Ɩzayi 33
33
Baw-bio páw nɩ a sob nɛ na sãwnɛ bom za a!
1Baw-bio wɛ! fʋ̃ʋ na sãwnɛ bom za#33:1 A na ɩ n a Asiiri tẽw n'ʋ a baw-bio ŋa càarɩ.
ɛ́ nɩr bɛ sãw fʋ bɛr a,
fʋ̃ʋ na mɩlɛ a nɩbɛ ɛ́ nɩr bɛ mɩl fʋ a.
Fʋ̃ʋ wa sãw bom za bɛr baar'a,
bɛ mɩ́ na sãw fʋ na bɛr.
Fʋ̃ʋ wa mɩl baar'a,
bɛ mɩ̀ na mɩl fʋ na.
2Sore e, zɔ tɩ nɩbaalʋ!
Tɩ ƴãw nɩ a tɩ tɩɛrʋ a fʋ ƴãw.
Ɩ̀ a tɩ fãw biɓaara za,
nɩ a tɩ faarɛ a kpɩɛrʋ daar.
3A nɩbɛ wa wone a fʋ kɔkɔr a,
bɛ mɩ́ zɔrɛ na.
Fʋ̃ʋ dɛ wa ìre àrɛ a,
a nɩ-bʋʋr-yoru mɩ́ zɔrɛ na yàarɛ.
4Lɛ n'a a mɩ́ ɩ a zab:
à mɩ́ ɩ na mɛ̃ sãso-nãá-nʋrɩ n'a fʋ nyɛ̃ a.
Bɛ mɩ́ lore na nyɩɛr a zɛbr na-bome
mɛ̃ sãsoge na yãwmɛ bɛ dɩ vuo a.
5A Sore zɛw na do,
bʋ̃ʋ n'ʋ vɛ̃, ʋ kpɩɛr'ɩ a saa-zu.
Ʋ paal'ɩ a Zerizalɛm
nɩ a lɛ-na-tu-sɔr-a, nɩ a mɩnʋ.
6Ɛ́ nyɩɩm, Sore nɩ-bʋʋrɛ ɛ,
nyɩ nãà wa tʋ̃ɔ́ na kpɩɛr ɛ́ bom bɛ damnɛ nyɩ ɛ.
A yã-bãwfʋ nɩ a bãwfʋ
ɩ n na-bome na faarɛ a.
A Sore zɔba a,
ʋlɛ n'ɩ a fʋ na-bom.
A Sore na dam'a
7A Arɩɛl#33:7 Arɩɛl: Nyɛ̃ 29.1 nɩ a manʋ. nɩbɛ n'ɩ bɛ ŋan
kone a sɛ́ɛ pʋʋr.
A nɩbɛ bɛ na tõ a ƴã-ɓaarʋ ƴãw a
kone nɩ mʋta-zɩ̃ɩ.
8A sɛ́ɛ gã nɩ zawlɛ,
nɩr bɛ cãà tuur a soli tɔlɛ ɩ.
A wõ-taa na maalɩ a sãw na,
bɛ zawr'ɩ a dãsɩɛ dem bɛr,
bɛ bɛ cãà ŋmɛlɛ kaar nɩr za ɩ.
9A tẽw tɛr'ɩ wahala, kpiir.
Vĩ nyɔw nɩ a Libã tãw, ʋ kore na.
A Saron zi-tɩ̃tal ŋmɛ̃ na taa nɩ wɛja-kpalɛ.
A Basan nɩ a Karmɛl tan bɛ cãà tɛr tɩɩr ɛ.
10A Sore yere na:
«Ƴɛrɛŋa a, ɩ̃ na dam'a,
ƴɛrɛŋa a, ɩ̃ na ìr'a,
ɩ̃ na wul'a ɩ̃ na ɩ kpɛ̃ɛ a.
11A lɛ nyɩ na tɩɛrɩ kɛ́ nyɩ ɩ a,
ɩ n dʋn mʋ̃ɔ tɛwr,
ɛ́ alɛ wa maalɩ a lɛn daar a,
ãá ɩ mɔ̃-kon tɛwr.
12A nyɩ mɩŋa nʋɔr pɩɛlʋ
na dɩ nyɩ na mɛ̃ vũu a.
Vũu na dɩ n a nɩ-bʋʋrɛ bɛ lɩɛbɩ tãpɛlʋ.
Bɛ na lɔb bɛ na ƴãw vũumí
mɛ̃ wuli-gʋ̀ʋ́r bɛ na cɛ ŋma a.
13Nyɩɩm na zãá a,
nyɩ wõ a ʋlɩ bom nɛ ɩ̃ na ɩ a.
Ɛ́ nyɩɩm na pɩɛlɩ a,
nyɩ nyɛ̃ a ɩ̃ kpɛnʋ bãw.»
14Pʋl-vʋ̃ɔ nyɔw nɩ a yel-bebe dem a Sɩyɔ̃ tẽw pʋɔ,
dɛ̃bɩ̃ɛ ɩrɛ nɩ a nɩ-faar bɛ màwr.
Bɛ sowre na:
«A tɩ buor'ʋ na tʋ̃ɔ́ àr
a vũu ŋa na dɩrɛ a pɛr?
A tɩ buor ʋ na tʋ̃ɔ́ àr
a vũu-zɛlɛ á ŋá na bɛ kpiire a pɛr?»
15— Sob nɛ na tuur a mɩnʋ
ɛ́ yere a yel-mɩŋa a n'ʋ.
Ʋ mɩ́ zawr'ɩ a tɔnɛ
bɛ na mɩ́ ɩ a po-to-fãw-ɩb páw a,
ʋ bɛ sàwr a bɛlɩ dem na bɔbr
kɛ́ bɛ ŋmɛ ʋ nʋɔr a ɩ.
Ʋ mɩ́ pàw nɩ a tobe tɛr,
k'ʋʋ ta wõ nɩ-kʋ ƴɛ̀rʋ ɛ.
Ʋ mɩ́ pàw nɩ a ʋ mimie,
k'ʋʋ ta jɩ́r a yel-faa ɩ.
16A nɩr ŋa na kpɩɛr'ɩ ziir na kɛrɩ a.
Pìe na ɩ zɛbr-yir-kpɛn a n'a
na ɩ a ʋ sɔwlʋ zie.
Ʋ na mɩ́ nyɛ̃ nɩ bʋ̃-dɩra,
ʋ kʋ̃ mɩ́ bɔ kʋ̃ɔ gù ɛ.
A Zerizalɛm tẽw na nyɛ̃ nɩ a faafʋ
17Fʋ na jɩ́r'ɩ a nãà na dɩ dɛpaalʋ a,
fʋ na nyɛ̃ nɩ a tẽw yɛ̀lʋ tɩ tɔ.
18Fʋ na tɩɛr'ɩ a ʋlɩ bom nɛ
na tɩ ɩrɛ fʋ dɛ̃bɩ̃ɛ a,
ɛ́ fʋ na sowre na:
«Nyɩnɛ n'a a bɛlɩ dem na sɔrɛ
ɛ́ jiele a zuru-yar a be?
Nyɩnɛ n'a a bɛlɩ dem na jɩ́rɛ
a ziir na cɔbrɩ kpɛmɛ a zɛbr ƴãw a be?»
19Fʋ kʋ̃ cãà nyɛrɛ a nɩ-bʋʋrɛ bɛ ŋa
na ɩrɛ pɔ̀l-ɩb a ɩ,
nɩ-bʋʋrɛ fʋ na kʋ̃ wõ a ƴɛ̀rʋ a,
ƴɛ̀r-sãan nɩr za na bɛ wone a ɩ.
20Jɩ́r a Zerizalɛm kaa, nyɛ̃ a Sɩyɔ̃ tẽw a,
a tẽ-kpɛ̃ɛ tɩ na maalɛ a tɩ cuwr a.
Ʋ na sãá nɩ a fʋ zie
mɛ̃ zie na ɩ zoom a,
mɛ̃ pɛn-sɛw bɛ na kʋ̃ lɛb wɩl a.
Bɛ kʋ̃ lɛb vɔ̃ a ʋ kpawbie ɩ,
bɛ kʋ̃ lɛb cɛ̀r a ʋ míe bɛr ɛ.
21Be n'a a Sore na wul tɩ
a ʋ vɩɛlʋ na bɛ tɛr tɔ a.
Ʋ na ɩ n bàrʋ nɩ man-bɛrɛ zie
a zɛbr gbor-bɛrɛ na bɛ tɔlɛ a,
a gbor-bɛrɛ na bɛ tuur tɔlɛ a.
22A Sore n'ɩ a tɩ nɩ-kpɛ̃ɛ,
ʋlɛ n'ʋ de tɩ a niwn.
A Sore n'ɩ a tɩ nãà,
ʋlɛ n'ɩ a tɩ faarɛ.
23A fʋ míe yɔl'a,
a bɛ cãà nyɔw a dà-wogo tɛr ɛ,
bɛ bɛ dúore a dɩrapo ɩ.
Lɛ n'a bɛ na põ a zɛbr na-bʋ̃-yaga.
A gbɛɛ tɛɛ za na pʋɔ nɩ a zab pʋɔ.
24A Zerizalɛm nɩr kãw za kʋ̃ lɛb yel:
«Ɩ̃ ɩ n bàal» ɛ.
A tẽ-kpɛ̃ɛ ŋa nɩbɛ
na páw nɩ a bɛ yel-bebe suur.
Currently Selected:
Ɩzayi 33: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
