2 Bibie za yel-manɩ 17
17
A Zozafatɩ naalʋ-dɩb
1A Asa bidɛb, Zozafatɩ, tɩ lɩɛr'ɩ a ʋ sãà dɩ a naalʋ. A Zozafatɩ tɩ tɛr'ɩ fãw yaga yaga a Ɩsɩrayɛl ƴãw. 2Ʋ tɩ ƴãw nɩ sojarɩ a Zuda tẽ-kpɛn kpɛn za pʋɔ, ɛ́ zɩɩlɩ na-kpɛ̃ɛ-lɩɛrbɛ a ʋ naalʋ-tẽw pʋɔ nɩ a ten al a ʋ sãà Asa na tɩ zɛb de a Efarayim nɩbɛ zie a pʋɔ. 3A Sore tɩ be n a Zozafatɩ zie, bʋ̃ʋ n'ʋ vɛ̃, ʋ tɩ cere na mɛ̃ a lɛ a ʋ sãàkʋm-kʋra na tɩ dãw de niwn cen a. Ʋ bɛ tɩ bɔ a Báàl mɩnɛ ɩ. 4Ɛcɛ ʋ tɩ ƴãw nɩ fãw bɔbr a Sore, a ʋ sãà Naaŋmɩn, ɛ́ tuur a ʋ nɛ-ƴãwnɩ, ɛ́ bɛ cɔwrɛ a lɛ a saa-pɛrɩ́-gʋba-lowr naalʋ-tẽw#17:4 Saa-pɛrɩ́-gʋba-lowr naalʋ-tẽw: A Ɩsɩrayɛl naalʋ-tẽw n'ʋ bɛ yere a ka. nɩbɛ na tɩ ɩrɛ a ɩ. 5A Sore tɩ ɩ na a ʋ naalʋ kpɛmɛ. A Zuda tẽw nɩbɛ za tɩ kʋ̀rɛ nɩ bome a Zozafatɩ, ʋ tɩ kpɛ naalʋ ɛ́ tɛr yúor. 6Ʋ tɩ tone nɩ a Sore nɩ ʋ pʋɔ za, ɛ́ tɩ sãw a maalʋ-ziir za nɩ a dà-barɩ za bɛr a Zuda naalʋ-tẽw pʋɔ.
7A ʋ naalʋ-dɩb yome ata sob, ʋ tɩ tõ n a ʋ tõ-tõ-nɩ-bɛrɛ bɛ mɩnɛ bɛ tɩ kanɩ nɩ a Zuda tẽ-bɛrɛ nɩbɛ. Bɛlɛ tɩ n'ɩ Bɛn-Hayil, Ovadɩa, Zekarɩa, Netanɛl nɩ Mikayahu. 8Levitɩ mɩnɛ piwaɩ tɩ bɩɛlɛ bɛ na: Semayahu, Netanɩahu, Zevadɩahu, Asayɛl, Semiramɔtɩ, Yehonatan Adoniyahu, Toviyahu nɩ Tɔv-Adoniya, lãwnɩ bàwr-maalbɛ ayi, Elisama nɩ Yehoram. 9Bɛ tɩ ɓáw nɩ a Sore wulu sɛbɛ tɛr cen nɩ, ɛ́ tɩ cɔlɩ a Zuda tẽ-bɛrɛ za tɩ tɔ, zanɛ nɩ a nɩbɛ.
A Zozafatɩ kpɛnʋ
10Dɛ̃bɩ̃ɛ tɩ ɩrɛ nɩ a naalʋ-ten al za na tɩ jil koli a Zuda a, ɛ́ kãw za bɛ tɩ sàw ŋmãa nɩ a Zozafatɩ zɛbr ɛ. 11Filisɩtɛ̃ mɩnɛ tɛɛ za tɩ wa n nɩ bʋ̃-kʋ̀rɩ nɩ zuru-yar na ɩ salm-pla a wa kʋ̀ a Zozafatɩ, ɛ́ Arabʋ mɩnɛ wa n pʋ́rɩ túr ayopõi dɔwlɩ kɔbr ayopõi (7 700) nɩ bʋrɩ túr ayopõi dɔwlɩ kɔbr ayopõi (7 700) wa kʋ̀ ʋ.
12A Zozafatɩ kpɛnʋ tɩ dɔwlɛ na cere. Ʋ tɩ ŋma n a Zuda tẽw pʋɔ zɛbr-yir-kpɛn kpɛn nɩ tẽ-bɛrɛ a bʋ̃-dɩrɩ binu ƴãw. 13À ŋá n'a ʋ tɩ tɛr bʋ̃-dɩrɩ na bɛ dɩ vuo a, a Zuda tẽ-bɛrɛ pʋɔ, nɩ zɛbr-nɩbɛ na kpɛ kanyir a, a Zerizalɛm. 14Yie yie n'a a sojarɩ bɛ ŋa tɩ ɓã ɓã taa. A Zuda dɔwlʋ pʋɔ a, sojarɩ túr nɩ-bɛrɛ tɩ be n be: Adɩna na tɩ dɩrɛ naalʋ sojarɩ tùr-kɔbr ata (300 000) na kpɛ socir a zu a, 15Yehohanan na pɩɛlɩ ʋ a tɩ dɩrɛ nɩ naalʋ sojarɩ tùr-kɔbr ayi dɔwlɩ tùr-lɩz'a anaar (280 000) zu, 16ɛ́ Zikiri bidɛb, Amasɩa, na nɔnɛ de ʋ tʋɔra tɩr a Sore tome ƴãw a, tɩ so sojarɩ tùr-kɔbr ayi (200 000). 17A Bɛ̃zamɛ dɔwlʋ pʋɔ a, soja-gãdaa kãw na dɩ kɛ́ Eliyada a tɩ so nɩ sojarɩ tùr-kɔbr ayi (200 000) na tɛr tamɛ nɩ kur-pãgalɩ a, 18ɛ́ Yehozavadɩ na pɩɛlɩ ʋ a tɩ so sojarɩ tùr-kɔbr ayi vʋ̃ɔ lɩzɛr (180 000) na cɔbrɩ gù a zɛbr a. 19A sojarɩ bɛ ŋa nɛbɛ tɩ tone a nãà tome a Zerizalɛm, pãa de nɩ a bɛl ʋ na tɩ ƴãw a naalʋ-tẽw za tẽ-kpɛn kpɛn pʋɔ a.
La Bible en Dagara © Alliance Biblique du Burkina Faso, 2013.