Wulu-ayi-sob 20
20
A nɛ́ɛ na ƴãw càarɩ a zɛbr a
1Nyɩmɛ wa cere kɛ́ nyɩ tɩ zɛb'ɩ a nyɩ dɔ̃ dem a, nyɩmɛ wa nyɛ̃ wie bɩɩ zɛbr-torkori, nɩ zɛbr-nɩbɛ na yãwmɛ zuo nyɩ a, nyɩɩm taa zɔrɛ dɛ̃bɩ̃ɛ ɩ. Bʋ̃ʋ n'ʋ vɛ̃, a Sore nyɩ Naaŋmɩn na ɩ nyɩ yi a Eziptɩ a, be n a nyɩ zie. 2Nyɩmɛ wa waar na tĩ a zɛbr a, a bàwr-maalɛ na taw na ta yel a zɛbr-nɩbɛ: 3«Ɩsɩrayɛl nɩbɛ sojarɩ i, nyɩ bɛrɛ wone! A dɩ̃a a, nyɩ waar'a na zɛb'ɩ a nyɩ dɔ̃ dem. Nyɩ ta sàw a nyɩ kanyir baarɩ ɛ, nyɩ ta zɔrɛ dɛ̃bɩ̃ɛ ɩ, nyɩ ta tɛr pʋl-vʋ̃ɔ ɩ, nyɩ ta màwr a bɛ niŋé ɩ. 4A Sore nyɩ Naaŋmɩn bɩɛlɛ nyɩ na, k'ʋʋ lãwnɩ nyɩ zɛb'ɩ a nyɩ dɔ̃ dem, ɛ́ ɩ nyɩ zɛb tʋ̃ɔ́.»
5Al pùorí, a sojarɩ nɩ-bɛrɛ na so a sojarɩ íru a na yel bɛ na: «Nɩr be n a nyɩ pʋɔ, ŋmãa yir-paala ɛ́ bɛ kpɛ ʋ sɛr ɛ? Ʋ lɛb kul. Alɛ bɛ ɩ lɛ, ʋ nãà mab'a kpi a zɛbr zie ɛ́ nɩ-yũo kpɛ a yir. 6Nɩr be n be, ƴãw divɛ̃ tɩɩr púo paalʋ, ɛ́ bɛ pɔr a wɔ̃-dan sɛr ɛ? Ʋ lɛb kul. Alɛ bɛ ɩ lɛ, ʋ nãà mab'a kpi a zɛbr zie, ɛ́ nɩ-yũo pɔr a ʋ divɛ̃ tɩɩr wɔ̃-dan. 7Nɩr be n be ƴãw yúor paalʋ, ɛ́ bɛ maalɩ a kul-taa sɛr bɩɩ? Ʋ lɛb kul. Alɛ bɛ ɩ lɛ, ʋ nãà mab'a kpi a zɛbr zie, ɛ́ nɩ-yũo kul a ʋ ƴãwnɩ-yúor.» 8A sojarɩ nɩ-bɛrɛ na so a sojarɩ íru a na yel'ɩ à ŋá ƴãw pʋɔ: «Nɩr be n a nyɩ pʋɔ a ʋ kanyir baarɩ, ʋʋ zɔrɛ dɛ̃bɩ̃ɛ bɩɩ? Ʋ lɛb kul, ta ɩ a ʋ taabɛ kanyir baarɩ ɛ.» 9A sojarɩ nɩ-bɛrɛ bɛ ŋa wa ƴɛ̀r baar'a, bɛ na kaa na ír a nɩ-bɛrɛ kʋ̀ a sojarɩ.
10Nyɩmɛ wa cere tarɛ tẽ-kpɛ̃ɛ kãw kɛ́ nyɩ zɛb'ɩ ʋ a, nyɩ de niwn yel k'aa tẽw dem ɩ nyɩ wõ taa ta zɛb ɛ. 11Bɛlɛ wa sàw ɛ́ yuo a tẽ-kpɛ̃ɛ dɩ̃dɛɛ a, bɛ za na tone nɩ pɔ̃tɔrɩ tome a nyɩ ƴãw. 12Ɛcɛ bɛlɛ bɛ wa sàw, ɛ́ nyɛ̃ a zɛbr sa a, nyɩ na ŋmãa na jil a tẽw a ʋ deb ƴãw. 13A Sore nyɩ Naaŋmɩn na ɩ na nyɩ tʋ̃ɔ́ ʋ. A lɛn daar a, nyɩ na kʋ n a dɛbr za. 14A bome nyɩ na zɛb de a tɛwr nyɩ na na tɛr a na ɩ n a pɔwbɛ, a bibiir, a dʋn nɩ bom za na be a tẽ-kpɛ̃ɛ ʋl pʋɔ a. Nyɩ na so nɩ a nyɩ dɔ̃ dem bome ɩrɛ nɩ lɛ za nyɩ na bɔbr a, a Sore nyɩ Naaŋmɩn na faa n'ʋ kʋ̀ nyɩ a. 15À ŋá n'a nyɩ na mɩ́ ɩ a tẽ-bɛrɛ al na zãá yaga za a ƴãw, a al na bɛ pʋɔ a tẽw ʋl nyɩ na na kpɩɛr a pʋɔ a. 16Ɛcɛ a ten al a Sore nyɩ Naaŋmɩn na na kʋ̀ nyɩ nyɩ so a, a ten á ŋá nɩbɛ a, nyɩ bɛ bɛrɛ been kãw za ʋ vʋʋrɛ ɩ. 17Nyɩ na kʋ n a Hititɩ mɩnɛ, a Amoritɩ mɩnɛ, a Kanãa tẽw dem, a Perizitɩ mɩnɛ, a Hivitɩ mɩnɛ nɩ a Zebizitɩ mɩnɛ pàw pɛr, mɛ̃ a lɛ a Sore nyɩ Naaŋmɩn na yel kʋ̀ nyɩ a, 18kɛ́ bɛ ta wule nyɩ, nyɩ cɔwrɛ a bɛ ɩ-ɩrɩ na bɛ maal'ɩ wob, bɛ na mɩ́ ɩrɛ k'aa pɛlɩ a bɛ ŋmɩmɛ pʋɔ a ɩ.
19Nyɩmɛ wa zɛbr'ɩ tẽ-kpɛ̃ɛ, ŋmãa jil ʋ a tɩ cɛlɩ ɛ́ nyɩ wa bãw de ʋ a, nyɩ bɛ cɩɛr a ʋ tɩ-wɔnɩ ŋmarɛ ɩ. Nyɩ na tʋ̃ɔ́ na dɩrɛ a wɔmɛ, ɛcɛ nyɩ taa cɩɛr a tɩɩr lɔbr ɛ. A tɩɛ na be a wɩ̀ɛ pʋɔ a nɔ̃w ɩ n nɩr bɛ na zɛbr'ɩ ʋ bɩɩ? 20Ɛcɛ a tɩɩr al a wɔmɛ na bɛ dɩrɛ a, nyɩ na tʋ̃ɔ́ na mɩ́ cɛ a lɔb, gɔr a, cɔbrɛ nɩ a tẽ-kpɛ̃ɛ na zɛbr'ɩ nyɩ a deb, ɛ́ gù ʋ wa tɩ lo.
Currently Selected:
Wulu-ayi-sob 20: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
