2 Bibie za yel-manɩ 19
19
A Zozafatɩ zɩɩl'ɩ ƴɛ̀r-dɩrbɛ a Zuda naalʋ-tẽw pʋɔ
1A Zuda nãà Zozafatɩ tɩ lɛb'a kul'ɩ ƴã-ɓaarʋ a Zerizalɛm. 2Naaŋmɩn-ƴɛ̀r-manɛ Yehu, Hanani bidɛb, tɩ yi na tuori ʋ yel ʋ: «Bʋ̃ʋ n'ʋ so fʋ sõw nɩ-faa? Ãa n'ʋ na tʋ̃ɔ́ nɔnɛ sob nɛ na hɩ̃ɛn a Sore a? Fʋ na ɩ à à ŋá a zũú, a Sore suur ìr'ɩ a fʋ ƴãw. 3Ɛcɛ fʋ maal'ɩ yel-vɩɛlɩ, bʋ̃ʋ n'ʋ vɛ̃, fʋ nyɩw nɩ a ŋmɩn-pɔw Asera dà-barɩ za bɛr a tẽw pʋɔ, ɛ́ ƴãw fãw bɔbr a Naaŋmɩn nɩ fʋ pʋɔ za.»
4A Zozafatɩ tɩ kpɩɛr'ɩ a Zerizalɛm. Ɛcɛ ʋ tɩ lɛb'a ìr zɔ cɔlɩ a tẽw, yi a Bɛɛr-Seva tɩ sãá a Efarayim tan vuo pʋɔ, k'ʋʋ ɩ a Ɩsɩrayɛl nɩbɛ lɛb wa a Sore, a bɛ sãà mɩnɛ Naaŋmɩn zie. 5Ʋ tɩ zɩɩl'ɩ ƴɛ̀r-dɩrbɛ a Zuda naalʋ-tẽw tẽ-kpɛn kpɛn za pʋɔ 6ɛ́ yel bɛ à ŋá: «Nyɩ gù vla a lɛ nyɩ na na ɩrɛ a ƴãw! Nɩsaalbɛ yúor ƴãw bɛ n'a nyɩ na dɩrɛ a ƴɛ̀rʋ ɛ, a Sore yúor ƴãw n'a. Ʋl mɩŋa na be n a nyɩ zie a lɛn daar nyɩ na mɩ́ dɩrɛ a ƴɛ̀rʋ a. 7A na ɩ à ŋá a, nyɩ zɔrɛ a Sore yaga yaga, ɛ́ gùre vla a lɛ nyɩ na ɩrɛ a, bʋ̃ʋ n'ʋ vɛ̃, a Sore tɩ Naaŋmɩn bɛ sàwr yel na bɛ tu sɔ́r a ɩ, ʋ bɛ owre ɩ, ʋ bɛ sàwr bɛ kʋ̀rɛ ʋ bome ŋmɩɛr'ɩ ʋ nʋɔr ɛ.»
8A Zerizalɛm mɩ̀ a, a Zozafatɩ tɩ kaa na ír levitɩ mɩnɛ, bàwr-maalbɛ nɩ a Ɩsɩrayɛl nɩbɛ yie nɩ-bɛrɛ kɛ́ bɛ maalɛ a ƴɛ̀rʋ a Sore yúor ƴãw, ɛ́ maalɛ a ƴɛ̀rʋ a tẽw na mɩ́ wa tɛr taw-taa a. 9À ŋá n'a ʋ tɩ yel bɛ: «A Sore zɔba zũú n'a nyɩ na ɩrɛ nɩ nyɩ pʋɔ za, ɛ́ bɛ tɛr sãwna ɩ. 10Sãw nɛ za a nyɩ tẽ-bi-taabɛ nãà mɩ́ wa yi a ten al pʋɔ bɛ na kpɩɛr a wa manɩ yel kʋ̀ nyɩ, kɛ́ nyɩ bãw a, a yel càar'ɩ nɩr kʋb, a wulu, a nɔ-ƴãwna, a tub bɩɩ ɩb na ɩrɛ lɛ a, nyɩ na mɩ́ caalɩ bɛ na. Lɛ n'a bɛ kʋ̃ ɩ sãwna dem a Sore zie ɩ, ɛ́ a Sore suur kʋ̃ ìr a nyɩ ƴãw bɩɩ a nyɩ tẽ-bi-taabɛ ƴãw ɛ. Nyɩ ɩrɛ à à ŋá, a nyɩ mɩŋa ta tɛr sãwna ɩ. 11A bàwr-maal-kara Amarɩa na ɩ n a nyɩ nɩ-kpɛ̃ɛ a puoru yele za pʋɔ, ɛ́ a naalʋ-tẽw tõ-tõ-bi-nɩ-kpɛ̃ɛ Zevadɩahu na ɩ Yisɩmayɛl bidɛb a, ɩ a nyɩ nɩ-kpɛ̃ɛ a nãà yele pʋɔ. A levitɩ mɩnɛ na ɩ n a sɛ-sɛbrbɛ a nyɩ lõbowrí. Nyɩ dɩ kanyir ɛ́ tone! Ɛ́ a Sore, ʋ be a bɛlɩ dem na ɩrɛ vla a zie.»
La Bible en Dagara © Alliance Biblique du Burkina Faso, 2013.