Ɩzayi 3
3
Bʋnɩ-ɩb'a, a Zuda naalʋ-tẽw pʋɔ
1A Sore Naaŋmɩn, a kpɛnʋ-za-sob,
na ír'ɩ a bʋ̃-dɩrɩ nɩ kʋ̃ɔ sõwfʋ za
a Zerizalɛm nɩ a Zuda ten pʋɔ.
Ʋ na ír'ɩ a alɩ bome nɛ za na tɩ̀ɛrɛ a a:
2soja-gãdaar nɩ zɛbr-nɩ-zawlɛ,
ƴɛ̀r-dɩrbɛ, naaŋmɩn-ƴɛ̀r-manbɛ,
bàwr-bʋwrbɛ nɩ nɩ-kore,
3sojarɩ nɩ-bɛrɛ nɩ nɩ-yée,
yã-wulbɛ, tɩtɩlbɛ nɩ sɔbr.
4A Sore yere na:
“Dɛbli-nyɔfɛrɛ nɛbɛ ɩ̃ na kʋ̀ bɛ
bɛ ɩ a bɛ nɩ-bɛrɛ,
dɩrɛ naalʋ a bɛ zu
mɛ̃ a lɛ a na ɓãanɛ bɛ a.”
5A nɩbɛ na ɩrɛ nɩ taa po-to-fãw-ɩb,
ŋa za a ʋ tɔ sob zie:
a pɔlbili na dɔwrɛ nɩ a dɛb-nyamɛ,
a nɩ-bɛ-tɛr-bir mɩnɛ
dɔwrɛ a nɩ-sɩza mɩnɛ.
6Nɩr na mɩ́ nyɔw nɩ a ʋ yɛb,
a ʋ sãà yir pʋɔ ɛ́ yel ʋ:
“Fʋ cãà na tɛr kpar-kpɛ̃ɛ,
a lɛ pʋɔ a, ɩ a tɩ nɩ-kpɛ̃ɛ
ɛ́ kaa a yel-nyãbʋnɔ á ŋá zie.”
7Ɛcɛ à ŋà sob na sɔw nɩ a ʋlɩ bibir nɛ:
“Ɩ̃ kʋ̃ tʋ̃ɔ́ ɩ bom za a nyɩ ƴãw ɛ.
Bʋ̃-dɩra nɩ kpar-kpɛ̃ɛ bɛ be ɩ̃ yir ɛ.
Nyɩ kʋ̃ tʋ̃ɔ́ ɩ ɩ̃ ɩ nɩ-kpɛ̃ɛ ɩ.”
8Zerizalɛm kaw na lo,
Zuda naalʋ-tẽw gã nɩ tẽw.
A bɛ ƴɛ̀rʋ nɩ a bɛ ɩ-ɩrɩ a Sore zie
ɩ n gaarʋ tɛwr a ʋ yúor-vɩɛlʋ-danʋ niŋé.
9A bɛ niŋe ŋmɛ̃a dɩ n a dãsɩɛ nyɔw bɛ.
Mɛ̃ a Sodɔm tẽw dem a,
bɛ bɛ sɔwlɛ a yel-bebe ɩ,
bɛ ƴɛ̀rɛ nɩ a ƴɛ̀rʋ a nɩbɛ za niŋé.
Nyɛ̃ baw-bio a,
bɛ cɔbrɛ nɩ a bɛl mɩŋa kpɩɛrʋ!
10Nyɩ na tʋ̃ɔ́ na yel:
a nɩ-mɩŋa tɛr'ɩ zu-nʋ̃ɔ̀,
bʋ̃ʋ n'ʋ vɛ̃, ʋ na nyɛ̃ nɩ a ʋ ɩ-ɩrɩ maalʋ.
11Ɛcɛ a nɩ-faa ƴãw a,
nyɛ̃ baw-bio a!
Bʋ̃ʋ n'ʋ vɛ̃, bɛ na ɩ ʋ na tu n a ʋ ɩ-ɩrɩ.
12A Sore yere na: “Ɩ̃ nɩ-bʋʋrɛ ɛ,
a bɛlɩ dem na dɔwrɛ nyɩ a, bibili nɛbɛ,
ɛ́ pɔwbɛ nɛbɛ dɩrɛ a naalʋ a nyɩ zu.
Ɩ̃ nɩ-bʋʋrɛ ɛ, a bɛlɩ dem
na tɛr nyɩ cere nɩ a, tule nyɩ na,
bɛ tuli nɩ a nyɩ sɔ́r.”
A Sore dɩrɛ nɩ nɩ a ʋ nɩ-bʋʋrɛ nɩ-bɛrɛ ƴɛ̀rʋ
13A Sore ìr'ɩ a ƴɛ̀rʋ-dɩb ƴãw,
ʋ ìr'a àr k'ʋʋ dɩ n a nɩ-bʋʋrɛ a ƴɛ̀rʋ.
14Ʋ dɩrɛ nɩ nɩ a nɩ-kore
nɩ a ʋ nɩ-bʋʋrɛ nɩ-bɛrɛ a ƴɛ̀rʋ à ŋá:
“Nyɩmɛ nɛbɛ sãw
a ɩ̃ divɛ̃ tɩɩr púo#3:14 Divɛ̃ tɩɩr púo: A Sɛb-sõw pʋɔ a, a divɛ̃ tɩɩr púo bɩɩ a divɛ̃ tɩɛ mɩ́ tʋ̃ɔ́ na ɩ a Naaŋmɩn nɩ-bʋʋrɛ Ɩsɩrayɛl bãwfʋ. bɛr,
ɛ́ paalɩ a nyɩ yie
nɩ a nan dem bome nyɩ na zu a.
15Ãa n'ʋ kʋ̀ nyɩ a sɔ́r nyɩ kʋrɛ
a ɩ̃ nɩ-bʋʋrɛ gúur,
ɛ́ ɩrɛ po-to-fãw-ɩb a nan dem zie?”
A Sore Naaŋmɩn,
a kpɛnʋ-za-sob'ʋ sowre.
A Zerizalɛm pɔwbɛ na dɩrɛ dɛpaalʋ a
16A Sore yere na:
“A Sɩyɔ̃ tẽw pɔwbɛ ɩrɛ nɩ pɔ̀lʋ.
Bɛ mɩ́ vʋ̃ɔ nɩ a nyũu kɛ́ cen,
ɛ́ mɩ́ 'law a mimir!
Bɛ mɩ́ cere nɩ bɛ̀lbɛ̀l,
ɛ́ ɩrɛ a gbɛ-buule a kone.
17Alɛ so a Sore na ɩ
a bɛ zuru a kpal,
ɛ́ ɩ a bɛ gbẽri a sãá.
18A ʋlɩ bibir'a, a Sore na ír'ɩ a bɛ pɩ̃ɛmɛ bɛr: a gbɛ-buule, a kɔkɔrɩ-bamɛ, a pɩ̃ɛmɛ na ɩ mɛ̃ cuw-cɩ̃ɔ a, 19a tokpamɛ, a nuru-bamɛ, a niwn-pɛn-pawrɩ, 20a zu-pɛn-vili, a bãzɔlɩ, a kpawr-wobri, a sawbie nɩ a kɔ̃tɔ̃-bʋ̃-ƴãwnɩ, 21a nũ-tʋɛ nɩ a nyɔ-bamɛ, 22a cuw kparɩ, a kɔkɔrɩ-pɛnɛ, a bawŋmamɛ zu pɛnɛ, a nuru kɔ̀ɛ, 23a càalɩ́, a lɛ̃ pɛn kparɩ, a zu-jɩ̀ɩr, a zu nɩ a bawŋmamɛ zu pɛn-vʋlvʋl.
24Pʋɔrʋ nyũu na lɩɛr'ɩ a parfɛ̃ nyũu,
miwr na lɩɛr'ɩ a kpàwr.
Zu bɛ na fɔr'a
na lɩɛr'ɩ a zu bɛ na pàl
tɩ ƴãw kpɛ̃kpɛrsɩ a.
Vʋɔra pɛn gãw na lɩɛr'ɩ
a dɛpaal bʋ̃-suuri.
Ƴã-ganɩ́ bãwfʋ na ɩrɛ vĩ a
na lɩɛr'ɩ a vɩɛlʋ bãwfʋ.
A Zerizalɛm pɔw-kɔbɛ
25Zerizalɛm i, a zɛbr-sɔ-kpɛ̃ɛ
na kʋ n a fʋ dɛbr,
a fʋ sojarɩ na kpi n a zɛbr zie.
26Lɛ n'a a tẽ-kpɛ̃ɛ na kone ʋ za
ɛ́ be wahala pʋɔ,
mɛ̃ pɔw na bɛ cãà tɛr bom za
ɛ́ zɩ̃ tẽsɔw a.
Currently Selected:
Ɩzayi 3: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
