2 Bibie za yel-manɩ 5
5
1A Salomɔ̃ na tɩ tõ a Ŋmɩn-yir-kpɛ̃ɛ ŋmãafʋ tome za baar'a, ʋ tɩ ƴãw na bɛ de bom nɛ za a ʋ sãà Daviir na tɩ de kʋ̀ a Sore a wa n: salm-pla, salm-zɩɛ nɩ a bome za, ʋ wa de a za ƴãw a Ŋmɩn-yir-kpɛ̃ɛ na-bome binu zie dĩo pʋɔ.
Bɛ tuo nɩ a wõ-taa daga wa n a Ŋmɩn-yir-kpɛ̃ɛ pʋɔ
(Nyɛ̃ 1Na 8:1-13)
2Lɛ n'a a nãà Salomɔ̃ tɩ bʋɔl'ɩ a Ɩsɩrayɛl nɩbɛ nɩ-kore, a Ɩsɩrayɛl dɔwlʋ nɩ-bɛrɛ za, nɩ a Ɩsɩrayɛl yie nɩ-bɛrɛ, kɛ́ bɛ ɓã taa a ʋ zie a Zerizalɛm, bɛ tuo a Sore wõ-taa daga a Daviir Tẽ-kpɛ̃ɛ́, a pɛr lɛ k'aa Sɩyɔ̃, cen nɩ a Ŋmɩn-yir-kpɛ̃ɛ pʋɔ. 3Lɛ n'a a Ɩsɩrayɛl nɩbɛ za tɩ wa ɓã taa a nãà Salomɔ̃ zie, a cuwr ayopõi sob cuw#5:3 Cuwr ayopõi sob cuw: A Sɛwr cuw n'ʋ bɛ yere à ŋá. maalʋ ƴãw. 4A Ɩsɩrayɛl nɩbɛ nɩ-kore za na wa ta a, a levitɩ mɩnɛ tɩ tuo nɩ a wõ-taa daga. 5Bɛ tɩ tuo nɩ a wõ-taa daga cen nɩ, lãwnɩ a tuor-taa pɛn-sɛw nɩ a bʋ̃-son za na tɩ be a pɛn-sɛw pʋɔ a. A levitɩ mɩnɛ bɛl na ɩ bàwr-maalbɛ a nɛbɛ tɩ tuo a cen nɩ. 6A nãà Salomɔ̃ nɩ a Ɩsɩrayɛl lãw nɩbɛ za na tɩ wa lãw nɩ ʋ a tɩ ɓã n taa àr a daga niŋé. Bɛ tɩ kʋ n píir nɩ nĩi na tɩ yãwmɛ nɩr kʋ̃ tʋ̃ɔ́ maal bãw a nʋɔr a maal'ɩ bagɛ.
7Al pùorí, a bàwr-maalbɛ tɩ kpɛ n nɩ a Sore wõ-taa daga a ʋ beba zie, a zi-sõw-za-zi-sõw pʋɔ, a seribɛ̃ pɩgɛ pile. 8A seribɛ̃ tɩ dɔl'ɩ a pɩgɛ a zie nɛ bɛ na na bin a daga a saa-zu, a pàw a daga nɩ a dàar bɛ na mɩ́ tuo nɩ ʋ a. 9A dàar á ŋá tɩ wõwme na, fʋ̃ʋ wa be a wõ-taa daga nɩ a càará dɩ̃dɔrɩ́ cará a n'a fʋ mɩ́ tʋ̃ɔ́ nyɛ̃ a nyɛɛ. Ɛcɛ fʋ̃ʋ wa be a yẽw a, fʋ bɛ mɩ́ nyɛ̃ a ɩ. A cãà nɩ be nɩ dɩ̃a. 10A Naaŋmɩn wulu kʋsɛ-pamɛ ayi a Moyiir na tɩ ƴãw a daga pʋɔ a, al tɛwr'a tɩ be be. A kʋsɛ-pamɛ ʋ na tɩ páw a Orɛb tãw zu a n'a, a lɛn daar a Sore na tɩ maal'ɩ a Ɩsɩrayɛl nɩbɛ wõ-taa, ʋ na tɩ tɛr bɛ yi n a Eziptɩ tẽw baarɩ a.
11A bàwr-maalbɛ tɩ lɛb'a yi a zi-sõw pʋɔ. A bàwr-maalbɛ za na tɩ be a be a tɩ so n a bɛ dɛwr bɛr, bɛ bɛ tɩ tu a lɛ a palɛ palɛ na tu taa a ɩ. 12A levitɩ mɩnɛ bɛl na ɩ yiel-yielbɛ a, bɛ za, Asafʋ, Heman, Yedutun, a bɛ bidɛbr nɩ a bɛ yɛbr tɩ su n lɛ̃ pɛnɛ tɛr'ɩ sɛ̃sɛgɛ, korijom nɩ pɛ̀nɛ́, àr'ɩ a bàwr-maal-kuur saa-pɛrɩ́. Bàwr-maalbɛ lɩz'a ayʋɔb (120) tɩ àr'a kɔw bɛ pɛlbɛ wɩɩr. 13A wɩ-pɛblɛ nɩ a yiel-yielbɛ tɩ lãw nɩ taa vla vla maal yiele mɛ̃ kɔkɔr-been a, yiele danɛ nɩ a Sore: «Nyɩ danɛ a Sore, a ʋ vɩɛlʋ ƴãw, a ʋ nɔ̃wfʋ na be kʋralɛ a ƴãw.» A yielu ŋa mɩ́ ìr'a do lãwnɩ a wɩɩr, a sɛ̃sɛgɛ nɩ a yielu bome al na cɛ a, zũzuwr mɩ́ paal'ɩ a Ŋmɩn-yir-kpɛ̃ɛ. 14A zũzuwr ŋa tɩ ɩ na a bàwr-maalbɛ bɛ tʋ̃ɔ́ cãà cow a bɛ tome ɩ. Bʋ̃ʋ n'ʋ vɛ̃, a Sore yúor-vɩɛlʋ-danʋ tɩ paal'ɩ a Ŋmɩn-yir-kpɛ̃ɛ.
La Bible en Dagara © Alliance Biblique du Burkina Faso, 2013.