Ɩzayi 5
5
A Sore divɛ̃ tɩɩr púo
1Nyɩ vɛ̃ ɩ̃ yieli yielu a ɩ̃ bá ƴãw. A ɩ̃ bá nɩ a ʋ divɛ̃ tɩɩr púo yielu n'ʋ.
A ɩ̃ bá tɩ tɛr'ɩ divɛ̃ tɩɩr púo
tãle na kpɛ pʋɔrʋ a zu.
2Ʋ tɩ buw nɩ a tẽsɔw,
tuuri a kʋsɛbɛ bɛr,
ɛ́ sɛl divɛ̃ tɩ-vɩɛlɩ bʋʋrɛ.
Ʋ tɩ mɛ n bʋ̃-gùre yir-cõcowla a púo sɔwlɩsɔw,
ɛ́ tuw bɔw a wɔmɛ nɛbrʋ ƴãw.
Ʋ tɩ gùre na k'aa ʋ divɛ̃ tɩɩr wa wɔ̃ wɔ̃-vɩɛlɩ,
ɛ́ a wa wɔ̃ wɔ̃-faar tɛwr.
3A ɩ̃ bá yere na:
«Ƴɛrɛŋa a, Zerizalɛm tẽw dem
nɩ Zuda nɩbɛ ɛ,
nyɩ dɩ a ƴɛ̀rʋ na be
mãa nɩ a ɩ̃ divɛ̃ tɩɩr púo cara pʋɔ a.
4Bʋ̃ʋ n'ʋ ɩ̃ nãá tʋ̃ɔ́ lɛb ɩ
a ɩ̃ divɛ̃ tɩɩr púo#5:4 Nyɛ̃ 3.14 nɩ a manʋ. ƴãw ɛ́ bɛ ɩ?
Ɩ̃ tɩ gùre nɩ wɔ̃-vɩɛlɩ a ʋ zie,
bʋ̃ʋ n'ʋ so ʋ wa wɔ̃ wɔ̃-faar?
5Ƴɛrɛŋa a, ɩ̃ na yel'ɩ ʋlɩ bom nɛ
ɩ̃ na na ɩ a ɩ̃ divɛ̃ tɩɩr púo a kʋ̀ nyɩ:
ɩ̃ na ír'ɩ a dàbáw bɛr
a dʋn 'wɔb a tɩɩr váar.
Ɩ̃ na dáa nɩ a dacin na viiri koli ʋ a lɔb,
a sɔr-tɔlbɛ nɛb ʋ.
6Ɩ̃ na ɩ na ʋ lɩɛbɩ kár:
nɩr bɛ ɓɛlɛ a wuli-ɓɛrmɛ bɛrɛ ɩ,
nɩr bɛ dɔrɛ ʋ ɛ.
Gɔ-tuwr'a na búle a be,
ɩ̃ɩ na yel'ɩ a zũzuwe
à ta ɩ saa wa ƴãw ʋ ɛ.»
7A Sore, a kpɛnʋ-za-sob, divɛ̃ tɩɩr púo
n'ɩ a Ɩsɩrayɛl yir dem,
ɛ́ a Zuda nɩbɛ n'ɩ
a divɛ̃ tɩɛ bʋʋrɛ ʋ na tɩ nɔnɛ a.
A Sore tɩ gùre nɩ a lɛ
na mɩ́ tu sɔ́r a, a bɛ zie,
ɛ́ a ziir za a wa ɩ yel
na bɛ mɩ́ tu a mɩnʋ a.
Ʋ tɩ gùre nɩ a mɩnʋ,
ɛ́ a ziir za a wa ɩ
nɩbɛ bɛ na dɔwrɛ a cɛlsɩ.
Baw-bio ayʋɔb kãw a Zuda tẽw nɩ-bɛrɛ ƴãw
(Kan-nɛ́ɛ 8-24: nyɛ̃ 10.1-4)
8Baw-bio páw nɩ a bɛlɩ dem
na mɩ́ tɛr yir ƴãw pʋɔ yir ƴãw a,
na mɩ́ de púo ƴãw pʋɔ púo ƴãw a,
ɛ́ mɩ́ tɛr tɩ faa a zie za
ɛ́ cɛ bɛ tɛwr kpɩɛr a tẽw a.
9A Sore, a kpɛnʋ-za-sob pɔb ŋa
lo n a ɩ̃ tobe pʋɔ:
«Yir-yaga, yir-bɛrɛ nɩ yir-vɩɛlɩ na lo na,
nɩr kʋ̃ cãà kpɩɛr a ɩ.
10Ɛtaar#5:10 Ɛtaar: Mɛtɩr kʋba tal'ʋ. ata divɛ̃ tɩɩr púo wɔmɛ divɛ̃
kʋ̃ mɩ́ ta litɩr lɩz'a ayi nɩ pie ɩ.
Ɛ́ nɩr wa bʋ̀r kilo#5:10 Kilo: A kilogɩram'ʋ bɛ pʋ̃ɔ bʋɔlɛ a kilo a ka. A kilogɩram been ɩ n gɩram túr. A kilo ɩ n tɩbrʋ bʋ̃-mána. kʋba ble a,
ʋ na cɛ n kilo pie tɛwr.»
11Baw-bio páw nɩ a bɛlɩ dem
na mɩ́ cɔ̃w ìr tu a dã-kpɛn pùor,
a zie mɩ́ tɩ libre,
ɛ́ bɛ nyúur a divɛ̃ a damnɛ bɛ a!
12A pɛ̀nɛ́ nɩ a korijom,
a gãgali nɩ a weli kon n'a
bɛ mɩ́ bɩɛlɛ nɩ a bɛ dã-nyũ.
Ɛcɛ bɛ bɛ mɩ́ nyɛ̃ a ʋlɩ bom nɛ
a Sore na ɩrɛ a ɩ,
bɛ bɛ mɩ́ jɩ́rɛ a ʋlɩ bom nɛ ʋ na maalɛ a ɩ.
13Alɛ n'a so a Sore yere:
«Bɛ na ír'ɩ a ɩ̃ nɩ-bʋʋrɛ a bɛ tẽw pʋɔ,
bɛ na bɛ sàw bãw bom a ƴãw.
A bɛ nɩ-yée na kpi n kɔ̃,
ɛ́ a zu-sɛbla kpi kʋ̃ɔ-nyúur.»
14Lɛ n'a a Kpɩmɛ-tẽw na yuo 'hee!
Ʋ na háa nɩ a ʋ nɔ-gbayala.
A nɩ-yée nɩ a zu-sɛbla na lãw na siw a be,
a bɛ cuw gɔmɛ pʋɔ.
15A na fɛr'a a nɩsaalbɛ za gũu zuru,
ɛ́ siwri bɛ tʋɔra,
a na fɛr'a a pɔ̀lʋ dem su zuru.
16A Sore, a kpɛnʋ-za-sob,
na dɩ n a ƴɛ̀rʋ wul ʋ na ɩ kpɛ̃ɛ a.
A Naaŋmɩn na ɩ sõw a na tu n a mɩnʋ,
wul a ʋ sonu.
17A tẽ-kpɛ̃ɛ debuo zu a,
píir na 'wɔbr'ɩ mʋ̃ɔ
mɛ̃ a mʋ̃ɔ 'wɔbrʋ ziir a a,
ɛ́ a bʋli, bɛ na guole k'aa 'wɔr a,
'wɔbr a mʋ̃ɔ a be.
18Baw-bio páw nɩ a bɛlɩ dem
a zir-ŋma mie na mɩ́ 'lẽ ƴãw
a bɛ sãwna ƴãw a.
Bɛ mɩ́ tawr'ɩ a bɛ yel-bier
mɛ̃ torko fʋ na tawr a.
19Bʋ̃ʋ n'ʋ vɛ̃, bɛ mɩ́ yere na:
«A Sore, ʋ ɩ fɔ̃w,
ʋ paw tõ a ʋ ton kɛ̀ tɩ nyɛ̃ ʋ!
A lɛ a Ɩsɩrayɛl Naaŋmɩn
na ɩ sõw a, na tɩɛrɩ bin a,
ʋ ta ɛ́ maalɩ, ɛ́ tɩ na bãw ʋ na!»
20Baw-bio páw nɩ a bɛlɩ dem
na mɩ́ bʋɔlɛ a faa vla,
ɛ́ bʋɔlɛ a vla faa a.
Bɛ mɩ́ de nɩ a lige bʋɔlɛ cãà
ɛ́ de a cãà bʋɔlɛ lige.
Bɛ mɩ́ de nɩ a bʋ̃-nʋ̃ɔ̀ bʋɔlɛ bʋ̃-tuo,
ɛ́ de a bʋ̃-tuo bʋɔlɛ bʋ̃-nʋ̃ɔ̀.
21Baw-bio páw nɩ a bɛlɩ dem
na mɩ́ de bɛ tʋɔra bʋɔlɛ yã-bãwnbɛ,
ɛ́ tɩ́ɛrɛ kɛ́ bɛ tɛr'ɩ yã a!
22Baw-bio páw nɩ a bɛlɩ dem
na ɩ dã-nyũ-karɩ,
ɛ́ kpɛmɛ yaga mɩ́ nyàw a dã-kpɛn taa a!
23Bɛ mɩ́ lɛb'a bɛr a sãwna sob,
nʋɔr ʋ na ŋmɛ bɛ a ƴãw,
ɛ́ zawrɩ na kʋ̀ a nɩr na bɛ tɛr sãwna a a ʋ yel-mɩŋa.
24Alɛ so bɛ na ɩ mɛ̃ mʋ̃ɔ vũu na dɩ a,
bɩɩ mɛ̃ a mɔ̃-kon na bɔr vũu-zɛlɛ pʋɔ a.
A nyɩgɛ ƴãw n'a bɛ na tĩ pʋ̃ɔ́,
ɛ́ a bɛ puuru lɩɛbɩ uuru ìr do.
Bʋ̃ʋ n'ʋ vɛ̃, bɛ zawr'ɩ
a Sore, a kpɛnʋ-za-sob, wulu bɛr,
bɛ bɛ ŋmɛlɩ kaa a Ɩsɩrayɛl Naaŋmɩn
na ɩ sõw a ƴɛ̀rʋ ɛ.
A Sore suur a ʋ nɩ-bʋʋrɛ ƴãw
(Kan-nɛ́ɛ 25: nyɛ̃ 9.7-20)
25Alɛ n'a so a Sore suur ìr
a ʋ nɩ-bʋʋrɛ ƴãw.
Ʋ̀ zɛw nɩ a nũu ŋmɛ n bɛ.
A tan gbiwri na,
a kũuni gã nɩ a sɛ́ɛ pʋɔ mɛ̃ sagɛ a.
Ɛcɛ a na saa ɩ à ŋá a,
a Sore suur bɛ ɓãa ɩ,
ɛ́ a ʋ nũu cãà zɛw.
26A Sore zɛwr'ɩ dɩrapo
nɩ-bʋʋrɛ na zãá#5:26 Nɩ-bʋʋrɛ na zãá a: A Asiiri tẽw dem na bɔbr kɛ́ bɛ wa zɛb de a Zuda naalʋ-tẽw a nɛbɛ. a ƴãw,
ʋ fuole na bʋɔlɛ bɛ a tẽw baarʋ zie.
Bɛlɛ n'ɩ bɛ ŋa na páwr a,
bɛ tarɛ nɩ fɔ̃w fɔ̃wlɛ.
27Nɩr kãw za bɛ bàl a bɛ pʋɔ ɩ,
kãw za bɛ cere titibr ɛ,
kãw za bɛ gúre sʋ̃ɔ-gʋ̃ɔ ɩ,
kãw za bɛ gúr ɛ.
Kãw za bɛ fór a ʋ kpàwr ɛ,
kãw za nafawr bʋ̃-'leni bɛ cɛ̀r ɛ.
28A bɛ pime kàr'a,
a bɛ tamɛ za dúor'a.
A bɛ wie nafɩlɛ kpɛmɛ na
mɛ̃ kʋsɛ-cɩlsɩ a,
ɛ́ a bɛ zɛbr-torkori gbɛ́ɛ
lɩɛbɛ mɛ̃ sɛsɛb-pɩl a.
29Bɛ ùore na mɛ̃ gben a,
bɛ kone na mɛ̃ gbẽw-bili a.
Bɛ kone na mɛ̃ wɛ-dʋn
na sɛ̀m bom a na nyɔw a, cere nɩ
ɛ́ nɩr kʋ̃ tʋ̃ɔ́ faa ʋ a zie a.
30Ɛcɛ bibir kãw a,
a saa na tanɩ nɩ a nɩ-bʋʋrɛ bɛ ŋa ƴãw,
mɛ̃ a lɛ a saa-sɛsɛb na mɩ́ wa cɛ̀r
a kʋ̃ɔ-kpɛ̃ɛ ɩrɛ gɔmɛ a.
Bɛ na mɩ́ jɩ́r'ɩ a tẽw,
ɛcɛ lige nɩ kpɩɛrʋ n'a na pili pàw ʋ.
Zũzu-sɛblɛ na ɩ na a bibir liw.
Currently Selected:
Ɩzayi 5: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
