2 Bibie za yel-manɩ 23
23
A Zowasɩ lɩɛb'ɩ a nãà
(Nyɛ̃ 2Na 11:4-20)
1A yome ayopõi sob daar, a Yehoyada tɩ ɩ n kanyir ɩb kãw: ʋ tɩ maal'ɩ wõ-taa nɩ a sojarɩ kɔbr nɩ-bɛrɛ bɛ ŋa: Yeroham bidɛb Azarɩahu, Yehohanan bidɛb Yisɩmayɛl, Ovɛdɩ bidɛb Azarɩahu, Adayahu bidɛb Maaseyahu, nɩ Zikiri bidɛb Elisafatɩ. 2Bɛ tɩ zɔ na cɔlɩ a Zuda naalʋ-tẽw bʋɔlɩ a levitɩ mɩnɛ na be a Zuda naalʋ-tẽw tẽ-bɛrɛ za pʋɔ a nɩ a Ɩsɩrayɛl dɔwlʋ nɩ-bɛrɛ ɓã taa, a bɛ za lɛb wa a Zerizalɛm. 3A nɩbɛ bɛ ŋa za na tɩ ɓã taa a Ŋmɩn-yir-kpɛ̃ɛ pʋɔ a tɩ maal'ɩ nɩ a nãà wõ-taa. A Yehoyada tɩ yel bɛ na: «Nyɩ nyɛ̃ a nãà bidɛb! Ʋlɛ n'ʋ a fɛr k'ʋʋ dɩ a naalʋ mɛ̃ a lɛ a Sore na tɩ yel a Daviir bʋ̃-dɔwrɩ ƴãw a. 4Nyɩ nyɛ̃ a lɛ nyɩ na na ɩ a: nyɩ na põ ziir ata a, a zi-been dem, a bàwr-maalbɛ nɩ a levitɩ mɩnɛ na dier a tome a pɩ̃ɛnʋ-bibir a na gù n a Ŋmɩn-yir-kpɛ̃ɛ dɩ̃dɛɛ, 5a ziir ayi dem na be n a nãà yir, ɛ́ a ziir ata dem be a Yir-pɛr dɩ̃dɔrɩ́. A nɩbɛ za na be n a Ŋmɩn-yir-kpɛ̃ɛ davʋrɩ pʋɔ. 6Nɩr za taa kpɩɛr a Ŋmɩn-yir-kpɛ̃ɛ pʋɔ a bɛ ɩ a bàwr-maalbɛ nɩ a levitɩ mɩnɛ na tone a ɩ. Bɛl na tʋ̃ɔ́ na kpɛ, bɛ na ɩ Naaŋmɩn nɩ-sori a ƴãw. Ɛ́ a nɩbɛ za na tuur'ɩ a lɛ a Sore na yel a. 7A levitɩ mɩnɛ bɛl na cɛ a na tɛr'ɩ a zɛbr bome a nũú ŋmãa nɩ viiri koli a nãà, ɛ́ bɩɛlɛ ʋ be za ʋ na cere a. Nɩr za wa yel k'ʋʋ kpɛ a Ŋmɩn-yir-kpɛ̃ɛ pʋɔ a, bɛ na kʋ ʋ na.»
8A levitɩ mɩnɛ nɩ a Zuda tẽw dem za tɩ ɩ n a lɛ tɔr za a bàwr-maalɛ Yehoyada na tɩ yel a. Nɩ-kpɛ̃ɛ za mɩ́ tɩ ɓã n a ʋ nɩbɛ taa, a bɛl na tine a tome a pɩ̃ɛnʋ-bibir a nɩ a bɛl na báarɛ a ʋlɩ bibir nɛ a, bʋ̃ʋ n'ʋ vɛ̃, a bàwr-maalɛ Yehoyada bɛ tɩ kʋ̀ pal kãw za pɩ̃ɛnʋ ɛ. 9Ʋ tɩ kʋ̀ n a sojarɩ kɔbr nɩ-bɛrɛ a nãà Daviir kafine nɩ a kur-pãgalɩ bʋʋrɛ bʋʋrɛ na tɩ be a Ŋmɩn-yir-kpɛ̃ɛ pʋɔ a. 10Ʋ tɩ pɩɛr'ɩ a nɩbɛ za a yir nɩ a bàwr-maal-kuur niŋé, yi n a Ŋmɩn-yir-kpɛ̃ɛ dʋrʋ lowr tɩ tɔ n a gʋba lowr, ŋa za tɛr a ʋ zɛbr bom a nũú, ɛ́ bɛ jil koli a nãà. 11Lɛ n'a a Yehoyada nɩ a ʋ bidɛbr tɩ ƴãw a Zowasɩ yi: bɛ tɩ vɔblɩ ʋ nɩ a nãà-kpawʋɔ, ɛ́ de a wõ-taa sɛbɛ#23:11 Wõ-taa sɛbɛ: Nyɛ̃ 2Na 11.12 nɩ a manʋ. kʋ̀ ʋ, al pùorí bɛ cir a kãá ƴãw ʋ a zũú, ɩ k'ʋ ɩ a nãà. Daadaalɛ, a nɩbɛ za tɩ cɩɩrɛ na yere nɩ: «A nãà, ʋ vʋʋrɛ!»
12A Atali tɩ wõ n a gɔmɛ a nɩbɛ na zɔrɛ ŋmɩɛr taa ɩrɛ cáarɛ nɩ a nãà ƴãw a. Ʋ tɩ cen na tɩ páw bɛ a Sore Ŋmɩn-yir-kpɛ̃ɛ pʋɔ. 13Ʋ tɩ jɩ́r'a nyɛ̃ a nãà ʋ àr a Ŋmɩn-yir-kpɛ̃ɛ kpul ƴãw, a dɩ̃dɔr ƴãw. A sojarɩ nɩ-bɛrɛ nɩ a wɩ-pɛblbɛ tɩ àr'a kɔw ʋ. Nʋ̃ɔ̀ tɩ ɩrɛ nɩ a nɩbɛ za, ɛ́ a bʋ̃-ŋmɩɛrbɛ pɛblɛ a wɩɩr, ɛ́ a yiel-yielbɛ kaarɛ a cáarʋ zie nɩ a bɛ yielu bome. Lɛ n'a a Atali tɩ taw a ʋ bʋ̃-suuri cɩɛrɩ ɛ́ cɩɩrɛ yere nɩ: «Mɩlʋ wɛ! Mɩlʋ wɛ!»
14A bàwr-maalɛ Yehoyada tɩ ƴãw nɩ a sojarɩ kɔbr nɩ-bɛrɛ na tɩ kaarɛ a zɛbr-nɩbɛ zie a, bɛ yi, ʋʋ yel bɛ: «Nyɩ nyɔw ʋ taw yi n a nɩbɛ na cɔrɩ a pʋɔ. Nɩr nɛ za wa tuur ʋ a, nyɩ kʋ ʋ.» 15A sojarɩ tɩ vɩr ʋ na cen nɩ a nãà yir lowr, ɛ́ ʋ na tɩ ta a Wie dɩ̃dɔrɩ́ a, bɛ kʋ ʋ nɩ a be.
16A Yehoyada tɩ bin nɩ wõ-taa a ʋl nɩ a nɩbɛ za nɩ a nãà cara pʋɔ, k'aa nɩbɛ tʋ̃ɔ́ ɩ Naaŋmɩn nɩ-bʋʋrɛ. 17Lɛ n'a a zu-sɛbla za tɩ cen a Báàl yir tɩ ŋmɛr ʋ bɛr, ɛ́ ŋmɛr a Báàl bàwr-maal-kube nɩ a ʋ dasuli bɛr, ɛ́ kʋ a ʋ bàwr-maalɛ Matan a bàwr-maal-kube niŋé. 18Al pùorí, a Yehoyada tɩ ƴãw nɩ a levitɩ mɩnɛ bɛl na ɩ bàwr-maalbɛ#23:18 Levitɩ mɩnɛ bɛl na ɩ bàwr-maalbɛ a: Nyɛ̃ Wl-ayi 17.9 nɩ a manʋ. a, bɛ gùre a Sore yir-kpɛ̃ɛ. A Daviir tɩ bʋ́r bɛ nɩ palɛ palɛ, kɛ́ bɛ tʋ̃ɔ́ maalɛ a nyɩw-a-za-bagɛ a Sore yir-kpɛ̃ɛ pʋɔ, mɛ̃ a lɛ na ƴãw a Moyiir sɛbɛ pʋɔ a. Ʋ tɩ yel'a kʋ̀ bɛ kɛ́ bɛ tone a ton ŋa yiele nɩ nʋ̃ɔ̀ yielu. 19A Yehoyada mɩ̀ tɩ ƴãw nɩ zi-gùrbɛ a Ŋmɩn-yir-kpɛ̃ɛ dɩ̃dɛɛ ƴãw, kɛ́ nɩr za na tɛr dɛwr a ta tʋ̃ɔ́ kpɛ ɩ.
20A Yehoyada tɩ lɛb'a bʋɔlɩ a sojarɩ kɔbr nɩ-bɛrɛ, a nɩ-yée nɩ a tẽ-kaarbɛ nɩ a nɩbɛ za ɓã taa. Ʋ tɩ tɛr'ɩ a nãà yi n a Ŋmɩn-yir-kpɛ̃ɛ́, bɛ tu a saa-zu dɩ̃dɔr ƴãw cen a nãà yir. Bɛ na tɩ zɩɩlɩ a Zowasɩ a nãà-dà-kɔw zu a, 21nʋ̃ɔ̀ tɩ ɩrɛ nɩ a nɩbɛ za.
A Atali kũu pùorí a, a tẽw tɩ lɛb'a tɛr ƴã-ɓaarʋ.
La Bible en Dagara © Alliance Biblique du Burkina Faso, 2013.