Barukɩ 3
3
1«Sore kpɛnʋ-za-sob, Ɩsɩrayɛl Naaŋmɩn i, tɩ kone na cɔwr fʋ nɩ socie kpɩɛrʋ na tɛr a, nɩ tɩɛrʋ na bàl a za a. 2Sore e, bɛr wõ tɩ, zɔ tɩ nɩbaalʋ, tɩ na maalɩ yel-bebe sãw fʋ a ƴãw. 3Fʋ̃ʋ a, fʋ dɩrɛ nɩ naalʋ kʋralɛ, ɛ́ tɩɩm wɛ! 4Sore kpɛnʋ-za-sob, Ɩsɩrayɛl Naaŋmɩn i, bɛr wõ a tɩɩm nɩ-kũuni bɛ ŋa puoru. Sore tɩ Naaŋmɩn i, tɩ ɩ n a bɛlɩ dem na maalɩ a yel-bebe sãw fʋ a bibiir, a bɛlɩ dem na bɛ bɛr wõ a fʋ ƴɛ̀rʋ a. Lɛ so a kpɩɛrʋ nyɔw tɩ. 5Ta tɩɛrɛ a tɩ sãàkʋm-kore sãwnɩ ɛ, nɩ̃ɛ tɩɛrɛ a fʋ kpɛnʋ nɩ a fʋ yúor, a vuo ŋa pʋɔ. 6Yel-mɩŋa za, fʋ̃ʋ n'ɩ a Sore tɩ Naaŋmɩn, ɛ́ tɩ na danɛ fʋ na, Sore e! 7Fʋ ƴãw tɩ nɩ a fʋ zɔba tɩɛrʋ, kɛ́ tɩ tʋ̃ɔ́ mɩ́ bʋɔlɩ fʋ fʋ wa sõw tɩ. Tɩ na danɛ fʋ nɩ a tɩ diw-cenu zie. Bʋ̃ʋ n'ʋ vɛ̃, a faa al za a tɩ sãàkʋm-kore na tɩ maalɩ sãw fʋ a, tɩ ɩ na a zãá nɩ a tɩ socie. 8Tɩmɛ n'ɩ bɛ ŋan dɩ̃a zãá nɩ a tɩ tẽw, be a be fʋ na diw tɩ yaarɩ a. A be a, bɛ tɩ tʋ tɩ nɩ zʋmɛ, ɛ́ ŋmɛ ƴãw tɩ, ɛ́ dɔwrɩ tɩ yáa a tɩ sãàkʋm-kore sãwnɩ za san, bɛl na tɩ bɛr a fʋ̃ʋ Sore tɩ Naaŋmɩn a.»
A YÃ-BÃWFƲ
3:9—4:4
A Yã-bãwfʋ bɛ na yiiri bɛr a
9Ɩsɩrayɛl nɩbɛ ɛ,
nyɩ bɛrɛ wone a nɛ-ƴãwnɩ
na tɩrɛ a nyɔ-vʋʋrʋ a.
Nyɩ ƴãw tobr, tʋ̃ɔ́ bãw bom.
10Ɩsɩrayɛl nɩbɛ ɛ,
ŋmɩŋmɩn n'a a ɩ?
Bʋ̃ʋ n'ʋ so nyɩ kpɩɛr
a nyɩ dɔ̃ dem tẽw pʋɔ?
Bʋ̃ʋ n'ʋ so nyɩ kòre tẽ-sãan pʋɔ?
11Bʋ̃ʋ n'ʋ so nyɩ tɔ kũuni tɛr dɛwr,
ɛ́ bɛ sɔ́r a nyɩɩm tɛɛ za ƴãw
a bɛlɩ dem na be
a kpɩmɛ tẽw a pʋɔ?
12Nyɩ na zawrɩ
a yã-bãwfʋ bul-nʋɔr bɛr a n'a so.
13Nyɩmɛ tɩ tu a Naaŋmɩn sɔ́r a,
nyɩ nãá be n
a ƴã-ɓaarʋ pʋɔ kʋralɛ.
14Nyɩ bãw a be a bãwfʋ,
a fãw, a yã na be a,
kɛ́ nyɩ mɩ̀ tʋ̃ɔ́ bãw
a be a nyɔ-vʋʋr-wogo na be a,
a be a mimie cãà
nɩ a ƴã-ɓaarʋ na be a#3:14 A kan-nɛ́ɛ 9-14 ƴãw a, nyɛ̃ Wl-ayi 30.15-20, Zʋkp 4.20-22..
A nɩsaalbɛ kʋ̃ tʋ̃ɔ́ bãw a yã-bãwfʋ ɛ
(Nyɛ̃ Zɔb 28:12-17, Zʋkp 1:1-9)
15Ãa n'ʋ nyɛ̃
a Yã-bãwfʋ kpɛb zie#3:15 Nyɛ̃ Zɔb 28.12-17, Zʋkp 1.1-9.?
Ãa n'ʋ kpɛ a ʋ na-bome dĩó?
16A nɩ-bʋʋrɛ nɩ-bɛrɛ
nɔ̃w nɛbɛ bɩɩ?
Bɩɩ a bɛlɩ dem na pɔwlɛ
a wɛ-dʋn a nɛbɛ?
17Bɩɩ a bɛlɩ dem na mɩ́ pɔwlɩ
a mʋ̃ɔ pʋɔ lili a nɛbɛ?
Bɩɩ a nɩbɛ a tɛra
na bɛ tɛr tɛwfʋ zie a,
na mɩ́ bɔ a salm-pla
nɩ a salm-zɩɛ gbõ taa a,
a al ƴãw a nɩsaalbɛ na mɩ́ ƴãw
a bɛ tɩɛrʋ a nɛbɛ bɩɩ?
18Bɩɩ nɩbɛ na mɩ́ ƴãw fãw
maal tõ n a salm-pla a nɛbɛ ɛ?
Ɛcɛ a bɛ tome bãwfʋ kãw za
bɛ mɩ́ cãà be a pùorí ɛ.
19Bɛ bɔr'a,
bɛ siw nɩ a kpɩmɛ tẽw,
ɛ́ nɩ-yoru lɩɛrɩ bɛ.
20Nɩbɛ bɩɛrɩ na nyɛ̃ a cãà
ɛ́ kpɛ a tẽw zu,
ɛcɛ bɛ bɛ tɩ bãw a sɔ́r
na cere a Yã-bãwfʋ zie a ɩ,
21bɛ bɛ tɩ cɛlɛ a ʋ sɛ́ɛ zie ɩ,
bɛ bɛ tɩ ŋmɛlɩ kaa ʋ ɛ.
A bɛ bibiir tɛɛ za bɛ tu a sɔ́r
a bɛ sãà mɩnɛ na tɩ tu a ɩ.
22Nɩr bɛ wõ a Yã-bãwfʋ yele
a Kanãa tẽw pʋɔ ɩ,
bɛ bɛ nyɛ̃ ʋ a Teman tẽw ɛ.
23A Agaar#3:23 Agaar, Madian, Teman: Arabi tẽw nɩ-bʋʋrɛ ata yée n'a. Ɛ́ a Agaar ƴãw a, nyɛ̃ Yzt 16.15. bʋʋrɛ tɛɛ za
na bɔbr ʋ a tẽw zu a,
a Madian nɩ a Teman ten yɛ-yɛrbɛ,
a suol-suolbɛ
nɩ a bãwfʋ bɔbr-bɔbrbɛ,
bɛ tɩ bãw a sɔ́r na cere
a Yã-bãwfʋ zie a ɩ,
bɛ bɛ tɩ cɛlɩ a sɛ́ɛ
na wɩɛr a ʋ zie a zie ɩ.
24Ɩsɩrayɛl nɩbɛ ɛ,
nyɩ nyɛ̃ a tẽ-daa,
a Naaŋmɩn yir ŋa,
na ɩ kpɛ̃ɛ sɛw a!
Nyɩ nyɛ̃ a zie ʋ na so a
na yɛlmɛ a!
25Ʋ ɩ n kpɛ̃ɛ kpɛ̃ɛ
ɛ́ bɛ tɛr tɛwfʋ zie ɩ,
ʋ do n saa ɛ́ bɛ tɛr manʋ ɛ.
26Be n'a a nɩ-jarmam
jarmam#3:26 Nɩ-jarmam jarmam: Nyɛ̃ Yzt 6.1-4 nɩ Yã-b 14.6. dɔw,
a koro za nɩ-yée bɛ ŋa,
nɩbɛ na kɛrɩ kɛrɩ,
ɛ́ bãw a zɛbr yele a.
27Ɛcɛ bɛlɛ bɛ nɛbɛ
a Naaŋmɩn kaa ír,
k'ʋʋ wul bɛ a Yã-bãwfʋ sɔ́r ɛ.
28Bɛ kpi na,
bɛ na bɛ tɩ bãw yã a ƴãw,
bɛ kpi n a bɛ dãbolu zũú.
29Ãa n'ʋ do a salom zu
k'ʋʋ tɩ de a Yã-bãwfʋ,
ɛ́ tɛr ʋ a saa-zu be siw wa n?
30Ãa n'ʋ gãw a kʋ̃ɔ-kpɛ̃ɛ
k'ʋʋ tɩ nyɛ̃ ʋ,
ɛ́ tɛw nɩ ʋ salm-zɩɛ
mɩŋa mɩŋa lɛb wa n?
31Nɩr za bɛ bãw
a Yã-bãwfʋ sɔ́r ɛ,
nɩr za bɛ bãw a lɛ
ʋ na na ɩ páw ʋ a ɩ#3:31 A kan-nɛ́ɛ 29-31 ƴãw a, nyɛ̃ Wl-ayi 30.11-14, Bɛn-Sɩ 1.2-6..
Naaŋmɩn yõ n'ʋ bãw a Yã-bãwfʋ ɛ́ kʋ̀ ʋ a Ɩsɩrayɛl
32Ɛcɛ a Naaŋmɩn
na bãw bom za a
bãw nɩ a Yã-bãwfʋ vla,
a ʋ yã zũú n'a ʋ nyɛ̃ ʋ.
Ʋ cɔbr'ɩ a tẽw k'ʋʋ be kʋralɛ,
ɛ́ paal'ʋ nɩ dʋ̃-gbɛ́ɛ anaɩ#3:32 Nyɛ̃ Zɔb 28.23-27, Zʋkp 8.22-31. .
33Ʋ mɩ́ tõ n a cãà, ʋ cen.
Ʋ lɛb bʋɔl'ʋ,
ʋ màwr sàw nɩ a ʋ nʋɔr.
34A ŋmar-bie nyɩwrɛ nɩ
a beba zie nɩ nʋ̃ɔ̀.
35A Naaŋmɩn mɩ́ bʋɔlɩ a na,
a sàw: «Tɩ be n ka!»
A nyɩwrɛ nɩ nɩ nʋ̃ɔ̀
a Sob nɛ na ír a a ƴãw#3:35 A kan-nɛ́ɛ 34-35 ƴãw a, nyɛ̃ Ɩza 40.26, Ssy 19.2..
36A Íre ŋa n'ɩ a tɩ Naaŋmɩn,
ʋ bɛ tɛr ʋ tɔ ɩ.
37Ʋ nyɛ̃ nɩ a sɔ́r za na cere
a Yã-bãwfʋ zie a,
ɛ́ wul ʋ a ʋ tõ-tõ-bie
Zakɔb nɩ-bʋʋrɛ,
a ʋ nɩ-nɔna Ɩsɩrayɛl nɩ-bʋʋrɛ.
38A pùorí n'a bɛ nyɛ̃
a Yã-bãwfʋ a tẽw zu,
ʋ kpɛ a nɩsaalbɛ sɔgɔ.
Currently Selected:
Barukɩ 3: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.