2 Bibie za yel-manɩ 12
12
Eziptɩ tẽw nãà Sɩsakɩ ìr'a zɛbr'ɩ a Zuda naalʋ-tẽw
(Nyɛ̃ 1Na 14:25-28)
1A Orobowam naalʋ na bɛ wa cãà bãw damnʋ, ʋʋ kpɛmɛ dɔwlɩ a, ʋ tɩ zawr'ɩ a Sore wulu bɛr ɛ́ a Ɩsɩrayɛl nɩbɛ za mɩ̀ ɩ mɛ̃ a ʋl a. 2A Orobowam naalʋ-dɩb yome anũu sob a, a Eziptɩ tẽw nãà, Sɩsakɩ, tɩ wa na wa zɛb'ɩ a Zerizalɛm: bɛ na tɩ zawrɩ a Sore bɛr a n'a so. 3A Sɩsakɩ tɩ tɛr'ɩ zɛbr-torkori túr dɔwlɩ kɔbr ayi (1 200), soja-wi-zɔmnbɛ tùr-lɩz'a ata (60 000) nɩ sojarɩ na bɛ tɛr nʋɔr a, bɛ yi a Eziptɩ páw ʋ wa: Libi tẽw dem, Sukitɩ mɩnɛ nɩ Etiopi tẽw dem. 4Ʋ tɩ zɛb'a de a Zuda tẽ-kpɛn kpɛn, ɛ́ tɛr lɛɛ tɩ ta a Zerizalɛm. 5A naaŋmɩn-ƴɛ̀r-manɛ Semaya tɩ cen na tɩ páw a Orobowam nɩ a Zuda nɩ-bɛrɛ na tɩ ɓã taa a Zerizalɛm, a Sɩsakɩ waa daar a, yel bɛ: «À ŋá n'a a Sore yere: “A nyɩɩm, nyɩ zawrɩ mɛ̃ na bɛr, alɛ so a mãa, ɩ̃ mɩ̀ zawrɛ nyɩ bɛrɛ kʋ̀rɛ a Sɩsakɩ.”»
6A Ɩsɩrayɛl nɩ-bɛrɛ nɩ a nãà tɩ siwr'ɩ bɛ tʋɔra ɛ́ yel à ŋá: «A Sore dem de na!» 7A Sore na tɩ nyɛ̃ bɛ siwri bɛ tʋɔra a, ʋ tɩ lɛb'a ƴɛ̀r a Semaya zie à ŋá: «Bɛ na faa sàw a bɛ sãwna a, ɩ̃ kʋ̃ kʋ bɛ pàw pɛr ɛ. Ɩ̃ kʋ̃ yaa kɛ́ faa bɛ ɩ, a ɩ̃ suur nãá tɩ ƴãw a Sɩsakɩ sãw a Zerizalɛm bɛr a bɛ cãà ìr ɛ. 8Ɛcɛ a Sɩsakɩ na so bɛ na, lɛ n'a bɛ na bãw k'aa sàw-ɩ̃-só-bɛ nɩ a sàw-a-tẽw-zu-na-mɩnɛ-só-bɛ bɛ ɩ been ɛ.»
9Lɛ n'a a Eziptɩ tẽw nãà Sɩsakɩ tɩ ŋmãa nɩ a Zerizalɛm a zɛbr. Ʋ tɩ wob'ɩ a Sore Ŋmɩn-yir-kpɛ̃ɛ nɩ a nãà yir na-bome. Ʋ tɩ wob'ɩ a za pap, báa zuo a za a salm-zɩɛ zɛbr-kur-pãgalɩ a Salomɔ̃ na tɩ ƴãw bɛ maalɩ a. 10Lɛ n'a a Orobowam tɩ maalɩ kur-zɩɛ zɛbr-kur-pãgalɩ lɩɛr'ɩ a, ɛ́ de a kʋ̀ a sojarɩ na gùre a nãà yir dɩ̃dɛɛ a nɩ-bɛrɛ. 11Sãw za a nãà wa cere a Sore Ŋmɩn-yir-kpɛ̃ɛ́ a, a sojarɩ mɩ́ de nɩ a zɛbr-kur-pãgalɩ, al pùorí bɛ lɛb wa bin a a sojarɩ na gùre a zie a dĩó.
12A nãà na tɩ sàw a ʋ sãwna a zũú, a Sore suur bɛ tɩ lo a ʋ zu ʋ sãw ʋ bɛr cʋmcʋm ɛ. Lɛb waar mɩ̀, yel-vɩɛlɩ tɩ be n a Zuda naalʋ-tẽw.
A Orobowam naalʋ-dɩb baarʋ
(Nyɛ̃ 1Na 14:21-24,29-31)
13A Orobowam tɩ tɛr'ɩ yome lɩz'a ayi nɩ been a lɛn daar ʋ na tɩ lɩɛbɩ a nãà a. Ʋ tɩ ɩ n a ʋ naalʋ kpɛmɛ. Ʋ tɩ dɩ n a naalʋ yome pie nɩ ayopõi a Zerizalɛm. Bʋ̃ʋ n'ʋ vɛ̃, a tẽ-kpɛ̃ɛ ŋa n'ʋ a Sore tɩ kaa ír a Ɩsɩrayɛl tẽw za pʋɔ k'ʋʋ tʋ̃ɔ́ mɩ́ wul a be ʋ na be a ʋ nɩ-bʋʋrɛ Ɩsɩrayɛl sɔgɔ a. A Orobowam mã yúor tɩ n'ɩ Naama na ɩ Amɔ̃ tẽw nɩr a. 14A Orobowam tɩ ɩ n faa, ʋ bɛ tɩ bɔ a Sore nɩ ʋ pʋɔ za ɩ.
15A Orobowam ɩ-ɩrɩ, a de niwn dem tɩ ta n a pɛr baarɩ, a za sɛb'ɩ a «naaŋmɩn-ƴɛ̀r-manɛ Semaya ɩ-ɩrɩ nɩ a naaŋmɩn-ƴɛ̀r-manɛ Ido ɩ-ɩrɩ sɛbɛ» pʋɔ. Zɛbr tɩ be n ʋlɛ nɩ a Zerobowam cara pʋɔ kʋralɛ. 16Ʋ na wa kpi a, bɛ ũù ʋ nɩ a «Daviir Tẽ-kpɛ̃ɛ» pʋɔ. A ʋ bidɛb Abɩa#12:16 Abɩa: Bɛ bʋɔlɛ ʋ nɩ Abiam a na-mɩnɛ sɛbr pʋɔ. Nyɛ̃ 1Na 14.31. tɩ lɩɛrɩ ʋ na dɩ a naalʋ.
La Bible en Dagara © Alliance Biblique du Burkina Faso, 2013.