2 Bibie za yel-manɩ 6
6
1Lɛ n'a a Salomɔ̃ tɩ yel: «Sore e, fʋ tɩ yel'a
kɛ́ zie na liw a pʋɔ n'a fʋ na kpɩɛr.
2Ɛcɛ mãa a, ɩ̃ ŋmãa nɩ yir-vla vla kʋ̀ b,
zie fʋ na na kpɩɛr kʋralɛ a!»
A ƴɛ̀rʋ a Salomɔ̃ na ƴɛ̀r a Ŋmɩn-yir-kpɛ̃ɛ maalʋ ƴãw a
(Nyɛ̃ 1Na 8:14-21)
3A Ɩsɩrayɛl lãw nɩbɛ za tɩ àr'ɩ saaƴẽwn. A Salomɔ̃ tɩ lɩɛb'a puori bɛ. 4Al pùorí, ʋ yel à ŋá: «Ɩ̃ puore nɩ a Sore, a Ɩsɩrayɛl Naaŋmɩn, yãanɩ! Ʋl mɩŋa maal'ɩ a lɛ ʋ na tɩ yel kʋ̀ a ɩ̃ sãà Daviir a. Ʋ tɩ yel ʋ na: 5“Mãa n'ʋ ɩ a ɩ̃ nɩ-bʋʋrɛ Ɩsɩrayɛl, ʋ yi a Eziptɩ tẽw. A ʋlɩ bibir nɛ wa tɔ a dɩ̃a a, ɩ̃ bɛ kaa ír tẽ-kpɛ̃ɛ kãw za a Ɩsɩrayɛl tẽw tẽ-bɛrɛ za pʋɔ, kɛ́ bɛ ŋmãa Ŋmɩn-yir-kpɛ̃ɛ ɩ̃ mɩ́ be a be ɩ, ɩ̃ɩ mɩ̀ bɛ kaa ír nɩr kãw k'ʋʋ ɩ a ɩ̃ nɩ-bʋʋrɛ Ɩsɩrayɛl nãà ɩ. 6Ɛcɛ, ɩ̃ kaa na ír a Zerizalɛm ʋ ɩ a ɩ̃ kpɛb zie, ɛ́ kaa ír fʋ, a fʋ̃ʋ Daviir, kɛ́ fʋ ɩ a ɩ̃ nɩ-bʋʋrɛ Ɩsɩrayɛl nɩ-kpɛ̃ɛ.” 7Zɩ̃ kɛ́ a ɩ̃ sãà Daviir tɩ tɩɛrɛ na k'ʋʋ ŋmãa Ŋmɩn-yir-kpɛ̃ɛ, a Sore, a Ɩsɩrayɛl Naaŋmɩn na na so a. 8Ɛcɛ, a Sore tɩ yel ʋ na: “Fʋ bɔbr'a kɛ́ fʋ ŋmãa Ŋmɩn-yir-kpɛ̃ɛ ɩ̃ so ʋ. A fʋ tɩɛrʋ vɩɛl'a. 9Ɛcɛ, fʋ̃ʋ bɛ n'ʋ na ŋmãa ʋ ɛ, a fʋ bidɛb'ʋ. A fʋ bidɛb fʋ na dɔw a n'ʋ na ŋmãa a Ŋmɩn-yir-kpɛ̃ɛ ŋa a ɩ̃ ƴãw#6:9 A kan-nɛ́ɛ 4 tɩ ta n a 9 sob ƴãw a, nyɛ̃ 2Sa 7.1-13..” 10A Sore tu n a lɛ ʋ na yel a. Ɩ̃ lɩɛr'ɩ a ɩ̃ sãà Daviir zɩ̃ a Ɩsɩrayɛl naalʋ-dà-kɔw zu, mɛ̃ a lɛ a Sore na tɩ yel a, ɛ́ ŋmãa a Ŋmɩn-yir-kpɛ̃ɛ ŋa, a Sore, a Ɩsɩrayɛl Naaŋmɩn, na so a. 11Ɩ̃ɩ bin nɩ a daga a ʋ pʋɔ, a daga ʋl pʋɔ a Sore wõ-taa ƴɛ̀rʋ na be a, a wõ-taa ʋ na tɩ maal'ɩ a Ɩsɩrayɛl nɩbɛ a.»
A Salomɔ̃ puoru ʋ na puori a
(Nyɛ̃ 1Na 8:22-53)
12Al pùorí, a Salomɔ̃ tɩ àr'ɩ saaƴẽwn a Sore bàwr-maal-kuur niŋé, tori a Ɩsɩrayɛl lãw nɩbɛ za. Ʋ tɩ tur'ɩ a nuru cɔw a salom k'ʋʋ puori. 13A Salomɔ̃ tɩ ƴãw na bɛ maalɩ kur-zɩɛ gbòró a davʋra sɔwlɩsɔw. A kpul dɔwlʋ zie ŋa lõbowr-been za mɩ́ tɩ tɛr'ɩ mɛtɩr ayi nɩ ŋmãa, ɛ́ a kɛrʋ ɩ mɛtɩr been nɩ ŋmãa. A Salomɔ̃ tɩ do n a ʋ zu gbĩ dume tori a Ɩsɩrayɛl lãw nɩbɛ za. Ʋ tɩ tur'ɩ a nuru cɔw a salom k'ʋʋ puori. 14Ʋ tɩ yel'a: «Sore e, Ɩsɩrayɛl Naaŋmɩn i, Naaŋmɩn bɛ be be mɛ̃ a fʋ̃ʋ a salom zu nɩ a tẽw zu ɛ. Fʋ mɩ́ maal'a tɛr a fʋ wõ-taa nɩ nɔ̃wfʋ a fʋ tõ-tõ-biir zie, a lɛn daar bɛ na mɩ́ sàwr a fʋ nʋɔr nɩ bɛ pʋɔ za a. 15A lɛ fʋ na tɩ ƴɛ̀r a fʋ tõ-tõ-bie ɩ̃ sãà Daviir zie a, fʋ tu na. A lɛ fʋ̃ʋ mɩŋa na tɩ yel kʋ̀ ʋ a, fʋ ɩ ʋ nɩ a dɩ̃a. 16Ƴɛrɛŋa a, Sore e, Ɩsɩrayɛl Naaŋmɩn i, mɩ̀ maalɩ a lɛ fʋ na tɩ ƴãw a nʋɔr a fʋ tõ-tõ-bie ɩ̃ sãà Daviir zie a, a lɛn daar fʋ na tɩ yel ʋ à ŋá a: “A fʋ bʋʋrɛ wa ɩrɛ vla a ɩ̃ zie mɛ̃ a lɛ a fʋ̃ʋ mɩŋa na ɩ a, a bɛ kãw na mɩ́ be n a ɩ̃ niŋé kʋralɛ, dɩrɛ naalʋ a Ɩsɩrayɛl nɩbɛ zu, a fʋ pùorí.” 17Ƴɛrɛŋa a, Ɩsɩrayɛl Naaŋmɩn i, ɩ̃ zɛlɛ fʋ na, maalɩ a lɛ fʋ na yel a fʋ tõ-tõ-bie, a ɩ̃ sãà Daviir zie a!
18Ɛcɛ a Naaŋmɩn na tʋ̃ɔ́ na sɩrɩ kpɩɛr a tẽw zu nɩ a nɩsaalbɛ ɛ? A salom yɛlmɛ na bɛ dɩ vuo ɩ, ɛ́ bɛ saalɩ a Naaŋmɩn kpɛb ƴãw ɛ. Ɛ́ bʋ̃ʋ baa n'ɩ a Ŋmɩn-yir-kpɛ̃ɛ ŋa ɩ̃ na ŋmãa a! 19Ɛcɛ, Sore ɩ̃ Naaŋmɩn i, cɛlɛ be: a mãa fʋ tõ-tõ-bie, ɩ̃ puore na zɛlɛ nɩ fʋ yãayãa, bɛr wõ a puoru ɩ̃ na puore fʋ nɩ ɩ̃ pʋɔ za a dɩ̃a a. 20Yuo a fʋ mimie! Jɩ́rɛ a Ŋmɩn-yir-kpɛ̃ɛ ŋa mʋ̃tɔ̃w nɩ tɩ̃ɩsɔw, fʋ na yel a ʋ ƴãw à ŋá a: “A ka n'a ɩ̃ na be.” Bɛr wõ a puoru ɩ̃ na puore fʋ a ka a. 21Mɩ́ bɛr wõ mãa nɩ a fʋ nɩ-bʋʋrɛ Ɩsɩrayɛl yãayãa zɛlʋ, tɩmɛ mɩ́ wa puore fʋ a ka a. Sore e, mɩ́ bɛr wõ a salom zu be fʋ na kpɩɛr a, mɩ́ bɛr wõ ɛ́ dɩ suur kʋ̀ tɩ.
22Bɛlɛ wa tɛr'ɩ nɩr ƴɛ̀rʋ yel k'ʋʋ sãw nɩ a ʋ tɔ sob a, bɛ na ƴãw na ʋ pɔ. Ʋlɛ wa wa, wa pɔ a fʋ yir pʋɔ, a fʋ bàwr-maal-kuur niŋé a, 23a fʋ̃ʋ a, Sore e, be a salom zu ɛ́ bɛr wõ, ɛ́ tu. Dɩ n a fʋ tõ-tõ-biir a ƴɛ̀rʋ: yel a sãwna sob k'ʋʋ sãw na, ɛ́ ɩ a ʋ sãwna lɛb lo a ʋ zu, ɛ́ yel a yel-mɩŋa sob k'ʋʋ bɛ tɛr sãwna ɩ, ɛ́ a nɩbɛ za ɩrɛ a ʋ zie mɛ̃ nɩr na bɛ tɛr sãwna a.
24A fʋ nɩ-bʋʋrɛ Ɩsɩrayɛl dɔ̃ dem wa zɛb tʋ̃ɔ́ bɛ bɛ na zawrɩ a fʋ nʋɔr a ƴãw a, bɛlɛ wa lɛb wa a fʋ zie wa danɛ fʋ, wa puore fʋ ɛ́ zɛlɛ fʋ yãayãa a yir ŋa pʋɔ a, 25fʋ̃ʋ a, Sore e, be a salom zu ɛ́ bɛr wõ, dɩ a fʋ nɩ-bʋʋrɛ Ɩsɩrayɛl yel-bebe suur kʋ̀ bɛ. Lɛb tɛr bɛ wa n a tẽw fʋ na kʋ̀ a bɛ sãàkʋm-kore a pʋɔ.
26A salom wa pàw a saa bɛ waar a, bɛ na zawrɩ a fʋ nʋɔr a ƴãw n'a. Ɛcɛ, bɛlɛ wa lɩɛbɩ niwn cɔw a zie ŋa kɛ́ bɛ puori fʋ a, bɛlɛ wa danɛ fʋ, ɛ́ ciire a bɛ yel-bebe fʋ na ƴãw bɛ kpɩɛrʋ pʋɔ a ƴãw a, 27a fʋ̃ʋ a, Sore e, be a salom zu ɛ́ bɛr wõ, dɩ a Ɩsɩrayɛl nɩbɛ yel-bebe suur kʋ̀ bɛ, bɛ na ɩ a fʋ tõ-tõ-biir nɩ a fʋ nɩ-bʋʋrɛ a ƴãw. Wul bɛ bɛ cere vla, ɛ́ fʋ ɩ a saa ʋ wa ƴãw a tẽw ŋa fʋ na so ɛ́ de kʋ̀ bɛ bɛ mɩ̀ so ʋ a.
28Kɔ̃ wa lo a, bɩɩ jɛ̀lmɛ̃ bàalʋ wa kpɛ a tẽw pʋɔ a, a bʋ̃-kʋ́ɔrɩ al na mɩ́ tɛr bie a wa kòre bɩɩ pɔnɛ a dàar zu a, a sãsoge nɩ a sãsow-nãa-nʋrɩ wa wa yaga za a, dɔ̃ dem wa zɛb'ɩ a fʋ nɩbɛ tɩ kpɛ n a tẽ-bɛrɛ al na cɔbrɩ kpɛmɛ a zɛbr ƴãw a pʋɔ a, yel-faa za bɩɩ bàalʋ za wa wa a, 29a Ɩsɩrayɛl nɩbɛ, a fʋ nɩ-bʋʋrɛ, bɛlɛ wa nyɛ̃ kɛ́ bɛl mɩŋa zie n'a a bɛ kpɩɛrʋ yi, ɛ́ puore fʋ, lɔbr nuru zɛlɛ fʋ a, bɛlɛ wa lɩɛbɩ niwn cɔw a Ŋmɩn-yir-kpɛ̃ɛ ŋa, ɛ́ zɛw a nuru puore nɩ fʋ a, 30a fʋ̃ʋ a, Sore e, a salom zu be fʋ na kpɩɛr a, bɛr wõ, dɩ suur kʋ̀ bɛ, ɛ́ ɩ ɩb kãw. Mɩ́ ɩ ŋa za tu n a lɛ a ʋ ɩb na ŋmɛ̃ a, fʋ na faa bãw ŋa za socir a. Bʋ̃ʋ n'ʋ vɛ̃, fʋ̃ʋ yõ n'ʋ bãw a nɩsaalbɛ socir. 31À ŋá n'a a Ɩsɩrayɛl nɩbɛ na zɔrɛ fʋ kʋralɛ, lɛn daar za bɛ na na kpɩɛr a tẽw fʋ na kʋ̀ a tɩ sãàkʋm-kore a.
32Bɛlɛ wa ƴɛ̀rɛ a fʋ yúor na ɩ kpɛ̃ɛ a ƴɛ̀rʋ a, nɩ a fʋ kpɛnʋ nɩ a fʋ fãw tome ƴɛ̀rʋ a, a nɩ-bʋʋr-yoru tɛɛ za na wõ a na. A lɛ a, sãan na bɛ pʋɔ a fʋ nɩ-bʋʋrɛ Ɩsɩrayɛl pʋɔ a wa yi tẽ-zãána kãw wa k'ʋʋ wa puori fʋ a yir ŋa pʋɔ a, 33a fʋ̃ʋ a, Sore e, be a salom zu fʋ na kpɩɛr a ɛ́ bɛr wõ a sãan ŋa puoru, ɛ́ kʋ̀ ʋ a ʋlɩ bom nɛ ʋ na zɛlɛ a. À ŋá n'a a tẽw zu nɩ-bʋʋrɛ za na bãw fʋ. Bɛ na zɔrɛ fʋ na mɛ̃ a lɛ a fʋ nɩ-bʋʋrɛ Ɩsɩrayɛl na zɔrɛ fʋ a, ɛ́ bɛ na bãw na kɛ́ fʋ̃ʋ sɩrɩ so a yir ŋa ɩ̃ na ŋmãa a.
34A Ɩsɩrayɛl nɩbɛ wa cere kɛ́ bɛ tɩ zɛb'ɩ a bɛ dɔ̃ dem, a be fʋ na tõ bɛ a, bɛlɛ wa lɩɛbɩ niwn cɔw a tẽ-kpɛ̃ɛ ŋa fʋ na kaa ír a, nɩ a yir ŋa ɩ̃ na ŋmãa a fʋ ƴãw a, bɛlɛ wa puore fʋ a, 35fʋ̃ʋ cɛlɛ be a salom zu, bɛr wõ a bɛ yãayãa zɛlʋ ɛ́ sõw bɛ.
36A Ɩsɩrayɛl nɩbɛ wa zawrɩ a fʋ nʋɔr a — nɩsaal na bɛ be be bɛ zawrɛ nʋɔr a ƴãw a — fʋ̃ʋ wa nyɛ̃ nɩ bɛ suur, ƴãw bɛ a bɛ dɔ̃ dem nuru pʋɔ, bɛ tɛr bɛ a gbãgbaalʋ pʋɔ cen nɩ a bɛ ten a, ten na zãá bɩɩ pɩɛlɩ a, 37a bɛ gbãgbaalʋ tẽw pʋɔ be, bɛlɛ wa lɛb tɩɛrɩ ɛ́ zɛlɛ fʋ yãayãa yere nɩ: “Tɩ maal'ɩ yel-bier, tɩ bɛ ɩ vla ɩ, tɩ sãw na!” a, 38bɛlɛ wa lɛb wa a fʋ zie nɩ a bɛ pʋɔ za nɩ a bɛ sɩ́ɛ za, a tẽw ʋl pʋɔ bɛ na ɩ a gbãgbaar a, bɛlɛ wa lɩɛbɩ niwn cɔw a bɛ tẽw, a tẽw ʋl fʋ na kʋ̀ a bɛ sãàkʋm-kore a, a tẽ-kpɛ̃ɛ ŋa fʋ na kaa ír a, nɩ a yir ŋa ɩ̃ na ŋmãa a fʋ ƴãw a, 39a fʋ̃ʋ a, a salom zu be fʋ na kpɩɛr a, cɛlɛ be, bɛr wõ a bɛ yãayãa zɛlʋ ɛ́ sõw bɛ, ɛ́ dɩ suur kʋ̀ bɛ, a yel-bebe bɛ na maalɩ sãw fʋ a ƴãw.
40Ɩ̃ Naaŋmɩn i, yuo a fʋ mimie! Bɛr wõ a puoru ɩ̃ na puore fʋ a zie ŋa pʋɔ a ƴɛrɛŋa a.
41Ɛ́ ƴɛrɛŋa a, Sore Naaŋmɩn i,
ìr wa a fʋ pɩ̃ɛnʋ zie,
fʋ̃ʋ nɩ a daga ʋl na wule a fʋ fãw a.
Sore Naaŋmɩn i, ɩ a fʋ faafʋ pàw a fʋ bàwr-maalbɛ
mɛ̃ pɛn na pàw bɛ a.
A fʋ nɩbɛ na sàw de fʋ a,
bɛ lɔbr nʋ̃ɔ̀ cɛlsɩ a bɛ nʋ̃ɔ̀ pʋɔ.
42Sore Naaŋmɩn i, ta ŋmɛlɩ kpaar cɔw a fʋ nɩ-kabra ɩ,
lɛb tɩɛrɩ bãwnɩ a maalʋ al za
fʋ na kʋ̀ a fʋ tõ-tõ-bie Daviir a.»
La Bible en Dagara © Alliance Biblique du Burkina Faso, 2013.