Ezekɩɛl 1

A SORE BƲƆL'Ɩ A EZEKƖƐL A Ʋ TOME ƳÃW

1—3

A Sore wul'ɩ ʋ tʋɔra a Ezekɩɛl

1A ɩ̃ yome lɩzɛr'ɩ pie sob, a cuwr anaar sob, a bibie anũu sob, a mãa Ezekɩɛl na ɩ a bàwr-maalɛ Buuzɩ bidɛb a, ɩ̃ tɩ pʋɔ nɩ a Zifʋ mɩnɛ bɛl bɛ na tɩ diw cen nɩ a pʋɔ, a Kebaar man nʋɔr. Ɩ̃ tɩ nyɛ̃ nɩ a salom ʋ yuo, ɛ́ a Naaŋmɩn tɩ tɩr bʋ̃-nyɛrɩ kʋ̀ m ɩ̃ nyɛ̃. 2A nãà Yoyakin diw-cenu yome anũu sob tɩ n'a#1:2 Nyɛ̃ 2Na 24.8-17 nɩ 2Bi-yel 36.9-10. . 3A Babɩlɔn tẽw pʋɔ, a Kebaar man nʋɔr, a Sore tɩ ƴɛ̀r'ɩ a ɩ̃ zie, a mãa Ezekɩɛl, na ɩ a bàwr-maalɛ Buuzɩ bidɛb a. Be n'a a Sore fãw tɩ siw a ɩ̃ zu.

4Bom ŋa n'ʋ ɩ̃ tɩ nyɛ̃: sɛsɛb-pɩl tɩ yi n a saa-pɛrɩ́-gʋba-lowr waar'ɩ zũzuwr-kpɛ̃ɛ cãà na viiri koli a. Saa-nyɩwrʋ tɩ yire nɩ a ʋ ziir za. A ʋ sɔwlɩsɔw tɩ nyɔw nɩ vũu dɩrɛ mɛ̃ kure na nyɩwrɛ a. 5A tɩ ɩ na mɛ̃ bʋ̃-vʋʋrɩ anaar'a be a sɔwlɩsɔw a. A tɩ ŋmɛ̃ na taa nɩ nɩsaalbɛ. 6A bʋ̃-vʋʋrɩ á ŋá kãw za tɩ tɛr'ɩ niŋe anaar nɩ pɩgɛ anaar. 7A gbɛ́ɛ tɩ tori na, a gbɛ-ceni tɩ ŋmɛ̃ na taa nɩ nále nafɩlɛ, ɛ́ tɩ nyɩwrɛ mɛ̃ kur-zɩɛ bɛ na kàr a. 8A pɩwr za pile a, nɩr nũu tɩ be n be. A nuru á ŋá tɩ lɩɛb'a tori a lowe anaar mɛ̃ a niŋe nɩ a pɩgɛ a. 9A pɩgɛ nyɛɛ tɩ tɔ n taa. A bʋ̃-vʋʋrɩ tɩ tori nɩ niwn cere ɛ́ bɛ ŋmɛlɛ kaar ɛ. 10A niŋe tɩ ŋmɛ̃ na taa nɩ nɩsaal niwn, ɛ́ ŋa za tɩ tɛr gbẽw niwn a dʋrʋ-lowr, nadɛr niwn a gʋba-lowr nɩ sɩla niwn. 11A pɩgɛ ayi tɩ tur'a cɔw a saa-zu ɛ́ tɩ tuori taa, ɛ́ a ayi al na cɛ a tɩ pàw a a ƴã-gamɛ. 12Ŋa za mɩ́ tɩ cere na tori a ʋ niŋé. A mɩ́ tɩ tori nɩ niwn cere a be a na bɔbr'a, ɛ́ bɛ lɩɛbɛ ɩ. 13A bʋ̃-vʋʋrɩ cara pʋɔ a, bɛ mɩ́ tɩ nyɛ̃ nɩ bʋ̃-kãw na ŋmɛ̃ taa nɩ vũu-bie na nyɔw vũu 'lere a, bɛ mɩ́ tɩ nyɛ̃ nɩ mɔ̃-'leni vũu na damnɛ a. A vũu tɩ dele nɩ mimie, ɛ́ saa-nyɩwrʋ tɩ yire a pʋɔ. 14A bʋ̃-vʋʋrɩ tɩ cere na ɛ́ waar fɔ̃w fɔ̃w za, mɛ̃ saa-nyɩwrʋ a.

15Ɩ̃ na tɩ jɩ́rɛ a a, ɩ̃ tɩ nyɛ̃ nɩ gbɛr-vilo vilo na tɩ tɔ tẽw a, à ŋà za pɛr. 16A gbɛ́ɛ á ŋá tɩ nyɩwrɛ na mɛ̃ kʋsɛ-bi-nyɩla a. A tɩ ŋmɛ̃ n taa a za anaar ɛ́ ɩ mɛ̃ bɛ maal'a na a sawlɩ sawlɩ taa a. 17A mɩ́ tɩ tʋ̃ɔ́ na cere lɩɛbɛ a loge a za anaar ɛ́ bɛ mɩ́ tɩ ƴawr lɩɛbɛ ɩ. 18A kɛrʋ tɩ vʋ̃ɔnɛ nɩ pʋ̀lá ɛ́ zili-nyɩwrɩ tɩ yɛ́r pàw a viiri koli. 19A bʋ̃-vʋʋrɩ na mɩ́ tɩ cere tɔlɛ nidaa a, a gbɛ́ɛ mɩ̀ mɩ́ tɩ taw na tɔl pɩɛl'a, ɛ́ a na mɩ́ tɩ zɛw ìr a tẽw a, a mɩ̀ mɩ́ tɩ zɛw na ìr. 20A bʋ̃-vʋʋrɩ mɩ́ tɩ cere nɩ a be a na bɔbr'a, ɛ́ a gbɛ́ɛ mɩ́ tɩ lãw cere nɩ a mɩ̀. Bʋ̃ʋ n'ʋ vɛ̃, a bʋ̃-vʋʋrɩ pʋ-tɩɛrʋ n'a mɩ́ tɩ ɩ a gbɛ́ɛ cere. 21A na ɩ à ŋá a, lɛn daar za alɛ wa tawr tɔlɛ, tɛwr àrɛ bɩɩ zɛwr ìre a tẽw a, a gbɛ́ɛ mɩ́ tɩ lãw na ɩrɛ a bʋ̃-been nɛ, bʋ̃ʋ n'ʋ vɛ̃, a bʋ̃-vʋʋrɩ pʋ-tɩɛrʋ n'a tɩ be a gbɛ́ɛ pʋɔ.

22A bʋ̃-vʋʋrɩ zu-sɔw a, bʋ̃-kãw tɩ be n be ɩ mɛ̃ bɩwra a, ɛ́ nyɩwrɛ mɛ̃ kʋ̃ɔ-kuur a. 23A bɩwra ŋa pile a, bʋ̃-vʋʋra za tɩ tɛrɩ pɩgɛ ayi na dɔl cɔw taar a. A ayi al na cɛ a tɩ pàw nɩ a ʋ ƴã-gan. 24Ɩ̃ tɩ wõ n a gɔmɛ a pɩgɛ na tɩ ɩrɛ a bʋ̃-vʋʋrɩ na mɩ́ wa cere tɔlɛ nidaa a. A gɔmɛ á ŋá tɩ ŋmɛ̃ na taa nɩ kʋ̃ɔ-kpɛ̃ɛ damnʋ, saa-tanʋ, a Kpɛnʋ-za-sob kɔkɔr bɩɩ zɛbr-nɩbɛ na yãwmɛ a gɔmɛ a. A na mɩ́ tɩ tɛw àr a, a mɩ́ tɩ ɓã n a pɩgɛ taa. 25Gɔmɛ tɩ ɩrɛ nɩ a bɩwra na tɩ be a bʋ̃-vʋʋrɩ zu-sɔw a pʋɔ. 26A bɩwra na tɩ be a zu-sɔw a saa-zu a pʋɔ a, bɛ tɩ nyɛ̃ nɩ safɩɩr kʋsɩɛr na ŋmɛ̃ taa nɩ naalʋ-dà-kɔw a. A naalʋ-dà-kɔw ŋmɛ̃-ta-tɔ ŋa zu, a saa-zu za a, ŋmɛ̃a na ŋmɛ̃ mɛ̃ nɩr a tɩ àr'a. 27Ɩ̃ tɩ nyɛ̃ nɩ a ŋmɛ̃a ŋa ʋ nyɩwrɛ mɛ̃ kure bɛ na kàr a, ɛ́ tɩ ɩ mɛ̃ vũu viiri na koli ʋ a. A bom ʋl na tɩ ɩ mɛ̃ a ʋ sɩɛ a zu-sɔw nɩ a pile a, ɩ̃ tɩ nyɛ̃ nɩ bom kãw na ɩ mɛ̃ vũu na caalɛ a ziir za a. 28A cãà na viiri koli ʋ a ŋmɛ̃ na taa nɩ sa-gõguo na nyɩwrɛ zũzuwe pʋɔ saa bibir a. A Sore yúor-vɩɛlʋ-danʋ bãwfʋ tɩ n'ʋ. Ɩ̃ tɩ nyɛ̃ nɩ à á ŋá za, ɩ̃ tɩ lo na gbĩ dume gũu tɩ tɔ tẽw. Lɛ n'a ɩ̃ tɩ wõ nɩr ʋ ƴɛ̀rɛ a ɩ̃ zie.

Currently Selected:

Ezekɩɛl 1: DBDC

Highlight

Copy

Compare