Ɩzayi 27
27
A Sore na tʋ̃ɔ́ a kʋ̃ɔ-bɛrɛ wa-bɩɛ a
1A ʋlɩ bibir nɛ a, a Sore na de nɩ a ʋ zɛbr-sɔ-kpɛ̃ɛ na dɩrɛ a, na bɛ dɩ vuo ɛ́ tɛr fãw a, a Levɩatã na ɩ a waab na zɔrɛ a ƴãw, a Levɩatã na ɩ a wa-gõlõgõlõ a ƴãw. Ɛ́ ʋ na kʋ n a kʋ̃ɔ-kpɛ̃ɛ wa-bɩɛ#27:1 A Levɩatã bɩɩ kʋ̃ɔ-kpɛ̃ɛ wa-bɩɛ ɩ n dʋ̃-bɩɛ bɩɛ kãw na be a koro za Saa-pɛrɩ́ tẽw nɩbɛ suolu pʋɔ a. Ʋ tɩ ɩ n a Faalʋ kpɛnʋ bãwfʋ. A sɛbrʋ ŋa pʋɔ a, ʋ tɔ̃w na ɩ n a tẽw ʋl na tʋ̃ɔ́ a Ɩsɩrayɛl nɩbɛ a bãwfʋ. Nyɛ̃ Zɔb 3.8, 7.12..
A Sore nɩ a ʋ divɛ̃ tɩɩr púo
2A ʋlɩ bibir nɛ a, nyɩ cɛ yielu
a divɛ̃-nʋ̃ɔ̀ nʋ̃ɔ̀ divɛ̃ tɩɩr púo#27:2 Nyɛ̃ 3.14 nɩ a manʋ. ƴãw.
3«A mãa, a Sore, mãa n'ɩ a ʋ gùre.
Ɩ̃ cɔ̀rɛ ʋ nɩ kʋralɛ.
Ɩ̃ gùre ʋ nɩ mʋ̃tɔ̃w nɩ tɩ̃ɩsɔw,
kɛ́ nɩr taa wa sãw ʋ bɛr ɛ.
4Ɩ̃ bɛ cãà nyɛ̃ nɩ ʋ suur ɛ.
Ɛcɛ mãa wa nyɛ̃ gɔ-tuwr a,
ɩ̃ na zɛb'ɩ a na ɛ́ nyɩw a bɛr.
5Ɛcɛ sob nɛ na na zɔ kpɛ a ɩ̃ naayir a,
ʋ na ɩ na ƴã-ɓaarʋ be mãa nɩ a ʋl zie,
ʋ na ɩ na ƴã-ɓaarʋ be be.»
A Sore na dɩ n suur kʋ̀ a Ɩsɩrayɛl bʋʋrɛ
6A nɩdaar na waar a,
a Zakɔb bʋʋrɛ na tɛ n nyɩgɛ,
a Ɩsɩrayɛl bʋʋrɛ na tɛ n pɩrmɛ ɛ́ pu,
bɛ na paal'ɩ a tẽ-daa nɩ a bɛ wɔmɛ.
7A Sore ŋmɛ n a ʋ nɩbɛ mɛ̃ a lɛ ʋ na ŋmɛ
a bɛlɩ dem na tɩ ŋmɩɛr bɛ a bɩɩ?
Ʋ kʋ bɛ na mɛ̃ a lɛ ʋ na kʋ
a bɛlɩ dem na tɩ kʋrɛ bɛ a bɩɩ?
8Ʋ̃ʋ 'hʋ̃, ɛcɛ ʋ ƴãw bɛ nɩ dɔwrʋ,
diw bɛ, ír bɛ a bɛ tẽw pʋɔ.
Ʋ pɛbl'ɩ a ʋ pɩɛlʋ kpɛ̃w kpɛ̃w za diw bɛ
mɛ̃ saa-pɛrɩ́ sɛsɛb na fu n fãw a.
9Nyɛ̃ a lɛ a Zakɔb sãwna na na baarɩ a,
nyɛ̃ a ʋlɩ bom nɛ
a ʋ yel-bier suur páwfʋ na na wa n a:
bɛ na ƴɛ́r'ɩ a bàwr-maal-kube
kʋsɛbɛ za a ɩ mɛ̃ tã-zɔ̃ a.
A dà-barɩ nɩ a parfɛ̃ bʋ̃-nyɩwrɩ kʋ̃ cãà bà àr ɛ.
10Nɩr za bɛ cãà a tẽ-kpɛ̃ɛ bɛ na cɔbrɩ
ʋ kpɛmɛ a zɛbr ƴãw a pʋɔ ɩ.
Bɛ bɛr ʋ na ʋ gã zawla mɛ̃ wɛja-kpalɛ a.
A náli waar'a wa 'wɔbr a mʋ̃ɔ a be,
a ganɛ na pɩ̃ɛnɛ a be,
ɛ́ 'wɔbr a tɩɩr wuli váar.
11A wuli wa kò a, a mɩ́ kar'a lo,
pɔwbɛ wa nyɩw a.
A nɩ-bʋʋrɛ bɛ ŋa bɛ tɛr yã ɩ.
Alɛ so a sob nɛ na ír bɛ a bɛ zɔrɛ bɛ nɩbaalʋ ɛ,
a sob nɛ na maalɩ bɛ a bɛ dɩrɛ suur kʋ̀rɛ bɛ ɩ.
A Ɩsɩrayɛl nɩbɛ za bɛ na diw cen nɩ a lɛb-waa
12A ʋlɩ bibir nɛ a, a Sore na va n a ʋ bʋ̃-dieri
a Efaratɩ manɩ́ tɩ tɔ a Eziptɩ tẽw fʋɔla.
Ɛ́ nyɩɩm, Ɩsɩrayɛl nɩbɛ ɛ,
ʋ na yiiri nyɩ nɩ been been mɛ̃ ka-zuru a.
13A ʋlɩ bibir nɛ a, a ɩɩl-kpɛ̃ɛ na pɛbl'a.
Lɛ n'a a bɛlɩ dem na tɩ bɔr be a Asiiri tẽw a,
nɩ a bɛl bɛ na tɩ diw cen nɩ a Eziptɩ tẽw a,
na lɛb wa.
Bɛ na wa gbĩ n dume gũu tɩ tɔ tẽw a Sore niŋé,
a tãw-sõw zu, a Zerizalɛm.
Currently Selected:
Ɩzayi 27: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
