2 Bibie za yel-manɩ 2
2
1A Salomɔ̃ tɩ de nɩ nɩbɛ tùr lɩz'a ata nɩ pie (70 000) bɛ tuore a bome, nɩbɛ tùr lɩz'a anaar (80 000) bɛ pɛnɛ a kʋsɛbɛ a tãw zu, ɛ́ nɩbɛ túr ata dɔwlɩ kɔbr ayʋɔb (3 600) piwre a tõ-tõ-biir bɛ ŋa.
2A Salomɔ̃ tɩ tõ na bɛ tɩ yel a Tɩ́ɩ̀r tẽw nãà Hiram: «Fʋ kʋ̀ n sɛɛdɩr tɩɩr dàar a ɩ̃ sãà Daviir ʋ tʋ̃ɔ́ ŋmãa nɩ a ʋ yir-kpɩɛra. Mɩ̀ lɛb ɩ a lɛ a ɩ̃ zie. 3Bʋ̃ʋ n'ʋ vɛ̃, mãa n'ɩ ŋan bɔbr k'ɩ̃ɩ ŋmãa yir kʋ̀ a Sore ɩ̃ Naaŋmɩn, Ŋmɩn-yir-kpɛ̃ɛ ʋ na na so a. A ʋ pʋɔ n'a bɛ na mɩ́ nyɩw a parfɛ̃ ɛ́ bin a dipɛ̃-son kʋralɛ. Be n'a bɛ na maalɛ a nyɩw-a-za-bagɛ biɓaarɛ nɩ zaanʋɔrɛ, a pɩ̃ɛnʋ-bibie, cuw-paalɛ daar nɩ a Sore tɩ Naaŋmɩn cuwr al za na cɛ a daar. A nɛ́ɛ á ŋá na ƴãw kʋ̀ a Ɩsɩrayɛl nɩbɛ a na tuur'ɩ kʋralɛ. 4Ɛ́ a Ŋmɩn-yir-kpɛ̃ɛ ɩ̃ na bɔbr k'ɩ̃ɩ ŋmãa a na ɩ n kpɛ̃ɛ, bʋ̃ʋ n'ʋ vɛ̃, a tɩ Naaŋmɩn ɩ n kpɛ̃ɛ zuo a ŋmɩmɛ za. 5A salom yɛlmɛ na, ɛ́ bɛ saalɩ a ʋ kpɛb ƴãw ɛ, ɛ́ ãa n'ʋ na tʋ̃ɔ́ ŋmãa yir kʋ̀ ʋ? Ɛ́ a mãa tɔr za a, ãa nɛ m na ŋmãa yir kʋ̀ ʋ? Zie bɛ na na maalɛ bàwr kʋ̀rɛ ʋ a tɛwr'ʋ ɩ̃ bɔbr k'ɩ̃ɩ ŋmãa. 6A na ɩ à ŋá a, kʋ̀ m bãw-bãwnɛ na tone a salm-pla, a salm-zɩɛ, a kur-zɩɛ nɩ a kure a, na bãw a lɛ bɛ na mɩ́ mʋɔlɩ a pɛnɛ a ɩ zɩɛ-ɓõɓõ, zɩɛ-wʋlʋlʋ bɩɩ zɩɛ-kãbala a, ɛ́ mɩ̀ bãw wib a. Ʋlɛ nɩ a ɩ̃ mɩŋa bãw-bãwnbɛ nɛbɛ na tone, a bɛl a ɩ̃ sãà Daviir na cɔbrɩ ɛ́ bɛ kpɩɛr a Zuda nɩ a Zerizalɛm a. 7Mɩ̀ kʋ̀ m Libã tẽw sɛɛdɩr tɩɩr dàar nɩ sɩpɩrɛ tɩɩr dàar nɩ sãtal tɩɩr dàar. Ɩ̃ bãwnɩ a na a fʋ tõ-tõ-biir na bãw a Libã tẽw dàar cɛb a. A ɩ̃ tõ-tõ-biir na sõw nɩ a fʋ tõ-tõ-biir 8bɛ lãw bɔ a dàar a yãwmɛ yaga yaga, bʋ̃ʋ n'ʋ vɛ̃, a yir ɩ̃ na bɔbr k'ɩ̃ɩ ŋmãa a na ɩ n kpɛ̃ɛ tɛr yúor. 9A mãa a, ɩ̃ na kʋ̀ n a dà-cɩɛrbɛ na cɩɛr a dàar a ble zɔ̃ tɔn túr ayʋɔb (6 000), ɔɔzʋ zɔ̃ tɔn túr ayʋɔb (6 000), divɛ̃ litɩr tùr kɔbr ani (800 000) nɩ kãá litɩr tùr kɔbr ani (800 000).»
10A Tɩ́ɩ̀r tẽw nãà, Hiram, tɩ sɛb'a sɔw a Salomɔ̃ à ŋá: «A Sore na nɔnɛ a ʋ nɩ-bʋʋrɛ a n'a so ʋ ƴãw fʋ ɩ a bɛ nãà. 11A Sore, a Ɩsɩrayɛl Naaŋmɩn, tɛr'ɩ puoru, ʋl na ír a salom nɩ a tẽw a. Bʋ̃ʋ n'ʋ vɛ̃, ʋlɛ n'ʋ kʋ̀ bidɛb a nãà Daviir, ʋ tɛr yã-bãwfʋ, bãw maal-ɩb ɛ́ tɛr yã na na tʋ̃ɔ́ ŋmãa Ŋmɩn-yir-kpɛ̃ɛ kʋ̀ a Sore, ɛ́ ŋmãa nãà yir a ʋl mɩŋa ƴãw a. 12A na ɩ à ŋá a, ƴɛrɛŋa a, ɩ̃ kʋ̀rɛ fʋ nɩ Hiram-Abi#2:12 Hiram-Abi: Ziir a mɩnɛ a, bɛ bʋɔlɛ ʋ nɩ Huuram-Abi, bɩɩ Hiram-Abi. Bɛ mɩnɛ mɔ̃ mɩ̀ bʋɔlɛ ʋ nɩ Huuram bɩɩ Hiram. Ɛcɛ, ʋ bɛ ɩ a Tɩ́ɩ̀r tẽw nãà Hiram n'ʋ ɛ. na ɩ bãw-bãwnɛ na tɛr yã a. 13Tɩ́ɩ̀r tẽw n'a a ʋ sãà yi, ɛ́ a ʋ mã ɩ Dan dɔwlʋ nɩr. Ʋ bãw nɩ a salm-zɩɛ nɩ a salm-pla tome, a kur-zɩɛ, a kure, a kʋsɩɛr nɩ a dàa tome, ʋ bãw nɩ a pɛnɛ mʋɔlʋ mɩ́ mʋɔlɩ a ɩ zɩɛ, zɩɛ-kãbala nɩ zɩɛ-wʋlʋlʋ nɩ lɛ̃ pɛnɛ yele. Ʋ bãw nɩ wib bʋʋrɛ za, ʋ na tʋ̃ɔ́ na maalɩ bom nɛ za bɛ na na yel k'ʋʋ maalɩ a. Ʋ na lãw nɩ nɩ a fʋ bãw-bãwnbɛ nɩ a fʋ sãà, a ɩ̃ sore Daviir, bãw-bãwnbɛ tone. 14A ble nɩ a ɔɔzʋ, a kãá nɩ a divɛ̃ fʋ na yel kɛ́ fʋ na tɩr'a a, tɩr a kʋ̀ tɩ. 15Tɩɩm a, tɩ na cɛ n a Libã tɩɩr sɛw lɛ za na pɛlɩ a fʋ pʋɔ a. Tɩ na 'lẽ a na ɓã taa ƴãw a kʋ̃ɔ-kpɛ̃ɛ zu a duwre tɩ ta a Zafa, fʋ ƴãw bɛ de a do n a Zerizalɛm.»
16A nʋʋrɩ bɛl za na tɩ kpɩɛr a Ɩsɩrayɛl tẽw a, a Salomɔ̃ tɩ de bɛ nɩ a tome, a bɛl a ʋ sãà Daviir na tɩ sɔ́r a: bɛ tɩ ɩ n nɩbɛ tùr lɩz'a ayopõi nɩ pie nɩ ata dɔwlɩ nɩbɛ kɔbr ayʋɔb (153 600). 17Ʋ tɩ kaa na ír nɩbɛ tùr lɩz'a ata nɩ pie (70 000) bɛ tuore a tuor, nɩbɛ tùr lɩz'a anaar (80 000) pɛnɛ a kʋsɛbɛ a tãw zu, ɛ́ nɩbɛ túr ata dɔwlɩ kɔbr ayʋɔb (3 600) piwre a nɩbɛ bɛ ŋa za tome.
La Bible en Dagara © Alliance Biblique du Burkina Faso, 2013.