2 Bibie za yel-manɩ 14
14
1A Asa tɩ ɩrɛ nɩ vla. A lɛ na pɛlɩ a Sore ʋ Naaŋmɩn pʋɔ a n'a ʋ tɩ ɩrɛ. 2Ʋ tɩ sãw nɩ a ŋmɩn-sãanbɛ bàwr-maal-kube nɩ a maalʋ-ziir bɛr, ʋ tɩ kár'ɩ a kʋsɛ-teli ɛ́ cɛ a dà-barɩ lɔb. 3Ʋ tɩ yel'ɩ a Zuda nɩbɛ kɛ́ bɛ bɔbr a Sore, a bɛ sãà mɩnɛ Naaŋmɩn, ɛ́ tuur a ʋ wulu nɩ a ʋ nɛ-ƴãwnɩ. 4Ʋ tɩ sãw nɩ a maalʋ-ziir za nɩ a parfɛ̃ nyɩwfʋ ziir za bɛr a Zuda tẽ-bɛrɛ za pʋɔ, ɛ́ a naalʋ-tẽw bɛ tɩ bãw damnʋ ɛ. 5Ʋ tɩ mɛ n tẽ-kpɛn kpɛn a Zuda tẽw, a tẽw na bɛ tɩ bãw damnʋ a ƴãw. A alɩ yome nɛ pʋɔ a, nɩr za bɛ tɩ zɛb'ɩ ʋ ɛ, bʋ̃ʋ n'ʋ vɛ̃, a Sore tɩ kʋ̀ ʋ nɩ ƴã-ɓaarʋ. 6Ʋ tɩ yel'ɩ a Zuda tẽw nɩbɛ: «Nyɩ ɩ tɩ mɛ a tẽ-bɛrɛ á ŋá, tɩ ŋmãa dacin viiri koli a nɩ yir-cõcowli, tɩ ƴãw dɩ̃dɛɛ nɩ bʋ̃-kparɩ a tẽw tɩ na cãà so a ƴãw. Bʋ̃ʋ n'ʋ vɛ̃, tɩ bɔ n a Sore tɩ Naaŋmɩn, tɩ bɔ ʋ na, ʋʋ kʋ̀ tɩ nɩ a ƴã-ɓaarʋ a lõbowe za.» Ɛ́ bɛ tɩ mɛ a bɛ tẽ-kpɛn kpɛn.
7A Asa tɩ tɛr'ɩ zɛbr-nɩbɛ: Zuda dɔwlʋ pʋɔ, sojarɩ tùr-kɔbr ata (300 000) na mɩ́ tɛr a zɛbr-kur-pãgala kpɛ̃ɛ nɩ a kafin a. A Bɛ̃zamɛ dɔwlʋ pʋɔ sojarɩ tùr-kɔbr ayi dɔwlɩ tùr-lɩz'a anaar (280 000) na mɩ́ tɛr a zɛbr-kur-pãgala cãpile ɛ́ tɛbr tam a. Soja-gãdaar tɩ n'ɩ bɛ za. 8Etiopi tẽw Zera tɩ wa na wa ŋmãa nɩ bɛ a zɛbr. Ʋ tɩ tɛr'ɩ sojarɩ tu-túr (1 000 000) nɩ zɛbr-torkori kɔbr ata (300). Ʋ tɩ ta n a Maaresa. 9A Asa tɩ yi na tuori ʋ. Ʋlɛ nɩ a ʋ zɛbr-nɩbɛ tɩ pɩɛr'ɩ a zɛbr ƴãw a Sefata fʋɔla pʋɔ pɩɛlɩ a Maaresa. 10A Asa tɩ kõ na bʋɔlɩ a Sore ʋ Naaŋmɩn k'ʋʋ wa sõw ʋ. Ʋ tɩ yel'a: «Sore e, fʋ̃ʋ yõ n'ʋ na tʋ̃ɔ́ sõw a fãw sob ɛ́ sõw a bãbàal. A na ɩ à ŋá a, wa sõw tɩ, Sore tɩ Naaŋmɩn i, fʋ̃ʋ ƴãw n'a tɩ ɩrɛ ƴãwn, ɛ́ a fʋ yúor ƴãw n'a tɩ yi wa kɛ́ tɩ wa zɛb'ɩ a nɩ-yaga yaga bɛ ŋa. Sore e, fʋ̃ʋ n'ɩ a tɩ Naaŋmɩn, ta sàw a nɩsaal ciere nɩ fʋ ɛ!»
11A Sore tɩ pɔb'ɩ a Etiopi nɩbɛ a Asa nɩ a Zuda niŋé, a Etiopi nɩbɛ lɩɛbɩ zɔ. 12A Asa nɩ a ʋ nɩbɛ tɩ diw bɛ na tɩ sãá nɩ Geraar. Bɛ tɩ kpi n yaga ɛ̀ been bɛ tɩ cɛ ɩ. Bʋ̃ʋ n'ʋ vɛ̃, a Sore nɩ a ʋ nɩbɛ tɩ ƴɛ́r bɛ na ŋmɛr. A Asa nɩbɛ tɩ wob'ɩ a zɛbr bome bɛ dɩ vuo ɩ. 13Bɛ tɩ zɛb'a de a ten al za na viiri koli a Geraar tẽw#14:13 Geraar tẽw: A Filisɩtɛ̃ mɩnɛ nãà Abimelɛkɩ tẽ-kpɛ̃ɛ tɩ n'ʋ. Ʋ tɩ be n a Kanãa tẽw pʋɔ. a, bʋ̃ʋ n'ʋ vɛ̃, a Sore tɩ ɩ na dɛ̃bɩ̃ɛ nyɔw a ten á ŋá, ɛ́ bɛ fa a ten á ŋá za bome. Na-bome yaga yaga tɩ be n a ten á ŋá pʋɔ. 14Bɛ mɩ̀ tɩ ŋmãa nɩ nɩ a dʋ̃-cɩ̃ɩnbɛ a zɛbr zɛb de píir nɩ nyɔ̃wmɩ na bɛ dɩ vuo a. Al pùorí, bɛ tɩ lɛb'a cen a Zerizalɛm.
La Bible en Dagara © Alliance Biblique du Burkina Faso, 2013.