2 Bibie za yel-manɩ 27
27
A Yotam naalʋ-dɩb
(Nyɛ̃ 2Na 15:32-38)
1A Yotam tɩ tɛr'ɩ yome lɩzɛr'ɩ anũu a lɛn daar ʋ na tɩ lɩɛbɩ a nãà a, ɛ́ dɩ a naalʋ yome pie nɩ ayʋɔb a Zerizalɛm. A ʋ mã yúor tɩ dɩ na kɛ́ Yerusa, Sadɔkɩ pɔwyaa tɩ n'ʋ. 2A Yotam tɩ ɩ n a lɛ na pɛlɩ a Sore pʋɔ a, mɛ̃ a lɛ tɔr za a ʋ sãà Ozɩasɩ na tɩ ɩ a. Ɛcɛ ʋ bɛ tɩ sàw kpɛ a Sore yir-kpɛ̃ɛ pʋɔ ɩ, ɛ́ a Ɩsɩrayɛl nɩ-bʋʋrɛ tɩ cãà ɩrɛ a ɩ-faar.
3A Yotam n'ʋ mɛ a Sore yir-kpɛ̃ɛ saa-zu dɩ̃dɔr, ɛ́ mɛ bʋ̃-mɩɛrɩ yaga a Ofɛl#27:3 Ofɛl: A Zerizalɛm tẽle kãw n'ʋ. Ʋ tɩ be n a Ŋmɩn-yir-kpɛ̃ɛ nɩ a nãà yir saa-pɛrɩ́-dʋrʋ-lowr. dacin zu. 4Ʋ mɩ̀ tɩ mɛ n tẽ-bɛrɛ a Zuda tan vuo pʋɔ, lãwnɩ dacine na piw a tẽw a, nɩ yir-cõcowli a tuw vuo pʋɔ.
5A Yotam tɩ cen na tɩ zɛb'ɩ a Amɔ̃ tẽw nãà, zɛb tʋ̃ɔ́. A ʋlɩ yũon nɛ a, a Amɔ̃ tẽw dem tɩ ya ʋ nɩ zu-yar salm-pla tɔn ata, ble tɔn túr ata (3 000) nɩ ɔɔzʋ tɔn túr ata (3 000). A yome ayi al na tu a, bɛ tɩ lɛb'a ya a zu-yar a sɛw a lɛ. 6A Yotam tɩ tɛrɛ nɩ fãw dɔwlɛ, a ʋ cenu na tɩ tori a Sore ʋ Naaŋmɩn niŋé a ƴãw.
7A Yotam ɩ-ɩrɩ al na cɛ a, a zɛbr al za ʋ na zɛb a, nɩ a ʋ ɩ-ɩrɩ, a sɛb'a ƴãw a Ɩsɩrayɛl nɩ a Zuda na-mɩnɛ sɛbɛ pʋɔ. 8Ʋ tɩ tɛr'ɩ yome lɩzɛr'ɩ anũu a lɛn daar ʋ na lɩɛbɩ a nãà a, ɛ́ dɩ a naalʋ yome pie nɩ ayʋɔb a Zerizalɛm. 9Ʋ na wa kpi a, bɛ ũù ʋ nɩ a «Daviir Tẽ-kpɛ̃ɛ» pʋɔ. A ʋ bidɛb Akaazɩ tɩ lɩɛrɩ ʋ na dɩ a naalʋ.
La Bible en Dagara © Alliance Biblique du Burkina Faso, 2013.