Ɩzayi 42
42
A Sore tõ-tõ-bie (yiel-dãw-niwn sob)
1A Sore yere na:
Nyɛ̃ a ɩ̃ tõ-tõ-bie ɩ̃ na tɩ̀ɛ a,
a ɩ̃ nɩ-kaa-íra na pɛlɩ a ɩ̃ pʋɔ a.
Ɩ̃ ƴãw nɩ a ɩ̃ Vʋʋrʋ a ʋ zu,
k'ʋʋ ɩ a nɩ-bʋʋrɛ bãw a lɛ-na-tu-sɔr-a.
2Ʋ bɛ cɩɩrɛ ɩ, bɛ ƴɛ̀rɛ kpɛ̃w kpɛ̃w za ɩ,
nɩr bɛ wone a ʋ kɔkɔr a sɔ́r zu ɛ.
3Ʋ bɛ kàrɛ a mur na gbɩɛlɩ a bɛrɛ ɩ,
ʋ bɛ kpiire a vũu
na 'lere kpɩ̃ɩkpɩ̃ɩ a bɛrɛ ɩ.
Ɛcɛ ʋ sɩrɩ na ɩrɛ bɛ bãwnɛ a lɛ-na-tu-sɔr-a.
4Ʋ bɛ bàlɛ ɩ, ʋ bɛ tɩ̀ɛrɛ bɛrɛ ɩ,
ɛ́ gù ʋ wa tɩ bin a lɛ-na-tu-sɔr-a, a tẽw zu,
ɛ́ a nɩ-bʋʋrɛ na zãá a gùre a ʋ wulu.
A tẽ-daa nɩbɛ cãà
5A Naaŋmɩn, a Sore,
na ír a salom nɩ a ʋ yɛ̀lʋ za a,
na yɛ́r a tẽsɔw nɩ a ʋ bʋ̃-buli a,
na kʋ̀ a nyɔ-vʋʋrʋ
a nɩ-bʋʋrɛ na kpɩɛr a ʋ zu a,
nɩ a vʋʋrʋ a bɛlɩ dem na dɛnɛ a ʋ zu a,
ƴɛ̀rɛ nɩ à ŋá a ʋ tõ-tõ-bie zie:
6«A mãa, a Sore, ɩ̃ bʋɔlɩ fʋ na
mɛ̃ a lɛ-na-tu-sɔr-a,
ɩ̃ nyɔw fʋ nɩ nũú, ɩ̃ mɛ b'a,
ɛ́ ƴãw kɛ́ fʋ wa ɩ
mãa nɩ a ɩ̃ nɩbɛ wõ-taa,
kɛ́ fʋ wa ɩ a tẽ-daa nɩbɛ cãà.
7Fʋ na ɩ n a zɔn bɛ lɛb nyɛrɛ,
fʋ na ír'ɩ a nɩ-pàwrɩ a bɛ gaso pʋɔ,
fʋ na ɩ n a bɛlɩ dem
na kpɩɛr a lige pʋɔ a,
bɛ yi a bɛ di-pàwrɩ pʋɔ.»
8Mãa n'ɩ a Sore, a ɩ̃ yúor'ɩ lɛ.
Ɩ̃ bɛ kʋ̀rɛ a ɩ̃ yúor-vɩɛlʋ-danʋ nɩ-yũo ɩ.
Ɩ̃ bɛ bɛrɛ a danʋ ɩ̃ na so a kʋ̀rɛ tɩbɛ ɩ.
9A yel-dãw-niwn maal'a tɔl.
Ƴɛrɛŋa a, yel-paalɛ n'a ɩ̃ de niwn yere.
A bɛ ta sɛr ɛ, ɩ̃ɩ ɩrɛ kɛ́ nyɩ bãw a.
A tẽ-daa za, ʋ danɛ a Sore
10Nyɩ yieli yiel-paala a Sore ƴãw.
Nyɩ danɛ ʋ a tẽw baarʋ zie,
nyɩɩm na duwre a kʋ̃ɔ-kpɛ̃ɛ zu a,
nɩ bom za na paalɩ ʋ a,
nɩ nyɩɩm, nɩ-bʋʋrɛ na zãá a.
11A nɩbɛ, bɛ cɛ yielu
a wɛja-kpalɛ tẽ-bɛrɛ pʋɔ,
a Kedaar#42:11 Kedaar: Nyɛ̃ 21.16 nɩ a manʋ. Pìir: Ʋ na ɩ n a Petra tẽ-kpɛ̃ɛ bɛ na cɔbrɩ ʋ kpɛmɛ a zɛbr ƴãw, ɛ́ be a Edɔm tẽw wɛja-kpalɛ pʋɔ a. laɩ pʋɔ!
A nɩbɛ na kpɩɛr a Pìir zu a,
bɛ lɔbr nʋ̃ɔ̀ cɛlsɩ,
bɛ cáarɛ a tan zu!
12A nɩ-bʋʋrɛ na zãá a,
bɛ manɛ a Sore yúor-vɩɛlʋ-danʋ,
bɛ yiele kpɛ̃w kpɛ̃w za danɛ nɩ ʋ!
13A Sore waar'a mɛ̃ soja-gãdaa a,
mɛ̃ zɛbr-nɩr na tʋlɛ a zɛbr ƴãw a.
Ʋ ŋmɩɛr'ɩ a zɛbr cɛl, ʋ ɩrɛ nɩ gɔmɛ,
ʋ ɩrɛ nɩ gãda-ɩb a ʋ dɔ̃ dem zie.
A Sore na ɩ n a lɛ ʋ na tɩɛrɩ a
14A Sore yere na:
Koro za n'a ɩ̃ ɩ a gbili,
ɩ̃ bɛ tɩ ƴɛ̀rɛ ƴɛ̀rʋ ɛ,
ɩ̃ tɩ nyɔw nɩ ɩ̃ tʋɔra.
Ƴɛrɛŋa a, ɩ̃ na cɩɩrɛ na.
Ɩ̃ kone na, ɩ̃ vʋʋrɛ na guur,
ɩ̃ vʋʋrɛ na zarɛ
mɛ̃ pɔw a dɔwfʋ na ta a.
15Ɩ̃ na sãw nɩ a tã-bɛrɛ nɩ a tãli bɛr,
ɛ́ ɩ a bʋ̃-buli za a ko a be.
Ɩ̃ na ɩ n a mamɛ lɩɛbɩ tẽsɔw-kpɛ̃w,
ɛ́ ɩ a gbãtaɩ kʋ̃ɔ a sɩr.
16Ɩ̃ na tɛr'ɩ a zɔn
tu n sɔ́r bɛ na bɛ bãw a,
ɩ̃ na ɩ na bɛ cere
soli bɛ na bɛ bãw a zu.
Ɩ̃ na ɩ na a lige lɩɛbɩ cãà a bɛ niŋé,
ɛ́ a zi-gbegbegegbege
ɩ tẽsɔw na man taa a.
A ɩ̃ tɩɛrʋ n'ɩ à ŋà,
ɩ̃ na maal'ʋ na, ɩ̃ bɛ bɛrɛ ʋ ɛ.
17A bɛlɩ dem na mɩ́ ƴãw
a bɛ tɩɛrʋ a tɩbɛ ƴãw
ɛ́ yere a tɩbɛ dasuli:
«Nyɩmɛ n'ɩ a tɩ ŋmɩmɛ» a,
bɛ tɩ̃wnɩ nɩ pùor ɛ́ vĩ nyɔw bɛ.
Nɩ-bʋʋrɛ na zɔ̃w ɛ́ wõw a
18Nyɩɩm won i, nyɩ bɛrɛ wone!
Nyɩɩm zɔn i, nyɩ jɩ́r nyɛ̃!
19Ãa n'ʋ ɩ zɔ̃w a bɛ ɩ a ɩ̃ tõ-tõ-bie?
Ɛ́ ãa n'ʋ ɩ wõw mɛ̃ a nɩ-tona ɩ̃ na tone a?
— Sɩza, ãa n'ʋ ɩ zɔ̃w mɛ̃ a Sore nɩ-bʋʋrɛ a?
Ãa n'ʋ ɩ wõw mɛ̃ a Sore tõ-tõ-bie a?
20Nyɩɩm, Ɩsɩrayɛl nɩbɛ ɛ,
nyɩ nyɛ̃ nɩ yel-yaga ɛ́ bɛ cɛlɩ be ɩ.
Nyɩ yuo nɩ a tobe, ɛ́ bɛ wõ bom za ɩ.
21A Sore mɩnʋ zũú,
ʋ nɔ̃w na ɩ a ʋ wulu ʋ ɩ kpɛ̃ɛ ɛ́ vɩɛl vɩɛl.
22Ɛcɛ nyɩɩm n'ɩ bɛ ŋa ɩ nɩ-bʋʋrɛ
bɛ na za ɛ́ fa a bome za a.
Bɛ nyɔw nyɩ na pàw bɔw-bɛrɛ pʋɔ,
nyɩ zɩ̃ n gasori pʋɔ.
A dɔ̃ dem nyɔw nyɩ na
mɛ̃ zɛbr bome bɛ na zɛb de a,
ɛ́ nɩr za bɛ wa faa nyɩ ɛ.
Bɛ tɛr nyɩ na cen nɩ,
ɛ́ nɩr za bɛ yel:
«Nyɩ lɛb bɛr bɛ kʋ̀ m» ɛ!
23Ãa n'ʋ na cɛlɛ be a nyɩ pʋɔ?
Ãa n'ʋ na bɛrɛ wone?
Ãa n'ʋ na wõ a ƴɛrɛŋa?
24— Ãa n'ʋ bɛr a Ɩsɩrayɛl,
a Zakɔb nɩbɛ kʋ̀
a bɛlɩ dem na fa a bɛ bome a za a,
a bɛlɩ dem na za bɛ a?
A Sore tɩ na ɩ sãw a bɛ n'ʋ ɛ?
A ʋ nɩ-bʋʋrɛ bɛ sàw tu a ʋ sɔ́r ɛ,
bɛ bɛ sàw bɛr wõ a ʋ wulu ɛ.
25Alɛ so a Sore ɩ
a ʋ su-tʋlʋ kpãkpã ìr a bɛ ƴãw,
ʋ ɩ bɛ nyɛ̃ a zɛbr faalʋ.
A zɛbr ƴãw nɩ vũu jil koli bɛ,
ɛ́ bɛ bɛ bãw a pɛr ɛ.
A vũu tɛr'a tɩ dɩ bɛ,
ɛ́ bɛ tobr bɛ ka be ɩ.
Currently Selected:
Ɩzayi 42: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
