Wulu-ayi-sob 22

A maal-ɩrɛ a tɔ bʋ̃-tɛrɩ ƴãw

1Nyɩmɛ wa nyɛ̃ a nyɩ Ɩsɩrayɛl tɔ náab, pɛ́rʋ bɩɩ bʋɔ ʋ bɔrɛ gʋɔr a, nyɩ ta bɛr ʋ ʋ bɔr cen ɛ, nyɩ ƴãw fãw tɛr ʋ tɩ kʋ̀ a ʋ sob. 2A dʋ̃w sob wa zãá zuo a, bɩɩ nyɩmɛ bɛ wa bãw ʋ a, nyɩ kpa a dʋ̃w kul'ɩ a nyɩ yir tɩ tɛr ʋ, ɛ́ gù a ʋ sob wa wa a ʋ nyɔwfʋ, nyɩ na kʋ̀ ʋ nɩ a ʋ dʋ̃w a lɛn daar. 3Lɛ n'a nyɩ mɩ̀ na mɩ́ ɩ bõw ƴãw, kpar-kpɛ̃ɛ ƴãw, bɩɩ Ɩsɩrayɛl nɩr bʋ̃-tɛra kãw za ƴãw, ʋ na bɔr bɛr nyɩ nyɛ̃ a. Nyɩ kʋ̃ tʋ̃ɔ́ mɩ́ zawrɩ a kaafʋ bɛr ɛ.

4Nyɩmɛ wa nyɛ̃ a nyɩ Ɩsɩrayɛl nɩ-tɔ bõw bɩɩ náab ʋ lo a sɔ́r zu a, nyɩ kʋ̃ bɛr ʋ a ʋ yõ ʋ nyɔw ʋ k'ʋ lɛb ìr ɛ, a fɛr'a kɛ́ nyɩ sõw ʋ, ʋ nyɔw a ʋ dʋ̃w ʋ lɛb ìr.

Tub a mɩnɛ

5Pɔw bɛ tɛr sɔ́r na su dɛb kparɩ ɛ, dɛb mɩ̀ bɛ tɛr sɔ́r na su pɔw kparɩ ɛ. A Sore nyɩ Naaŋmɩn bɛ nɔnɛ a bɛlɩ dem na ɩrɛ à à ŋá a towtow ɛ.

6Nyɩmɛ wa lo sɔ́r cere tɩ nyɛ̃ lili-cow tɩɛ zu, bɩɩ tẽsɔw, ɛ́ a lili-mã ũú nɩ a jɛlɛ bɩɩ a bili a, nyɩ bɛ tɛr sɔ́r na nyɔw a mã lãwnɩ a bili ɛ. 7Nyɩ bɛr a mã ʋ ƴaw cere, ɛ́ nyɩ wob a bili. Lɛ n'a a nyɩ nyɔ-vʋʋrʋ na wõwme, ɛ́ nyɩ wone nʋ̃ɔ̀.

8Nyɩmɛ wa ŋmaarɛ yir-paala a, nyɩ na vibl'ɩ a gàr dacine, kɛ̀ nyɩ taa wa so nɩr na yi a gàrʋ́ lo a kũu ɛ.

9Nyɩ kʋ̃ bʋ̀r bʋ̃-bʋʋr-yoru ƴãw a nyɩ divɛ̃ tɩɩr púo pʋɔ ɩ. Alɛ bɛ ɩ lɛ, a na fɛr'a kɛ̀ Naaŋmɩn so a bome za nyɩ nãà wa de a, a divɛ̃ tɩɩr wɔmɛ nɩ a bʋ̃-yoru al. 10Nyɩ kʋ̃ lãw caw náab nɩ bõw kɔ n ɛ. 11Nyɩ kʋ̃ su kparɩ, a pɛn na wob'ɩ píir kɔblʋ fomie nɩ lɛ̃ fomie a ɩ.

12Nyɩ na mɩ́ ƴãw nɩ zʋɔrɛ#22:12 Zʋɔrɛ: Nyɛ̃ Sɔr-n 15.37-41. a pɛn nyɩ na pili nɩ nyɩ tʋɔra a nɛ́ɛ anaar ƴãw.

Kul-taa bɩɩ dɛb nɩ pɔw lãw-taa a mɩnɛ na bɛ sɛw a yele

13A ɩ mɛ̃ dɛb kul'ɩ pɔw, páw ʋ baarɩ, ɛ́ a pùorí ʋ bɛ cãà nɔnɛ ʋ ɛ, 14yere k'aa ʋ ɩb bɛ vɩɛl ɛ, ɛ́ sãwnɛ a ʋ yúor yere nɩ: «Ɩ̃ kul'ɩ a pɔw ŋa, ɛ́ ɩ̃ na wa pɩɛl'ʋ a, ɩ̃ bɛ nyɛ̃ a bãwfʋ na wule k'ʋʋ bɛ páw dɛb a ɩ.» 15A lɛ pʋɔ a, a pɔwsɩra sãà nɩ a ʋ mã na de nɩ a bãwfʋ na wule k'aa bɛ pɔwyaa bɛ gã nɩ dɛb a, wa n a tẽ-kpɛ̃ɛ nɩ-kore niŋé, a ƴɛ̀rʋ-dɩb zie. 16A sãà na wa yel bɛ na: «A ɩ̃ pɔwyaa n'ʋ, ɩ̃ kʋ̀ ʋ nɩ a dɛb ŋa ʋ kul. Ɛcɛ ʋ bɛ cãà nɔnɛ ʋ ɛ, 17ɛ́ yere kʋ̀rɛ mɛ̃ k'aa ʋ ɩb bɛ vɩɛl ɛ, k'ʋʋ bɛ nyɛ̃ a bãwfʋ na wule k'ʋʋ bɛ páw dɛb a ɩ. Ɛcɛ nyɛ̃ a bãwfʋ na wule k'aa ɩ̃ pɔwyaa bɛ páw dɛb a.» A sãà nɩ a mã na dɔl'ɩ a gãw na mar a zɩ̃ɩ a, a nɩ-kore niŋé, a gãw bɛ na gã nɩ a kul-taa tɩ̃ɩsɔw a. 18A tẽ-kpɛ̃ɛ nɩ-kore na nyɔw nɩ a dɛb nɛ ƴãw bɛ ƴãw ʋ dɔwrʋ. 19A na fɛr'a ʋ ya salm-pla libie kʋba (100) san kʋ̀ a pɔwsɩra sãà, ʋ na sãw Ɩsɩrayɛl pɔwsɩrale yúor a ƴãw. A na fɛr'a ʋ tɛr ʋ, k'ʋ ɩ a ʋ pɔw, ɛ́ ʋ bɛ tɛr sɔ́r na bɛr ʋ a ʋ nyɔ-vʋʋrʋ daar za ɩ.

20Ɛcɛ alɛ wa ɩ sɩza n'a bɛ bɛ nyɛ̃ a bãwfʋ na wule k'aa pɔwsɩra bɛ páw dɛb a, 21bɛ na tɛr ʋ na cen nɩ a ʋ sãà yir dɩ̃dɔrɩ́, a ʋ tẽw dem tɩ lɔb'ɩ ʋ kʋsɛbɛ kʋ. Bʋ̃ʋ n'ʋ vɛ̃, ʋ bɛ tõ vla a Ɩsɩrayɛl tẽw pʋɔ ɩ: ʋ na cãà be a ʋ sãà yir ɛ́ páw dɛb a. Nyɩ na ír'ɩ a faalʋ bɛr à à ŋá a nyɩ pʋɔ.

22Bɛlɛ wa nyɔw dɛb ʋ gã nɩ pɔw na kul sɩr a, bɛ na kʋ n bɛ za ayi, a dɛb nɩ a pɔw za. Nyɩ na ír'ɩ a yel-faa bɛr à à ŋá a Ɩsɩrayɛl nɩbɛ sɔgɔ.

23Dɛb wa tuori pɔwsɩrale na ƴãw nɩ dɛb yúor a, ʋlɛ wa tuor'ʋ tẽ-kpɛ̃ɛ pʋɔ gã nɩ ʋ a, 24nyɩ na tɛr'ɩ bɛ za ayi yi n a tẽ-kpɛ̃ɛ dɩ̃dɔrɩ́ tɩ lɔb'ɩ bɛ kʋsɛbɛ kʋ. A pɔwsɩrale na kpi na, a na ɩ a tẽ-kpɛ̃ɛ pʋɔ ʋʋ bɛ kõ kɛ́ bɛ wa faa ʋ a. A dɛb na kpi na, ʋ na gã nɩ a ʋ tɔ pɔw a ƴãw. Nyɩ na ír'ɩ a faalʋ bɛr à à ŋá a nyɩ sɔgɔ. 25Ɛcɛ alɛ wa ɩ wɩ̀ɛ pʋɔ n'a nɩr tuori pɔwsɩrale na ƴãw nɩ yúor, nyɔw ʋ gã nɩ a, a sob nɛ na gã nɩ ʋ a yõ n'ʋ na kpi. 26Nyɩ bɛ ɩrɛ a pɔwsɩrale bom za ɩ: ʋ bɛ maalɩ yel-bier na sɛwnɩ kũu a ɩ. — A yel ŋa ŋmɛ̃ na taa nɩ nɩr na lo nyɔw a ʋ tɔ sob kʋ a. — 27Wɩ̀ɛ pʋɔ n'a a dɛb tuori a pɔwsɩrale na ƴãw nɩ yúor a, ʋlɛ saa kõ bʋɔlɩ a, nɩr bɛ tɩ ka be na faa ʋ ɛ.

28Nɩr wa tuori pɔwsɩrale na bɛ ƴãw nɩ yúor sɛr, nyɔw gã nɩ, bɛ nyɔw bɛ a, 29a sob na kʋ̀ n a pɔwsɩrale sãà salm-pla libie lɩz'a ayi nɩ pie, ɛ́ a na fɛr ʋ na ʋ kul a powle, ʋ na faa fɛr ʋ a ƴãw. Ɛ́ a sob nyɔ-vʋʋrʋ daar za a, ʋ bɛ tɛr sɔ́r na bɛr a pɔwsɩrale ɩ.

Currently Selected:

Wulu-ayi-sob 22: DBDC

Highlight

Copy

Compare