Ɩzayi 40
40
ZIIR AYI SOB
A ƖSƖRAYƐL MƆWLƲ
40—55
Nyɩ mɔwlɩ a ɩ̃ nɩ-bʋʋrɛ
1Nyɩ mɔwlɩ, nyɩ mɔwlɩ a ɩ̃ nɩ-bʋʋrɛ,
a nyɩ Naaŋmɩn n'ʋ yere.
2Nyɩ ƴɛ̀r a ɓãa a Zerizalɛm socir.
Nyɩ zɛw kɔkɔr yel ʋ
k'aa ʋ pɔ̃tɔrɩ tome baar'a,
k'ʋʋ ya n a ʋ sãwna san baarɩ.
Bʋ̃ʋ n'ʋ vɛ̃, a Sore ƴãw na
ʋ ya a ʋ yel-bebe za san gb'a ayi.
3Kɔkɔr kãw cɩɩrɛ na yere:
«Nyɩ puo sɔ́r a wɛja-kpalɛ pʋɔ a Sore ƴãw.
Nyɩ maalɩ sɔ́r a zi-kõw ŋa pʋɔ ʋ vɩɛl
a tɩ Naaŋmɩn ƴãw#40:3 Nyɛ̃ Mark 1.3..
4Fʋɔla za, ʋ paalɩ tanɛ do,
tã-kpɛ̃ɛ za nɩ tãle za, a tuw siw man.
A gbĩgbin, ʋ lɩɛbɩ zie na man taa a,
ɛ́ a zi-kɛrɩ lɩɛbɩ fʋɔl-yɛlsɩ!
5Lɛ n'a a Sore yúor-vɩɛlʋ-danʋ na sãá,
ɛ́ a nɩbɛ za na nyɛ̃ ʋ na.
À à ŋá n'a a Sore yel.»
6Kɔkɔr yere nɩ a ɩ̃ zie: «Cɩɩrɩ yel!»
Ɩ̃ sowri: «Bʋ̃ʋ n'ʋ ɩ̃ na cɩɩrɩ yel?»
Ʋ sɔw: «Bom ŋa n'ʋ:
A nɩsaalbɛ ɩ na mɛ̃ mʋ̃ɔ a,
bɛ bɛ kpɛmɛ zuo a póru va-puuru ɛ.
7A mʋ̃ɔ mɩ́ ko na, a va-puuru mɩ́ var'a,
a Sore sɛsɛb wa fu ŋmɛ a a.
— Sɩza n'a, a nɩsaalbɛ bɛ tɛr tʋɔr mɛ̃ a mʋ̃ɔ a ɩ—.
8A mʋ̃ɔ mɩ́ ko na ɛ́ a va-puuru vàr,
ɛcɛ a Sore tɩ Naaŋmɩn ƴɛ̀rʋ
na be n be kʋralɛ.»
Yel-nʋ̃ɔ̀ na ɩ bʋ̃-yera a
9Zerizalɛm i, do tãw na kɛrɩ a zu,
Sɩyɔ̃ i, cɩɩrɛ nɩ a fʋ fãw za.
Fʋ̃ʋ na waar'ɩ yel-nʋ̃ɔ̀ a,
zɛw a kɔkɔr, ta zɔrɛ dɛ̃bɩ̃ɛ ɩ.
Yel a Zuda tẽw tẽ-bɛrɛ:
«Nyɩ nyɛ̃ a nyɩ Naaŋmɩn!
10Nyɩ nyɛ̃ a Sore Naaŋmɩn.
Ʋ waar'ɩ nɩ kpɛnʋ,
ʋ tɛr'ɩ fãw na dɩ a naalʋ.
Ʋ lɛb'a waar'ɩ a bom ʋ na páw a,
ʋ lɛb'a waar'ɩ a ʋ tome sã-ya#40:10 A Zifʋ mɩnɛ bɛ na diw cen nɩ a Babɩlɔn a, lɛb-waa ƴɛ̀rʋ n'a a naaŋmɩn-ƴɛ̀r-manɛ ƴɛ̀rɛ: a Naaŋmɩn zie n'a a na yi..
11Ʋ àrɛ nɩ nɩ a ʋ dʋn mɛ̃ pi-cɩ̃ɩnɛ a,
ʋ mɩ́ zɛw nɩ a nũu kpa a ɓã taa,
ʋ mɩ́ nyɔw nɩ a péli ɓori ɓori
ɛ́ kparɛ a pi-mã mɩnɛ bɛ̀lbɛ̀l.»
Naaŋmɩn gãw nɩ bom za
12Ãa n'ʋ manɩ a kʋ̃ɔ-kpɛ̃ɛ kʋ̃ɔnɩ a ʋ nũsalɛpʋ̃ɔ́?
Ãa n'ʋ dɔl a ʋ nobie man nɩ a salom yɛ̀lʋ?
Ɛ́ a tẽsɔw tanɛ,
ãa n'ʋ dĩ dĩ a ƴãw gara pʋɔ manɩ a?
Ãa n'ʋ dɔwlɩ a tã-bɛrɛ nɩ a tãli
tɩbrʋ bʋ̃-mána zu manɩ a?
13Ãa n'ʋ manɩ a lɛ a Sore vʋʋrʋ na ɩ a?
A Naaŋmɩn nɩ-waala n'ɩ buor
ʋ na ɩ ʋ bãw a lɛ ʋ na tɩɛrɩ a yele bin a?
14Ãa n'ʋ a Naaŋmɩn ƴãw ʋ wul ʋ a yã k'ʋʋ nyɛrɛ,
k'ʋʋ zanɩ a yele jielu vla,
k'ʋʋ zanɩ a yã-bãwfʋ,
k'ʋʋ bãw a bom a na fɛr kɛ́ bɛ bãw a?
15A nɩ-bʋʋrɛ ɩ na mɛ̃ kʋ̃ɔ-bir
na yi gara pʋɔ lo a,
mɛ̃ biir-bir bʋ̃-kera zu a.
A nɩ-bʋʋrɛ na zãá zãá a
tɩbrʋ ɩ na mɛ̃ a úuru a.
16A Libã tẽw dʋn bɛ saalɩ
bɛ na maal'ɩ nyɩw-a-za-bàwr kʋ̀ a Sore ɩ,
a ʋ tɩɩr za bɛ saalɩ a vũu gbɔwfʋ ƴãw ɛ.
17A nɩ-bʋʋrɛ za ɩ n bʋ̃-zaalɛ a Sore niŋé,
bɛ bɛ ɩ bom za a ʋ zie ɩ, sɛsɛb tɛwr.
A Naaŋmɩn bɛ tɛr ʋ tɔ ɩ
18Ãa n'ʋ nyɩ na de a Naaŋmɩn man nɩ?
Bʋ̃ʋ n'ʋ nyɩ na de ʋ ŋmɛ̃ taa nɩ ʋ?
19Tɩɩb kãw bɩɩ? Towtow!
Nuru tõ-tone kãw n'ʋ nyɩl kure maal'ɩ ʋ,
salm-zɩɛ tõ-tone kãw nyɩl salm-zɩɛ pàw ʋ,
ɛ́ ƴãw ʋ salm-pla bãzɔlɛ a kɔkɔrɩ́.
20Ʋlɩ sob na ɩ nã́w sob zuo
a de-kʋ̀b bom ŋa tɔ tɩrʋ ƴãw a,
kaa na ír dàa na bɛ pʋ̃ɔnɛ a.
Al pùorí ʋ bɔ nuru tõ-tone na bãw vla
na tʋ̃ɔ́ maalɩ tɩɩb ʋ kpɛmɛ àr a.
21Nyɩ bɛ bãw ɛ?
Nyɩ bɛ wõ a ɩ?
Bɛ bɛ yel yel kʋ̀ nyɩ a pɛr-tib daar za ɩ?
Nyɩ bɛ wõ a alɩ bome nɛ
na n'ɩ a tẽ-daa pɛr a ɩ?
22A Sore naalʋ-dà-kɔw
be n a tẽw tʋra zu-sɔw,
ɛ́ a nɩsaalbɛ mɩ́ sãá a ʋ zie ɩ mɛ̃ sãsowe a.
Ʋ yɛ́r'ɩ a salom mɛ̃ pɛn-kpɛ̃ɛ a,
ʋ dɔl ʋ na mɛ̃ pɛn-sɛw a,
a ʋ kpɛb ƴãw.
23Ʋ mɩ́ ɩ n a tẽ-daa ŋa na-mɩnɛ
bɛ bɛ cãà ɩ bom za ɩ,
ɩ a ʋ kaarbɛ bɛ ɩ bʋ̃-zawlɛ.
24Bɛ bɛ de a zie baarɩ sɛr ɛ,
bɛ bɛ zɩ̃ baarɩ sɛr ɛ,
ɛ́ a Sore pɛblɩ a ʋ pɩɛlʋ a bɛ zu.
Bɛlɛ n'ɩ bɛ ŋan ko,
a sɛsɛb-pɩl ɓáw bɛ cen nɩ mɛ̃ sàwr a.
25A Naaŋmɩn na ɩ sõw a sowre na:
«Ãa n'ʋ nyɩ na tʋ̃ɔ́ de m man nɩ?
Mãa nɩ ãa nɛbɛ na tʋ̃ɔ́ ɩ been?»
26Nyɩ úori a salom ɛ́ nyɛ̃:
ãa n'ʋ ír a ŋmar-bie?
A sob nɛ na mɩ́ ɩ a yi a za
cɔrɩ vla cere mɛ̃ sojarɩ,
ʋʋ bʋɔlɩ a za, ŋa nɩ ʋ yúor ŋa nɩ ʋ yúor a n'ʋ.
A ʋ fãw nɩ a ʋ kpɛnʋ bɛrmɛ nɩ yaga,
kɛ̀ ŋmar-bir kãw za bɛ be be
bɛ mɩ́ sàw a ʋ bʋɔlʋ ɛ.
A Sore mɩ́ kʋ̀ n fãw a bɛlɩ dem na bɛ tɛr ʋ a
27Zakɔb i, bʋ̃ʋ n'ʋ so fʋ yere,
Ɩsɩrayɛl i, bʋ̃ʋ n'ʋ so fʋ ƴɛ̀rɛ à ŋá:
«A Sore bɛ nyɛ̃ a lɛ a na ŋmɛ̃ m'a ɩ,
a lɛ-na-tu-sɔr a ɩ̃ ƴãw a
sɔwl'ɩ a ɩ̃ Naaŋmɩn zie».
28Fʋ bɛ bãwnɩ a ɩ? Fʋ bɛ wõ a ɩ?
A Sore ɩ n a Naaŋmɩn na be kʋralɛ a.
Ʋ ír'ɩ a tẽw za.
A ʋ fãw bɛ síwre ɩ, ʋ bɛ bàlɛ ɩ.
Nɩr kʋ̃ tʋ̃ɔ́ manɩ a ʋ yã zulu ɛ.
29Ʋ mɩ́ lɛb'a kʋ̀ fãw a bɛlɩ dem na bɛ tɛr ʋ a,
ɛ́ kʋ̀ kanyir a sob nɛ na bàl ʋ za a.
30A pɔlbili tɛɛ za fãw mɩ́ siwr'a, bɛ mɩ́ bàl'a.
A nɩbɛ na ta nɩbɛ a mɩ́ lo na.
31Ɛcɛ a bɛlɩ dem na mɩ́ ƴãw
a bɛ tɩɛrʋ a Sore ƴãw a,
mɩ́ páw nɩ fãw-paala.
Bɛ mɩ́ ƴaw na mɛ̃ sɩlɩ a,
bɛ mɩ́ zɔrɛ na bɛ bàlɛ ɩ,
bɛ mɩ́ cere na tɔlɛ nidaa
ɛ́ a bɛ fãw bɛ síwre ɩ.
Currently Selected:
Ɩzayi 40: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
