2 Bibie za yel-manɩ 4
4
1Bɛ tɩ maal'ɩ kur-zɩɛ bàwr-maal-kuur, a lõbowr za wogo mɩ́ ɩ mɛtɩr pie, ɛ́ a kɛrʋ ɩ mɛtɩr anũu.
A kur-zɩɛ sɩ̃w-kpɛ̃ɛ nɩ a kur-zɩɛ la-bɛrɛ
(Nyɛ̃ 1Na 7:23-26)
2Bɛ tɩ maal'ɩ kur-zɩɛ sɩ̃w-vilovilo. A ʋ pʋɔ yɛ̀lʋ tɩ ɩ n mɛtɩr anũu, a kɛrʋ ɩ mɛtɩr ayi nɩ ŋmãa, ɛ́ a viir-kolu ɩ mɛtɩr pie nɩ anũu. 3A sɩ̃w nɔgbãbir pile a, bɛ tɩ wi n nadɛɛ viiri koli a sɩ̃w za, nadɛɛ lɩzɛr mɛtɩr been za zu, gbɛlɛ ayi zu. A sɩ̃w-kpɛ̃ɛ nɩ a nadɛɛ á ŋá n'a bɛ tɩ lãw nyɩl. 4Kur-zɩɛ nadɛɛ pie nɩ ayi zu n'a a sɩ̃w tɩ dɔwlɩ: ata tɩ lɩɛb'a cɔw a saa-pɛrɩ́-gʋba-lowr ɛ́ ata lɩɛbɩ cɔw a mʋ̃tɔ̃w-kpɛb-lowr, ata lɩɛbɩ cɔw a saa-pɛrɩ́-dʋrʋ-lowr ɛ́ ata lɩɛbɩ cɔw a saa-pɛrɩ́. A pɛ́ɛ tɩ lɩɛb'a be a sɩ̃w pile. 5A sɩ̃w nɔgbãbir yɛ̀lʋ tɩ ɩ n nũ-ɓal. Bɛ tɩ maal'ɩ a ʋ nʋɔr, mɛ̃ koli-nyúura nʋɔr na ɩ mɛ̃ váar kãw bɛ na bʋɔlɛ lisɩ a puuru a. A sɩ̃w mɩ́ tɩ ƴãw nɩ litɩr tùr lɩz'a ayʋɔb (120 000) kʋ̃ɔ.
6Bɛ tɩ maal'ɩ kur-zɩɛ sɩnli pie, ƴãw anũu a Ŋmɩn-yir-kpɛ̃ɛ dʋrʋ lowr, ɛ́ ƴãw anũu a gʋba lowr a dɛwr-so-bɛrʋ ƴãw. Be n'a bɛ mɩ́ tɩ pɛ́w a nyɩw-a-za-bàwr nɛnɛ. A sɩ̃w-kpɛ̃ɛ pʋɔ kʋ̃ɔ n'a a bàwr-maalbɛ mɩ́ tɩ so n a bɛ dɛwr bɛr.
A Ŋmɩn-yir-kpɛ̃ɛ kure bʋ̃-maalɩ na sɛb tu taa a
(Nyɛ̃ 1Na 7:40-51)
7Bɛ tɩ maal'ɩ salm-zɩɛ fɩ̃tɩlɩ dɔwlʋ zie bome pie, mɛ̃ a lɛ bɛ na yel kɛ́ bɛ mɩ́ maal'a a. Bɛ mɩ́ tɩ ƴãw a nɩ a Ŋmɩn-yir-kpɛ̃ɛ pʋɔ, anũu a dʋrʋ lowr, anũu a gʋba lowr.
8Bɛ tɩ maal'ɩ tabalɛ pie ƴãw a Ŋmɩn-yir-kpɛ̃ɛ pʋɔ, anũu a dʋrʋ lowr, anũu a gʋba lowr.
Bɛ tɩ maal'ɩ salm-zɩɛ lali kʋba (100) a zɩ̃ɩ mɩrʋ ƴãw.
9Bɛ tɩ ŋmãa nɩ a bàwr-maalbɛ davʋra, nɩ davʋra kãw na ɩ kpɛ̃ɛ zuo a bàwr-maalbɛ dem a, ɛ́ ƴãw pamɛ. Bɛ tɩ nyɩl'ɩ kur-zɩɛ pàw a pamɛ za.
10Bɛ tɩ bin nɩ a sɩ̃w-kpɛ̃ɛ-vilovilo a Ŋmɩn-yir-kpɛ̃ɛ dʋrʋ lowr, a saa-pɛrɩ́-dʋrʋ-lowr nɩ a saa-pɛrɩ́ cará gõgon ƴãw.
11A Hiram na tɩ maalɩ a tãpɛlʋ bome, a pɛ́lɛ̀ nɩ a zɩ̃ɩ mɩrʋ lali baar'a, ʋ tɩ maal'ɩ bom za a nãà Salomɔ̃ na tɩ yel k'ʋʋ maalɩ a Ŋmɩn-yir-kpɛ̃ɛ ƴãw a baarɩ:
12kpule ayi, kpule nyʋɔrɩ́ zu-kpãkpule ayi,
mɩ̃ɛ bʋʋrɛ kãw a kpule nyʋɔrɩ́ zu-kpãkpule pàwfʋ ƴãw,
13girenadɩ tɩ-wɔmɛ kɔbr anaar (400)
na caw a mɩ̃ɛ ayi ƴãw, gbɛlɛ ayi zu a,
14ʋ mɩ̀ tɩ maal'ɩ a torkori nɩ a sɩnli
bɛ na mɩ́ dɔwlɩ a zu a,
15a sɩ̃w-kpɛ̃ɛ-vilovilo,
nadɛɛ pie nɩ ayi na tuo a sɩ̃w-kpɛ̃ɛ ŋa a,
16a tãpɛlʋ bome, a pɛ́lɛ̀ nɩ a nɛnɛ tɩr-jajaa.
A bome á ŋá za a nãà Salomɔ̃ na tɩ ƴãw a Hiram-Abi maalɩ a Sore Ŋmɩn-yir-kpɛ̃ɛ ƴãw a, kur-zɩɛ na sal kpʋ̃lɛ̃ kpʋ̃lɛ̃ a n'ʋ ʋ tɩ maal'ɩ a. 17Tẽsɔw pʋɔ n'a bɛ tɩ nyɩl a kur-zɩɛ maal'ɩ a, a Zurdɛ̃ bà-fʋɔla pʋɔ, Sukotɩ nɩ Seredata ten cará. 18A Salomɔ̃ tɩ maal'ɩ a bome á ŋá za a yãwmɛ bɛ tɛr nʋɔr ɛ, ɛ́ nɩr bɛ tɩ sàw bɔbr a kur-zɩɛ tɩbrʋ bãwfʋ ɛ.
19A Salomɔ̃ mɩ̀ tɩ ƴãw na bɛ maalɩ a salm-zɩɛ bome za a Ŋmɩn-yir-kpɛ̃ɛ ƴãw:
a salm-zɩɛ bàwr-maal-kuur,
a tabalɛ al zu bɛ na mɩ́ dɔwlɩ a dipɛ̃
bɛ na de kʋ̀ a Naaŋmɩn a,
20a fɩ̃tɩlɩ dɔwlʋ zie nɩ a fɩ̃tɩlɩ a na fɛr
k'aa dɩrɛ a zi-sõw-za-zi-sõw pʋɔ,
mɛ̃ a lɛ a nʋɔr na ƴãw a:
salm-zɩɛ mɩŋa mɩŋa n'a bɛ tɩ maal'ɩ a.
21A tɩ-puur-yɩryɩr, a vũuni,
a vũuni dɔwlʋ zie cabɩ:
salm-zɩɛ mɩŋa mɩŋa n'a bɛ tɩ maal'ɩ a.
22A vũuni kpiiru cabɩ,
a zɩ̃ɩ lali, a koli-nyúuri, a sɩlbarɩ:
salm-zɩɛ mɩŋa mɩŋa n'a bɛ tɩ maal'ɩ a.
A Ŋmɩn-yir-kpɛ̃ɛ pamɛ,
a dĩo pamɛ na yuore a zi-sõw-za-zi-sõw pʋɔ a,
a al na yuore a càará pʋɔ a:
salm-zɩɛ mɩŋa mɩŋa n'a bɛ tɩ maal'ɩ a.
La Bible en Dagara © Alliance Biblique du Burkina Faso, 2013.