Ezekɩɛl 2
2
A Naaŋmɩn tone nɩ a Ezekɩɛl a Ɩsɩrayɛl nɩbɛ zie
1A sob nɛ na tɩ ƴɛ̀rɛ a tɩ yel mɛ̃ na: «Nɩsaal bie e, ìr àr, ɩ̃ tɛr'ɩ ƴɛ̀rʋ a fʋ zie.» 2Ʋ na tɩ yere à à ŋá a, vʋʋrʋ kãw tɩ kpɛ n a ɩ̃ pʋɔ ɛ́ tɩ ɩ ɩ̃ ìr àr. Lɛ n'a ɩ̃ tɩ wõ a sob nɛ na tɩ ƴɛ̀rɛ a ɩ̃ zie a. 3Ʋ tɩ yel mɛ̃ na: «Nɩsaal bie e, ɩ̃ tone fʋ nɩ a Ɩsɩrayɛl nɩbɛ zie, a nɩ-bʋʋr-gaarɩ bɛ ŋa na ìr a ɩ̃ zu a. Bɛlɛ nɩ a bɛ sãàkʋm-kore zawrɩ mɛ̃ na bɛr wa tɩ tɔ a dɩ̃a. 4Ɩ̃ tone fʋ nɩ a zu-kpɛn dem bɛ ŋa na tɛr soci-kpawlɩ a zie. Tɩ yel à ŋá kʋ̀ bɛ: “À ŋá n'a a Sore Naaŋmɩn ƴɛ̀rɛ.” 5A na ɩ lɛ a, bɛlɛ saa bɛrɛ wone bɩɩ bɛ bɛrɛ wone fʋ, bɛ na faa ɩ nɩ-bʋʋr-gaarɩ a ƴãw a, bɛ na bãw na kɛ́ naaŋmɩn-ƴɛ̀r-manɛ be n a bɛ sɔgɔ.
6Ɛ́ a fʋ̃ʋ a, nɩsaal bie e, ta zɔrɛ bɛ, ɛ́ ta zɔrɛ a bɛ ƴɛ̀rʋ ɛ. Bɛ na mɩ́ ŋmɛ n a fʋ ƴɛ̀rʋ lɔb, ɛ́ a ɩ mɛ̃ gʋʋr na viiri koli fʋ ɛ́ fʋ zɩ̃ nan zu a. Ɛcɛ ta zɔrɛ a bɛ ƴɛ̀rʋ ɛ́ ta màwr a bɛ niŋé ɩ, bʋ̃ʋ n'ʋ vɛ̃, nɩsaal-gaarɩ nɛbɛ. 7Tɩ yel a ʋlɩ bom nɛ ɩ̃ na na yel kʋ̀ b a kʋ̀ bɛ. Bɛ na bɛr'a wo b bɩɩ kʋ̃ bɛr wo b ɛ, bɛ na faa ɩ zu-kpɛn dem a.
8Ɛ́ a fʋ̃ʋ a, nɩsaal bie e, bɛr wõ a ʋlɩ bom nɛ ɩ̃ na na yel kʋ̀ b a: ta ɩ nɩ-gaara mɛ̃ a nɩ-gaarɩ bɛ ŋa a ɩ. Háa a fʋ nʋɔr ɛ́ dɩ a ʋlɩ bom nɛ ɩ̃ na na kʋ̀ b a.»
9Lɛ n'a ɩ̃ tɩ nyɛ̃ nũu na tɩ tur cɔw mɛ̃ a. Ʋ tɩ tɛr'ɩ sɛbɛ na pili a. 10Ʋ tɩ dɔl ʋ nɩ a ɩ̃ niŋé: bɛ tɩ sɛb'a ƴãw a pʋ̃ɔmɩ nɩ a zikurí. A sɛbrʋ tɩ ɩ n kpɩɛrʋ kon, 'woi 'woi nɩ cɛlsɩ.
Currently Selected:
Ezekɩɛl 2: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
