Barukɩ 4
4
1A Yã-bãwfʋ a,
a Naaŋmɩn nɛ-ƴãwnɩ sɛbɛ n'ʋ,
a Wulu na be kʋralɛ a n'ʋ.
Bɛlɩ dem za na tuur ʋ a,
bɛ na vʋʋrɛ na,
bɛlɩ dem za na zawr'ʋ bɛr a,
bɛ na kpi na#4:1 Nyɛ̃ 3.9, Ssy 119.98, Mat 5.18..
2Nyɩ lɩɛbɩ nyɔw ʋ,
Zakɔb bʋʋrɛ ɛ!
Nyɩ lo a sɔ́r cere a cãà zie,
a ʋ cãà pʋɔ.
3A nyɩ yúor na yi a,
nyɩ ta bɛr ʋ kʋ̀ nɩ-yoru ɛ,
a alɩ bome nɛ ƴãw
nyɩɩm yõ na tɛr sɔ́r a,
nyɩ ta bɛr a kʋ̀ nɩ-bʋʋr-yoru ɛ.
4Zu-nʋ̃ɔ̀ dem'ɩ tɩ,
Ɩsɩrayɛl nɩbɛ ɛ!
Bʋ̃ʋ n'ʋ vɛ̃,
tɩ bãw nɩ a ʋlɩ bom nɛ
na mɩ́ pɛlɩ a Naaŋmɩn pʋɔ a.
A NAAŊMƖN NƖ-BƲƲRƐ MƆWLƲ
4:5—5:9
A fɛr'a k'aa nɩbɛ bɛ na diw a bɛ tẽw pʋɔ cen nɩ a, ƴãw fãw
5Ɩ̃ nɩbɛ ɛ, nyɩ ƴãw fãw,
nyɩɩm na ɩ bɛ cãà bãwnɩ
a Ɩsɩrayɛl a!
6Bɛ kʋ̀ɔrɩ nyɩ na kʋ̀
a nɩ-bʋʋr-yoru,
ɛcɛ a bɛ ɩ a nyɩ kʋ-pàw-pɛr ƴãw ɛ.
Nyɩ na ɩ a Naaŋmɩn suur
ìr a n'a so
ʋ bɛr nyɩ kʋ̀ a nyɩ dɔ̃ dem.
7Nyɩ ɩ na a nyɩ Íre nyɛ̃ suur,
nyɩ na bɛ maalɩ bagɛ kʋ̀ ʋ,
ɛ́ maalɩ kʋ̀ kɔ̃tɔmɛ#4:7 Kɔ̃tɔmɛ: Wl-ayi 32.15-18, Ssy 106.37. a.
8Nyɩ yiir'ɩ a Naaŋmɩn
na be kʋralɛ a bɛr,
a ʋl na guoli nyɩ a.
Nyɩ ɩ na a nyɩ mã-guole Zerizalɛm
tɛr pʋ-sãwna.
9Ʋ nyɛ̃ nɩ a Naaŋmɩn suur
na ìr a nyɩ ƴãw a, ɛ́ yel:
«Nyɩ bɛrɛ wone,
tẽ-bɛrɛ na kpɔwlɩ a Sɩyɔ̃ a,
Naaŋmɩn ƴãw mɛ̃ nɩ kpɩɛrʋ-kpɛ̃ɛ.
10Ɩ̃ nyɛ̃ nɩ a lɛ a Naaŋmɩn,
a Na-be-kʋralɛ,
na fɛr a ɩ̃ bidɛbr nɩ a ɩ̃ pɔwyaar
bɛ cen a tẽ-yũo a.
11Ɩ̃ tɩ guoli bɛ na nʋ̃ɔ̀ kpɛ m,
ɛ́ pʋ-sãwna nɩ kpɩɛrʋ n'a ɩ̃ tɩ tɛr
nyɛ̃ nɩ bɛ bɛ cen.
12Nʋ̃ɔ̀ ta ɩrɛ nɩr za
ʋ na nyɛ̃ m ɩ̃ ɩ pɔw-kʋɔr,
ɛ́ nɩ-yaga zawrɩ mɛ̃ bɛr a ɩ.
Ɩ̃ ɩ n ɩ̃ yõ, a ɩ̃ bibiir yel-bebe zũú,
bɛ na zawrɩ
a Naaŋmɩn wulu bɛr a ƴãw.
13Bɛ bɛ sàw a ʋ nɛ-ƴãwnɩ ɛ,
a bɛ ɩb bɛ tu a lɛ
ʋ na tɩ yere kʋ̀rɛ bɛ a ɩ,
bɛ bɛ tu a mɩnʋ sɔ́r
ʋ na tɩ wule bɛ a ɩ.
14Nyɩ wa,
nyɩɩm Sɩyɔ̃ tẽ-bɛr-kpɔwlɩ i!
Nyɩ cãà bãwnɩ a k'aa Naaŋmɩn,
a Na-be-kʋralɛ,
fɛr'ɩ a ɩ̃ bidɛbr nɩ a ɩ̃ pɔwyaar
bɛ cen tẽ-yũo.
15Ʋ ɩ na nɩ-bʋʋrɛ
na yi zi-zãána a,
wa a bɛ ƴãw,
nɩ-bʋʋrɛ na ɩrɛ pʋr-ɩb,
ɛ́ ƴɛ̀rɛ ƴɛ̀r-sãan a,
nɩbɛ na bɛ ƴãwnɛ a dɛb-nyamɛ,
ɛ́ bɛ zɔrɛ a bibiir nɩbaalʋ a.
16Bɛ tɛr'ɩ a pɔw-kʋɔr bibiir
ʋ na nɔnɛ yaga za a, cen nɩ,
ɛ́ bɛr ʋ ʋ ɩ ʋ yõ,
bɛ cãà tɛr a ʋ pɔwyaar ɛ.»
A Zerizalɛm lɛb'a kʋ̀rɛ fãw a ʋ bibiir
17Ɩ̃ bibiir i, ŋmɩŋmɩn n'a
ɩ̃ na tʋ̃ɔ́ sõw nyɩ?
18A sob nɛ na ɩ
a kpɩɛrʋ á ŋá páw nyɩ a,
ʋlɛ n'ʋ na faa nyɩ
a nyɩ dɔ̃ dem nuru pʋɔ.
19Nyɩ cere, ɩ̃ bibiir i, nyɩ cere!
Mãa a, ɩ̃ be n ka,
bɛ bɛr mɛ̃ ɩ̃ ɩ ɩ̃ yõ.
20Ɩ̃ yaa nɩ a ɩ̃ nʋ̃ɔ̀ bibie kparʋ bɛr,
ɛ́ su a ɩ̃ yãayãa-zɛlʋ kparʋ#4:20 Yãayãa-zɛlʋ kparʋ: Ʋlɛ n'ɩ a ko-tuolu bome nɩ a tʋɔra dɔwrʋ bome ɩ n been: vʋɔrɩ pɛnɛ mɩ́ tɩ n'a..
Ɩ̃ na cɩɩrɛ nɩ a Naaŋmɩn zie,
a Na-be-kʋralɛ-a zie,
a ɩ̃ bibi-vɩɛrɩ za.
21Nyɩ ƴãw fãw, ɩ̃ bibiir i!
Nyɩ cɩɩrɛ a Naaŋmɩn zie,
ʋʋ na faa nyɩ nɩ a dɔwrʋ
bɛ na dɔwrɛ nyɩ a pʋɔ,
nɩ a nyɩ dɔ̃ dem nuru pʋɔ.
22Mãa a, a Naaŋmɩn,
a Na-be-kʋralɛ-a n'ʋ ɩ̃ tɩɛrɛ
k'ʋʋ na faa nyɩ na.
Ɛ́ a ʋl, a Naaŋmɩn na ɩ sõw a,
ƴãw mɛ̃ nɩ nʋ̃ɔ̀ ŋa:
a Na-be-kʋralɛ, a nyɩ faarɛ,
kʋ̃ yaa kɛ́ wul nyɩ
a ʋ su-ɓaarʋ ɛ.
23Kpɩɛrʋ nɩ pʋ-sãwna n'a
ɩ̃ tɩ tɛr bɛr'ɩ nyɩ nyɩ cen.
Ɛcɛ Naaŋmɩn na lɛb'a
bɛr nyɩ kʋ̀ m kʋralɛ,
cuw nɩ nʋ̃ɔ̀ cɛlsɩ ŋmɛb pʋɔ.
24Dɩ̃a a,
a Sɩyɔ̃ tẽ-bɛr-kpɔwlɩ nyɛ̃ na
nyɩ na be a diw-cenu zie a.
Ɛcɛ a kʋ̃ yaa kɛ́ nyɛ̃ a faafʋ
na na yi a nyɩ Naaŋmɩn zie a ɩ.
A faafʋ na ta n nɩ
a Na-be-kʋralɛ-a
yúor-vɩɛlʋ-danʋ na nyɩwrɛ,
ɛ́ vɩɛl vɩɛl a.
25Ɩ̃ bibiir i, nyɩ dɩ kanyir
ɛ́ sàw a Naaŋmɩn suur
na ìr a nyɩ ƴãw a.
A dɔ̃ sob dɔwrɛ nyɩ na,
ɛcɛ nyɩ kʋ̃ yaa kɛ́ nyɛ̃
a ʋ loba ɩ,
ɛ́ nyɩ na ír'ɩ gbɛ́r dĩ nɩ ʋ
a kpalimí.#4:25 Dĩ a kpalimí: À ŋá n'a bɛ mɩ́ tɩ ɩ a nɩbɛ bɛ na zɛb tʋ̃ɔ́ a, kɛ́ bɛ ƴãw bɛ vĩ.
26A ɩ̃ bibiir na bɛ tɛr fãw a
lo n sɛ́ɛ na bɛ vɩɛl a cen.
Bɛ ír bɛ na mɛ̃ dʋn
dɔ̃ dem na zu a.
27Nyɩ ƴãw fãw, ɩ̃ bibiir i,
nyɩ cɩɩrɛ a Naaŋmɩn zie!
A sob nɛ na wa n nyɩ a ka a
kʋ̃ yiiri nyɩ bɛr ɛ.
28Nyɩ nyɛ̃ na a ɩ vla
nyɩ taw zãá nɩ a Naaŋmɩn.
Ƴɛrɛŋa a, nyɩ lɛb wa a ʋ zie,
ɛ́ ƴãw fãw gb'aa pie a ʋ bɔb ƴãw.
29A sob nɛ na ƴãw nyɩ
a kpɩɛrʋ á ŋá a,
ʋlɛ n'ʋ na faa nyɩ.
À à ŋá n'a ʋ na kʋ̀ nyɩ nʋ̃ɔ̀
na kʋ̃ bãw baarʋ a.
Ƴãw fãw, Zerizalɛm i
30Ƴãw fãw, Zerizalɛm i!
A Naaŋmɩn na bʋɔlɩ a fʋ yúor a,
na mɔwlɩ fʋ na.
31Baw-bio dem'ɩ a bɛlɩ dem na dɔwrɩ fʋ,
ɛ́ a fʋ loba ɩ bɛ nʋ̃ɔ̀ a!
32Baw-bio páw nɩ a tẽ-bɛrɛ al
na tɩ tɛr a fʋ bibiir
bɛ ɩ gbãgbaar a!
Baa zuo a za,
baw-bio páw nɩ
a tẽ-kpɛ̃ɛ ʋl#4:32 Tẽ-kpɛ̃ɛ ʋl: A Babɩlɔn tẽw n'ʋ a sɛb-maalɛ tɩɛrɛ. Ɛ́ a Babɩlɔn ŋa ɩ n a nɩ-bɛrɛ bɛl za na dɔwrɩ a Zifʋ mɩnɛ a bãwfʋ. na nyɔw bɛ a!
33Mɛ̃ a lɛ ʋ na tɩ cɩlɩ
a fʋ loba ƴãw,
ɛ́ nʋ̃ɔ̀ kpɛ ʋ a fʋ sãwfʋ ƴãw a,
lɛ n'a pʋ-sãwna na tɛr ʋ,
a ʋl mɩŋa loba ƴãw.
34Ɩ̃ na ɩ na ʋ bɛ cãà tɛr
a ʋ nɩ-yaga yaga ɩ,
bɛl na ɩ a ʋ nʋ̃ɔ̀ a,
ɛ́ a ʋ pɔ̀lʋ na lɩɛb'ɩ ko-tuolu.
35A Naaŋmɩn, a Na-be-kʋralɛ,
na ɩ na vũu dɩ ʋ bɛr
ʋ gã bibi-yaga,
ɛ́ kɔ̃tɔmɛ n'a na kpɩɛr a ʋ pʋɔ,
a cãà tɩ cɛlɩ zuo lɛ.
36Zerizalɛm i,
jɩ́r a saa-pɛrɩ́ ɛ́ nyɛ̃ a nʋ̃ɔ̀
a Naaŋmɩn na waar'ɩ a fʋ kʋ̀ b a.
37Jɩ́r nyɛ̃, bɛ waar'a,
a bidɛbr fʋ na tɩ nyɛ̃ bɛ cere a.
Bɛ yi n ziir za waar,
a saa-pɛrɩ́ tɩ tɔ
a mʋ̃tɔ̃w-kpɛb-lowr,
ɛ́ a ɩ a Naaŋmɩn na ɩ sõw a
ƴɛ̀rʋ n'ʋ bʋɔlɩ bɛ ɓã taa.
Nʋ̃ɔ̀ ɩrɛ bɛ nɩ yaga,
a Naaŋmɩn yúor-vɩɛlʋ-danʋ zũú#4:37 Nyɛ̃ Ɩza 43.5-7, 60.4-9..
Currently Selected:
Barukɩ 4: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.