Ezekɩɛl 38

Naaŋmɩn-ƴɛ̀r-manɛ ƴɛ̀rʋ na ƴɛ̀r Gɔgɩ ƴãw a

1A Sore tɩ yel mɛ̃ na: 2«A fʋ̃ʋ nɩsaal bie, lɩɛb a fʋ niwn cɔw a Gɔgɩ. A Tubal nɩ a Mesɛkɩ na be a Magɔgɩ tẽw a nɩ-bʋʋrɛ nɩ-kpɛ̃ɛ kpɛ̃ɛ za n'ʋ. Ƴɛ̀r a ɩ̃ yúor ƴãw a ʋ ƴãw#38:2 Tubal nɩ Mesɛkɩ: Nyɛ̃ 27.13 nɩ a manʋ. — Gɔgɩ nɩ Magɔgɩ: Nyɛ̃ Yzt 10.2-3. A Gɔgɩ yúor nɩ a Magɔgɩ tẽw yúor ɩ n a Naaŋmɩn nɩ-bʋʋrɛ dɔ̃ dem. Nɩr kʋ̃ tʋ̃ɔ́ wul a be a na be a ɩ. . 3Yel ʋ: À ŋá n'a a Sore ƴɛ̀rɛ: Ɩ̃ na ìr'ɩ a fʋ ƴãw, Mesɛkɩ nɩ Tubal ten nɩ-bʋʋrɛ nɩ-kpɛ̃ɛ kpɛ̃ɛ za a. 4Ɩ̃ na ƴãw nɩ bamɛ a fʋ yagɛ ƴãw ɛ́ vɩrɛ fʋ nɩ fãw. Ɩ̃ na ɩ na fʋ yi a fʋ tẽw, fʋ̃ʋ nɩ a fʋ zɛbr-nɩbɛ za: wie nɩ wi-zɔmnbɛ na su bʋ̃-suur-vɩɛlɩ vɩɛlɩ a. Nyɩ na ɩ n sojarɩ yaga yaga na tɛr zɛbr-kur-pãgalɩ nɩ zɛbr-sɔ-bɛrɛ a. 5Pɛrsɩ, Etiopi nɩ Putɩ sojarɩ na tɛr'ɩ zɛbr-kur-pãgalɩ bɛ za, ɛ́ vɔblɩ zɛbr-kpawʋʋr lãwnɩ fʋ cen. 6Gomɛɛr tẽw nɩ a ʋ zɛbr-nɩbɛ za, Bɛtɩ-Togarma tẽw na wɩɛr tɩ be a saa-pɛrɩ́-gʋba-lowr za a nɩ a ʋ zɛbr-nɩbɛ za na lãwnɩ fʋ na cen, de nɩ nɩ-bʋʋr-yoru na yãwmɛ a. 7Cɔbrɩ fʋ mɩŋa vla, fʋ̃ʋ nɩ a zu-sɛbla ŋa za fʋ na ɓã taa a fʋ zie a. Fʋ̃ʋ n'ʋ na dɩrɛ nɩ-kpɛ̃ɛnʋ a bɛ zu. 8Ka nɩ yome yaga, a na na cɛlɩ cɛlɩ a, ɩ̃ na ɩ na fʋ cen tɩ zɛb'ɩ a Ɩsɩrayɛl tẽw. A lɛn daar a, a bɛlɩ dem na kpɩɛr a ʋ pʋɔ a na cɩ̃ɛ nɩ a zɛbr zie. Bɛ na yi n a ten al bɛ na tɩ kpɩɛr a pʋɔ. Bɛ na ɓã n taa a Ɩsɩrayɛl tẽw tan zu nɩbɛ na bɛ tɩ kpɩɛr a daar zãá a. Bɛlɛ wa yi a nɩ-bʋʋr-yoru zie a, bɛ za na vʋʋrɛ na nɩ ƴã-ɓaarʋ. 9A fʋ̃ʋ, a fʋ zɛbr-nɩbɛ nɩ a fʋ bárɩ yaga a, nyɩ na zɛb'ɩ bɛ na. Nyɩ na lo n a bɛ zu mɛ̃ saa-sɛsɛb a, nyɩ na yɛ́r'a pàw a bɛ tẽw mɛ̃ zũzuwe tãw a.

10A mãa Sore Naaŋmɩn yere na, a daar ŋa wa ta a, tɩɛr-yaga na waar'ɩ a fʋ zu, ɛ́ fʋ na tɩɛr'ɩ faa maalʋ tɩɛrʋ. 11Fʋ na yel'a kɛ́ fʋ na zɛb'ɩ nɩ ƴã-ɓaarʋ nɩbɛ na kpɩɛr tẽw bɛ na bɛ mɛ dacine viiri koli, ɛ́ bɛ pàw ʋ nɩ pamɛ na tɛr dà-jɩ̀rɩ́ a. 12Fʋ na cen nɩ a be kɛ́ fʋ tɩ de zɛbr na-bome ɛ́ za. Fʋ na tɩ zɛb'ɩ nɩ nɩbɛ na lɛb kpɩɛr tẽ-bɛrɛ bɛ na tɩ dãw sãw bɛr a. Bɛ yi n tẽ-yoru wa ɓã taa. Bɛ tɛr'ɩ dʋn nɩ na-bome, bɛ kpɩɛr'ɩ a tẽ-daa sɔwlɩsɔw#38:12 Tẽ-daa sɔwlɩsɔw: A Zerizalɛm'ʋ bɛ yere a ka. Nyɛ̃ 5.5. . 13A bɛlɩ dem na kpɩɛr Saba nɩ Dedan ten a, a Tarsisɩ tẽw nɩ a tẽ-bɛr-kpɔwlɩ yɛ-yɛrbɛ na sowre fʋ na: “A bome zab ƴãw n'a fʋ ɓã a fʋ zɛbr-nɩbɛ taa bɩɩ? Salm-pla nɩ salm-zɩɛ, dʋn nɩ na-bome deb ƴãw n'a bɩɩ? Bɩɩ a zɛbr bome deb ƴãw n'a?”

14A fʋ̃ʋ nɩsaal bie, ƴɛ̀r naaŋmɩn-ƴɛ̀r-manɛ ƴɛ̀rʋ a ɩ̃ yúor ƴãw kʋ̀ a Gɔgɩ: À ŋá n'a a Sore Naaŋmɩn ƴɛ̀rɛ: A lɛn daar a ɩ̃ nɩ-bʋʋrɛ Ɩsɩrayɛl nãà wa vʋʋrɛ nɩ ƴã-ɓaarʋ a, fʋ na ìr'a lo a sɔ́r. 15Fʋ na yi n a fʋ tẽw na wɩɛr tɩ be a saa-pɛrɩ́-gʋba-lowr a wa nɩ tẽ-yaga sojarɩ. Nyɩ za na zɔm'ɩ wie, nyɩ na yãwmɛ na bɛ dɩ vuo ɩ, ɛ́ nyɩ na ɩ n zɛbr-nɩbɛ na kpɛmɛ a. 16Fʋ na wa na wa zɛb'ɩ a ɩ̃ nɩ-bʋʋrɛ Ɩsɩrayɛl, ɛ́ fʋ na pàw nɩ a ʋ tẽw mɛ̃ zũzuwr na pàw a tẽw a. A na cɛlɩ nɩ yaga ɛ́ à á ŋá wa bãw ɩ. Ɩ̃ na ƴãw nɩ a fʋ̃ʋ Gɔgɩ fʋ cen tɩ zɛb'ɩ a ɩ̃ tẽw, a nɩ-bʋʋr-yoru tʋ̃ɔ́ bãw mɛ̃ a lɛn daar ɩ̃ nãà wa wul a ɩ̃ sonu a bɛ mimirí a fʋ̃ʋ Gɔgɩ zũú a.

17À ŋá n'a a mãa Sore Naaŋmɩn yere: A koro za a, ɩ̃ tɩ ƴãw na a ɩ̃ tõ-tõ-biir, a Ɩsɩrayɛl tẽw naaŋmɩn-ƴɛ̀r-manbɛ, ƴɛ̀r a fʋ ƴɛ̀rʋ. Yome yaga ƴãw a, bɛ tɩ hieri na k'ɩ̃ɩ na ɩ na fʋ cen tɩ zɛb'ɩ a ɩ̃ nɩ-bʋʋrɛ Ɩsɩrayɛl. 18Ɛcɛ, Gɔgɩ i, a ʋlɩ bibir nɛ fʋ nãà wa zɛb'ɩ a Ɩsɩrayɛl a, ɩ̃ na nyɛ̃ nɩ suur mab, a mãa Sore Naaŋmɩn n'ʋ yere. 19A ɩ̃ su-tʋlʋ kpãkpã pʋɔ a, ɩ̃ pɔ na: a ʋlɩ bibir nɛ a, a tẽsɔw-kɔbr na dam'ɩ a Ɩsɩrayɛl tẽw. 20A man zʋ́mɛ́, a saa-zu lili, a wɛ-dʋn, a wɩɩr na vure a tẽsɔw a nɩ a nɩsaalbɛ na be a tẽw zu a, bɛ za na màwr'ɩ dɛ̃bɩ̃-mawfʋ a ɩ̃ niŋé. A tan na ƴɛ́r'a siw, a pìe na lo n tẽw, dacin kãw za kʋ̃ àr ɛ#38:20 A Naaŋmɩn ƴɛ̀rʋ-dɩb bibir yele n'ɩ à á ŋá bɛ na manɩ a. Nyɛ̃ Zer 4.24, Zow 4.16.. 21A ɩ̃ tan za zu a, ɩ̃ na zɛb'ɩ fʋ na, Gɔgɩ i, a mãa Sore Naaŋmɩn n'ʋ yere. A fʋ sojarɩ na lɛb'a ŋmɛlɩ kʋ taa. 22Ɩ̃ na dɔwrɩ fʋ na nɩ jɛ̀lmɛ̃ bàalʋ na nyɔwr nɩbɛ lʋɔrɛ a, ɛ́ bɛr fʋ fʋ kpi zɛbr zie. Ɩ̃ na ɩ na sa-zʋba mĩ, sa-bi-kube lo, cirbi na nyɔw vũu a siw a fʋ zu, a fʋ zɛbr-nɩbɛ zu nɩ a nɩ-bʋʋr-yaga na lãwnɩ fʋ a zu. 23À ŋá n'a ɩ̃ na wul a nɩ-bʋʋrɛ za k'ɩ̃ɩ sɩrɩ na ɩ Naaŋmɩn, ɛ́ bɛ na bãw na kɛ́ mãa n'ɩ a Sore.»

Currently Selected:

Ezekɩɛl 38: DBDC

Highlight

Copy

Compare