Wulu-ayi-sob 21

Nɩr bɛ na kʋ ɛ́ nɩr za bɛ bãw a kʋrɛ a yele

1Nyɩmɛ wa be a tẽw ʋl pʋɔ, a Sore nyɩ Naaŋmɩn na na kʋ̀ nyɩ nyɩ so a, alɛ wa ɩ mɛ̃ bɛ nyɛ̃ nɩ nɩr, bɛ na kʋ bɛr a wɩ̀ɛ pʋɔ, ɛ́ nɩr bɛ bãw a kʋrɛ a, 2a nyɩ nɩ-kore nɩ a nyɩ ƴɛ̀r-dɩrbɛ na cen na tɩ manɩ a vuo na be a be a kũu na gã a, nɩ a tẽ-bɛrɛ al na pɩɛlɩ a cara pʋɔ. 3Bɛ na nyɛ̃ nɩ a tẽ-kpɛ̃ɛ ʋl na n'ʋ pɩɛlɩ zuo a za a. A tẽ-kpɛ̃ɛ ʋl nɩ-kore na nyɔw nɩ na-sɩra bɛ na bɛ ƴãw ʋ dàa a nyũumɩ́ tõ n tome a. 4Bɛ na cen nɩ ʋ nɩ bàa na bɛ sɩrɛ a pʋɔ, zie kãw bɛ na bɛ dãw kɔ bʋ̀r a. Bɛ na tɩ ŋmɛ n a na-sɩra nyũu ka a be.

5A bàwr-maalbɛ na ɩ a Levi dɔwlʋ nɩbɛ a na taw na ta a lɛn daar. Bʋ̃ʋ n'ʋ vɛ̃, bɛlɛ nɛbɛ a Sore nyɩ Naaŋmɩn kaa ír kɛ́ bɛ tone a ʋ tome, ɛ́ mɩ́ ƴɛ̀r a nɔ-vla a ʋ yúor ƴãw. Bɛlɛ nɛbɛ a fɛr kɛ́ bɛ mɩ́ yel a lɛ na be be a càar'ɩ a zɛbr nɩ a pɔb-taa ƴãw-taa bàalʋ. 6A tẽw nɩ-kore za na taw pɩɛlɩ a kũu a na pɛ́w nɩ a bɛ nuru a bàa pʋɔ, a náab bɛ na ŋmɛ a nyũu ka a zu, 7ɛ́ yel: «Tɩmɛ bɛ nɛbɛ kʋ a nɩr ŋa ɩ, tɩ mɩ̀ bɛ nyɛ̃ a lɛ a na ɩ a ɩ. 8Sore e, dɩ suur kʋ̀ a nɩbɛ fʋ na faa a, ta ɩ a Ɩsɩrayɛl so nɩr na bɛ tɛr sãwna a kũu ɛ.» A lɛ pʋɔ a, a Naaŋmɩn na dɩ n suur kʋ̀ bɛ a nɩr ŋa kũu ƴãw.

9À à ŋá a, nyɩ na ɩ n a lɛ-na-tu-sɔr a Sore zie a, ɛ́ nyɩ kʋ̃ so nɩr na bɛ tɛr sãwna a kũu ɛ.

Pɔw-gbãgbaa kulu yele

10Nyɩmɛ wa cen kɛ́ nyɩ tɩ zɛb'ɩ a nyɩ dɔ̃ dem ɛ́ a Sore nyɩ Naaŋmɩn tɩ ƴãw bɛ a nyɩ nuru pʋɔ, nyɩ nyɔw gbãgbaar a, 11kapaw a nyɩ kãw na nyɛ̃ nɩ pɔw na pɔl a, a bɛ pʋɔ. Ʋlɛ wa nɔnɛ ʋ, ɛ́ bɔbr k'ʋʋ kul ʋ a, 12ʋ na tʋ̃ɔ́ na tɛr ʋ kul'ɩ a ʋ yir. A pɔw na tɩ fɔr'ɩ a zu#21:12 Fɔr a ʋ zu ɛ́ ŋma a ʋ nobiƴɛmɛ nɩ a ʋ gbebiƴɛmɛ: A zu fɔrʋ, a nobiƴɛmɛ nɩ a gbebiƴɛmɛ ŋma-bɛrʋ nɩ a kparʋ lɩɛrʋ: a wule na k'aa pɔw ŋa bɛr'ɩ a koro za nyɔ-vʋʋrʋ, ɛ́ ɩ nɩ-paala a Ɩsɩrayɛl bʋʋrɛ pʋɔ., ɛ́ ŋma a ʋ nobiƴɛmɛ nɩ a ʋ gbebiƴɛmɛ bɛr, 13ʋ na lɩɛr'ɩ a ʋ gbãgbaa kparʋ nɩ bʋ̃-yũo, ɛ́ kpɩɛr a dɛb nɛ yir. Ʋ na kõ n a ʋ sãà nɩ a ʋ mã kuor cuw-been. A pùorí n'a a dɛb ʋl na tʋ̃ɔ́ pɩɛl'ʋ, kul ʋ, ʋ ɩ a ʋ pɔw. 14A pɔw bɛ wa cãà pɛlɩ a ʋ pʋɔ a pùorí a, ʋ na bɛr ʋ na k'ʋ so ʋ tʋɔra. Ʋ kʋ̃ tɛr sɔ́r kʋɔrɩ ʋ, páw libie, bɩɩ ɩrɛ ʋ mɛ̃ gbãgbaa a ɩ, ʋ na faa fɛr ʋ ƴãw k'ʋ ɩ a ʋ pɔw a ƴãw.

A bidɛb-kpɛ̃ɛ na tɛr sɔ́r alɩ bome nɛ ƴãw a

15A ɩ mɛ̃ dɛb tɛr'ɩ pɔwbɛ ayi, nɔnɛ a kãw zuo a kãw. A pɔwbɛ bɛ za ayi dɔw nɩ bidɛbr kʋ̀ ʋ, ɛ́ a bidɛb-dãw-dɔwra ɩ a pɔw ʋ na bɛ maal nɔnɛ a bie. 16Ʋlɛ wa póne a ʋ bome kʋ̀rɛ a ʋ bidɛbr a ʋlɩ bibir nɛ a, ʋ bɛ tɛr sɔ́r na de a bidɛb-dãw dem kʋ̀ a pɔw ʋl ʋ na nɔnɛ zuo a bie, ɛ́ bɛr a ŋanɩ sob bie na sɩrɩ ɩ a dãw-dɔwra a ɩ. 17A na nɩ̃ɛ na fɛr ʋ sàw k'aa pɔw ʋl ʋ na bɛ maal nɔnɛ a bidɛb n'ɩ a bidɛb-dãw, ɛ́ kʋ̀ ʋ a bome ʋ na põ ziir ata a, ziir ayi dem. Bʋ̃ʋ n'ʋ vɛ̃, ʋlɛ n'ɩ a ʋ bi-dãw, ʋlɛ so a kpɛ̃ɛnʋ bome.

A bidɛb bɛ-wone yele

18A ɩ mɛ̃ nɩr tɛr'ɩ bidɛb, ʋ ɩ bɛ-wone nɩ bibi-gaara na bɛ wone a ʋ sãà nɩ a ʋ mã ƴɛ̀rʋ, bɛ na saa mɩ́ ƴãw ʋ dɔwrʋ a. 19A ʋ sãà nɩ a ʋ mã na nyɔw ʋ na wa n a ƴɛ̀rʋ-dɩb zie, a ʋ tẽ-kpɛ̃ɛ nɩ-kore niŋé. 20Bɛ na wa yel bɛ na: «A tɩ bidɛb'ɩ à ŋà, bɛ-wone n'ʋ, ɛ́ ɩ bibi-gaara. Ʋ bɛ wone a tɩ ƴɛ̀rʋ ɛ, ɛ́ nɔnɛ dɩb nɩ nyub tɛwr.» 21A lɛ a, a tẽw nɩbɛ za na lɔb'ɩ ʋ nɩ kʋsɛbɛ kʋ. Nyɩ na ír'ɩ a faalʋ bɛr à à ŋá, a nyɩ sɔgɔ. A Ɩsɩrayɛl nɩbɛ za na wõ n a yel ŋa, ɛ́ bɛ na zɔrɛ nɩ dɛ̃bɩ̃ɛ.

A nɩ-yawla ƴã-gan yele

22A ɩ mɛ̃ nɩr sãw na a sɛw k'ʋʋ kpi, ɛ̀ nyɩ kʋ ʋ, ɛ́ de a ʋ kũu yawlɩ tɩɛ zu. 23A ʋ ƴã-gan bɛ ganɛ a tɩɛ zu a tɩ̃ɩsɔw ɛ. A fɛr'a kɛ́ nyɩ ũù ʋ a ʋlɩ bibir nɛ tɔr za. Bʋ̃ʋ n'ʋ vɛ̃, kũu na yawlɩ tɩɛ zu à ŋá a, ʋ bʋɔlɛ nɩ Naaŋmɩn ŋmɛ-ƴãw ƴãwn a tẽw. A na ɩ à ŋá a, nyɩ gù vla taa dɛwr a tẽw a Sore nyɩ Naaŋmɩn na kʋ̀rɛ nyɩ kɛ́ nyɩ so a bɛrɛ ɩ.

Currently Selected:

Wulu-ayi-sob 21: DBDC

Highlight

Copy

Compare