Oze 4
4
NAAŊMƖN YERE NƖ A ƖSƖRAYƐL
4—13
A Naaŋmɩn dɩrɛ nɩ nɩ a ʋ nɩ-bʋʋrɛ ƴɛ̀rʋ
1A Sore dɩrɛ nɩ nɩ a tẽw dem ƴɛ̀rʋ.
Ɩsɩrayɛl nɩbɛ ɛ, nyɩ bɛr wõ a lɛ a Sore na yere a:
«Yel-mɩŋa nɩ tɔ-nɔ̃wfʋ bɛ cãà a tẽw pʋɔ ɩ.
Nɩr za bɛ cãà bãw a mãa Naaŋmɩn ɛ.
2Ɛ́ ŋmɛ-ƴãw-taa nɩ ziri nɩ nɩ-kʋ
nɩ nyãnyuwlu nɩ pɩ̃ɔ-yele pãa pàw a ziir za.
Bɛ kʋrɛ nɩ a nɩbɛ suwle taa.
3Alɛ n'a so a tẽw ko ʋ za,
ɛ́ a ʋ nɩbɛ kõwne tɩ lãwnɩ a wɛ-dʋn nɩ a saa-zu lili.
A kʋ̃ɔ-kpɛ̃ɛ zʋ́mɛ́ tɛɛ za kʋ̃ cãà ɩ.»
A bàwr-maalbɛ sãwna
4Nɩ-sãsaralɛ bɛ n'ʋ bɛ na yel k'ʋʋ sãw na ɩ,
bɩɩ bɛ na zɛbr'ɩ ɛ.
Bàwr-maal-kara a, fʋ̃ʋ n'ʋ
ɩ̃ maalɛ nɩ a ƴɛ̀rʋ, a Sore n'ʋ yere.
5Fʋ na ŋmɩɛr'ɩ gbɛ́ɛ mʋ̃tɔ̃-tuo,
ɛ́ a ƴɛ̀r-manɛ mɩ̀ lãwnɩ fʋ ŋmɩɛr a gbɛ́ɛ a tɩ̃ɩsɔw.
Ɩ̃ na pàw nɩ a fʋ mã Ɩsɩrayɛl nʋɔr.
6A ɩ̃ nɩ-bʋʋrɛ báarɛ na, bɛ na bɛ bãw mɛ̃ a ƴãw.
Fʋ na bɛ bɔbr a ɩ̃ bãwfʋ a, ɩ̃ mɩ̀ na zawrɩ fʋ na bɛr,
ɛ́ fʋ kʋ̃ cãà ɩ a ɩ̃ bàwr-maalɛ ɩ.
Fʋ na yiiri a fʋ Naaŋmɩn wulu bɛr a,
a mãa mɩ̀, ɩ̃ mɩ̀ na yiir'ɩ a fʋ bibiir bɛr.
7A bàwr-maalbɛ za cɔ̃cɔ̃ maal'ɩ yel-bier sãw mɛ̃.
Ɩ̃ na ɩ n a bɛ yúor na yi a lɩɛbɩ vĩ.
8A ɩ̃ nɩ-bʋʋrɛ yel-bebe n'a bɛ guole nɩ bɛ tʋɔra#4:8 A yel-bebe dem mɩ́ tɩ maal'ɩ bàwr a bɛ yel-bebe suur-dɩ-kʋ̀b ƴãw. A bàwr-maalbɛ mɩ́ tɩ so a bàwr á ŋá nɛnɛ a mɩnɛ. A na ɩ à ŋá a, a yel-bebe dem wa yãwmɛ ɛ́ maalɛ a bagɛ a, a bàwr-maalbɛ nʋ̃ɔ̀ n'a. Nyɛ̃ Lev 6.19-22..
Bɛ bɛ nyɛrɛ a ɩ̃ nɩ-bʋʋrɛ sãwna zie ɩ.
9A bom nɛ na na ɩ a ɩ̃ nɩ-bʋʋrɛ a,
ʋl tɔr za n'ʋ na ɩ a bàwr-maalbɛ.
Ɩ̃ na dɔwrɩ bɛ na a bɛ cenu na bɛ vɩɛl a ƴãw,
ɩ̃ na yáa nɩ a bɛ ɩ-faar san.
10Bɛlɛ saa mɩ́ dɩrɛ sɛw ŋmɩn a,
bɛ bɛ be za na tɩw ɛ.
Bɛ na mɩ́ tu n a pɔw-yɛmɛ pùor,
ɛ́ kʋ̃ dɔw yɛ̀r ɛ.
Bʋ̃ʋ n'ʋ vɛ̃, bɛ bɛr'ɩ a mãa Sore ƴãwfʋ.
11A divɛ̃ tɩɩr wɔmɛ na na maalɩ vla a tɩɛrʋ
ɩ na a ɩ̃ nɩ-bʋʋrɛ bɛ bãw yã ɩ.
12Dàar tɩɩb zie n'a a ɩ̃ nɩ-bʋʋrɛ sowre bʋ̃-sowri.
Dakʋra n'ʋ wule bɛ bʋ̃-wuli!
Pɔw-yɛm ɩ-ɩrɩ yã bɔrɛ nɩ bɛ na.
A pɔw-yɛm ɩ-ɩrɩ zũú,
bɛlɛ nɩ a bɛ Naaŋmɩn bʋ́r'ɩ taa.
13Tan zu n'a bɛ mɩ́ do tɩ maalɩ a bàwr.
Tãli zu n'a bɛ nyɩwr
a tɩ-suur-zɔ̃-na-nyùur-vla-vla-a.
Sɛn, pepilie nɩ terebɛ̃tɩ tɩɩr ɓaarʋ
na maalɩ a al ƴãw a pile n'a bɛ mɩ́ be.
Lɛ so a nyɩ pɔwyaar na ɩrɛ mɛ̃ pɔw-yɛmɛ a,
ɛ́ a nyɩ biir-pɔwbɛ tone pɩ̃ɔ yel-bier tome.
14Ɛcɛ ɩ̃ kʋ̃ dɔwrɩ a nyɩ pɔwyaar
nɩ a nyɩ biir-pɔwbɛ a bɛ ɩ-ɩrɩ ƴãw ɛ.
Bʋ̃ʋ n'ʋ vɛ̃, a bàwr-maalbɛ tɛɛ za
mɩ́ tɛr'ɩ pɔw-yɛmɛ taw yi n pùor,
bɛlɛ nɩ ŋmɩmɛ yir pɔw-yɛmɛ nɛbɛ
lãwnɛ a bàwr bʋ̃-dɩrɩ.
Mɛ̃ a lɛ a zʋkpar na yel a:
“Nɩ-bʋʋrɛ na bɛ bãw yã a wɩɛrɩ bɛ loba zie.''
15«Ɩsɩrayɛl ɩ, à ŋá n'a fʋ tone a pɔw-yɛm tome.
A Zuda nãá nɩ̃ɛ mɩ̀ ta lo a sãwna been nɛ pʋɔ ɩ!
Nyɩ ta mɩ́ cen a Gilgal ɛ,
nyɩ ta mɩ́ do a Bɛtɩ-Awɛn#4:15 Bɛtɩ-Awɛn: A pɛr lɛ kɛ́ faalʋ yir. Ɛcɛ a tib daar a, a zie ŋa tɩ dɩ na kɛ́ Betɛl, a pɛr lɛ kɛ́ Naaŋmɩn yir. A ɩ-faar'a wa so bɛ kpɔwrɛ bʋɔlɛ a zie ŋa a faalʋ yir. ɛ,
ɛ́ ta mɩ́ pɔ yel ɛ: “A Sore na vʋʋrɛ a...!''»
16A Ɩsɩrayɛl tɩ tõ n zu-kpɛ̃w tome mɛ̃ na-kʋ́ɔra bɛ na ƴãwnɛ dàa a nyũumɩ́ ʋ bɛ sàwr a. Bʋnʋ ƴãw n'a a Sore na kaarɛ bɛ zie mɛ̃ píir bɛ na kparɛ cere nɩ dʋn mʋ̃ɔ 'wɔbrʋ zie a? 17A Efarayim nɩbɛ nɩ tɩbɛ n'a lãwnɛ, nyɩ bɛr bɛ! 18Bɛlɛ wa nyũ tɩ kuoli a, nɩ-fa-ɩb'a cɛ, a bɛ nɩ-bɛrɛ nɔnɛ nɩ a vĩ yele. 19Sɛsɛb-pɩl na ɓáw bɛ na cere nɩ, ɛ́ a bɛ bàwr na ɩrɛ bɛ nɩ vĩ.
Currently Selected:
Oze 4: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
