Ɩzayi 49
49
A Sore tõ-tõ-bie (A yielu ayi sob)
1Nyɩ bɛrɛ wone a ɩ̃ ƴɛ̀rʋ,
nyɩɩm nɩ-bʋʋrɛ na zãá a,
nyɩ cɛlɛ be, nyɩɩm na kpɩɛr zi-zãána a.
Ɩ̃ tɩ cãà nɩ a ɩ̃ mã vʋr pʋɔ
ɛ́ a Sore bʋɔlɩ mɛ̃.
Ɩ̃ tɩ cãà nɩ a ɩ̃ mã puori,
ʋʋ bʋɔlɩ a ɩ̃ yúor.
2Ʋ ɩ na a ɩ̃ ƴɛ̀rʋ
ɩ zɛbr-sɔ-kpɛ̃ɛ na dɩrɛ a,
ʋʋ piw mɛ̃ tɛr nɩ a ʋ nũu.
Ʋ ɩ na ɩ̃ ɩ pĩi-nɔ-ɓɩlɓɩl,
ʋ sɔwlɩ mɛ̃ a ʋ lɔw pʋɔ.
3Ʋ yel mɛ̃ na:
«Ɩsɩrayɛl i, fʋ̃ʋ n'ɩ a ɩ̃ tõ-tõ-bie,
fʋ̃ʋ n'ʋ ɩ̃ na wul'ɩ a ɩ̃ vɩɛlʋ».
4Mãa ƴãw a, ɩ̃ tɩ yere na:
«Ɩ̃ bàl'ɩ ɩ̃ tʋɔra zawla,
ɩ̃ hanɩ na ɛ́ a wa ɩ zi-vuo,
ɛ́ a bɛ wa tɛr pɛr ɛ».
Zɩ̃ k'aa ʋlɩ bom nɛ ɩ̃ na sɛw taa nɩ a
tɩ gùre mɛ̃ nɩ a Sore zie,
a ɩ̃ maalʋ tɩ be n a ɩ̃ Naaŋmɩn zie.
5Ƴɛrɛŋa a, a Sore ƴɛ̀r'a,
ʋl na cɔbrɩ mɛ̃ a ɩ̃ mã puori
k'ɩ̃ɩ wa ɩ a ʋ tõ-tõ-bie a.
Ʋ bɔbr'a k'ɩ̃ɩ lɛb tɛr a Zakɔb bʋʋrɛ wa n a ʋ zie,
k'ɩ̃ɩ lɛb ɓã a Ɩsɩrayɛl nɩbɛ taa.
A lɛ pʋɔ a, ɩ̃ ɩ n nɩr a Sore zie,
ɛ́ a ɩ̃ fãw a, a ɩ̃ Naaŋmɩn n'ʋ.
6Ʋ yel mɛ̃ na: «Fʋ na ɩ a ɩ̃ tõ-tõ-bie
kɛ́ fʋ ɩ a Zakɔb dɔwlʋ a lɛb ìr a,
kɛ́ fʋ tɛr a Ɩsɩrayɛl nɩbɛ bɛl
na cãà vʋʋrɛ a lɛb wa n a,
a ɩ n pʋrɩ.
Ɩ̃ ɩ na fʋ ɩ a nɩ-bʋʋr-yoru cãà,
k'aa ɩ̃ faafʋ cen tɩ tɔ a tẽw baarʋ zie».
A Ɩsɩrayɛl bɛ na diw cen nɩ a lɛb-waa
7A Sore, a Ɩsɩrayɛl ya-diere,
a ʋ Naaŋmɩn na ɩ sõw a, ƴɛ̀rɛ na.
À ŋá n'a ʋ yere a fʋ zie,
fʋ̃ʋ a nɩbɛ na bɛ bʋɔlɛ nɩr a,
fʋ̃ʋ bɛ za na hɩ̃ɛn a,
fʋ̃ʋ na ɩ a na-po-to-dem gbãgbaa a:
«A na-mɩnɛ wa nyɛrɛ fʋ a,
bɛ na ìr'ɩ a bɛ dà-kɔwr zu.
A bɛlɩ dem na dɩ nɩ-kpɛ̃ɛnʋ a wa nyɛ b a,
bɛ na gũu nɩ a fʋ niŋé».
A na ɩ n à à ŋá a Sore ƴãw,
ʋl na ŋmɛ̃ ʋ ŋmɛ̃a a,
a Ɩsɩrayɛl Naaŋmɩn na ɩ sõw a ƴãw,
ʋl na kaa ír fʋ a.
8À ŋá n'a a Sore yere:
«A daar na wa ta a, ɩ̃ sɔw fʋ na.
A faafʋ bibir na wa vɩɛ a, ɩ̃ sõw fʋ na.
Ɩ̃ cɔbrɩ fʋ na k'ɩ̃ɩ ɩ fʋ ɩ
a wõ-taa bom mãa nɩ a ɩ̃ nɩbɛ cará.
Ɩ̃ na ɩ n a Ɩsɩrayɛl tẽw ʋ lɛb ìr,
ɩ̃ɩ lɛb põ a tẽw ŋa na sãw gã a ziir.
9Ɩ̃ yere nɩ a gaso pʋɔ dem,
a bɛlɩ dem na be a lige pʋɔ a:
“Nyɩ yi wa a cãà pʋɔ!”
Bɛ na nyɛrɛ nɩ dɩb a sɔ́r zu,
bɛ na tʋ̃ɔ́ na dɩrɛ a tãli za zu.
10Kɔ̃ nɩ kʋ̃ɔ-nyúur kʋ̃ lɛb kpɛ bɛ ɩ.
A wɛja-kpalɛ sɛsɛb-tʋlʋ nɩ a mʋ̃tɔ̃w
kʋ̃ lɛb dɩ bɛ ɩ.
Bʋ̃ʋ n'ʋ vɛ̃, ɩ̃ na tɛr bɛ na nɩ nɔ̃wfʋ
cen nɩ bul-nɛ́ɛ na ɩ ɓaar ɓaar a pɛr.
11Ɩ̃ na ɩ na a tan sɛ́ɛ za
lɩɛbɩ sɛ́ɛ na tɛr cenu a.
Ɩ̃ na lɛb'a maalɩ a sɛ́ɛ ƴãw.
12Bɛlɛ n'ɩ bɛ ŋan! Bɛ yi n zi-zãána waar:
bɛ mɩnɛ yi a saa-pɛrɩ́-gʋba-lowr,
bɛ mɩnɛ yi a mʋ̃tɔ̃w-kpɛb-lowr,
bɛ mɩnɛ yi a saa-pɛrɩ́-dʋrʋ-lowr,
a Eziptɩ tẽw.»
13Salom i, ŋmɩɛr nʋ̃ɔ̀ cɛlsɩ!
Ɛ́ fʋ̃ʋ, tẽw i, cɩlɛ!
Tan i, nyɩ cáarɛ nʋ̃ɔ̀ cáarʋ!
Bʋ̃ʋ n'ʋ vɛ̃, a Sore mɔwlɛ nɩ a ʋ nɩbɛ,
ʋ zɔrɛ nɩ a kpɩɛrʋ dem nɩbaalʋ.
Mãa bɛ yiire fʋ bɛrɛ ɩ
14A Sɩyɔ̃ tẽw tɩ yere na:
«A Sore zawrɩ mɛ̃ na bɛr,
a ɩ̃ zu-sob yiiri mɛ̃ na bɛr.»
15Ɛcɛ a Sore sɔwr'a:
Pɔw mɩ́ yiir'ɩ a bie ʋ na ƴɛnɛ a bɛr ɩ?
Ʋ mɩ́ yiir'a na tɛr nɔ̃wfʋ
a ʋ pʋɔ bʋ̃-dɔwra ƴãw ɩ?
Ʋlɛ saa na yiiri a,
mãa kʋ̃ yiiri fʋ bɛr towtow ɛ.
16Nyɛ̃, ɩ̃ wi fʋ na ƴãw a ɩ̃ nũsalɛ̃pʋʋr pʋɔ,
a fʋ dacĩ-bɛrɛ be n a ɩ̃ niŋé kʋralɛ.
17A bɛlɩ dem na na lɛb mɛ b a páwr'a waar,
ɛ́ a bɛlɩ dem na ŋmɛr fʋ bɛr ɛ́ sãw fʋ bɛr a,
cere kɛ́ bɛr fʋ.
18Jɩ́r a ziir za kaa nyɛ̃:
a fʋ bibiir za ɓanɛ nɩ taa,
bɛ waar'ɩ a fʋ zie.
A Sore yere na: Ɩ̃ taa bɛ wa vʋʋrɛ!
Alɛ bɛ ɩ lɛ, bɛ na ɩ na mɛ̃ pɩ̃ɛmɛ fʋ na ƴãw a,
mɛ̃ kpàwr pɔw na ƴãw nɩ yúor a na sɛ a.
19Fʋ be n deboru pʋɔ,
a fʋ ziir ŋmɛr ŋmɛr a,
a fʋ tẽw sãw na.
Ɛcɛ ʋ kʋ̃ yaa kɛ́ ɩ pʋrɩ zuo a ʋ nɩbɛ ƴãw ɛ,
ɛ́ a bɛlɩ dem na tɩ ɩrɛ kɛ́ fʋ ta cãà a,
na cen na zãá nɩ fʋ.
20A bibiir fʋ na bɛ tɩ cãà tɛr a
na lɛb'a ƴɛ̀rɛ à ŋá ƴãwn a fʋ tobe pʋɔ:
«A zie ɩ n fɩɩra zuo a ɩ̃ ƴãw.
Kʋ̀ m vuo ɩ̃ tʋ̃ɔ́ kpɩɛr a ka».
21Lɛ n'a fʋ na sowre fʋ tʋɔra:
«Ãa n'ʋ kʋ̀ m a bibiir bɛ ŋa za?
Ɩ̃ bɛ tɩ tɛr bibiir ɛ, ɛ́ kʋ̃ʋ tʋ̃ɔ́ bɛ dɔw ɛ.
Bɛ tɩ diw mɛ̃ nɩ a ɩ̃ tẽw pʋɔ cen nɩ,
bɛ tɩ zawrɩ mɛ̃ na bɛr.
A bɛ ŋa a, ãa n'ʋ guoli bɛ?
Ɩ̃ tɩ be n be ɩ̃ yõ,
ɛ́ a bɛl a, nyɩnɛ n'a bɛ tɩ be?»
22À ŋá n'a a Sore Naaŋmɩn yere:
«Ɩ̃ na kabr'ɩ a nɩ-bʋʋr-yoru,
ɩ̃ na zɛw nɩ a ɩ̃ bãwfʋ a bɛ ƴãw.
Bɛ na kɔ̃gbɔwlɩ nɩ a fʋ bidɛbr lɛb wa n,
ɛ́ dúori a fʋ pɔwyaar baw lɛb wa n.
23Na-mɩnɛ nɛbɛ na guole a fʋ bibiir,
ɛ́ na-mɩnɛ pɔwyaar ɩ a bɛ bɩyaalbɛ.
Bɛ na mɩ́ vɔblɩ muru a fʋ niŋé.
Bɛ na mɩ́ lɛnɩ nɩ a fʋ gbɛ́ɛ uuru.
Lɛ n'a fʋ na bãw kɛ́ mãa n'ɩ a Sore,
nɩ kɛ́ bɛlɩ dem na ƴãw a bɛ tɩɛrʋ a ɩ̃ ƴãw a
bɛ nyɛrɛ vĩ ɛ.»
24Bom gãdaa na zɛb de a,
bɛ na tʋ̃ɔ́ na lɛb de ʋ a ʋ zie e?
Bɛ na tʋ̃ɔ́ na faa gaso nɩr
na-po-tuo sob nuru pʋɔ ɔ?
25Ʋ̃ʋ, à ŋá n'a a Sore yere:
«Ɩ̃ na lɛb'a de a bom a gãdaa na zɛb de a,
ɩ̃ na faa nɩ a gaso nɩr
a na-po-tuo sob nuru pʋɔ!
Zerizalɛm i, mãa mɩŋa n'ʋ
na zɛb'ɩ a bɛlɩ dem na zɛbr'ɩ fʋ a,
mãa mɩŋa n'ʋ na faa a fʋ bibiir.
26Ɩ̃ na fɛr'ɩ a bɛlɩ dem na dɔwrɛ fʋ a
ƴãw bɛ 'wɔb a bɛl mɩŋa ƴã-gã-nɛn,
bɛ nyũ a bɛ zɩ̃ɩ kuoli,
mɛ̃ nɩr na mɩ́ nyũ divɛ̃-kɛr kuoli a.
Lɛ n'a bʋ̃-vʋʋra za na bãw
k'aa fʋ faarɛ a, mãa n'ʋ, a mãa Sore,
k'aa fʋ ya-diere a, a mãa Zakɔb Naaŋmɩn
na kpɛmɛ a n'ʋ.»
Currently Selected:
Ɩzayi 49: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
