2 Bibie za yel-manɩ 18
18
A Zozafatɩ nɩ a Ɩsɩrayɛl nãà Akab yir tɛr'ɩ wõ-taa
(Nyɛ̃ 1Na 22:1-4)
1A nãà Zozafatɩ tɩ kpɛ n naalʋ bɛ dɩ vuo ɩ, ɛ́ a ʋ yúor yi yaga. Ʋ tɩ ƴãw nɩ a ʋ yir nɩbɛ kul a Ɩsɩrayɛl nãà Akab yir dem. 2Yome à ŋá lɛ pùorí, a Zozafatɩ tɩ cen nɩ a Akab zie a Samaari. A Akab tɩ ƴãw na bɛ kʋ píir nɩ nĩi yaga yaga k'ʋʋ tuori nyɔw nɩ a Zozafatɩ nɩ a nɩbɛ na tu ʋ a. Al pùorí, ʋ tɩ yel'ɩ a Zozafatɩ k'ʋʋ ɩ bɛ lãw cen tɩ ŋmãa nɩ a Aramɔtɩ tẽw#18:2 Aramɔtɩ tẽw: Nyɛ̃ 1Na 22.3. na be a Galaadɩ a zɛbr. 3A Akab tɩ sowr'ɩ a Zozafatɩ: «Fʋ na sàw na wa mãa nɩ fʋ̃ʋ tɩ cen tɩ ŋmãa nɩ a Aramɔtɩ tẽw na be a Galaadɩ a zɛbr ɩ?» A Zozafatɩ sɔw ʋ: «Tɩ za ɩ n been, a mãa nɩ a fʋ̃ʋ, a ɩ̃ nɩ-bʋʋrɛ ɩ n a fʋ nɩ-bʋʋrɛ. Ɩ̃ páwr fʋ na cere a zɛbr.»
A Ɩsɩrayɛl nãà naaŋmɩn-ƴɛ̀r-manbɛ yel'a kɛ́ bɛ na zɛb'a tʋ̃ɔ́
4Ɛcɛ, a Zozafatɩ tɩ yel'a ƴãw pʋɔ: «De niwn sowri a Sore!» 5Lɛ n'a a Ɩsɩrayɛl nãà tɩ ɓã a ʋ naaŋmɩn-ƴɛ̀r-manbɛ kɔbr anaar (400) taa, ɛ́ sowri bɛ: «Tɩ na tʋ̃ɔ́ na cen tɩ zɛb'ɩ a Aramɔtɩ tẽw na be a Galaadɩ a, bɩɩ ɩ̃ lɩɛbɩ bɛr?» Bɛ sɔw: «Fʋ na tʋ̃ɔ́ na cen, Naaŋmɩn na de nɩ a tẽw ƴãw a fʋ nuru pʋɔ.» 6Ɛcɛ a Zozafatɩ tɩ lɛb'a sowri: «naaŋmɩn-ƴɛ̀r-manɛ kãw bɛ lɛb be a ka tɩ na tʋ̃ɔ́ ƴãw ʋ sowri a Sore ɩ?» 7A Ɩsɩrayɛl nãà tɩ sɔw nɩ a Zozafatɩ: «Kãw cãà nɩ be, ɛcɛ ɩ̃ bɛ nɔnɛ ʋ ɛ, bʋ̃ʋ n'ʋ vɛ̃, faa n'a ʋ mɩ́ hiere kʋ̀rɛ mɛ̃ kʋralɛ, ʋ bɛ dãw hieri vla kʋ̀ m ɛ. Yimɩla bidɛb, Mise, n'ʋ.» A Zozafatɩ tɩ yel'a: «Ta ƴɛ̀rɛ a lɛ ɩ!» 8Lɛ n'a a Ɩsɩrayɛl nãà tɩ bʋɔlɩ a ʋ tõ-tõ-bi-nɩ-kpɛ̃ɛ kãw wa yel ʋ: «Ƴãw bɛ tɛr a Yimɩla bidɛb, Mise, wa n a ka fɔ̃w!»
9A Ɩsɩrayɛl nãà nɩ a Samaari nãà tɩ su n a bɛ nãà bʋ̃-suuri zɩ̃ nɩ, ŋa za a ʋ naalʋ-dà-kɔw zu a Samaari tẽw dɩ̃dɔr nʋɔr nɩbɛ tuor-taa zie, ɛ́ a naaŋmɩn-ƴɛ̀r-manbɛ hiere a ƴɛ̀rʋ a bɛ niŋé. 10Kenaana bidɛb, Sidikiyahu, na tɩ maalɩ kure ɩ́lɛ́ a, tɩ yel'a: «À ŋá n'a a Sore yere: “A ɩ́lɛ́ á ŋá ɩ n a fʋ kpɛnʋ bãwfʋ, fʋ na na ƴɛ́r'ɩ a Siiri zɛbr-nɩbɛ ŋmɛr a.”» 11Ɛ́ a naaŋmɩn-ƴɛ̀r-manbɛ za mɩ́ tɩ yere k'aa lɛ ʋ na yel a ɩ n sɩza, bɛ tɩ yere na: «Fʋ na tʋ̃ɔ́ na cen tɩ ŋmãa nɩ a Aramɔtɩ tẽw na be a Galaadɩ a zɛbr. Fʋ na zɛb'a tʋ̃ɔ́, a Sore na de ʋ na ƴãw a fʋ nuru pʋɔ.»
A naaŋmɩn-ƴɛ̀r-manɛ Mise yel'a kɛ́ bɛ kʋ̃ zɛb tʋ̃ɔ́ ɩ
(Nyɛ̃ 1Na 22:13-28)
12A sob ʋl na tɩ cen a Mise bʋɔlʋ a tɩ yel ʋ na: «Bɛrɛ wone! A naaŋmɩn-ƴɛ̀r-manbɛ za hiere na yere kʋ̀rɛ a nãà k'ʋʋ na zɛb'a tʋ̃ɔ́. A na ɩ lɛ a, bãw lɛ fʋ na na ɩ, mɩ̀ ƴɛ̀r mɛ̃ a bɛl a: mɩ̀ hieri yel k'ʋʋ na zɛb'a tʋ̃ɔ́.» 13Ɛcɛ a Mise tɩ sɔw ʋ na: «A Sore na vʋʋrɛ a zũú, a lɛ a ɩ̃ Naaŋmɩn na na yel kʋ̀ m a, lɛ tɛwr'a ɩ̃ na yel.»
14Ʋ tɩ wa n a nãà niŋé, a nãà wa sowri ʋ: «Mise e, tɩ na tʋ̃ɔ́ na cen tɩ zɛb'ɩ a Aramɔtɩ tẽw na be a Galaadɩ a, bɩɩ ɩ̃ lɩɛbɩ bɛr?» Ʋ sɔw: «Nyɩ cen, nyɩ na tɩ zɛb'a tʋ̃ɔ́, a Sore na de nɩ a tẽw ƴãw a nyɩ nuru pʋɔ.» 15Ɛcɛ a nãà tɩ lɛb'a yel: «Gb'aa ŋmɩn n'a a fɛr k'ɩ̃ɩ ƴãw fʋ pɔ kɛ́ fʋ na yel'ɩ a yel-mɩŋa kʋ̀ m a Sore yúor ƴãw?» 16Lɛ n'a a Mise tɩ sɔw:
«Ɩ̃ nyɛ̃ nɩ a Ɩsɩrayɛl nɩ-bʋʋrɛ nɩbɛ
bɛ yaarɩ be a tan zu mɛ̃ píir na bɛ tɛr cɩ̃ɩnɛ a.
Ɛ́ a Sore yel'a: “Bɛ bɛ cãà tɛr niw-dierbɛ ɩ.
Ŋa za, ʋ mɩ́ lɛb kul a ʋ yir nɩ ƴã-ɓaarʋ.”»
17A Ɩsɩrayɛl nãà tɩ yel'ɩ a Zozafatɩ: «Ɩ̃ dãw bɛ yel kʋ̀ b ɛ? Faa tɛwr'a ʋ mɩ́ hiere yere kʋ̀rɛ mɛ̃, vla bɛ mɩ́ n'a ɩ!» 18Lɛ n'a a Mise tɩ lɛb yel: «Nyɩ nɩ̃ɛ bɛr wõ a lɛ a Sore na yere a. Sɩza n'a, ɩ̃ nyɛ̃ nɩ a Sore ʋ zɩ̃ a ʋ naalʋ-dà-kɔw zu, ɛ́ a salom zɛbr-nɩbɛ àr saaƴẽwn, a ʋ dʋrʋ nɩ a ʋ gʋba lowr. 19A Sore tɩ sowr'a: “Ãa n'ʋ na cen tɩ bɛlɩ a Ɩsɩrayɛl nãà Akab ƴãw ʋ cen tɩ zɛb'ɩ a Aramɔtɩ tẽw na be a Galaadɩ a, bɛ tʋ̃ɔ́ kʋ ʋ a be?” Ŋa mɩ́ tɩ yel'ɩ à ŋá, ŋa yel à ŋá. 20Lɛ n'a a Vʋʋrʋ ʋl na mɩ́ ƴãw a naaŋmɩn-ƴɛ̀r-manbɛ ƴɛ̀rɛ a, tɩ taw ta a Sore niŋé yel: “Mãa n'ʋ, mãa na cen na tɩ bɛlɩ ʋ!” A Sore lɛb sowri ʋ: “Ŋmɩŋmɩn n'a fʋ na tɩ ɩ?” 21Ʋ tɩ sɔw na: “Ɩ̃ na cen na tɩ ƴãw a nãà naaŋmɩn-ƴɛ̀r-manbɛ za ŋma ziri kʋ̀ ʋ.” A Sore tɩ sɔw ʋ na: “Tub-vla vla n'ʋ. Cen tɩ ɩ à à ŋá!” 22A na ɩ à ŋá a, a Sore wa ƴãw ziri vʋʋrʋ a fʋ ƴɛ̀r-manbɛ nʋɔrɩ́ a, fʋ̃ʋ bãw kɛ́ ʋl mɩŋa yel'a k'ʋʋ na ƴãw fʋ nɩ yel-faa.»
23Lɛ n'a a Kenaana bidɛb, Sidikiyahu, tɩ ta ɓa a Mise kɔ́rɩ́ ɛ́ yel: «Nyɩnɛ n'a a Sore Vʋʋrʋ tu yi a ɩ̃ zie wa ƴɛ̀rɛ nɩ fʋ?» 24A Mise tɩ sɔw na: «Ɩ̃ yel kɛ́ bʋnʋ kʋ̀ b? Fʋ na nyɛ̃ a na a ʋlɩ bibir a nãà fɛr kɛ́ fʋ tɩ sɔwlɩ a fʋ yir di-pɛ-baara za pʋɔ a.» 25Lɛ n'a a Ɩsɩrayɛl nãà tɩ yel: «Nyɩ nyɔw a Mise cen nɩ tɩ kʋ̀ a Amɔ̃ tẽw na-kpɛ̃ɛ-lɩɛrɛ nɩ a nãà bidɛb Yowasɩ, 26ɛ́ yel bɛ: “À ŋá n'a a nãà yere: Nyɩ lɔb a nɩr ŋa ƴãw gaso pʋɔ ɛ́ kʋ̀rɛ ʋ dipɛ̃-ŋmale nɩ kʋ̃ɔ blã, ɛ́ gù ɩ̃ tɩ yi a zɛbr zie lɛb wa n ƴã-ɓaarʋ.”» 27A Mise tɩ yel'a: «Fʋ̃ʋ wa lɛb wa n ƴã-ɓaarʋ a, fʋ̃ʋ bãw k'aa Sore bɛ n'ʋ ƴãw ɩ̃ ƴɛ̀r ɛ.» Al pùorí, ʋ yel: «Nɩ-bʋʋrɛ za a, nyɩ bɛrɛ wone...»
A nãà Akab kpi n a zɛbr zie
(Nyɛ̃ 1Na 22:29-40)
28A Ɩsɩrayɛl nãà nɩ a Zuda nãà Zozafatɩ, tɩ cen na kɛ́ bɛ tɩ zɛb'ɩ a Aramɔtɩ tẽw na be a Galaadɩ a. 29A Ɩsɩrayɛl nãà tɩ yel'ɩ a Zozafatɩ: «Ɩ̃ na su n a suuru bɛ kʋ̃ bãw mɛ̃ ɩ, ɩ̃ cen nɩ a zɛbr zie. Ɛcɛ fʋ̃ʋ a, su a fʋ nãà kparɩ.» À ŋá n'a a Ɩsɩrayɛl nãà tɩ su a suuru bɛ tɛr bãwfʋ ɛ, cen nɩ a zɛbr zie. 30Zɩ̃ kɛ́ a Aram tẽw nãà tɩ yel'ɩ à ŋá kʋ̀ a ʋ zɛbr-torkori nɩ-bɛrɛ: «Nyɩ taa zɛbr'ɩ a soja-zawlɛ nɩ a sojarɩ nɩ-bɛrɛ ɩ, nyɩ zɛbr'ɩ a Ɩsɩrayɛl nãà yõ.» 31Lɛ so, a zɛbr-torkori nɩ-bɛrɛ na wa nyɛ̃ a Zozafatɩ a, bɛ yel'a: «Bʋnʋ bɛ ka be ɩ, a Ɩsɩrayɛl nãà n'ɩ à ŋá», ɛ́ lɩɛbɩ cere a ʋ ƴãw. Ɛcɛ a Zozafatɩ tɩ ŋmɛ n cɛl. A Sore Naaŋmɩn tɩ wa na wa sõw ʋ, ɩ a ʋ dɔ̃ dem bɛr ʋ. 32Lɛ n'a a zɛbr-torkori nɩ-bɛrɛ tɩ nyɛ̃ k'aa Ɩsɩrayɛl nãà bɛ n'ʋ ɛ, ɛ́ bɛr ʋ.
33Ɛcɛ soja kãw tɩ bʋnɩ na tɛ a pĩi ʋ tɩ nyɔw a Ɩsɩrayɛl nãà, a nyãa-kpale kur-pɛgɛ cara pʋɔ. A nãà tɩ yel'ɩ a ʋ zɛbr-torko dãanɛ: «Cɛ lɩɛbɩ! Tɛr mɛ̃ yi zaa nɩ a zɛbr pʋɔ, ɩ̃ bɛ laar ɛ.» 34Ɛcɛ a ʋlɩ bibir nɛ a, a zɛbr tɩ tʋl'ɩ kpãkpã, a tɩ fɛr k'aa nãà àr a ʋ zɛbr-torko pʋɔ, a Aram tẽw zɛbr-nɩbɛ niŋé. A mʋ̃tɔ̃w na wa kpɩɛr'a, ʋ tɩ kpi na.
La Bible en Dagara © Alliance Biblique du Burkina Faso, 2013.