2 Bibie za yel-manɩ 25
25
A Amazɩasɩ naalʋ-dɩb
(Nyɛ̃ 2Na 14:1-7)
1A Amazɩasɩ tɩ tɛr'ɩ yome lɩzɛr'ɩ anũu a lɛn daar ʋ na tɩ lɩɛbɩ a nãà a, ɛ́ dɩ a naalʋ a Zerizalɛm yome lɩzɛr'ɩ piwaɩ. A ʋ mã na tɩ yi a Zerizalɛm a yúor tɩ dɩ na kɛ́ Yehoadan. 2A Amazɩasɩ tɩ ɩ n a lɛ na pɛlɩ a Sore pʋɔ a, ɛcɛ ʋ bɛ tɩ ɩ n ʋ pʋɔ za ɩ.
3A Amazɩasɩ na tɩ zɩɩlɩ a ʋ naalʋ ʋ kpɛmɛ baar'a, ʋ tɩ ƴãw na bɛ kʋ a soja-nɩ-bɛrɛ bɛl na tɩ kʋ a ʋ sãà, a nãà Zowasɩ#25:3 Nyɛ̃ 24.23-26. a. 4Ɛcɛ ʋ tɩ jɩɩr'ɩ a bɛ bidɛbr bɛr, k'ʋʋ tu a lɛ na sɛb a Wulu sɛbɛ pʋɔ, a Moyiir sɛbɛ pʋɔ a. A be a, a Sore ƴãw nɩ a nʋɔr ŋa: «Bɛ bɛ kʋrɛ sãà mɩnɛ a bɛ bibiir yel-bebe ƴãw ɛ, bɛ bɛ kʋrɛ bibiir a bɛ sãà mɩnɛ yel-bebe ƴãw ɛ. Nɩsaal za yel-bebe ƴãw n'a bɛ na mɩ́ kʋ ʋ#25:4 Nyɛ̃ Wl-ayi 24.16..»
5A Amazɩasɩ tɩ bʋɔl'ɩ a ʋ naalʋ-tẽw nɩbɛ ɓã taa, Zuda dɔwlʋ nɩbɛ nɩ Bɛ̃zamɛ dɔwlʋ nɩbɛ, ɛ́ kaa ír a yie yie dɔwlʋ pʋɔ sojarɩ túre nɩ-bɛrɛ nɩ sojarɩ kɔbr nɩ-bɛrɛ. Ʋ tɩ ƴãw na bɛ sɔ́r a dɛbli bɛl na tɛr yome lɩzɛr'ɩ dɔwlɛ a. Bɛ tɩ ɩ n nɩbɛ tùr-kɔbr ata (300 000) na na tʋ̃ɔ́ cen a zɛbr, ɛ́ bãw a kafin nɩ a zɛbr-kur-pãgala yele a. 6Al pùorí, ʋ ír soja-gãdaar tùr-kʋba (100 000) a Ɩsɩrayɛl naalʋ-tẽw pʋɔ nɩ salm-pla libie na vɩrɩ ta tɔn ata a. 7Ɛcɛ Naaŋmɩn nɩr kãw tɩ wa na wa yel ʋ: «Nãà a, Ɩsɩrayɛl sojarɩ bɛ páwr fʋ cere ɩ, bʋ̃ʋ n'ʋ vɛ̃, a Sore bɛ be a saa-pɛrɩ́-gʋba-lowr naalʋ-tẽw nɩbɛ zie ɩ, a Efarayim bʋʋrɛ bɛ ŋa! 8Bɛlɛ wa páw fʋ cen a, fʋ̃ʋ saa kpɛmɛ a zɛbr ƴãw a, ɛcɛ Naaŋmɩn na ɩ na fʋ lo a fʋ dɔ̃ dem niŋé. Bʋ̃ʋ n'ʋ vɛ̃, Naaŋmɩn yõ n'ʋ mɩ́ ɩ bɛ zɛb tʋ̃ɔ́ bɩɩ zɛb lo.» 9A Amazɩasɩ tɩ sowr'ɩ a Naaŋmɩn nɩr: «Ɛ́ a libie al za ɩ̃ na kʋ̀ a Ɩsɩrayɛl sojarɩ a ɩ ŋmɩn?» A Naaŋmɩn nɩr tɩ sɔw ʋ na: «A Sore na tʋ̃ɔ́ na kʋ̀ b zuo a lɛ.» 10Lɛ n'a a Amazɩasɩ tɩ lɛb bɛr a sojarɩ na tɩ yi a saa-pɛrɩ́-gʋba-lowr naalʋ-tẽw a bɛ lɛb kule. Bɛ tɩ lɛb'a kule ɛ́ tɩ nyɛ̃ nɩ a Zuda naalʋ-tẽw suur yaga yaga.
11A Amazɩasɩ na wa kpɛmɛ a sɛw a, ʋ tɩ tɛr'ɩ a ʋ nɩbɛ cen nɩ a Nyaarʋ fʋɔla#25:11 Nyaarʋ fʋɔla: Nyɛ̃ 2Na 14.7 nɩ a manʋ. pʋɔ tɩ kʋ Edɔm tẽw sojarɩ tùr-pie (10 000). 12A Zuda sojarɩ mɩ̀ tɩ nyɔw nɩ a Edɔm tẽw sojarɩ tùr-pie (10 000) bɛ ɩ nɩ-pàwrɩ. Bɛ tɩ tɛr bɛ na do n pìir na kɛrɩ a nyʋɔrɩ́, ɛ́ dá bɛ bɛr a vuo pʋɔ bɛ tɩ lo a tẽw kpi bɛ za.
13A sojarɩ bɛl a Amazɩasɩ na bɛ tɩ sàw bɛ páw ʋ cen a zɛbr, ɛ́ tɩ bɛr bɛ bɛ lɛb kule a, bɛ tɩ kpɛ n a Zuda tẽ-bɛrɛ al na be a Samaari nɩ a Bɛtɩ-Horon cará a kʋ nɩbɛ túr ata (3 000), ɛ́ wob bome na bɛ dɩ vuo a cen nɩ.
A Ɩsɩrayɛl nãà Zowasɩ zɛb'a tʋ̃ɔ́ a Amazɩasɩ
(Nyɛ̃ 2Na 14:8-14)
14A Amazɩasɩ na tɩ zɛb tʋ̃ɔ́ a Edɔm tẽw nɩbɛ ɛ́ lɛb waar a, ʋ tɩ wob'ɩ a Edɔm tẽw ŋmɩmɛ dasuli wa n wa ɩ a lɩɛbɩ a ʋ ŋmɩmɛ. Ʋ mɩ́ tɩ gbĩ n dume gũu tɩ tɔ tẽw a niŋé, ɛ́ maalɛ bagɛ kʋ̀rɛ a. 15Lɛ n'a a Sore suur tɩ ìr a Amazɩasɩ ƴãw, ʋ tõ ƴɛ̀r-manɛ kãw k'ʋʋ tɩ yel ʋ à ŋá: «Bʋ̃ʋ n'ʋ so fʋ ƴãwnɛ a nɩ-bʋʋrɛ bɛ ŋa ŋmɩmɛ na bɛ tʋ̃ɔ́ faa a bɛ nɩ-bʋʋrɛ a fʋ nuru pʋɔ a?» 16Ɛcɛ a Amazɩasɩ tɩ tur'a de a ƴɛ̀rʋ sowr'ʋ: «Ãa n'ʋ kaa ír fʋ fʋ ɩ a nãà yã-wule? Fʋ̃ʋ bɛ wa bɔbr ŋmɩɛrʋ a, fʋ̃ʋ taa lɛb háarɛ nʋɔr ɛ.» A naaŋmɩn-ƴɛ̀r-manɛ bɛ lɛb tɩ háa nʋɔr ɛ, al pùorí, ʋ yel: «Ɩ̃ bãwnɩ a na, a Naaŋmɩn yel'a kɛ́ bɛ kʋ b, à à ŋá fʋ na ɩ a ƴãw, nɩ fʋ na zawrɩ na bɛr wõ a yã ɩ̃ na wule fʋ a.»
17A Zuda tẽw nãà Amazɩasɩ tɩ bɛr'a wõ nɩ-yoru, ɛ́ tõ nɩbɛ a Ɩsɩrayɛl nãà Zowasɩ na ɩ Yoakaazɩ bidɛb ɛ́ ɩ Yehu yãw a zie. Ʋ tɩ ƴãw na bɛ yel ʋ: «Wa tɩ wa tuori taa zɛb!» 18A Ɩsɩrayɛl tẽw nãà Zowasɩ tɩ tõ na bɛ tɩ yel a Zuda tẽw nãà Amazɩasɩ: «Bibir kãw, a Libã baa-gʋɔ tɩ tõ na kɛ́ bɛ tɩ yel a Libã sɛɛdɩr tɩɛ: “Kʋ̀ a fʋ pɔwyaa a ɩ̃ bidɛb ʋ kul”, ɛcɛ a Libã wɛ-dʋ̃w kãw tɩ tɔl'a nɛb a baa-gʋɔ kar.»#25:18 Nyɛ̃ 2Na 14.9. 19A Zowasɩ tɩ yel'a ƴãw pʋɔ: «Fʋ zɛb'a tʋ̃ɔ́ a Edɔm tẽw nɩbɛ pɔrɛ nɩ! Ɛcɛ tɛr a yúor ŋa zɩ̃ nɩ a fʋ tẽw! Bʋ̃ʋ n'ʋ so fʋ bɔbr kɛ́ fʋ tĩ zɛbr na na ɩ faa a fʋ zie a, zɛbr bɛ na na tʋ̃ɔ́ fʋ̃ʋ nɩ a Zuda zɛbr-nɩbɛ za a?»
20Ɛcɛ a Amazɩasɩ bɛ tɩ bɛr wõ a ʋ ƴɛ̀rʋ ɛ. Naaŋmɩn n'ʋ tɩ bɔbr k'aa Amazɩasɩ nɩ a ʋ zɛbr-nɩbɛ lo a bɛ dɔ̃ dem nuru pʋɔ, bɛ na tɩ lɩɛbɩ tu a Edɔm tẽw ŋmɩmɛ a ƴãw. 21Lɛ n'a a Ɩsɩrayɛl nãà Zowasɩ tɩ cen a zɛbr. A ʋ zɛbr-nɩbɛ nɩ a Amazɩasɩ zɛbr-nɩbɛ tɩ tuor'ɩ taa zɛb a Bɛtɩ-Semɛsɩ, a Zuda tẽw pʋɔ. 22A Ɩsɩrayɛl zɛbr-nɩbɛ tɩ pɔb'ɩ a Zuda zɛbr-nɩbɛ bɛ lɩɛbɩ zɔ kul bɛ za. 23A Bɛtɩ-Semɛsɩ be a, a Ɩsɩrayɛl tẽw nãà Zowasɩ tɩ nyɔw nɩ a Zuda tẽw nãà, Amazɩasɩ, na ɩ Zowasɩ bidɛb ɛ́ ɩ Yoakaazɩ yãw a, ʋ ɩ gaso nɩr. Ʋ tɩ tɛr ʋ na cen nɩ a Zerizalɛm. Ʋ tɩ dáa nɩ a tẽ-kpɛ̃ɛ dacĩ-kpɛ̃ɛ lɔb cen nɩ tɩ ta mɛ̃ mɛtɩr kɔbr ayi a (200), na tĩ a Efarayim dɩ̃dɔr ƴãw, ɛ́ tɩ tɔ a Dacĩ-gõgon dɩ̃dɔr a. 24Ʋ tɩ de nɩ a salm-zɩɛ, a salm-pla nɩ a bʋ̃-vɩɛlɩ vɩɛlɩ za na be a Ŋmɩn-yir-kpɛ̃ɛ pʋɔ nɩ a nãà yir na-bome binu zie a. Ʋ mɩ̀ tɩ de nɩ nɩ-tɛwrɩ lɛb cen nɩ a Samaari.
A nãà Amazɩasɩ kũu
(Nyɛ̃ 2Na 14:15-20)
25A Ɩsɩrayɛl nãà Yoakaazɩ bidɛb, Zowasɩ, kũu pùorí, a Zuda nãà Amazɩasɩ tɩ cãà nɩ be maalɩ yome pie nɩ anũu. 26A Amazɩasɩ yele al na cɛ a, a tib zie tɩ ta n a baarʋ zie a, a sɛb'a ƴãw «a Ɩsɩrayɛl nɩ a Zuda na-mɩnɛ ɩ-ɩrɩ sɛbɛ» pʋɔ. 27A lɛn daar a Amazɩasɩ na dɛ tɩ tĩ zawrɩ a Sore bɛr a, nɩbɛ tɩ tĩ na bʋ̀rɛ taa a ʋ ƴãw a Zerizalɛm. Bibir kãw, ʋ tɩ zɔ na cen Lakisɩ#25:27 Lakisɩ: Nyɛ̃ 2Na 14.19 nɩ a manʋ., ɛcɛ bɛ tɩ ƴãw nɩ nɩbɛ diw bɩɛrɩ ʋ tɩ kʋ ʋ a Lakisɩ be. 28Al pùorí bɛ ƴãw a ʋ kũu zɛbr-torko zu, wie taw wa n a Zerizalɛm, a Zuda tẽw, bɛ wa ũù ʋ a ʋ sãàkʋm-kore ũufʋ zie.
La Bible en Dagara © Alliance Biblique du Burkina Faso, 2013.