2 Bibie za yel-manɩ 3
3
A Ŋmɩn-yir-kpɛ̃ɛ ŋmãafʋ
(Nyɛ̃ 1Na 6:1-38)
1A Salomɔ̃ tɩ tĩ nɩ a Sore Ŋmɩn-yir-kpɛ̃ɛ ŋmãafʋ a Zerizalɛm, a Moriya#3:1 Moriya: A Wõ-ta-kʋra sɛbɛ za pʋɔ a, a ka tɛwr'a bɛ bʋɔlɩ a tãw ŋa kɛ́ Moriya, alɛ bɛ ɩ lɛ, bɛ bʋɔlɛ ʋ nɩ Sɩyɔ̃ tãw. tãw zu, a be a Sore na tɩ ɩ a ʋ sãà Daviir nyɛ̃ ʋ a. A Daviir tɩ cɔbr'ɩ a zie a Ɔrnan na ɩ Zebi bʋʋrɛ a ble vab gbãgbalá. 2A Salomɔ̃ naalʋ-dɩb yome anaar sob a cuwr ayi sob daar'a a tome tɩ tĩ. 3A Ŋmɩn-yir-kpɛ̃ɛ pɛr a Salomɔ̃ na sʋ̃ɔ́ a zɛ̃a n'ɩ à ŋá: a wogo tɩ ɩ n mɛtɩr lɩzɛr'ɩ pie, ɛ́ a yɛ̀lʋ ɩ mɛtɩr pie. 4A zawle, a wogo na tɩ sɛw a Ŋmɩn-yir-kpɛ̃ɛ yɛ̀lʋ a, wogo tɩ ɩ n mɛtɩr pie, ɛ́ a kɛrʋ ɩ mɛtɩr lɩz'a ata. A Salomɔ̃ tɩ ƴãw na bɛ nyɩl salm-zɩɛ mɩŋa mɩŋa pàw a ʋ pʋɔ za. 5Sɩpɩrɛ tɩɛ dà-pãgalɩ n'a bɛ tɩ kpa pàw a càará dacine, ɛ́ nyɩl salm-zɩɛ mɩŋa mɩŋa pàw, ɛ́ wi kpãkparmɛ tɩɛ wuli nɩ bãzɔlɩ ƴãw. 6Bɛ mɩ̀ tɩ cãà na ƴãw a dĩo ŋa pɩ̃ɛmɛ nɩ kʋsɛ-bi-nyɩlɩ nyɩlɩ. Ɛ́ a salm-zɩɛ a, Parwayim tẽw n'a a tɩ yi. 7Bɛ tɩ nyɩl'ɩ salm-zɩɛ pàw a kpule, a dɩ̃dɛɛ, a dacine nɩ a pamɛ, ɛ́ wi seribɛ̃ mɩnɛ ƴãw a dacine zu.
8Al pùorí, bɛ tɩ ŋmãa nɩ a zi-sõw-za-zi-sõw: a ʋ wogo na tɩ sɛw a Ŋmɩn-yir-kpɛ̃ɛ yɛ̀lʋ a, tɩ ɩ n mɛtɩr pie, ɛ́ a ʋ yɛ̀lʋ mɩ̀ ɩ mɛtɩr pie. Bɛ tɩ de nɩ salm-zɩɛ mɩŋa mɩŋa tɔn lɩzɛr nyɩl pàw a pʋɔ. 9A salm-zɩɛ pĩi-bie tɩbrʋ tɩ ɩ n kilo#3:9 Kilo: A kilogɩram'ʋ bɛ pʋ̃ɔ bʋɔlɛ a kilo a ka. A kilogɩram been ɩ n gɩram túr. A kilo ɩ n tɩbrʋ bʋ̃-mána. Nyɛ̃ 1Bi-yel 20.2. põ-zɛ̃-taa. Mɔ̃ mɩ̀ bɛ tɩ nyɩl'ɩ salm-zɩɛ pàw a saa-zu diru.
10Bɛ tɩ nyɩl'ɩ bome maal'ɩ seribɛ̃ ayi ƴãw a zi-sõw-za-zi-sõw pʋɔ, ɛ́ nyɩl salm-zɩɛ pàw a. 11A seribɛ̃ pɩgɛ za na ɓã taa a, a wogo tɩ ɩ n mɛtɩr pie: a dãw-niwn sob pɩwr kãw, a wogo na tɩ ɩ mɛtɩr ayi nɩ ŋmãa a tɩ tɩɛ nɩ a Ŋmɩn-yir-kpɛ̃ɛ dacin, ɛ́ a pɩwr kãw, a wogo mɩ̀ na ɩ mɛtɩr ayi nɩ ŋmãa a tɩ tɩɛ a seribɛ̃ ŋanɩ sob. 12A seribɛ̃ ayi sob pɩwr, a wogo na tɩ ɩ mɛtɩr ayi nɩ ŋmãa a tɩ tɩɛ nɩ a Ŋmɩn-yir-kpɛ̃ɛ dacin, ɛ́ a pɩwr kãw, a wogo mɩ̀ na ɩ a mɛtɩr ayi nɩ ŋmãa a tɩɛ a seribɛ̃ dãw-niwn sob. 13A seribɛ̃ á ŋá pɩgɛ tɩ yɛ́r'a pàw mɛtɩr pie zie, ɛ́ a tɩ ìr àr'ɩ gbɛ́ɛ, ɛ́ lɩɛbɩ a niŋe tori a di-pʋɔ. 14Bɛ tɩ wób'ɩ pɛn-yawla nɩ lɛ̃ pɛn-vʋlvʋl bɛ na mʋ̀ɔlɩ ʋ ɩ kãbala, zɩɛ nɩ zɩɛ-ɓõɓõ, ɛ́ bɛ maw seribɛ̃ ƴãw a.
A kur-zɩɛ kpule nɩ a kur-zɩɛ bàwr-maal-kuur
(Nyɛ̃ 1Na 7:15-22)
15Bɛ tɩ maal'ɩ kpule ayi a Ŋmɩn-yir-kpɛ̃ɛ niŋé: a kɛ̀rʋ́ tɩ ɩ n mɛtɩr pie nɩ ayopõi, ɛ́ a zu-kpãakpule na tɩ be a nyʋɔrɩ́ a, kɛrʋ ɩ mɛtɩr ayi nɩ ŋmãa. 16Bɛ tɩ maal'ɩ bãzɔlɩ ƴãw a kpule nyʋɔrɩ́, ɛ́ maalɩ pɩ̃ɛmɛ na ɩ girenadɩ tɩɛ wɔmɛ a ƴãw a bãzɔlɩ ƴãw. 17Bɛ tɩ bà n a kpule a Ŋmɩn-yir-kpɛ̃ɛ niŋé, kãw a dʋrʋ lowr, ɛ́ kãw a gʋba lowr. A dʋrʋ lowr kpul tɩ dɩ na kɛ́ Yakin, a pɛr lɛ kɛ́: “Ŋmɩn n'ʋ tɩrɛ a fãw”, ɛ́ a gʋba lowr kpul dɩ kɛ́ Bowaazʋ, a pɛr lɛ kɛ́: “Ŋmɩn n'ɩ a fãw.”
La Bible en Dagara © Alliance Biblique du Burkina Faso, 2013.