Ɩzayi 6
6
A Ɩzayi a Naaŋmɩn na bʋɔlɩ a
1A nãà Ozɩasɩ kũu yũon#6:1 Sɛbr a mɩnɛ pʋɔ a, bɛ mɩ̀ bʋɔlɛ nɩ a nãà Ozɩasɩ kɛ́ Azarɩasɩ. A tɩ ɩ n a Yeezu Kɩrɩta na bɛ wa sɛr a yome 740. Nyɛ̃ 2Na 15.7. , ɩ̃ tɩ nyɛ̃ nɩ a Sore ʋ zɩ̃ naalʋ-dà-kɔw na kɛrɩ yaga za a zu. A ʋ kpar-kpɛ̃ɛ pɛr na mɩ́ vure a tẽw a pùorí a tɩ paal'ɩ a Ŋmɩn-yir-kpɛ̃ɛ. 2Malkɩ mɩnɛ bɛ na bʋɔlɛ serafɛ̃ mɩnɛ a tɩ àr'ɩ a ʋ zu-sɔw. Ŋa za tɩ tɛr'ɩ pɩgɛ ayʋɔb: ayi a niwn pàwfʋ ƴãw, ayi a ƴã-gan pàwfʋ ƴãw ɛ́ ayi a ƴawfʋ ƴãw. 3Bɛ tɩ cɩɩrɛ na yere kʋ̀rɛ taa:
«Sõw, sõw, sõw,
a Sore, a kpɛnʋ-za-sob!
A ʋ yúor-vɩɛlʋ-danʋ
paal'ɩ a tẽw za!»
4A bɛ kɔkɛɛ tɩ ɩ na a dɩ̃dɛɛ dàar a màwr, ɛ́ zʋ̀ʋ́r tɩ paalɛ a Ŋmɩn-yir-kpɛ̃ɛ. 5Lɛ n'a ɩ̃ tɩ yel: «Baw-bio páw mɛ̃ na! Ɩ̃ kpi na! Bʋ̃ʋ n'ʋ vɛ̃, nɩr a nʋɔr na tɛr dɛwr a nɛ m, ɩ̃ɩ kpɩɛr nɩ-bʋʋrɛ a nɛ́ɛ na tɛr dɛwr a sɔgɔ, ɛ́ a ɩ̃ mimie nyɛ̃ a Nãà, a Sore, a kpɛnʋ-za-sob!»
6Ɛcɛ a malkɩ mɩnɛ bɛ na bʋɔlɛ serafɛ̃ mɩnɛ a ƴen sob tɩ ƴaw na waar a ɩ̃ zie, tɛr vũu-bir ʋ na tɩ ír'ɩ caba a bàwr-maal-kuur zu a. 7Ʋ tɩ tɔ n nɩ a ɩ̃ nʋɔr ɛ́ yel à ŋá:
«A bom ŋa na dɛ tɔ a fʋ nɔgbãbie a,
bɛ de nɩ a fʋ sãwna bɛr a baarɩ,
bɛ dɩ n a fʋ yel-bier suur kʋ̀ b.»
8Lɛ n'a ɩ̃ tɩ wõ a Sore ʋ sowre: «Ãa n'ʋ ɩ̃ na tõ? Ãa n'ʋ na cen a tɩ yúor ƴãw?» Ɩ̃ sɔw: «Mãa n'ɩ ŋan, tõ m!»
9A Sore yel mɛ̃:
«Cen tɩ yel a nɩ-bʋʋrɛ bɛ ŋa:
“Nyɩmɛ saa nɔnɛ nyɩɩm bɛrɛ wone,
ɛ́ nyɩ kʋ̃ bãw a pɛr ɛ.
Nyɩmɛ saa nɔnɛ nyɩɩm jɩ́rɛ,
ɛ́ nyɩ kʋ̃ nyɛ̃ bom ɛ.”
10Ɩ a nɩ-bʋʋrɛ bɛ ŋa socie a kpawlɩ,
ɩ a bɛ tobe a wõw, ɛ́ a bɛ mimie zɔ̃w.
Ta sàw a bɛ mimie nyɛrɛ ɩ,
a bɛ tobe wone ɩ,
a bɛ socie bãw a pɛr ɛ.
Bɛ ta tʋ̃ɔ́ lɩɛbɩ a bɛ ɩb, ɛ́ sanɩ ɛ.»
11Lɛ n'a ɩ̃ tɩ sowri: «Tɩ ta debor daar, Sore e?» Ʋ sɔw: «Tɩ ta a lɛn daar a tẽ-bɛrɛ na na sãw gã nɩbɛ bɛ cãà kpɩɛr a, a yie gã zawlɛ nɩsaalɛ za bɛ cãà nyùur a, ɛ́ a tẽsɔw sãw ʋ za a ɩ kpɩɛrʋ a.»
12A Sore na ɩ na a tẽw dem
cen zãá nɩ a bɛ tẽw.
Tẽsɔwr bɛ na bɛr a na gã nɩ yaga.
13Ɛ́ a nɩbɛ ziir pie sob
wa cãà cɛ be a tẽw pʋɔ a,
vũu na dɩ bɛ na
mɛ̃ a lɛ bɛ na mɩ́ nyɩw
sɛn tɩɛ nɩ terebɛ̃tɩ tɩɛ bɛ na cɛ lɔb a.
A tɩ-pɛ-kpur'ʋ na cɛ́.
Ɛcɛ a tɩ-pɛ-kpur ŋa ɩ n bʋ̃-bʋʋr-sõw.
Currently Selected:
Ɩzayi 6: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
