Wulu-ayi-sob 19

A naayir zɔ-kpɛb zie tẽ-bɛrɛ

1A Sore nyɩ Naaŋmɩn na kʋ n nɩ-bʋʋrɛ bɛ mɩnɛ, k'ʋʋ tʋ̃ɔ́ de a bɛ tẽw kʋ̀ nyɩ. A lɛn daar a, nyɩ na tʋ̃ɔ́ na de a bɛ bome so a, ɛ́ kpɩɛr a bɛ tẽ-bɛrɛ nɩ a bɛ yie. 2-3A tẽw a Sore nyɩ Naaŋmɩn na na kʋ̀ nyɩ nyɩ so a, nyɩmɛ wa põ ʋ ziir ata baarɩ a, nyɩ na kaa na ír tẽ-bɛrɛ ata nyɩ na na ɩ a tab ɩ mɔlɛ a. Lɛ n'a nɩr nãà wa kʋ nɩr a, na mɩ́ tʋ̃ɔ́ zɔ tɩ kpɛ naayir a be.

4A yel ʋl ƴãw a nɩ-kʋrɛ na na tʋ̃ɔ́ mɩ́ zɔ tɩ kpɛ a naayir a tẽ-bɛrɛ á ŋá pʋɔ, faa a ʋ nyʋɔr a n'ɩ ŋa: ʋlɛ bɛ wa bãw kɛ́ kʋ a ʋ tɔ sob ʋ na bɛ tɩ dãw hɩ̃ɛn a. 5Mɛ̃ à ŋá a, nɩr kpɛ n tuw pʋɔ, ʋlɛ nɩ a ʋ tɔ sob kɛ́ bɛ tɩ cɛ̀ tɩɩr. Ʋ tɩ zɛw a lɛr k'ʋʋ cɛ n a tɩɛ, a lɛr-bir for a kukur ƴãw yi tɩ cɛ à ŋà sob, ʋ kpi. A nɩr ŋa na tʋ̃ɔ́ na zɔ tɩ kpɛ a naayir a tẽ-bɛrɛ á ŋá kãw pʋɔ, faa a ʋ nyʋɔr. 6A bɛ tɛr sɔ́r, k'aa sob nɛ a na fɛr k'ʋʋ kʋ#19:6 Kʋ a nɩ-kʋrɛ yáa a san: Nɩr na bãw kɛ́ kʋ ʋ tɔ sob a, a fɛr'a k'aa kũu nɩr kãw mɩ̀ kʋ ʋ yáa a san. Mɩ̀ nyɛ̃ Sɔr-n 35.9-34. a nɩ-kʋrɛ yáa a san a, ìr'ɩ a ʋ suur diw bɩɛr'ʋ tɩ páw ʋ, a sɔ́r na wõwme a zũú, ɛ́ kʋ ʋ ɛ. Bʋ̃ʋ n'ʋ vɛ̃, a nɩ-kʋrɛ ŋa bɛ sɛwnɩ kũu ɛ, ʋ na bɛ tɩ dãw hɩ̃ɛn a sob ʋ na kʋ a ƴãw. 7À á ŋá ƴãw n'a, ɩ̃ yel kɛ́ nyɩ kaa ír tẽ-bɛrɛ ata, a ɩ naayir zɔ-kpɛb zie tẽ-bɛrɛ.

8-9Nyɩmɛ wa cɛlɛ be tuur a nɛ-ƴãwnɩ za ɩ̃ na kʋ̀rɛ nyɩ a dɩ̃a a, nyɩmɛ wa nɔnɛ a Sore nyɩ Naaŋmɩn, ɛ́ maalɛ a ʋ pʋ-tɩɛrʋ kʋralɛ a, ʋ na ɩ n a nyɩ tẽw ʋ kpɛ kpɛ̃ɛ, ʋ na kʋ̀ nyɩ nɩ a tẽw ʋl za ʋ na yel k'ʋʋ na kʋ̀ n a nyɩ sãàkʋm-kore a. A lɛn daar a, nyɩ na kaa na ír naayir zɔ-kpɛb zie tẽ-bɛrɛ ata, ƴãw pʋɔ a dãw niwn dem ata ƴãw. 10À ŋá n'a bɛ kʋ̃ mɩ́ kʋ nɩr na bɛ tɛr sãwna a, a tẽw ʋl a Sore nyɩ Naaŋmɩn na na kʋ̀ nyɩ, nyɩ so a pʋɔ ɛ. Alɛ bɛ ɩ lɛ, nyɩmɛ na mɩ́ so a ʋ kũu sãwna.

11Ɛcɛ nɩr wa hɩ̃ɛn a ʋ tɔ sob, jɩɛrɛ ʋ, wa ùr nyɔw ʋ ŋmɛ kʋ a, ɛ́ a pùorí ʋ zɔ cen tɩ kpɛ naayir a tẽ-bɛrɛ á ŋá kãw pʋɔ a, 12a ʋ tẽ-kpɛ̃ɛ nɩ-kore na tõ n nɩbɛ bɛ cen tɩ nyɔw ʋ, ɛ́ bɛ na ƴãw ʋ nɩ a sob nɛ a na fɛr k'ʋʋ kʋ yáa a san a, nuru pʋɔ, ʋ kʋ ʋ. 13Nyɩ kʋ̃ tɛr mimi-baalʋ a ʋ ƴãw ɛ. À à ŋá n'a nyɩ na ír a nɩr na bɛ tɛr sãwna a kʋrɛ a Ɩsɩrayɛl nɩbɛ sɔgɔ, ɛ́ a na vɩɛl'ɩ a nyɩ zie.

A tẽsɔwr tʋr-bɔwrɩ

14Nyɩmɛ wa zɩ̃ a tẽsɔwr bɛ na kʋ̀ nyɩ a pʋɔ baarɩ, a tẽw ʋl pʋɔ a Sore nyɩ Naaŋmɩn na na kʋ̀ nyɩ nyɩ so a, a tʋr-bɔwrɩ a dãw-waarbɛ na ƴãw nyɩɩm nɩ a nyɩ tɔ sob tẽsɔw cara pʋɔ a, nyɩ kʋ̃ lɩɛb'a ƴãw zi-yoru ɛ.

A ƴɛ̀rʋ-dɩb pʋɔ dãsɩɛ dem yele

15Nɩ-been yõ dãsɩɛ kʋ̃ tʋ̃ɔ́ sɛw bɛ ƴãw nɩr na kʋ nɩr, nɩr na maalɩ yel-bier, bɩɩ nɩr na sãw sãwna kãw a, dɔwrʋ ɛ. Nɩbɛ ayi bɩɩ nɩbɛ ata dãsɩɛ dɩb zũú n'a bɛ na tʋ̃ɔ́ mɩ́ bãw a yel yel-mɩŋa.

16Dãsɩ-ziri sob wa yel kɛ́ nɩr kãw maal'ɩ yel-faa a, 17a na fɛr'a k'aa bɛ za ayi na tɛr a taw-taa a cen a Sore niŋé. Bɛ na tɩ man nɩ a bɛ yel a be, a bàwr-maalbɛ nɩ a ƴɛ̀r-dɩrbɛ bɛl na so a tome a lɛn daar a niŋé. 18A ƴɛ̀r-dɩrbɛ na bɔ n a yel-mɩŋa vla vla bãw. Bɛ na nyɛ̃ na k'aa dãsɩɛ sob ɩ n zir-ŋmarɛ, k'ʋʋ ŋmãa nɩ ziri ƴãw a ʋ tɔ sob. 19A lɛ pʋɔ a, nyɩ na ɩ ʋ na mɛ̃ a lɛ ʋ na tɩ tɩɛrɛ k'ʋʋ ɩ a ʋ tɔ a. Nyɩ na ír'ɩ a faalʋ bɛr à à ŋá a nyɩ sɔgɔ. 20A nɩbɛ ŋmãa na wõ n a yel ŋa zɔrɛ dɛ̃bɩ̃ɛ, ɛ́ kʋ̃ lɛb maalɩ a yel-faa ŋa tɔ a nyɩ sɔgɔ ɩ. 21Nyɩ kʋ̃ tɛr mimi-baalʋ towtow a sãwna sob ƴãw ɛ: nyɔ-vʋʋrʋ n'ʋ na ya nyɔ-vʋʋrʋ, mimir ya mimir, nyɩ́ɩm ya nyɩ́ɩm, nũu ya nũu, gbɛ́r ya gbɛ́r.

Currently Selected:

Wulu-ayi-sob 19: DBDC

Highlight

Compare

Copy