Ɩzayi 10
10
A bɛlɩ dem na ɩrɛ a Sore suur ìre a
(Nyɛ̃ 5:8-24)
1Baw-bio dem'ɩ a bɛlɩ dem
na mɩ́ bin tub na bɛ tu a mɩnʋ a,
ɛ́ mɩ́ sɛb ƴãw nɛ́ɛ na waar'ɩ kpɩɛrʋ a!
2À à ŋá n'a a ƴɛ̀rʋ
bɛ mɩ́ dɩ n mɩnʋ a bãbàalbɛ ƴãw ɛ,
ɛ́ a ɩ̃ nɩ-bʋʋrɛ nan dem
bɛ mɩ́ nyɛ̃ a lɛ-na-tu-sɔr-a,
ʋ maalɩ a bɛ zie ɩ.
Bɛ mɩ́ zure nɩ a pɔw-kɔbɛ bome
ɛ́ farɛ a bi-kpebe dem.
3Bʋ̃ʋ n'ʋ nyɩ na ɩ a dɔwrʋ bibir,
a saa nɩ a sɛsɛb nãà wa yi
a zi-zãána ŋmʋrɛ waar a?
Ãa zie n'a nyɩ na zɔ cen tɩ nyɛ̃ a sõwfʋ?
Nyɩnɛ n'a nyɩ na bin a nyɩ na-bome?
4A gaso nɩbɛ tɛwr pʋɔ n'a nyɩ na gũu,
bɩɩ a kũuni sɔgɔ n'a nyɩ na lo a tẽw.
Ɛcɛ a na saa ɩ à à ŋá a,
a Sore suur cãà bɛ ɓãa ɩ,
a ʋ nũu cãà na zɛw.
A Asiiri tẽw nɩ a ʋ nãà baw-bio
5A Sore yere na:
Baw-bio páw nɩ a Asiiri tẽw,
ʋl na ɩ a ɩ̃ suur dakpuli-ŋmãa a.
A ɩ̃ su-yãyaar dabɔl'ʋ ʋ tɛr a ʋ nũú.
6Nɩ-bʋʋrɛ na bɛ tu m'a ƴãw n'a ɩ̃ tõ ʋ,
nɩbɛ na kʋrɛ mɛ̃ suur a ƴãw n'a ɩ̃ yel k'ʋʋ cen,
tɩ zà ɛ́ wob a bɛ na-bome,
tɩ nɛb nɛb bɛ mɛ̃ sɛ́ɛ zu mɛ̃mɛrɛ a.
7Ɛcɛ à ŋá bɛ n'a a Asiiri tẽw tɩ́ɛrɛ ɩ,
bʋ̃-yũo n'ʋ ʋ tɩ́ɛrɛ:
sãw-bɛrʋ tɛwr tɩ́ɛrʋ n'a ʋ tɛr,
ʋ ɩ nɩ-bʋʋr-yaga ta cãà ɩ.
8Ʋ yere na:
«A ɩ̃ zɛbr-nɩbɛ nɩ-bɛrɛ za bɛ ɩ na-mɩnɛ bɩɩ?
9Ɩ̃ bɛ ɩ a Kalno tẽ-kpɛ̃ɛ
mɛ̃ a lɛ ɩ̃ na ɩ a Karkemisɩ tẽ-kpɛ̃ɛ a ɩ?
Ɩ̃ bɛ ɩ a Hamatɩ tẽ-kpɛ̃ɛ
mɛ̃ a lɛ ɩ̃ na ɩ a Arpadɩ tẽ-kpɛ̃ɛ a ɩ?
Ɩ a Samaari mɛ̃ a lɛ ɩ̃ na ɩ a Damasɩ#10:9 A sɔ́rʋ a tẽ-bɛrɛ á ŋá na sɔ́r tu taa a, wule nɩ a lɛ a Asiiri tẽw zɛbr-nɩbɛ na tɩ waar a Zerizalɛm ƴãw, ɛ́ nɩr kʋ̃ tʋ̃ɔ́ piw bɛ a sɔ́r a. a ɩ?
10Ɩ̃ tʋ̃ɔ́ na zɛb de tɩbɛ naalʋ-ten,
a be a dasuli na yãwmɛ zuo
a Zerizalɛm nɩ a Samaari ten dem a.
11Ɩ̃ kʋ̃ tʋ̃ɔ́ ɩ a Zerizalɛm nɩ a ʋ tɩbɛ
mɛ̃ a lɛ ɩ̃ na ɩ a Samaari nɩ a ʋ tɩbɛ a ɩ?»
12A Sore wa tõ a ʋ ton baarɩ a Sɩyɔ̃ tãw zu nɩ a Zerizalɛm a, ʋ na ìr'ɩ a Asiiri tẽw nãà pɔ̀l-ɩb ƴãw nɩ a jɩ́rʋ ʋ na mɩ́ jɩ́r mɛ̃ nɩr bɛ lɛb ka be pʋɔ a ʋ ƴãw a. 13Bʋ̃ʋ n'ʋ vɛ̃, ʋ yel a:
«A alɩ bome nɛ za ɩ̃ na ɩ a,
a ɩ̃ fãw nɩ a ɩ̃ yã-bãwfʋ zũú n'a,
bʋ̃ʋ n'ʋ vɛ̃, ɩ̃ tɛr'ɩ yã.
Ɩ̃ ír'ɩ a nɩ-bʋʋrɛ tʋr-bɔwrɩ bɛr,
fa a bɛ na-bome,
ɛ́ siwri a na-mɩnɛ a bɛ dà-kɔwr zuru.
14Ɩ̃ de nɩ a nɩ-bʋʋrɛ na-bome
mɛ̃ lili-cow fʋ na ír a.
Ɩ̃ de nɩ bom za a tẽw zu,
mɛ̃ jɛlɛ na gã fʋ wob a,
ɛ́ nɩr za bɛ dam dam ɛ,
bɛ háa nʋɔr kõ ɩ.»
15A lɛr na pɔrɛ nɩ
a sob nɛ na cɩɛr'ɩ ʋ a zie bɩɩ?
A sɔ-nyɩmɛ na zɛwr'ɩ ʋ tʋɔra
a sob nɛ na ɩrɛ ʋ damnɛ a zie bɩɩ?
Mɛ̃ a dakpuli-ŋmãa n'ʋ ɩ
a sob nɛ na zɛw ʋ a ʋ damnɛ a,
bɩɩ mɛ̃ a dabɔl'ʋ zɛw
a sob nɛ na bɛ ɩ dàa bom a!
16Alɛ so a Sore Naaŋmɩn, a kpɛnʋ-za-sob
na ɩ a Asiiri tẽw ziir al na tɛr a a
na-bome siwri.
Bɛ na tõ n vũu ƴãw
a vɩɛlʋ na sãá a ƴãw,
a dɩrɛ mɛ̃ vũu-kpɛ̃ɛ na nyɔw dɩrɛ a.
17A Sore, a Ɩsɩrayɛl cãà, na lɩɛb'ɩ vũu.
A Naaŋmɩn na ɩ sõw a
na lɩɛb'ɩ vũu-zɛl nyɔw a gɔ-tuwr,
dɩ a bibi-been.
18Ʋ na sãw nɩ a tuw-vɩɛlɩ vɩɛlɩ
nɩ a tɩ-wɔnɩ za bɛr pelẽpelẽ.
A na ɩ na mɛ̃ bàal
a ƴã-gan na báarɛ a.
19A Asiiri tẽw tuw tɩɩr na cɛ nɩ zaa pʋrɩ,
kɛ̀ bibile na tʋ̃ɔ́ a sɔ́r.
A Ɩsɩrayɛl nɩbɛ ŋmãa bɛl na na cɛ a
20A ʋlɩ bibir nɛ a, a Ɩsɩrayɛl nɩbɛ na cɛ a, a Zakɔb nɩbɛ bɛl na cɩ̃ɛ a, kʋ̃ cãà bɔbr tɩɛrɛ a sob nɛ na ŋmɩɛr bɛ a zie ɩ. A Sore, a Ɩsɩrayɛl Naaŋmɩn na ɩ sõw a n'ʋ, bɛ na sɩrɩ de, ʋ ɩ a bɛ tɩɛrɛ. 21Ŋmãa na cɛ a na lɛb'a wa#10:21 Nyɛ̃ 7.3 nɩ a manʋ.. A Ɩsɩrayɛl nɩbɛ ŋmãa na cɛ a, na lɛb'a wa a Naaŋmɩn-Gãdaa zie. 22Ɛcɛ, Ɩsɩrayɛl i, a fʋ nɩbɛ saa tɩ yãwmɛ sɛw a kʋ̃ɔ-kpɛ̃ɛ nʋɔr biire a, nɩbɛ ŋmãa na cɛ a tɛwr nɛbɛ na lɛb wa a Sore zie. Bɛ yel'ɩ a kʋ-pàw-pɛr baarɩ, na na ɩ a mɩnʋ paalɩ a tẽw mɛ̃ man na paalɩ yi nɛ́ɛ a. 23A kʋ-pàw-pɛr a Sore Naaŋmɩn, a kpɛnʋ-za-sob, na yel à à ŋá a, ʋ na maal'ʋ nɩ a tẽw za pʋɔ.
Nyɩ ta zɔrɛ a Asiiri tẽw ɛ
24A lɛ so, à ŋá n'a a Sore Naaŋmɩn, a kpɛnʋ-za-sob, ƴɛ̀rɛ: «Ɩ̃ nɩbɛ ɛ, nyɩɩm na kpɩɛr a Sɩyɔ̃ a, nyɩ ta zɔrɛ a Asiiri tẽw na ŋmɩɛr'ɩ nyɩ a ʋ dakpuli-ŋmãa ɛ́ mɩ́ zɛw a ʋ dabɔl a nyɩ ƴãw mɛ̃ a Eziptɩ tẽw dem a koro za a ɩ. 25Bʋ̃ʋ n'ʋ vɛ̃, blã n'a cãà cɛ, zaa pʋrɩlɛ n'a cãà cɛ, ɛ́ a ɩ̃ suur a nyɩ ƴãw na baar'a, ʋ na baar'ɩ pelẽpelẽ.» 26Bʋ̃ʋ n'ʋ so, a Sore, a kpɛnʋ-za-sob, na zɛw nɩ a ʋ fʋba a Asiiri tẽw ƴãw, mɛ̃ a lɛ ʋ na tɩ ɩ a Madian tẽw dem ƴãw a Orɛvʋ pìir pɛr a. Ʋ na zɛw nɩ a ʋ dabɔl a kʋ̃ɔ-kpɛ̃ɛ zu, mɛ̃ a lɛ ʋ na tɩ ɩ a Eziptɩ tẽw dem ƴãw a#10:26 Madian tẽw dem zɛb-tʋ̃ɔ́fʋ a Orɛvʋ pìir pɛr: Nyɛ̃ Ƴɛ̀r-d 7.23-25. Dabɔl na zɛw a kʋ̃ɔ-kpɛ̃ɛ zu a: Nyɛ̃ Ety 14.15-22..
27A ʋlɩ bibir nɛ a,
ʋ na dɔw nɩ a tuor bɛr na dĩ a nyɩ bawŋmamɛ,
ɛ́ dĩ a nyɩ nyuru mɛ̃ ni-kʋ́ɔrɩ dàa a.
A dɔ̃ sob tarɛ na pɩɛlɛ a Zerizalɛm
A dɔ̃ sob dúor'ɩ a Samaari,
28ʋ tarɛ nɩ Ayatɩ tẽw ƴãw,
ʋ tuur'a tɔlɛ Migiron
ɛ́ bɛrɛ a ʋ tuor Mikɩmasɩ.
29Ʋ gãwnɛ nɩ a fʋɔla ɛ́ yere:
«Tɩ na gã nɩ Geva ìr.»
Dɛ̃bɩ̃ɛ ɩrɛ nɩ a nɩbɛ
bɛ màwr a Arama.
A nɩbɛ nyɔw nɩ zɔba a Givea,
a Sawul tẽ-kpɛ̃ɛ.
30Nyɩ lɔbr cɛlsɩ, Galim tẽw dem i!
Gùre fʋ tʋɔra, Laɩsa tẽw i!
Anatɔtɩ tẽw i, sɔ̀w!
31Madimena tẽw dem zɔrɛ na,
Gevim tẽw dem bɔbr'ɩ sɔwlʋ zie.
32A ʋlɩ bibir nɛ a, a dɔ̃ sob
na tɛw nɩ Nɔvʋ tẽw.
Ʋ vɛlɛ nɩ nũu cɔwr a Sɩyɔ̃ tãw,
a Zerizalɛm tãle.
33A Sore Naaŋmɩn, a kpɛnʋ-za-sob,
karɛ nɩ a wuli nɩ fãw.
Ʋ cɛ n a tɩ-kɛrɩ lɔb,
a al na kɛrɩ zuo a taabɛ a gã nɩ tẽw.
34Ʋ cɛ n a tuw pʋɔ va-pɔrɛ nɩ lɛr,
a Libã tẽw sɛɛdɩr tɩ-bɛrɛ gã nɩ tẽw.
Currently Selected:
Ɩzayi 10: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
