2 Bibie za yel-manɩ 24
24
A Zowasɩ ƴãw na bɛ lɛb maalɩ a Ŋmɩn-yir-kpɛ̃ɛ ƴãw
(Nyɛ̃ 2Na 12:1-17)
1A Zowasɩ tɩ tɛr'ɩ yome ayopõi a lɛn daar ʋ na tɩ lɩɛbɩ a nãà a, ɛ́ tɩ dɩ a naalʋ yome lɩz'a ayi a Zerizalɛm. A ʋ mã na tɩ yi Bɛɛr-Seva#24:1 Bɛɛr-Seva: Nyɛ̃ 1Na 19.3. a, yúor tɩ dɩ na kɛ́ Sɩvɩa. 2A Zowasɩ tɩ ɩ n a lɛ na pɛlɩ a Sore pʋɔ a, a bàwr-maalɛ Yehoyada cãafʋ daar za. 3A Yehoyada tɩ de nɩ pɔwbɛ ayi kʋ̀ a Zowasɩ, ʋ dɔw nɩ bidɛbr nɩ pɔwyaar.
4À á ŋá pùorí, a Zowasɩ tɩ bɔbr'a k'ʋʋ lɛb maalɩ a Sore yir-kpɛ̃ɛ ƴãw. 5Ʋ tɩ bʋɔl'ɩ a bàwr-maalbɛ nɩ a levitɩ mɩnɛ ɓã taa ɛ́ yel bɛ à ŋá: «Nyɩ cen a Zuda tẽ-bɛrɛ pʋɔ a Ɩsɩrayɛl nɩbɛ za zie tɩ de libie tʋ̃ɔ́ mɩ́ maal'ɩ a nyɩ Naaŋmɩn yir-kpɛ̃ɛ ƴãw yũon za. Nyɩ paw fɔ̃w.» Ɛcɛ a levitɩ mɩnɛ tɩ nɩɩnɛ na. 6A lɛ n'a a nãà tɩ bʋɔlɩ a bàwr-maal-kara Yehoyada wa yel ʋ: «Bʋ̃ʋ n'ʋ so fʋ bɛ fɛr a levitɩ mɩnɛ ƴãw bɛ wa n a Zerizalɛm nɩbɛ nɩ a Zuda nɩbɛ zuru-yar, a Sore tõ-tõ-bie Moyiir nɩ a Ɩsɩrayɛl lãw nɩbɛ na ƴãw càar'ɩ a pɛn-sɛw na tɛr a wõ-taa kʋsɛ-pamɛ a? 7A Atali, a pɔw faa ŋa nɩ a ʋ nɩbɛ bɛr'ɩ a Naaŋmɩn yir ʋ sãw, bɛ mɔ̃ mɩ̀ de nɩ a Sore yir-kpɛ̃ɛ bʋ̃-son za a Báàl mɩnɛ puoru ƴãw.»
8A nãà tɩ ƴãw na bɛ maalɩ daga bin a yẽw a Ŋmɩn-yir-kpɛ̃ɛ dɩ̃dɔrɩ́. 9Al pùorí ʋ ƴãw bɛ hieri yel a Zuda naalʋ-tẽw pʋɔ nɩ a Zerizalɛm pʋɔ, kɛ́ ŋa za mɩ́ wa n a zu-yar a Sore ƴãw, a Naaŋmɩn tõ-tõ-bie Moyiir na ƴãw a Ɩsɩrayɛl nɩbɛ za ƴãw a wɛja-kpalɛ pʋɔ a. 10A nɩ-bɛrɛ nɩ a nɩbɛ za tɩ wa n nɩ a bom nɛ a na fɛrɛ kɛ́ bɛ wa n a, nɩ nʋ̃ɔ̀, wa ƴãw a daga pʋɔ, a daga tɩ paalɩ. 11Bɛ na tɩ de a daga wa n k'aa levitɩ mɩnɛ wa sɔ́r a libie na be a ʋ pʋɔ a nãà yúor ƴãw a, bɛ tɩ nyɛ̃ nɩ a libie a yãwmɛ. Lɛ n'a a nãà sɛ-sɛbrɛ nɩ a bàwr-maal-kara bʋ̃-kaarɛ tɩ kpowri a libie, ɛ́ lɛb bin a daga a ʋ binu zie. À ŋá n'a bɛ tɩ ɩrɛ a bibie za, tɩ páw libie a yãwmɛ bɛ dɩ vuo ɩ. 12A nãà nɩ a Yehoyada tɩ de nɩ a libie kʋ̀ a tõ-tõ-nɩ-bɛrɛ na so a Sore yir-kpɛ̃ɛ tome a. Bɛ tɩ de nɩ kʋsɛ-pɛnbɛ nɩ tõ-tõ-biir na bãw a kure nɩ a kur-zɩɛ tome a, kɛ́ bɛ lɛb maalɩ a Sore yir-kpɛ̃ɛ ƴãw. 13A tõ-tõ-biir tɩ ír'a tĩ a tome. A bɛ bãwfʋ zũú a, a tome tɩ cen nɩ vla. Bɛ tɩ maal'ɩ a Naaŋmɩn yir ƴãw mɛ̃ a lɛ ʋ na tɩ dãw sɛw ɛ́ kpɛmɛ a.
14A tome na tɩ baar'a, bɛ tɩ wa n nɩ a libi-ŋmãa na cɛ a wa kʋ̀ a nãà nɩ a bàwr-maalɛ Yehoyada, bɛ de maal'ɩ bome a Sore yir-kpɛ̃ɛ ƴãw: tõ-tõ-bome, nyɩw-a-za-bagɛ bome, labɛ nɩ salm-zɩɛ nɩ salm-pla bome. A Yehoyada cãafʋ daar za a, nyɩw-a-za-bagɛ tɩ maalɛ nɩ a Sore yir-kpɛ̃ɛ pʋɔ kʋrakʋralɛ.
A Zowasɩ bɛ cãà tu a Naaŋmɩn ɛ
15A Yehoyada tɩ kor'a tɩ kor, ɛ́ pãa kpi. Ʋ tɩ tɛr'ɩ yome lɩz'a ayʋɔb nɩ pie (130) a ʋ kũu daar. 16Bɛ tɩ ũù ʋ nɩ a «Daviir Tẽ-kpɛ̃ɛ» pʋɔ, lãwnɩ a na-mɩnɛ, bʋ̃ʋ n'ʋ vɛ̃, ʋ tɩ ɩ n vla a Ɩsɩrayɛl ƴãw nɩ a Naaŋmɩn nɩ a ʋ Yir ƴãw.
17A Yehoyada kũu pùorí a, a Zuda tẽw nɩ-bɛrɛ tɩ wa na wa páw a Zowasɩ gbĩ dume gũu tɩ tɔ tẽw a ʋ niŋé, lɛ n'a a nãà tɩ bɛr wõ a yã bɛ na wul ʋ a, 18ɛ́ lɛ n'a a Ɩsɩrayɛl nɩbɛ tɩ zawrɩ a Sore, a bɛ sãà mɩnɛ Naaŋmɩn, yir bɛr, ɛ́ maalɛ a dà-barɩ nɩ a tɩbɛ. A sãwna ŋa tɩ ɩ na a Naaŋmɩn suur ìr a Zerizalɛm nɩ Zuda naalʋ-tẽw za ƴãw. 19A Sore tɩ tõ n naaŋmɩn-ƴɛ̀r-manbɛ a bɛ zie, kɛ́ bɛ tɩ tɛr bɛ lɛb wa n a ʋ zie, ɛcɛ nɩr za bɛ tɩ bɛr wõ a bɛ ƴɛ̀rʋ ɛ. 20Lɛ n'a a Naaŋmɩn Vʋʋrʋ tɩ siw a Yehoyada bidɛb, Zekarɩa, na tɩ ɩ bàwr-maalɛ a zu. A Zekarɩa tɩ ìr'a àr a nɩbɛ niŋé, ɛ́ yel bɛ à ŋá: «Nyɩ bɛrɛ wone lɛ a Naaŋmɩn na yere a: “Bʋ̃ʋ n'ʋ so nyɩ zawrɛ a ɩ̃ nɛ-ƴãwnɩ? Nyɩmɛ nɛbɛ lore! Nyɩ na faa zawrɩ mɛ̃ bɛr a, ɩ̃ mɩ̀ na zawrɩ nyɩ na bɛr!”»
21Lɛ n'a a nɩbɛ tɩ bʋ taa a Zekarɩa ƴãw, ɛ́ a nãà ƴãw bɛ lɔb'ɩ ʋ kʋsɛbɛ a Sore yir-kpɛ̃ɛ davʋra pʋɔ. 22A nãà Zowasɩ tɩ yiir'ɩ a vla a Zekarɩa sãà, Yehoyada, na tɩ maal'ʋ a, ɛ́ tɩ ƴãw bɛ kʋ a Zekarɩa. A Zekarɩa na tɩ kpiir a, ʋ tɩ yel'a: «A Sore, ʋ nyɛ̃ bom nɛ fʋ na ɩrɛ a, ɛ́ sowri fʋ bom!»
A Zowasɩ kũu
(Nyɛ̃ 2Na 12:18-22)
23A yũon baarʋ daar, a Aram tẽw zɛbr-nɩbɛ tɩ wa na wa ŋmãa nɩ a Zowasɩ zɛbr. Bɛ tɩ kpɛ n a Zuda naalʋ-tẽw nɩ a Zerizalɛm pʋɔ kʋ a nɩbɛ nɩ-bɛrɛ pàw pɛr, ɛ́ de a zɛbr na-bome tɩr kʋ̀ a bɛ nãà a Damasɩ tẽw. 24Ɛcɛ a Aram tẽw zɛbr-nɩbɛ bɛ tɩ saalɩ ɛ, ɛ́ a Sore ƴãw bɛ tʋ̃ɔ́ a Zuda zɛbr-nɩbɛ na bɛ dɩ vuo a, bɛ na tɩ zawrɩ a Sore bɛr a ƴãw, ʋl na ɩ a bɛ sãà mɩnɛ Naaŋmɩn a. A dɔwrʋ bɛ na tɩ ƴãw a Zowasɩ a tɩ n'ɩ à ŋà. 25A Aram tẽw zɛbr-nɩbɛ tɩ lɛb'a kul ɛ́ bɛr ʋ, ʋ gã nɩ bàalʋ na fɛrɛ ʋ a. A ʋ tõ-tõ-biir tɩ bʋ n taa a ʋ ƴãw, a bàwr-maalɛ Yehoyada bidɛb ʋ na kʋ a ƴãw, ɛ́ tɩ kʋ ʋ a ʋ gado zu. Bɛ tɩ ũù ʋ nɩ a «Daviir Tẽ-kpɛ̃ɛ» pʋɔ, ɛcɛ bɛ bɛ tɩ ũù ʋ a na-mɩnɛ yarʋ pʋɔ ɩ. 26Bɛ ŋa nɛbɛ tɩ bʋ taa a ʋ ƴãw: Amɔ̃ tẽw pɔw kãw na dɩ Simeyatɩ a bidɛb, Zavadɩ, nɩ Mowab tẽw pɔw kãw na dɩ Simiritɩ a, bidɛb, Yehozavadɩ.
27A Zowasɩ bidɛbr yée, a ƴɛ̀r-yaga al za a naaŋmɩn-ƴɛ̀r-manbɛ na ƴɛ̀r a Zowasɩ ƴãw ɛ́ bɛ sɛb a, nɩ a Naaŋmɩn yir lɛb maalʋ yele, a za sɛb'a ƴãw a «Na-mɩnɛ sɛbɛ yel-manɩ» pʋɔ. A ʋ bidɛb Amazɩasɩ n'ʋ tɩ lɩɛrɩ ʋ dɩ a naalʋ.
La Bible en Dagara © Alliance Biblique du Burkina Faso, 2013.