Habakukɩ 2
2
1Mãa a, ɩ̃ na àr'ɩ a ɩ̃ zi-gùre àrʋ zie,
ɩ̃ na àr'a gù mɛ̃ zi-piwre na àr a dacĩ-kpɛ̃ɛ zu a,
k'ɩ̃ɩ tʋ̃ɔ́ bãw a ʋlɩ bom nɛ a Naaŋmɩn na na yel kʋ̀ m a,
nɩ a lɛ ʋ na na sɔw a ɩ̃ kpɩɛrʋ kʋ̀ m a.
A nɩ-mɩŋa nɩ a sob nɛ na dɔwrɛ a ʋ taabɛ a yele
2A Sore tɩ sɔw mɛ̃ nɩ à ŋá:
Sɛb a yel ŋa ɩ̃ na wule fʋ a,
wi ʋ́ ƴãw dà-pɛwli zu, bɛ mɩ́ tʋ̃ɔ́ kanɩ ʋ mɔlɛ.
3A daar ʋl a yel ŋa na na ɩ a, bɛ ta sɛr ɛ.
Ɛcɛ a ʋ yel-mɩŋa na sãá nɩ a ʋ daar.
Bɛr tɩɛrʋ ɛ́ gùre, alɛ saa sãá mɛ̃ a cɛlɛ na a:
a ʋlɩ bom nɛ ɩ̃ na yere a na ta na,
bʋnʋ bɛ ka be ɩ, a bɛ lɛb kɔwrɛ ɩ.
4Sɛb yel: a tɩɛr-faa sob fãw siwre na,
ɛcɛ a nɩ-mɩŋa vʋʋrɛ na
ʋ na tu a Naaŋmɩn bɛ lɛb pùor a zũú.
5Sɩza n'a, a tɛra bɛ vɩɛl ɛ,
a pɔ̀lʋ dem bɛ bãw pɩ̃ɛnʋ towtow ɛ,
bɛ dɩrɛ nɩ gbogbo mɛ̃ a kpɩmɛ tẽw a,
bɛ bɛ tɛr sɛwfʋ ɛ, mɛ̃ a kũu a,
bɛ zɛbr'a dier a ten za, bɛ so nɩ a nɩ-bʋʋrɛ za.
6Ɛcɛ a nɩ-bʋʋrɛ bɛl bɛ na zɛb tʋ̃ɔ́ a,
kʋ̃ lãw taa bɛ za lɔbr zʋkpaɩ kʋ̀rɛ bɛ, ɛ́ ɩrɛ bɛ laar ɛ?
«Ŋmɛ-ƴãw» anũu
Nyɛ̃ a lɛ bɛ na na yere a:
Baw-bio páw nyɩ na!
Nyɩ wobr'ɩ bome nyɩ na bɛ so a,
gbone taa na tɩ ta n debor?
A nyɩ san tɩbrʋ dɔwlɛ na cere.
7A nyɩ samɛ dem kʋ̃ʋ wa ùr wa ɩ?
A bɛlɩ dem na na dam dam nyɩ a, bɛ kʋ̃ ìr bɩɩ?
Bɛ mɩ̀ na fa n a nyɩ bome.
8Nyɩ fá n nɩ-bʋʋr-yaga,
a nɩ-bʋʋrɛ bɛl na cɛ a mɩ̀ na fá nyɩ na.
A nɩsaal zɩ̃ɩ nyɩ na ɩ a cir a ƴãw,
a po-to-fãw-ɩb nyɩ na ɩ,
a tẽw za, a tẽ-bɛrɛ nɩ a nɩbɛ na kpɩɛr a pʋɔ a ƴãw.
9Baw-bio páw nyɩ na!
Nyɩ páwr'ɩ dɔwlɛ na bɛ sɛw a
kʋ̀rɛ a nyɩ nɩbɛ, kɛ́ nyɩ tʋ̃ɔ́ tɛr àrʋ zie na zɛw a,
a kpɩɛrʋ taa páwr nyɩ ɛ.
10A lɛ nyɩ na tɩɛrɩ a,
vĩ n'a a waar'ɩ a nyɩ yir dem ƴãw:
a nɩ-bʋʋr-yaga yaga nyɩ na kʋ pàw pɛr a,
a nyɩɩm mɩŋa nyɔ-vʋʋrʋ n'ʋ nyɩ sãw.
11A dacine kʋsɛbɛ tɛɛ za
na cɩɩrɛ nɩ a nyɩ sãwna,
ɛ́ a dĩo wɛwr sɔwr a.
12Baw-bio páw nyɩ na!
A tẽ-bɛrɛ tɛra a, nyɩ mɩ́ ɩ na a yi
a nɩbɛ nyɩ na kʋrɛ ɛ́ dɔwrɛ a zie.
13Alɛ so, vũu so a nɩ-bʋʋrɛ tome na dɩ,
ɛ́ a ten ten nɩbɛ bàlɛ bɛ tʋɔra zawla.
À á ŋá za a, a Sore kpɛnʋ-za-sob zie bɛ n'a a yi ɛ?
14Yel-mɩŋa, a Sore yúor-vɩɛlʋ-danʋ
a nɩbɛ na na bãw a, na paal'ɩ a tẽw,
mɛ̃ a lɛ a kʋ̃ɔnɩ na paalɩ pàw a kʋ̃ɔ-kpɛ̃ɛ a.
15Baw-bio páw nyɩ na!
Nyɩ mɩ́ ƴãw nɩ a nyɩ taabɛ bɛ nyũ dãa
na bɛ vɩɛl, ɛ́ ɩ mɛ̃ lɔw a,
kɛ́ bɛ kuoli yaarɩ a bɛ bʋ̃-suuri, nyɩ nyɛ̃ a bɛ faalʋ.
16Vĩ n'a nyɩ ƴãwnɛ nyɩ tʋɔra,
yúor bɛ n'ʋ nyɩ páwr ɛ.
Nyɩ mɩ̀ nyũ a, ɛ́ wul a nyɩ faalʋ!
A Sore na fɛr nyɩ na ƴãw nyɩ mɩ̀ nyũ
a ʋ suur koli-nyúura pʋɔ divɛ̃ za:
a ƴãwfʋ nyɩ na nyɛrɛ a, na lɩɛb'ɩ vĩ.
17A yele nyɩ na sãw a Libã tẽw a,
na lɛb'a lo a nyɩ zu.
Nyɩ sãw nɩ dʋn faa faa,
dʋn mɩ̀ na ƴãw nyɩ nɩ pʋl-vʋ̃ɔ!
À á ŋá za na ta na, a nɩsaalɛ zɩ̃ɩ nyɩ na cir a ƴãw,
nɩ a po-to-fãw-ɩb nyɩ na ɩ a tẽw za,
a tẽ-bɛrɛ nɩ a nɩbɛ na kpɩɛr a pʋɔ a ƴãw.
18A tɩbɛ yel-ɩra n'ɩ bo a tɩɩb-maalɛ
na mɩ́ maal'a bin a?
Kure bʋ̃-maalɩ na mɩ́ ŋmarɛ ziri
bɛ mɩ́ sàw de a tɛwr'a.
Bʋ̃ʋ ƴãw n'a a nɩsaalɛ na mɩ́ ƴãw a ʋ tɩɛrʋ,
a tɩbɛ á ŋá ƴãw na bɛ tɛr nʋɔr ƴɛ̀rɛ,
ɛ́ ɩ ʋl mɩŋa n'ʋ maal'a a?
19«Baw-bio páw nyɩ na!
Nyɩ mɩ́ yel'ɩ dà-ŋmãa: “Ìr, ta gúre ɩ!”
Ɛ́ yel kʋsɩɛr na gã bɛ ƴɛ̀rɛ a: “Ìr àr!”
Ɛcɛ alɛ n'ɩ a ŋan kʋ̃ tʋ̃ɔ́ wul nyɩ bom za nyɩ bãw ɛ.
Bɛ na saa nyɩl salm-zɩɛ nɩ salm-pla pàw a a,
a bɛ vʋʋrɛ towtow ɛ.
20Ɛcɛ a Sore ʋl be n a ʋ yir-sõw pʋɔ.
A tẽ-daa za nɩbɛ, bɛ ŋmãa vʋʋrʋ a ʋ niŋé!»
Currently Selected:
Habakukɩ 2: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
