Ɩzayi 11
11
Daviir paala
1Bidɛb na yi n a Zese#11:1 Zese: A Daviir sãà n'ʋ. Nyɛ̃ 1Sa 16.18-19. yir pʋɔ,
mɛ̃ wuli-pɔl na yi tɩ-kʋra pɛr ƴãw a.
Wuli-paala na tɛ n a ʋ nyɩgɛ ƴãw yi.
2A Sore Vʋʋrʋ na siw ʋ na:
yã-bãwfʋ nɩ yele jielu Vʋʋrʋ,
yã-wulu nɩ fãw Vʋʋrʋ,
bãwfʋ nɩ Sore zɔba Vʋʋrʋ.
3A Sore zɔba n'a na ɩ a ʋ yã-nɔn.
Ʋ kʋ̃ mɩ́ dɩ a ƴɛ̀rʋ tu n a lɛ ʋ na nyɛ̃ a ɩ,
ʋ kʋ̃ mɩ́ yel a lɛ na be be a,
tu n a lɛ ʋ na wone bɛ yere a ɩ.
4Ʋ na mɩ́ dɩ n a ƴɛ̀rʋ nɩ mɩnʋ kʋ̀ a bãbàalbɛ,
ʋ na mɩ́ yel'ɩ a lɛ-na-tu-sɔr-a
kʋ̀ a tẽw nan dem.
A ʋ ƴɛ̀rʋ na mɩ́ va n a tẽw mɛ̃ dabɔl a,
a ʋ nʋɔr pɩɛlʋ na mɩ́ kʋ n a nɩ-faa.
5A mɩnʋ nɩ a yel-mɩŋa
na ɩ n a ʋ zie mɛ̃ kpàwr
bɛ na mɩ́ sɛ a sɩɛmɩ́ kʋralɛ a.
6Lɛ n'a a wɛ-baa na lãw kpɩɛr'ɩ a péle,
a nyũo na mɩ́ gã na kɔwlɩ bʋle.
Bɛ na lãw na guole a nále nɩ a gbẽw-bile,
ɛ́ dɛbli-cãpile cɩ̃ɩnɛ a.
7A na-nyãw nɩ a wɛ-dʋ̃-faa
bɛ na bʋɔlɛ ursɩ, ʋ́ʋ̀ ɩ bʋ̃-nyãw a,
na lãw na 'wɔbr a mʋ̃ɔ,
ɛ́ a bili lãw gáa zie.
A gbẽw na 'wɔbr'ɩ mʋ̃ɔ mɛ̃ a náab a.
8A bi-ƴɛna na dɩ̃ɛnɛ nɩ gbàá bɔw nʋɔr,
ɛ́ a dɛbli-cãpile tõ nũu a dɔpan sɔwlʋ zie.
9Bɛ kʋ̃ cãà maalɛ yel-faa ɛ́ sãwnɛ bom
a ɩ̃ tãw-sõw za zu ɛ.
Bʋ̃ʋ n'ʋ vɛ̃, a Sore bãwfʋ na paal'ɩ a tẽw,
mɛ̃ man na paalɩ kʋ̃ɔ a.
10A ʋlɩ bibir nɛ a, a Zese bidɛb
na ɩ na mɛ̃ bãwfʋ bɛ na zɛw
a tẽ-daa nɩ-bʋʋrɛ ƴãw a.
A nɩ-bʋʋr-yoru na waar'a
wa bɔbr yã a ʋ zie,
ɛ́ a Naaŋmɩn yúor-vɩɛlʋ-danʋ
na nyɩwrɛ nɩ a be ʋ na kpɩɛr a.
A nɩbɛ bɛ na na diw cen nɩ a lɛb-waa
11A ʋlɩ bibir nɛ a, a Sore
na lɛb'a maal dɔl a ʋ kpãkpã-kpɛ̃w,
k'ʋʋ faa nɩ a ʋ nɩbɛ ŋmãa na cɛ a,
a bɛl na na cãà vʋʋrɛ be
a Asiiri tẽw, a Eziptɩ tẽw pɛrɩ́,
a Eziptɩ tẽw saa-zũú, a Sudã tẽw,
a Elam tẽw, a Babɩlɔn tẽw,
a Hamatɩ tẽw na be Siiri,
nɩ a kʋ̃ɔ-kpɛ̃ɛ nʋɔr nɩ a kʋ̃ɔ-kpɛ̃ɛ-sɔgɔ-ten pʋɔ a.
12Ʋ na zɛw nɩ bãwfʋ
k'ʋʋ yel a nɩ-bʋʋrɛ bɛ ŋa
ʋ na na lɛb ɓã a Ɩsɩrayɛl nɩbɛ taa a,
bɛl bɛ na diw a bɛ tẽw pʋɔ cen nɩ a,
nɩ ʋ na na lɛb ɓã a Zuda nɩbɛ taa
na yàarɩ be a tẽw lõbowe anaar a.
13Lɛ n'a a Efarayim#11:13 Efarayim: Nyɛ̃ 7.2 nɩ a manʋ. kʋ̃ cãà nyuur'ɩ a Zuda ɩ.
Bɛ na kʋ n a Zuda dɔ̃ dem pàw pɛr,
ɛ́ a Zuda kʋ̃ cãà tɛr'ɩ a Ɩsɩrayɛl dɔ̃ ɩ.
14Bɛ na lãw na dãw taa cen
a Filisɩtɛ̃ mɩnɛ tãli ƴãw, a mʋ̃tɔ̃w-kpɛb-lowr,
bɛ na za n a wɛja-kpalɛ pʋɔ nɩbɛ a saa-pɛrɩ́ lowr:
bɛ na so nɩ a Edɔm nɩ a Mowab ten,
ɛ́ a Amɔ̃ tẽw dem sàwr a bɛ nʋɔr.
15A Sore na ɩ na
a Eziptɩ tẽw kʋ̃ɔ-kpɛ̃ɛ gbɛ́r kò.
Ʋ na vɛlɩ nɩ nũu cɔw a Efaratɩ man.
A ʋ pɩɛlʋ fãw na ɩ na ʋ bʋ́r
ɩ bà-gbɛ́ɛ ayopõi, bɛ na na tʋ̃ɔ́
mɩ́ ƴãw nafawr-ɓɛwlɩkɛl gãw nɩ a.
16Sɔ́r na be n be a ʋ nɩbɛ ŋmãa na cɛ a ƴãw,
a bɛl na na cãà vʋʋrɛ be a Asiiri tẽw a,
mɛ̃ a lɛ ʋ na tɩ be be a koro a Ɩsɩrayɛl nɩbɛ ƴãw,
a lɛn daar bɛ na tɩ yi a Eziptɩ tẽw a.
Currently Selected:
Ɩzayi 11: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
