Ɩzayi 2

1A ʋlɩ bom nɛ a Amɔtɩsɩ bidɛb, Ɩzayi, na nyɛ̃ càar'ɩ a Zuda naalʋ-tẽw nɩ a Zerizalɛm tẽ-kpɛ̃ɛ a#2:1 A kan-nɔ-dãw-niwn sob ŋa ɩ n ʋ tʋɔra ƴɛ̀r-zu a kan-zu 1 sob tɩ tɔ a kan-zuru 12 sob ƴãw..

A nɩ-bʋʋrɛ za na darɛ nɩ taa cere a Zerizalɛm

(Kan-nɛ́ɛ 2-4: nyɛ̃ Mi 4:1-3)

2Daar waar'a na ta,

a Ŋmɩn-yir-kpɛ̃ɛ tãw

na wɩɛr tɩ àr a tan nyʋɔrɩ́,

ɛ́ kɛrɩ do gãw a tãli.

Lɛ n'a a nɩ-bʋʋrɛ za

na darɛ taa cere a ʋ zu.

3Nɩ-bʋʋr-yaga na ìr'a lo a sɔ́r ɛ́ yere:

“Nyɩ wa! Nyɩ wa tɩ do a Sore tãw zu,

tɩ do a Zakɔb Naaŋmɩn yir.

Ʋ na tɩ wul tɩ nɩ a ʋ sɛ́ɛ,

ɛ́ tɩ na cere nɩ a ʋ soli zu.”

Sɩza, Sɩyɔ̃ n'a a Sore wulu yire waar,

Zerizalɛm'a a ʋ ƴɛ̀rʋ yire waar wa páwr tɩ.

4Ʋ na mɩ́ dɩ n a ƴɛ̀rʋ

kʋ̀ nɩ-bʋʋrɛ na tɛr taw-taa a,

ʋ na mɩ́ bãw nɩ nɩ-bʋʋr-yaga yele kʋ̀ bɛ.

Bɛ na mɩ́ de nɩ a bɛ zɛbr-sɔ-bɛrɛ

zuw maal'ɩ kue,

ɛ́ de a bɛ kafine maal'ɩ sɔ-nɔ-gori.

Tẽw kãw kʋ̃ mɩ́

lɛb ŋmãa nɩ tẽw kãw zɛbr ɛ,

nɩr kʋ̃ lɛb cãà zanɛ zɛbr zɛbrʋ ɛ.

5Nyɩ wa, Zakɔb yir dem i!

Nyɩ ɩ tɩ cere a Sore cãà pʋɔ.

A Sore bibir

6Sore e, fʋ zawr'ɩ a fʋ nɩ-bʋʋrɛ bɛr,

a Zakɔb yir dem.

Bʋ̃ʋ n'ʋ vɛ̃, a Saa-pɛrɩ́ bàwr-bʋwrbɛ

paal'ɩ a bɛ tẽw.

A tɩtɩlbɛ yãwmɛ na man a Filisɩtɛ̃ mɩnɛ.

A fʋ nɩ-bʋʋrɛ maalɛ nɩ yɛ̀rʋ́ nɩ a nɩ-sãanbɛ.

7A bɛ tẽw paal'ɩ salm-pla nɩ salm-zɩɛ,

nɩ na-bome bɛ na kʋ̃ tʋ̃ɔ́ sɔ́r a.

Ʋ paal'ɩ wie nɩ zɛbr-torkori.

8A bɛ tẽw paal'ɩ tɩbɛ:

bɛ gbine nɩ dume

a bɛ nuru bʋ̃-maalɩ niŋé,

bome nɩsaalbɛ na maalɩ a.

9Alɛ n'a so a nɩsaalbɛ za na gũu zu,

ɛ́ bɛ siwri bɛ.

Sore e, taa dɩrɛ suur kʋ̀rɛ bɛ ɩ.

10Nyɩ sɔwlɩ a pìe pʋɔ,

nyɩ mʋr a tẽw,

a Sore na ɩrɛ dɛ̃bɩ̃ɛ a niŋé,

nɩ a ʋ dɛpaalʋ vɩɛlʋ niŋé.

11A nɩsaal na mɩ́ jɩ́r a pɔ̀l-jɩ́rʋ a,

a na fɛr'a ʋ mɩ́ jɩ́r pile,

ɛ́ a fɛr a pɔ̀lʋ sob ʋ gũu zu.

A ʋlɩ bibir nɛ a,

a Sore yõ n'ʋ na ɩ kpɛ̃ɛ.

12A Sore, a kpɛnʋ-za-sob, tɛr'ɩ bibir

ʋ na na ìr bom za na ɩrɛ pɔ̀lʋ a ƴãw,

bom za na zɛwr ʋ tʋɔra

ɛ́ tɩɛrɛ k'ʋʋ zuo nɩ za a ƴãw k'ʋʋ siwri ʋ.

13Ʋ na ìr'ɩ a Libã tẽw sɛɛdɩr tɩɩr za ƴãw,

a tɩɩr á ŋá na kɛrɩ kɛrɩ a,

nɩ a Basan tẽw sɛn tɩɩr ƴãw,

14a tã-kɛrɩ za ƴãw,

nɩ a tãli na do do a ƴãw,

15a yir-cõcowli za na kɛrɩ a ƴãw,

nɩ a dacĩ-bɛrɛ na bɛ tɛr dob a ƴãw,

16a gbor-bɛrɛ za ƴãw,

nɩ a gbor-vɩɛlɩ vɩɛlɩ za ƴãw.

17A na fɛr'a pɔ̀lʋ sob za gũu zu,

ɛ́ a bɛlɩ dem na ɩrɛ

nyɔka-ɩb a siwri bɛ tʋɔra.

A ʋlɩ bibir nɛ a,

a Sore yõ n'ʋ na ɩ kpɛ̃ɛ.

18A tɩbɛ za na bɔr a.

19Nyɩ kpɛ a pìe bɔwrɩ pʋɔ

nɩ a tẽw bɔwrɩ pʋɔ,

a Sore na ɩrɛ dɛ̃bɩ̃ɛ a niŋé,

nɩ a ʋ dɛpaalʋ vɩɛlʋ niŋé,

ʋ nãà wa ìr k'ʋʋ ƴãw a tẽw pʋl-vʋ̃ɔ a.

20A ʋlɩ bibir nɛ a, a nɩbɛ na lɔb'ɩ a bɛ salm-pla nɩ a bɛ salm-zɩɛ tɩbɛ ƴãw cʋcʋɛ nɩ zãzã-cili, a tɩbɛ bɛ na maalɩ kɛ́ bɛ puore a. 21Bɛ na cen nɩ a pìe bɔwrɩ pʋɔ nɩ a pìe haba, a Sore na ɩrɛ dɛ̃bɩ̃ɛ a niŋé, nɩ a ʋ dɛpaalʋ vɩɛlʋ niŋé, ʋ nãà wa ìr k'ʋʋ ƴãw a tẽw pʋl-vʋ̃ɔ a.

22A na ɩ à ŋá a, nyɩ bɛr a nɩsaal,

pɩɛlʋ tɛwr'ʋ a nyɔbɔwɛ pʋɔ.

A ʋ pɛr pãa n'ɩ bo a?

Currently Selected:

Ɩzayi 2: DBDC

Highlight

Copy

Compare