2 Bibie za yel-manɩ 26
26
A Ozɩasɩ naalʋ-dɩb
(Nyɛ̃ 2Na 14:21-22, 15:1-3)
1A Zuda nɩbɛ za tɩ de nɩ a Ozɩasɩ#26:1 Ozɩasɩ: A 2Na 14.21 pʋɔ a, a Ozɩasɩ dɩ na kɛ́ Azarɩasɩ. na tɩ tɛr yome pie nɩ ayʋɔb a, ʋ ɩ a nãà lɩɛrɩ a ʋ sãà Amazɩasɩ. 2Ʋlɛ n'ʋ tɩ lɛb zɛb de a Eilatɩ tẽw ɛ́ lɛb mɛ ʋ, a ʋ sãà kũu pùorí.
3A Ozɩasɩ tɩ tɛr'ɩ yome pie nɩ ayʋɔb a lɛn daar ʋ na tɩ lɩɛbɩ a nãà a, ɛ́ tɩ dɩ a naalʋ yome lɩz'a ayi nɩ pie nɩ ayi a Zerizalɛm. A ʋ mã tɩ yi n Zerizalɛm, ɛ́ dɩ kɛ́ Yekolɩa. 4A Ozɩasɩ tɩ ɩ n a lɛ na pɛlɩ a Sore pʋɔ a, mɛ̃ a lɛ tɔr za a ʋ sãà Amazɩasɩ na tɩ ɩ a.
A Ozɩasɩ tɩ tu n a Sore pùor, ɛ́ wa zawr'ʋ bɛr
5A Zekarɩahu na mɩ́ tɩ bãw a bʋ̃-nyɛrɩ a Naaŋmɩn na tɩrɛ a pɛr a, a ʋ cãafʋ daar za a, a Ozɩasɩ tɩ ƴãw nɩ fãw bãw a Sore Naaŋmɩn pʋ-tɩɛrʋ, ɛ́ a Naaŋmɩn mɩ́ ɩ a ʋ yele za maalɩ vla.
6Ʋ tɩ cen na tɩ zɛb'ɩ a Filisɩtɛ̃ mɩnɛ: ʋ tɩ ŋmɛ n a Gatɩ, a Yavine nɩ a Asɩdɔdɩ ten dacine ŋmɛr, al pùorí, ʋ mɛ tẽ-bɛrɛ a Asɩdɔdɩ tẽw vuo pʋɔ nɩ a Filisɩtɛ̃ mɩnɛ tẽw. 7Naaŋmɩn tɩ sõw ʋ nɩ a zɛbr pʋɔ ʋ na tɩ zɛbr'ɩ a Filisɩtɛ̃ mɩnɛ, a Arabʋ mɩnɛ na kpɩɛr a Guur-Baal, nɩ a Meunitɩ#26:7 Meunitɩ mɩnɛ: A nɩ-bʋʋrɛ bɛ ŋa tɩ kpɩɛr'ɩ a Edɔm naalʋ-tẽw saa-pɛrɩ́-dʋrʋ-lowr. Bɛ mɩ̀ bʋɔlɛ bɛ nɩ Amɔ̃ tẽw dem. Nyɛ̃ 20.1. mɩnɛ a. 8A Meunitɩ mɩnɛ tɩ ya n zɛbr zu-yar kʋ̀ a Ozɩasɩ.
A Ozɩasɩ tɩ kpɛmɛ na, a ʋ yúor yi tɩ tɔ a Eziptɩ tẽw tʋr-bɔwrɩ. 9Ʋ tɩ mɛ n yir-cõcowli a Zerizalɛm a Dacĩ-gõgon dɩ̃dɔr zu, a Fʋɔla dɩ̃dɔr zu, nɩ a zie ʋl a dacin na tɩ ɩ goraa a zu. 10Ʋ mɩ̀ tɩ mɛ n zi-gùrbɛ yir-cõcowli a wɛja-kpalɛ pʋɔ, ɛ́ tuw buli yaga ʋ na tɩ tɛr dʋn bɛ dɩ vuo a Ba-Peyi nɩ a zi-tɩ̃tal pʋɔ a ƴãw. Ʋ mɩ̀ tɩ tɛr'ɩ kʋ́ɔrbɛ nɩ divɛ̃ tɩ-kaarbɛ a tan pʋɔ nɩ a divɛ̃ tɩɩr póru pʋɔ, ʋ na tɩ nɔnɛ a tẽsɔw kɔb a ƴãw.
11A Ozɩasɩ tɩ tɛr'ɩ zɛbr-nɩbɛ na na tʋ̃ɔ́ zɛb a. Bɛ tɩ ŋma na põ põ, sɛwnɩ a lɛ a sojarɩ na sɛw a. A nãà sojarɩ nɩ-kpɛ̃ɛ kãw na dɩ kɛ́ Hananɩahu a n'ʋ tɩ ƴãw a sɛ-sɛbrɛ Yeyɩɛl nɩ a bʋ̃-kaarɛ Maaseyahu bɛ sɔ́r bɛ. 12Yie nɩ-bɛrɛ túr-ayi dɔwlɩ kɔbr ayʋɔb (2 600) tɩ so a soja-gãdaar bɛ ŋa. 13Bɛ tɩ ɩ n nɩbɛ tùr-kɔbr ata dɔwlɩ nɩbɛ túr ayopõi nɩ nɩbɛ kɔbr anũu (307 500). Bɛ tɩ ɩ n fãw tɛwr ɛ́ cɔbrɩ gù kɛ́ bɛ zɛb'ɩ a nãà dɔ̃ dem. 14Kʋralɛ bɛlɛ wa yire a zɛbr a, a nãà mɩ́ kʋ̀ bɛ nɩ zɛbr-kur-pãgalɩ, kafine, zɛbr-kpawɔ-kpowr, zɛbr-nyãa-kpali, tamɛ nɩ kpalɩ kʋsɛbɛ. 15A Zerizalɛm a, a Ozɩasɩ tɩ ƴãw na bɛ maalɩ zɛbr bome kãw bɛ na sʋ̃ɔmɩ bul tɩɛrɩ k'aa be a yir-cõcowli nɩ a dacĩ-gõgone zu a. A na sõw nɩ pime tɛbrʋ nɩ a kʋsɛ-bɛrɛ lɔbrʋ ƴãw. Naaŋmɩn tɩ sõw nɩ a Ozɩasɩ vla vla za ʋ tɩ tɛrɛ fãw dɔwlɛ ɛ́ a ʋ yúor yi tɩ ta zi-zãánɩ.
16Ɛcɛ a ʋ fãw zũú, ʋ tɩ ɩrɛ nɩ pɔ̀lʋ, a ɩ ʋ lo, ʋʋ bɛ cãà tu a Sore ʋ Naaŋmɩn ɛ: bibir kãw ʋ tɩ kpɛ n a Ŋmɩn-yir-kpɛ̃ɛ pʋɔ k'ʋʋ tɩ nyɩw tɩ-suur-zɔ̃-na-nyùur-vla-vla-a a parfɛ̃ bàwr-maal-kuur zu. 17A bàwr-maalɛ Azarɩahu tɩ tu ʋ na kpɛ, ʋlɛ nɩ a Sore bàwr-maalbɛ lɩz'a anaar na kpɛ socir a. 18Bɛ tɩ àr'a tori a nãà Ozɩasɩ ɛ́ yel ʋ: «Tɩ nãà a, fʋ bɛ tɛr sɔ́r, fʋ mɩŋa, na tʋ̃ɔ́ de a tɩ-suur-zɔ̃-na-nyùur-vla-vla-a kʋ̀ a Sore ɩ. Bàwr-maalbɛ tɛwr nɛbɛ tɛr sɔ́r a al ƴãw, bɛl na ɩ a Aarɔ̃ bʋʋrɛ ɛ́ bɛ maalɩ bɛ bɛ ɩ son a al ƴãw a. Yi a zi-sõw pʋɔ! Sɩza, yel-bier'ʋ fʋ maalɛ. A Sore Naaŋmɩn zie a, a de-kʋ̀b bom ŋa kʋ̃ ɩ yúor bom ɛ.»
19A Ozɩasɩ na tɩ tĩ k'ʋʋ nyɩw a tɩ-suur-zɔ̃-na-nyùur-vla-vla-a, ʋ tɩ nyɛ̃ nɩ nɩ a bàwr-maalbɛ suur. Daadaalɛ, kɔnʋ tɩ sãá nɩ a ʋ gbẽé a Ŋmɩn-yir-kpɛ̃ɛ pʋɔ be, pɩɛlɩ a parfɛ̃ bàwr-maal-kuur a bàwr-maalbɛ niŋé. 20A bàwr-maal-kara Azarɩahu nɩ a bàwr-maalbɛ za na tɩ jɩ́rɛ ʋ a tɩ nyɛ̃ nɩ a kɔnʋ na sãá a ʋ gbẽé a. Daadaalɛ bɛ tɩ diw ʋ na, ɛ́ ʋl mɩŋa na tɩ nyɛ̃ a Sore ŋmɛ ʋ a tɩ paw nɩ fɔ̃wlɛ yi.
A Ozɩasɩ naalʋ-dɩb baarʋ
(Nyɛ̃ 2Na 15:5-7)
21A nãà Ozɩasɩ tɩ ɩ n a kɔ̃w tɩ ta a ʋ kũu bibir. Ʋʋ na tɩ ɩ a kɔ̃w a zũú, a tɩ fɛr'a k'ʋʋ kpɩɛr yir pʋɔ ʋ yõ zie, ɛ́ bɛ tɛr sɔ́r na lɛb cen a Sore yir-kpɛ̃ɛ pʋɔ ɩ. A ʋ bidɛb Yotam na tɩ ɩ a nãà yir nɩ-kpɛ̃ɛ a, ʋlɛ n'ʋ tɩ kaarɛ a tẽw nɩbɛ zie. 22A Ozɩasɩ ɩ-ɩrɩ al na cɛ a, a dãw niwn dem tɩ tɔ a baarʋ zie dem, a naaŋmɩn-ƴɛ̀r-manɛ, Ɩzayi, na ɩ Amɔtɩsɩ bidɛb a sɛb a na#26:22 A bɛ ɩ a naaŋmɩn-ƴɛ̀r-manɛ Ɩzayi sɛbɛ na be a Sɛb-sõw pʋɔ a n'ʋ ɛ, sɛb-yũo na bɛ cãà a n'ʋ.. 23Ʋ na wa kpi a, bɛ ũù ʋ nɩ a nãà yarʋ pʋɔ, ɛcɛ ʋ na tɩ kɔ̃w a zũú a, bɛ bɛ ũù ʋ a ʋ yir nɩbɛ yaa pʋɔ ɩ. A ʋ bidɛb Yotam n'ʋ tɩ lɩɛrɩ ʋ dɩ a naalʋ.
La Bible en Dagara © Alliance Biblique du Burkina Faso, 2013.