Ezekɩɛl 37
37
A Ezekɩɛl nyɛ̃ nɩ a Sore ʋ lɛb kʋ̀ kũuni a nyɔ-vʋʋrʋ
1A Sore fãw tɩ siw nɩ a ɩ̃ zu, ɛ́ a ʋ Vʋʋrʋ tɛr mɛ̃ cen nɩ tɩ bin bà-fʋɔl-yɛlʋ na ɩ kɔbɛ tɛwr a pʋɔ. 2A Sore tɩ ɩ na ɩ̃ cɔlɩ viiri koli a zie ʋl. A kɔbɛ tɩ yãwmɛ na bɛ dɩ vuo ɩ, ɛ́ ko pɛlɩ a za. 3Lɛ n'a a Sore tɩ sowri mɛ̃: «Yel kʋ̀ m, nɩsaal bie e, a kɔbɛ á ŋá na tʋ̃ɔ́ na lɛb vʋʋrɛ bɩɩ?» Ɩ̃ sɔw ʋ: «Sore Naaŋmɩn i, fʋ̃ʋ n'ʋ bãw!» 4Ʋ lɛb yel: «Ƴɛ̀r naaŋmɩn-ƴɛ̀r-manɛ ƴɛ̀rʋ kʋ̀ a kɔbɛ á ŋá. Yel a: Kɔbɛ na ko pɛlɩ a, nyɩ bɛrɛ wone a Sore ƴɛ̀rʋ! 5À ŋá n'a a Sore Naaŋmɩn yere kʋ̀rɛ nyɩ: Ɩ̃ na ɩ n nyɔ-vʋʋrʋ pɩɛlʋ kpɛ a nyɩ pʋɔ ɛ́ nyɩ na vʋʋrɛ na. 6Ɩ̃ na ƴãw nɩ jiile a nyɩ zu, ɩ̃ na ɩ n ƴã-gã-nɛn bul a nyɩ zu, ɩ̃ na ɩ n gán pàw nyɩ. Ɩ̃ na ƴãw nyɩ nɩ nyɔ-vʋʋrʋ pɩɛlʋ, ɛ́ nyɩ na vʋʋrɛ na. Lɛ n'a nyɩ na bãw kɛ́ mãa n'ɩ a Sore.» 7Ɩ̃ tɩ ƴɛ̀r'ɩ a naaŋmɩn-ƴɛ̀r-manɛ ƴɛ̀rʋ kʋ̀ a kɔbɛ mɛ̃ a lɛ a Sore na tɩ ƴãw a nʋɔr kʋ̀ m k'ɩ̃ɩ ƴɛ̀r a. Ɩ̃ na tɩ ƴɛ̀rɛ a, ɩ̃ tɩ wõ n gɔmɛ, bome na damnɛ a gɔmɛ: A kɔbɛ tɩ taw na nyɔw taa. 8Ɩ̃ tɩ jɩ́r'a nyɛ̃ jiile a sãá a zu. Ƴã-gã-nɛn nɩ gán tɩ pàw a na. Ɛcɛ a bɛ tɩ tɛr a nyɔ-vʋʋrʋ pɩɛlʋ ɛ. 9Lɛ n'a a Sore tɩ yel mɛ̃: «Nɩsaal bie e, ƴɛ̀r a vʋʋrʋ zie a ɩ̃ yúor ƴãw, yel ʋ à ŋá: “Vʋʋrʋ ʋ, à ŋá n'a a Sore Naaŋmɩn yere kʋ̀rɛ fʋ: Yi a tẽw lõbowe anaar wa fu a kũuni á ŋá zu a lɛb vʋʋrɛ.”» 10Ɩ̃ tɩ ƴɛ̀r'ɩ a ƴɛ̀rʋ á ŋá a Sore yúor ƴãw, mɛ̃ a lɛ ʋ na tɩ ƴãw a nʋɔr kʋ̀ m a. Lɛ n'a a Vʋʋrʋ tɩ kpɛ a kũuni pʋɔ a lɛb vʋʋrɛ. A tɩ àr'ɩ saaƴẽwn, ɩ zɛbr-nɩbɛ na bɛ dɩ vuo a.
11A Sore tɩ lɛb'a yel mɛ̃: «Nɩsaal bie e, a kɔbɛ á ŋá a, a Ɩsɩrayɛl yir dem za nɛbɛ. Bɛl mɩŋa mɩ́ yere na: “A tɩ kɔbɛ ko na pɛlɩ, a tɩ tɩɛrʋ wɛ na, tɩ kpi na.” 12Lɛ so, ƴɛ̀r a ƴɛ̀rʋ á ŋá a ɩ̃ yúor ƴãw: A mãa Sore Naaŋmɩn, ɩ̃ na 'lawr'ɩ a nyɩ bɔwrɩ ɛ́ ɩ nyɩ yi a pʋɔ, a nyɩɩm, a ɩ̃ nɩ-bʋʋrɛ. Ɩ̃ na lɛb'a tɛr nyɩ cen nɩ a Ɩsɩrayɛl tẽw. 13A lɛn daar mãa wa 'lawrɩ a nyɩ bɔwrɩ, ɛ́ ɩ nyɩ yi a pʋɔ a, a nyɩɩm ɩ̃ nɩ-bʋʋrɛ, nyɩ na bãw na kɛ́ mãa n'ɩ a Sore! 14Ɩ̃ na ƴãw nyɩ nɩ a ɩ̃ Vʋʋrʋ ɛ́ nyɩ na vʋʋrɛ na. Ɩ̃ na ƴãw nyɩ nɩ a nyɩ tẽw. Lɛ n'a nyɩ na bãw k'aa mãa Sore a, ɩ̃ mɩ́ ƴɛ̀r'a ɛ́ tu a lɛ ɩ̃ na yel a. A mãa Sore Naaŋmɩn n'ʋ yere.»
A Sore na ɓã n a Ɩsɩrayɛl naalʋ-ten ayi taa
15A Sore tɩ yel mɛ̃ na: 16«A fʋ̃ʋ nɩsaal bie, de dali-ŋmãa ɛ́ sɛb a ƴɛ̀r-bie á ŋá ƴãw a ʋ zu: “Zuda nɩ a Ɩsɩrayɛl naalʋ-tẽw ŋa nɩbɛ.” Al pùorí, de dali-ŋmãa-yũo ɛ́ sɛb a ʋ zu: “Zuzɛb (bɩɩ Efarayim) nɩ a Ɩsɩrayɛl naalʋ-tẽw ŋa nɩbɛ#37:16 Zuda: A pɛr lɛ k'aa saa-pɛrɩ́-dʋrʋ-lowr naalʋ-tẽw, nyɛ̃ 1Na 12 nɩ 13. — Zuzɛb: A Efarayim sãà n'ʋ, ɛ́ ɩ a saa-pɛrɩ́-gʋba-lowr naalʋ-tẽw dɔwlʋ a Asiiri tẽw dem na sãw bɛr a Yeezu Kɩrɩta na bɛ tɩ wa sɛr a yome 721 daar a. .” 17De a dali-ŋmaarɛ á ŋá cow taa a ɩ dali-ŋmãa been a fʋ nũú. 18A fʋ tẽ-bi-taabɛ na sowri fʋ na kɛ́ fʋ man a yel ŋa pɛr kʋ̀ bɛ. 19Fʋ na sɔw bɛ na k'aa mãa Sore Naaŋmɩn yere nɩ à ŋá kʋ̀rɛ bɛ: Ɩ̃ na de nɩ a dali-ŋmãa ʋl na ɩ a Zuzɛb nɩ a Ɩsɩrayɛl naalʋ-tẽw ŋa nɩbɛ a. Ɩ̃ na de ʋ na ƴãw lãwnɩ a dali-ŋmãa ʋl na ɩ a Zuda naalʋ-tẽw bãwfʋ a. A ɩ̃ nũú a, a za ayi na ɩ n dali-ŋmãa been.
20A fʋ̃ʋ nɩsaal bie, tɛr a dali-ŋmaarɛ al zu fʋ na sɛb a, a fʋ nũú, nɩr za tʋ̃ɔ́ nyɛ̃ a. 21Al pùorí, yel kʋ̀ bɛ a lɛ a mãa Sore Naaŋmɩn na yere a: Ɩsɩrayɛl nɩbɛ ɛ, ɩ̃ na ír nyɩ nɩ a nɩ-bʋʋrɛ bɛl sɔgɔ nyɩ na cen a. Ɩ̃ na ɓã nyɩ nɩ taa ɛ́ tɛr nyɩ lɛb wa n a nyɩ tẽw. 22Ɩ̃ na ɩ na nyɩ ɩ nɩ-bʋʋr-been a Ɩsɩrayɛl tan zu. Nyɩ za na tɛr'ɩ na-been. Nyɩ kʋ̃ cãà ɩ ten ayi ɛ, ɛ́ kʋ̃ lɛb bʋ́r ɩ naalʋ-ten ayi ɛ. 23Nyɩ kʋ̃ lɛb dɛw nyɩ tʋɔra bɛr a ŋmɩn-bɛlɛbɛlɛ puoru zũú, a ɩb na bɛ maal'ɩ wob a, nɩ a sãwna bʋʋrɛ bʋʋrɛ za zũú ɛ. Ɩ̃ na faa nyɩ nɩ a yel-bebe al za nyɩ na maalɩ a ɩ̃ zie a pʋɔ. Ɩ̃ na ɩ na nyɩ lɛb vɩɛl. Nyɩ na ɩ n a ɩ̃ nɩ-bʋʋrɛ ɩ̃ɩ ɩ a nyɩ Naaŋmɩn. 24A ɩ̃ tõ-tõ-bie Daviir'ʋ na ɩ a nyɩ nãà. Ʋ na ɩ n a pi-cɩ̃ɩn-been a nyɩ za ƴãw. Nyɩ na sàwr'ɩ a ɩ̃ nɛ́ɛ, ɛ́ tɛr a tub ɩ̃ na ƴãw kʋ̀ nyɩ a tuur. 25Nyɩ na kpɩɛr'ɩ a tẽw ʋl ɩ̃ na kʋ̀ a ɩ̃ tõ-tõ-bie Zakɔb a pʋɔ, a be a nyɩ sãàkʋm-kore na kpɛ a. Nyɩ na kpɛ n a be tɩ kɔwrɩ, a nyɩɩm, a nyɩ bibiir nɩ a nyɩ yan. A ɩ̃ tõ-tõ-bie Daviir'ʋ na ɩ a nãà na dɩrɛ a naalʋ a nyɩ zu a kʋralɛ#37:25 Nyɛ̃ 34.23 nɩ a manʋ. . 26Ɩ̃ na maal'ɩ nyɩ nɩ ƴã-ɓaarʋ wõ-taa na na be kʋralɛ a. Ɩ̃ na ƴãw nyɩ nɩ a tẽw ŋa pʋɔ ɛ́ ɩ nyɩ yãwmɛ. Ɩ̃ na ɩ n a ɩ̃ zi-sõw be a nyɩ sɔgɔ kʋralɛ. 27Ɩ̃ na kpɩɛr'ɩ a nyɩ sɔgɔ. Ɩ̃ na ɩ n a nyɩ Naaŋmɩn ɛ́ nyɩ ɩ a ɩ̃ nɩ-bʋʋrɛ. 28A lɛn daar a ɩ̃ zi-sõw nãà wa be a nyɩ sɔgɔ kʋralɛ a, a nɩ-bʋʋr-yoru na bãw na k'ɩ̃ɩ ɩ n a Sore, nɩ k'ɩ̃ɩ ka n nũu ƴãw a Ɩsɩrayɛl a ɩ̃ tome ƴãw.»
Currently Selected:
Ezekɩɛl 37: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
