2 Bibie za yel-manɩ 13
13
A Abɩa naalʋ-dɩb
(Nyɛ̃ 1Na 15:1-8)
1Zerobowam naalʋ-dɩb yome pie nɩ ani sob daar'a a Abɩa tɩ lɩɛbɩ a Zuda naalʋ-tẽw nãà. 2Ʋ dɩ n a naalʋ yome ata a Zerizalɛm. A ʋ mã tɩ dɩ na kɛ́ Mikayahu, Givea tẽw Urɩɛl pɔwyaa tɩ n'ʋ.
Zɛbr tɩ lo n a Abɩa nɩ a Zerobowam cará. 3Sojarɩ na ɩ sojarɩ a tùr-kɔbr anaar (400 000) a a Abɩa tɩ ŋmãa nɩ a zɛbr, ɛ́ a Zerobowam pɩɛrɩ sojarɩ na ɩ sojarɩ a tùr-kɔbr ani (800 000) a Abɩa ƴãw. 4A Abɩa tɩ do n a Semarayim tãw na be a Efarayim tan vuo pʋɔ a nyʋɔrɩ́ tɩ ìr àr a be ɛ́ yel: «Zerobowam nɩ Ɩsɩrayɛl nɩbɛ za a, nyɩ bɛr wõ a ɩ̃ ƴɛ̀rʋ. 5Nyɩ bɛ bãwnɩ a k'aa Sore, a Ɩsɩrayɛl Naaŋmɩn, kʋ̀ n a Daviir nɩ a ʋ bidɛbr a naalʋ-dɩb a Ɩsɩrayɛl zu kʋralɛ ɩ? Nʋɔr na bɛ tɛr lɩɛbʋ a n'ʋ. 6Ɛcɛ a Nevatɩ bidɛb, Zerobowam, na tɩ ɩ a Daviir bidɛb Salomɔ̃ tõ-tõ-bie a, tɩ ìr'a lo a ʋ zu-sob zu. 7Nyãnyu-nɩ-farbɛ nɩ nɩ-bɛ-tɛr-bir mɩnɛ tɩ ɓã n taa a ʋ zie zɛb tʋ̃ɔ́ a Salomɔ̃ bidɛb Orobowam na tɩ cãà ɩ pɔlbile ɛ́ bɛ bãw yel a, lɛ so ʋ bɛ tɩ tʋ̃ɔ́ bà gbɛ́r a bɛ niŋé ɩ. 8Ɛ́ ƴɛrɛŋa nyɩ tɩɛr kɛ́ nyɩ ìr lo a naalʋ-dɩb a Sore na kʋ̀ a Daviir bidɛbr a zu! A nyɩ zɛbr-nɩbɛ bɛ dɩ vuo ɩ, ɛ́ nyɩ tɛr a salm-zɩɛ nadeli a Zerobowam na maalɩ kʋ̀ nyɩ a ɩ a nyɩ ŋmɩmɛ a. 9Nyɩ diw nɩ a Sore bàwr-maalbɛ, a Aarɔ̃ bidɛbr nɩ a levitɩ mɩnɛ ɛ́ kaa ír bàwr-maalbɛ mɛ̃ a tẽ-yoru nɩbɛ a: nɩr za na dɛ mɩ́ tɩ wa n nadele nɩ pʋ́rɩ ayopõi a, ʋ mɩ́ lɩɛb'ɩ a bome á ŋá na bɛ ɩ Naaŋmɩn a bàwr-maalɛ. 10Tɩɩm a, a Sore n'ɩ a tɩ Naaŋmɩn, tɩ bɛ zawrɩ ʋ bɛr ɛ. A bàwr-maalbɛ na tone a Sore a ɩ n a Aarɔ̃ bʋ̃-dɔwrɩ, ɛ́ a levitɩ mɩnɛ tone a bɛ tome. 11Biɓaara nɩ zaanʋɔra za a, bɛ mɩ́ nyɩw nɩ a nyɩw-a-za-bàwr nɛnɛ nɩ a tɩ-suur-zɔ̃-na-nyùur-vla-vla-a. Bɛ mɩ́ dɔwl'ɩ a dipɛ̃ bɛ na de kʋ̀ a Naaŋmɩn a, tabal zu, ɛ́ zaanʋɔrɛ za bɛ tɔ̃w a salm-zɩɛ fɩ̃tɩlɩ dɔwlʋ ziir fɩ̃tɩlɩ. Bʋ̃ʋ n'ʋ vɛ̃, a tɩɩm a, a Sore tɩ Naaŋmɩn n'ʋ tɩ tone, ɛ́ nyɩɩm zawrɩ ʋ bɛr. 12Ƴɛrɛŋa a, a Naaŋmɩn mɩŋa n'ʋ de tɩ niwn. A ʋ bàwr-maalbɛ be n ka cɔbrɩ gù a wɩ́ɛ pɛblʋ kɛ́ bɛ lɔb a zɛbr cɛl a nyɩ ƴãw. A na ɩ à ŋá a, Ɩsɩrayɛl nɩbɛ ɛ, nyɩ ta ŋmãa nɩ a Sore, a nyɩ sãà mɩnɛ Naaŋmɩn, a zɛbr ɛ, nyɩ kʋ̃ zɛb tʋ̃ɔ́ ɩ.»
13A Abɩa na tɩ ƴɛ̀rɛ a, a Zerobowam tɩ ƴãw nɩ sojarɩ sɔwlɩ jɩɩrɩ a Zuda sojarɩ zikurí kɛ́ bɛ tɩ ùr lo a bɛ zu. Lɛ n'a a Zuda zɛbr-nɩbɛ tɩ be sɔwlɩsɔw: a Zerobowam zɛbr-nɩbɛ bɛ mɩnɛ be a bɛ niŋé ɛ́ bɛ ŋmãa sɔwlɩ a bɛ zikurí. 14A Zuda nɩbɛ na tɩ lɩɛbɩ a, bɛ tɩ nyɛ̃ na kɛ́ ziir ayi n'a a fɛr kɛ́ bɛ zɛb, a bɛ niŋé nɩ a be zikurí. Bɛ tɩ kõ na bʋɔlɩ a Sore k'ʋʋ wa sõw bɛ. A bàwr-maalbɛ na wa pɛblɩ a wɩ́ɛ a, 15a Zuda zɛbr-nɩbɛ tɩ lɔb'ɩ a zɛbr cɛl. Daadaalɛ, a Naaŋmɩn tɩ pɔb'ɩ a Zerobowam nɩ a Ɩsɩrayɛl nɩbɛ za, a Abɩa nɩ a Zuda nɩbɛ niŋé. 16A Ɩsɩrayɛl nɩbɛ tɩ lɩɛb'a zɔ a Zuda niŋé, ɛ́ a Naaŋmɩn ƴãw bɛ a Zuda nɩbɛ nuru pʋɔ. 17A Abɩa nɩ a ʋ nɩbɛ tɩ pɔb'ɩ a Ɩsɩrayɛl nɩbɛ bɛ dɩ̃ɛn'ɩ ɛ: bɛ tɩ kʋ n a bɛ sojarɩ na ɩ sojarɩ a, sojarɩ tùr-kɔbr anũu (500 000). 18A lɛn daar, a Ɩsɩrayɛl nɩbɛ tɩ nyɛ̃ nɩ vĩ ɛ́ a Zuda nɩbɛ zɛb tʋ̃ɔ́, bɛ na tɩ ɩrɛ ƴãwn a Sore, a bɛ sãà mɩnɛ Naaŋmɩn ƴãw a. 19A Abɩa tɩ diw nɩ a Zerobowam. Ʋ tɩ faa nɩ a tẽ-bɛrɛ á ŋá a ʋ zie: Betɛl nɩ a ʋ tẽ-sori, Yesana nɩ a ʋ tẽ-sori, Efiron nɩ a ʋ tẽ-sori.
20A Abɩa naalʋ daar za a, a Zerobowam bɛ lɛb tɩ nyɛ̃ a ʋ dãwdãw kpɛnʋ ɛ. Al pùorí, a Sore tɩ ŋmɛ ʋ na ʋ kpi. 21A Abɩa ʋl a, ʋ tɩ kpɛmɛ na dɔwlɛ. Ʋ tɩ kul'ɩ pɔwbɛ pie nɩ anaar bɛ dɔw bidɛbr lɩzɛr'ɩ ayi nɩ pɔwyaar pie nɩ ayʋɔb kʋ̀ ʋ.
22A Abɩa ɩ-ɩrɩ al na cɛ a, a lɛ za ʋ na ɩ a nɩ a lɛ za ʋ na yel a, a be n a «naaŋmɩn-ƴɛ̀r-manɛ Ido ɩ-ɩrɩ sɛbɛ» pʋɔ. 23A Abɩa na wa kpi a, bɛ ũù ʋ nɩ a «Daviir Tẽ-kpɛ̃ɛ» pʋɔ. A ʋ bidɛb Asa n'ʋ tɩ lɩɛrɩ ʋ ɩ a nãà.
A Asa naalʋ-dɩb
(Mɩ̀ nyɛ̃ 1Na 15:9-11)
A Asa naalʋ-dɩb daar, a tẽw bɛ tɩ bãw damnʋ ɛ tɩ maalɩ yome pie.
La Bible en Dagara © Alliance Biblique du Burkina Faso, 2013.