Wulu-ayi-sob 23
23
1Nɩr bɛ tɛr sɔ́r na de a ʋ sãà pɔw kãw ɛ. Bʋ̃ʋ n'ʋ vɛ̃, a ʋ sãà yõ so bɛ.
A nɩbɛ bɛl na bɛ sɛw kɛ́ bɛ pʋɔ a Sore lãw nɩbɛ pʋɔ a
2Dɛb a lã-bie na ŋmɛr bɩɩ a yʋ̀ɔr na ŋmãa a bɛ pʋɔrɛ a Sore lãw nɩbɛ pʋɔ ɩ.
3Nɩr bɛ na dɔw dɛb nɩ pɔw lãw-taa#23:3 Dɛb nɩ pɔw lãw-taa na bɛ tɛr sɔ́r a: Nyɛ̃ Lev 18.6-20, 20.10-21. na bɛ tɛr sɔ́r a pʋɔ a, ʋ bɛ kpɩɛr a Sore lãw nɩbɛ pʋɔ ɩ. A ʋ bʋʋrɛ na dɔw lɩɛrɩ taa tɩ ta gb'aa pie a cãà kʋ̃ pʋɔ ɩ.
4A Amɔ̃ tẽw dem nɩ a Mowab tẽw dem bɛ be za na pʋɔ a Sore lãw nɩbɛ pʋɔ ɩ. A bɛ bʋʋrɛ na dɔw lɩɛrɩ taa tɩ ta gb'aa pie a cãà kʋ̃ pʋɔ ɩ. 5Bʋ̃ʋ n'ʋ vɛ̃, a nɩ-bʋʋrɛ bɛ ŋa bɛ tuor'ɩ nyɩ kʋ̃ɔ nɩ dipɛ̃ a sɔ́r zu a lɛ nyɩ na tɩ yi a Eziptɩ a ɩ. Bɛ nɩ̃ɛ na tɩ ƴãw Bewɔɔr bidɛb, a bàwr-bʋwrɛ Balaam, ʋ yi Petoor na be a Mezopotami Saa-zu a wa, bɛ wa kʋ̀ ʋ libie k'ʋʋ tʋ̃ɔ́ ŋmɛ ƴãw nyɩ. 6Ɛcɛ a Sore nyɩ Naaŋmɩn bɛ sàw bɛr wõ a Balaam ɛ, ʋ lɩɛb'ɩ a ŋmɛ-ƴãw a ɩ nɔ-vla ƴɛ̀rʋ a nyɩ zie, ʋ na nɔnɛ nyɩ a ƴãw. 7Lɛn daar za nyɩ na na cãà vʋʋrɛ a, nyɩ taa bɔbr a nɩ-bʋʋrɛ bɛ ŋa ayi tɛra nɩ a bɛ vla towtow ɛ.
8Nyɩ kʋ̃ de a Edɔm tẽw nɩbɛ#23:8: Nyɛ̃ 2.4 nɩ a manʋ. bʋɔlɛ nɩ-faar ɛ, nyɩ yɛbr nɛbɛ. Nyɩ mɩ̀ kʋ̃ de a Eziptɩ tẽw dem bʋɔlɛ nɩ-faar ɛ, bʋ̃ʋ n'ʋ vɛ̃, nyɩ tɩ ɩ n nʋʋrɩ a bɛ tẽw. 9A Edɔm tẽw nɩbɛ nɩ a Eziptɩ tẽw dem na be a nyɩ tẽw pʋɔ a na tʋ̃ɔ́ na pʋɔ a Sore lãw nɩbɛ pʋɔ, a bɛ dɔw-lɩɛr-taa gb'a ata sob daar.
A zɛbr laɩ vɩɛlʋ yele
10Nyɩmɛ wa cen kɛ́ nyɩ tɩ zɛb'ɩ a nyɩ dɔ̃ dem, ɛ́ tɩ maalɩ a nyɩ laɩ a, nyɩ na maal'a ɩrɛ bom za na na tʋ̃ɔ́ ɩ nyɩ tɛr dɛwr a ƴãw. 11Mɛ̃ à ŋá a, a nyɩ soja kãw wa tɛr dɛwr, a ʋ yʋ̀ɔr kʋ̃ɔ na cir a tɩ̃ɩsɔw daarɩ́ a ƴãw a, ʋ na yi na zaa a laɩ pʋɔ ɛ́ ta lɛb kpɛ ɩ. 12A zaanʋɔra wa tarɛ a, ʋ na so n kʋ̃ɔ, ɛ́ a mʋ̃tɔ̃w kpɛb daar ʋ lɛb wa a laɩ pʋɔ.
13Nyɩ na tɛr'ɩ zie a yẽw, mɩ́ cen tɩ dɔm a bãjɩra. 14Soja za na mɩ́ tɛr'ɩ kùle a ʋ bome pʋɔ. Ʋlɛ wa cen a sɩmanɩ́ a, ʋ na mɩ́ tuw nɩ nɩ bɔw, ɛ́ ga tanɛ pàw a ʋ bine a pùorí. 15A Sore nyɩ Naaŋmɩn mɩ́ cɔlɛ nɩ a nyɩ laɩ pʋɔ, k'ʋʋ gù nyɩ, ɛ́ ɩ nyɩ zɛb tʋ̃ɔ́ a nyɩ dɔ̃ dem. Alɛ so a nyɩ laɩ ɩ zie na ɩ sõw a. A Sore wa ɩ mɛ̃ ʋ nyɛ̃ nɩ bom na ɩrɛ ʋ vĩ a, ʋ kʋ̃ cãà be a nyɩ zie ɩ.
A gbãgbaa na zɔrɛ a
16Gbãgbaa wa yi a ʋ sore zie zɔ, wa be a nyɩ tẽw pʋɔ a, nyɩ kʋ̃ tɛr ʋ lɛb tɩ kʋ̀ a ʋ sore ɩ. 17Ʋ na kpɩɛr'ɩ a nyɩ sɔgɔ, a be ʋ na bɔbr a, a tẽ-kpɛ̃ɛ ʋl ʋ na kaa ír a pʋɔ. Nyɩ kʋ̃ dɔwrɛ ʋ ɛ.
A pɔw-yɛm bɩɩ a dɛ-yɛm tome a ŋmɩn-yoru ƴãwfʋ ƴãw ciir'a
18Ɩsɩrayɛl nɩr kãw za, dɛb bɩɩ pɔw, bɛ tɛr sɔ́r na tone dɛ-yɛm bɩɩ pɔw-yɛm tome, maalɛ nɩ ŋmɩn-yoru ɛ. 19Nyɩ kʋ̃ wa n dɛ-yɛm bɩɩ pɔw-yɛm tome sã-ya a Sore nyɩ Naaŋmɩn yir wa ír'ɩ nʋɔr nyɩ na kõ a towtow ɛ. Bʋ̃ʋ n'ʋ vɛ̃, a Sore bɛ nɔnɛ a nɩbɛ bɛ ŋa taabɛ towtow ɛ.
A bom fʋ na pɛ̃w kʋ̀ nɩr bɔbr'ɩ dɔwlɛ a
20Nyɩmɛ wa pɛ̃w bom a nyɩ Ɩsɩrayɛl nɩ-tɔ a, libie bɩɩ bʋ̃-dɩra, bɩɩ bʋ̃-yoru a, nyɩ taa wa bɔbr dɔwlɛ kãw za a ʋ zie ɩ. 21Nyɩ na tʋ̃ɔ́ na bɔbr dɔwlɛ nɩ-sãan zie, ɛcɛ a kʋ̃ tʋ̃ɔ́ ɩ a lɛ a nyɩ Ɩsɩrayɛl nɩ-tɔ zie ɩ. Lɛ n'a a Sore nyɩ Naaŋmɩn na maalɛ nyɩ a nyɩ yele za pʋɔ, a tẽw nyɩ na na so a pʋɔ.
A nʋɔr fʋ na kõ a yele
22Nyɩmɛ wa kõ nʋɔr a Sore nyɩ Naaŋmɩn zie a, nyɩ taa nɩɩnɛ nɩ a ʋ íru ƴãw ɛ, alɛ bɛ ɩ lɛ a Sore na sowri nyɩ na, ʋʋ na ɩ n yel-bier nyɩ maalɩ. 23Nyɩmɛ bɛ mɩ́ wa kõ nʋɔr a, a bɛ ɩ yel-bier a nyɩ zie ɩ. 24Ɛcɛ nyɩmɛ wa nyɛ̃ nyɩ tʋɔra kõ nʋɔr a Sore nyɩ Naaŋmɩn zie a, nyɩ ír ʋ vla, mɛ̃ a lɛ a nyɩ nʋɔr na yel a.
A bʋ̃-dɩra fʋ na tɔlɛ a sɔ́r zu ɩ a
25Nyɩmɛ wa tɔlɛ a nyɩ tɔ sob divɛ̃ tɩɩr púo pʋɔ a, nyɩ na tʋ̃ɔ́ na pɔr a wɔmɛ lɛ za nyɩ na bɔbr a, 'wɔb tɩ tɩw, ɛcɛ nyɩ bɛ tɛr sɔ́r na pɔr ƴãw a nyɩ pèlé pʋɔ cen nɩ ɛ. 26Nyɩmɛ wa tɔlɛ a nyɩ tɔ sob ble púo pʋɔ a, nyɩ na tʋ̃ɔ́ na ŋma a ble zuru nɩ a nũu, ɛcɛ nyɩ bɛ tɛr sɔ́r na de sʋɔ ŋmarɛ nɩ ɛ.
Currently Selected:
Wulu-ayi-sob 23: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
