Ɩzayi 48
48
A Sore yere nɩ yel-paalɛ na na ɩ a
1Nyɩ bɛrɛ wone, Zakɔb nɩ-bʋʋrɛ ɛ,
nyɩɩm bɛ na bʋɔlɛ nɩ a Ɩsɩrayɛl yúor
ɛ́ nyɩ ɩ a Zuda bʋʋrɛ a.
Nyɩ mɩ́ pɔ n nɩ a Sore yúor
ɛ́ ƴɛ̀rɛ a Ɩsɩrayɛl Naaŋmɩn ɩ-ɩrɩ ƴɛ̀rʋ,
ɛcɛ a bɛ mɩ́ tu a yel-mɩŋa nɩ a mɩnʋ ɛ.
2Nyɩɩm bɛ na bʋɔlɛ
“Tẽ-kpɛ̃ɛ-sõw nɩbɛ” a,
nyɩɩm na de a Ɩsɩrayɛl Naaŋmɩn
ʋ ɩ a nyɩ tɩ̀ɛrɛ a,
ʋl a yúor na dɩ kɛ́
“A Sore, a kpɛnʋ-za-sob” a,
nyɩ bɛrɛ wone:
3Koro za n'a ɩ̃ yel a yele na ɩ tɔl a.
Ɩ̃ tɩ yel'a k'ɩ̃ɩ na ɩ a na,
ɩ̃ tɩ ɩ na nyɩ bãwnɩ a.
Ɩ̃ wa ùr'a tõ, ɛ́ a ta.
4Ɩ̃ bãw nyɩ na nyɩ ɩ nɩ-bʋʋr-gaarɩ.
Nyɩ bɛ wone ƴɛ̀rʋ ɛ,
ɛ́ a nyɩ zuru kpɛmɛ.
5Alɛ n'a so ɩ̃ yel
a yele á ŋá kʋ̀ nyɩ koro kãw za.
A bɛ tɩ ta sɛr ɛ, ɩ̃ɩ ɩ nyɩ bãwnɩ a.
Ɩ̃ bɛ tɩ bɔbr kɛ́ nyɩ wa yere:
“A ɩ̃ tɩɩb tome n'a,
a ɩ̃ dàa bɩɩ a ɩ̃ kur-zɩɛ ŋmɩn n'ʋ yel a lɛ” ɩ.
6Nyɩ wõ n a ʋlɩ bom nɛ ɩ̃ na tɩ yel a,
ɛ́ nyɩ nyɛ̃ na k'ʋʋ maal'a.
Nyɩ mɩ̀ kʋ̃ nyɛ̃ ʋ bãw ɛ?
A na tĩ a ƴɛrɛŋa a,
ɩ̃ yere nɩ yel-paalɛ na na ɩ a.
Ɩ̃ bɛr a nɩ sɛr ɛ́ nyɩ bɛ bãw a ɩ.
7Yel-kore bɛ n'a ɩ, ƴɛrɛŋa n'a ɩ̃ ír a.
Wa tɩ tɔ a dɩ̃a a,
nyɩ bɛ dãw wõ bɛ ƴɛ̀r a ƴɛ̀rʋ ɛ.
Ɩ̃ bɛ tɩ bɔbr kɛ́ nyɩ yere:
“Tɩ tɩ bãwnɩ a na” ɩ.
8Nyɩ bɛ bɛr wõ ɩ, nyɩ bɛ bãw bom ɛ,
koro za n'a nyɩ bɛ cɛlɛ be ɩ.
Ɩ̃ bãw nyɩ na nyɩ ɩ mɩlmɩlbɛ,
ɛ́ bɛ bʋɔlɛ nyɩ
“nɩbɛ na gaarɩ a bɛ dɔwfʋ daar za a”
9A ɩ̃ yúor zũú n'a ɩ̃ nyɔwr a ɩ̃ suur.
A danʋ a na sɛw kɛ́ nyɩ danɛ mɛ̃ a ƴãw n'a
ɩ̃ kʋ̃ bɛr nyɩ bɛ kʋ nyɩ pàw pɛr ɛ.
10Ɩ̃ ɩ na nyɩ lɛb vɩɛl,
ɛ́ a bɛ ɩ a vũu na mɩ́ ɩ a salm-pla
ʋ vɩɛl a pʋɔ n'a ɩ,
kpɩɛrʋ vũu pʋɔ n'a.
11Mãa wa ɩ à à ŋá a,
mãa yõ tẽtẽ ƴãw n'a.
Bʋ̃ʋ n'ʋ vɛ̃, ɩ̃ kʋ̃ tʋ̃ɔ́ sàw a ɩ̃ yúor sãw ɛ.
Ɩ̃ bɛ bɛrɛ a ɩ̃ yúor-vɩɛlʋ-danʋ kʋ̀rɛ nɩ-yũo ɩ.
A Sore tone nɩ a nãà Siirisɩ
12A Sore yere na: Nyɩ bɛrɛ wone mɛ̃,
Zakɔb nɩ-bʋʋrɛ ɛ,
nyɩɩm Ɩsɩrayɛl nɩbɛ ɩ̃ na bʋɔlɩ a.
Mãa n'ʋ! Mãa n'ɩ a niw-diere,
mãa mɩ̀ n'ɩ a po-pàwrɛ.
13A ɩ̃ nuru n'a ɩ̃ bin nɩ a tẽw pɛr
ɛ́ dɔl a salom.
Mãa wa bʋɔlɛ a wa báarɛ a,
a mɩ́ ta n daadaalɛ àr.
14Nyɩ ɓã taa nyɩ za bɛr wõ:
Ɩ̃ tɛr'ɩ bá#48:14 A Pɛrsɩ tẽw nãà Siirisɩ n'ʋ bɛ yere. Nyɛ̃ 41.2 nɩ a manʋ. na na maalɩ
a lɛ ɩ̃ na bɔbr a Babɩlɔn tẽw ƴãw,
ɛ́ ɩ a Babɩlɔn tẽw dem bãw k'ɩ̃ɩ tɛr'ɩ kpɛnʋ a.
Ɛcɛ a nyɩ buor'ʋ yel a yel ŋa?
15Mãa n'ʋ, mãa yõ n'ʋ ƴɛ̀r.
Mɔ̃ mɩ̀, ɩ̃ bʋɔl'ɩ a nɩr ŋa,
ɩ̃ ƴãw na ʋ wa,
ɛ́ a ʋ ton na tõ n vla.
16Nyɩ taw pɩɛlɩ mɛ̃ bɛr wõ:
a pɛr-tib daar za a,
ɩ̃ bɛ dãw sɔwlɩ ƴɛ̀r ɛ.
A daar ʋl a yele á ŋá na ɩ a,
ɩ̃ tɩ be n be.
— Ɛ́ ƴɛrɛŋa a,
a Sore Naaŋmɩn n'ʋ tone mɛ̃
ɛ́ kʋ̀rɛ mɛ̃ a ʋ Vʋʋrʋ.
Fʋ̃ʋ tɩ ɩ mɛ̃ fʋ bɛr'a wõ m a!
17À ŋá n'a a Sore na yarɛ dier fʋ a,
a Ɩsɩrayɛl Naaŋmɩn na ɩ sõw a ƴɛ̀rɛ:
«Mãa n'ɩ a Sore fʋ Naaŋmɩn.
Mãa n'ʋ wule fʋ a ʋlɩ bom nɛ
na na tʋ̃ɔ́ wɩ̀ɛ fʋ a.
Mãa n'ʋ tɛr fʋ cere nɩ a sɔ́r fʋ na lo a zu.
18Fʋ̃ʋ tɩ ɩ mɛ̃ fʋ cɛlɩ nɩ a ɩ̃ nɛ-ƴãwnɩ zie a,
a fʋ ƴã-ɓaarʋ nãà ɩ na mɛ̃ man a,
ɛ́ a fʋ mɩnʋ ɩ mɛ̃ a kʋ̃ɔ-kpɛ̃ɛ kʋ̃ɔ-mie a!
19A fʋ bʋʋrɛ nãà yãwmɛ na
mɛ̃ a kʋ̃ɔ-kpɛ̃ɛ nʋɔr biir-bie a.
A bɛ yúor bɛ be za nãà bɔr a ɩ̃ niŋé ɩ!»
Nyɩ yi zaa a Babɩlɔn tẽw pʋɔ
20Nyɩ yi a Babɩlɔn tẽw pʋɔ,
nyɩ yi a tẽw ŋa pʋɔ zɔ.
Nyɩ ŋmɩɛr nʋ̃ɔ̀ cɛlsɩ yere nɩ a yel ŋa,
nyɩ ɩ bɛ wõ ʋ,
nyɩ ŋmɛ ʋ yaarɩ tɩ tɔ a tẽw baarʋ zie.
Nyɩ yel: «A Sore ya na de a ʋ tõ-tõ-bie Zakɔb!»
21Kʋ̃ɔ-nyúur bɛ kpɛ a ʋ nɩbɛ
a wɛja-kpalɛ pʋɔ ʋ na tɩ tɛr bɛ cere nɩ a ɩ.
Ʋ tɩ ɩ na kʋ̃ɔ tɛ yi pìir pʋɔ a bɛ ƴãw,
ʋ tɩ ɓar'ɩ a pìir, ɛ́ a kʋ̃ɔ gbɔlɛ.
22Ɛcɛ a Sore yere na kɛ́ ƴã-ɓaarʋ
bɛ ka a nɩ-faar ƴãw ɛ.
Currently Selected:
Ɩzayi 48: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
