2 Bibie za yel-manɩ 7
7
A bagɛ a Salomɔ̃ nɩ a Ɩsɩrayɛl nɩbɛ na maalɩ kʋ̀ a Sore a
(Nyɛ̃ 1Na 8:62-66)
1A Salomɔ̃ na tɩ puori baar'a, vũu tɩ yi n a salom zu siw dɩ a nyɩw-a-za-bagɛ nɩ a lãw-taa bagɛ, ɛ́ a Sore yúor-vɩɛlʋ-danʋ tɩ paalɩ a Ŋmɩn-yir-kpɛ̃ɛ. 2A bàwr-maalbɛ bɛ tɩ tʋ̃ɔ́ kpɛ a Ŋmɩn-yir-kpɛ̃ɛ pʋɔ ɩ, a Sore yúor-vɩɛlʋ-danʋ na tɩ paalɩ a Ŋmɩn-yir-kpɛ̃ɛ a ƴãw. 3A Ɩsɩrayɛl nɩbɛ za tɩ nyɛ̃ nɩ a vũu nɩ a Sore yúor-vɩɛlʋ-danʋ na siw a Ŋmɩn-yir-kpɛ̃ɛ zu a, bɛ tɩ lo na gbĩ dume a davʋra tẽw na pɩɛrɩ kʋsɛbɛ a zu, ɛ́ gũu tɩ tɔ tẽw danɛ nɩ a Sore, a ʋ vɩɛlʋ nɩ a ʋ nɔ̃wfʋ na be kʋralɛ a ƴãw.
4A nãà nɩ a Ɩsɩrayɛl nɩ-bʋʋrɛ za tɩ maal'ɩ bagɛ kʋ̀ a Sore. 5A Salomɔ̃ tɩ kʋ n nĩi tùr-lɩzɛr'ɩ ayi (22 000), píir nɩ bʋʋr tùr-lɩz'a ayʋɔb (120 000) maal'ɩ bagɛ. À à ŋá n'a a nãà nɩ a Ɩsɩrayɛl nɩ-bʋʋrɛ za tɩ de a Ŋmɩn-yir-kpɛ̃ɛ kʋ̀ a Sore. 6A bàwr-maalbɛ tɩ be n a bɛ tome zie. A levitɩ mɩnɛ tɩ tɛr'ɩ a Sore yielu bome a nãà Daviir na tɩ maalɩ a Sore danʋ ƴãw a. Bɛ mɩ́ tɩ danɛ nɩ a Sore yere nɩ a ƴɛ̀r-bie á ŋá a Daviir na tɩ kʋ̀ bɛ a: «A ʋ nɔ̃wfʋ be n kʋralɛ.» A bàwr-maalbɛ tɩ àr'a tori bɛ, pɛblɛ wɩɩr, ɛ́ a nɩbɛ za tɩ àr saaƴẽwn. 7A nãà tɩ maal'ɩ a davʋra sɔwlɩsɔw k'ʋ ɩ sõw, a davʋra na be a Ŋmɩn-yir-kpɛ̃ɛ niŋé a. Bʋ̃ʋ n'ʋ vɛ̃, a kur-zɩɛ bàwr-maal-kuur na be a Ŋmɩn-yir-kpɛ̃ɛ dɩ̃dɔr nʋɔr a tɩ ɩ n pʋrɩ zuo a bàwr-maal-bome za binu ƴãw, a tɩ fɛr a Salomɔ̃ ʋ nyɩw a nyɩw-a-za-bagɛ bome, a kukur de-kʋ̀b bome nɩ a lãw-taa bagɛ nɛn-kãánɩ a davʋra pʋɔ.
8A ʋlɩ daar nɛ a, a Salomɔ̃ tɩ maal'ɩ a Sɛwr cuw ʋlɛ nɩ a Ɩsɩrayɛl nɩbɛ za, bibie ayopõi. Bɛ tɩ yi n a tẽw za pʋɔ wa bɛ dɩ vuo ɩ, a Lebo-Hamatɩ na be a saa-pɛrɩ́-gʋba-lowr a ɛ́ tɩ tɔ a Eziptɩ fʋɔla na be a saa-pɛrɩ́-dʋrʋ-lowr a. 9A bibie ani sob, bɛ tɩ maal'ɩ lãw-sõw, bʋ̃ʋ n'ʋ vɛ̃, bɛ tɩ maal'ɩ a bàwr-maal-kuur bɛ na de kʋ̀ a Sore a, cuw, bibie ayopõi, ɛ́ mɩ̀ dɩ a Sɛwr cuw bibie ayopõi. 10Al pùorí, a cuwr ayopõi sob bibie lɩzɛr'ɩ ata sob, a nãà tɩ bɛr'ɩ a Ɩsɩrayɛl nɩbɛ bɛ lɛb kul. Nʋ̃ɔ̀ tɩ ɩrɛ bɛ nɩ yaga, ɛ́ a bɛ pʋʋr pɛlɩ, bʋ̃ʋ n'ʋ vɛ̃, a Sore tɩ wul'ɩ a ʋ nɔ̃wfʋ a Daviir, a Salomɔ̃ nɩ a ʋ nɩ-bʋʋrɛ Ɩsɩrayɛl.
A Salomɔ̃ lɛb'a nyɛ̃ a Sore a gb'a ayi sob
(Nyɛ̃ 1Na 9:1-9, mɩ̀ nyɛ̃ 2Bi-yel 1:7-12)
11A nãà Salomɔ̃ tɩ ŋmãa nɩ a Sore Ŋmɩn-yir-kpɛ̃ɛ nɩ a nãà yir baarɩ. Ʋ tɩ tõ n vla a lɛ za ʋ na tɩ tɩɛrɩ k'ʋʋ tõ a Ŋmɩn-yir-kpɛ̃ɛ pʋɔ nɩ a ʋl mɩŋa yir pʋɔ a. 12A Sore tɩ ɩ na ʋ nyɛ̃ ʋ tɩ̃ɩsɔw, ʋʋ yel ʋ à ŋá: «Ɩ̃ wõ n a fʋ puoru! Ɩ̃ sàw na kaa ír a zie ŋa ʋ ɩ bàwr yir. 13Mãa wa pàw a salom ɛ̀ saa bɛ cãà waar a, mãa wa ƴãw a sãsoge k'aa sãw a tẽw a, mãa wa ƴãw jɛ̀lmɛ̃ bàalʋ a ɩ̃ nɩ-bʋʋrɛ pʋɔ a, 14a lɛn daar a, a ɩ̃ nɩ-bʋʋrɛ, a nɩ-bʋʋrɛ bɛl ɩ̃ na kʋ̀ a ɩ̃ yúor a, bɛlɛ wa siwri bɛ tʋɔra ɛ́ puore a, bɛlɛ wa bɔbr mɛ̃, ɛ́ zawrɩ a bɛ ɩ-faar bɛr a, a mãa, ɩ̃ na be n a salom zu ɛ́ bɛr wõ bɛ, ɩ̃ na dɩ n a bɛ yel-bebe suur kʋ̀ bɛ, ɛ́ lɛb maalɩ a tẽw ƴãw. 15Dɩ̃a na ta a, a ɩ̃ mimie yuo na, ɩ̃ɩ ƴãw tobr a puoru na na puori a zie ŋa pʋɔ a ƴãw. 16Ƴɛrɛŋa a, ɩ̃ kaa na ír a zie ŋa, ɩ̃ de ʋ na so ʋ k'ɩ̃ɩ mɩ́ wul kʋralɛ k'ɩ̃ɩ be n a nyɩ sɔgɔ. Ɩ̃ na kaarɛ nɩ ʋ zie nɩ nɔ̃wfʋ. 17Ɛ́ a fʋ̃ʋ a, fʋ̃ʋ wa ɩrɛ a ɩ̃ zie mɛ̃ a fʋ sãà Daviir a, fʋ̃ʋ wa ɩrɛ a lɛ za ɩ̃ na yere kʋ̀rɛ fʋ a, fʋ̃ʋ wa sàwr a wulu nɩ a tub ɩ̃ na kʋ̃ b a, 18ɩ̃ na ɩ na fʋ dɩrɛ naalʋ kʋralɛ, mɛ̃ à à ŋá ɩ̃ na yel a fʋ sãà Daviir zie a: “A fʋ bʋʋrɛ nɩr kãw na mɩ́ be n be kʋralɛ dɩrɛ naalʋ a Ɩsɩrayɛl nɩbɛ zu, a fʋ pùorí#7:18 Nyɛ̃ 1Na 2.4..” 19Ɛcɛ nyɩmɛ wa gùr pùor cɔw mɛ̃ a, nyɩmɛ bɛ wa sàwr a nɛ-ƴãwnɩ nɩ a wulu ɩ̃ na kʋ̀ nyɩ a, nyɩmɛ wa puore ŋmɩn-yoru ɛ́ mɩ́ gbĩ dume gũu tɩ tɔ tẽw a niŋé a, 20ɩ̃ na ír nyɩ na nɩ fãw a tẽw ɩ̃ na kʋ̀ nyɩ a pʋɔ, ɩ̃ na jɛ n a yir ŋa ɩ̃ na maalɩ a ɩ̃ yúor ƴãw a bɛr ʋ zãá nɩ mɛ̃. Lɛ n'a a nɩ-bʋʋrɛ za na ɩrɛ a Ɩsɩrayɛl laar, ɛ́ tʋʋr ʋ. 21A nɩbɛ mɩ́ wa tɔlɛ pɩɛlɩ a Ŋmɩn-yir-kpɛ̃ɛ ŋa na tɩ dãw ɩ kpɛ̃ɛ a, bɛ na mɩ́ nyɔw nɩ nʋɔr ɛ́ pʋ̀lá vʋ̃ɔ bɛ bɛ yere: “Bʋ̃ʋ n'ʋ so a Sore ɩ a tẽw ŋa nɩ a Ŋmɩn-yir-kpɛ̃ɛ ŋa à à ŋá?” 22Bɛ na mɩ́ sɔw bɛ na: “A Ɩsɩrayɛl nɩbɛ na zawrɩ a Sore, a bɛ sãà mɩnɛ Naaŋmɩn, bɛr a n'a so, ʋl na tɩ ɩ bɛ yi a Eziptɩ tẽw a. Bɛ tu n ŋmɩn-yoru, gbĩ dume gũu tɩ tɔ tẽw a niŋé, alɛ n'a so a Sore ɩ a kpɩɛrʋ á ŋá za páw bɛ.”»
La Bible en Dagara © Alliance Biblique du Burkina Faso, 2013.