Barua ya Varome 1
1
1Nniń Paulo nkee iketi lya Kristo Yesu, nndevaangwa vve nrumi, tindesaulwa vve nkwanisa mboni ya Iṛuva ya ifura. 2Yyo Iṛuva eemmaa iirekia kwa kana ka vaauya vamwi ifo mitisiṛień misongori. 3Nayo mmboni ya Mwana wamwi Yesu Kristo ito awonikia ufwariń lwa Davidi kwa mikae ya kivvili. 4Kalolika na baa sheeli mMwana wa Iṛuva muni finya kwa mikae ya kiMumuyo Nsongori eeṛutwaa kwa vafu, yye Yesu Kristo Nndumi weru. 5Nae yye andeshililia na ishaavia imakii vve nrumi wa ilosha vayavaṛumu woose vankusure na iindia irina lyamwi. 6Kari kawo neeni mwifo, fulya mwawaangio Yesu Kristo. 7Namwisana ini mu woose mukee ifo Rome, mukee vakunde va Iṛuva mundevaangwa muve vasongori. Uwoo lukaa kwanu na unambwe luukie kwa Iṛuva Nde yeru na kwa Nndumi Yesu Kristo!
8Lya mbele nkee yaana Iṛuva wakwa nkuvavie na Yesu Kristo kiimba kyanu mu woose, amu ikusura lyanu liwore nsendo isangeń lyoose. 9Amu Iṛuva nkee indundia nrimiń wakwa tikwanisaa nrumi ya ifura lya Mwana wamwi Iṛuva uu ni nrambua wakwa, sheeli kitaare nantia-wo imukumbua ini. 10Na mikonu yoose nkee itereva kiterewoń kyakwa, akwaa kivaa llolie mwaanya wa imufikia, kwakooya Iṛuva akundaa. 11Amu llangie nnu ikwania neeni nkooye mwaanya wa imuavia wavi luukie kwa Mumuyo, amu mukaariswa kinuru. 12Llyo tiwiiṛianaa muu ti veni na ti veni na yaviana oo nndu na ikusura lya uroe likee lyanu na lyakwa. 13Kake, vanavama, mfurie mutuṛe imanya ndi, fulya nallanga keengi imusengera, naamu mmuṛundie neeni ifo kwanu sheeli nkee iṛundia vayavaṛumu vengi, kake namiimwa kumande alli. 14Amu nkee nsile wa Vagiriki na wa vayavaṛumu na wa vaṛango na wa vatakee vaṛango. 15Kiimba kya ikyo niń nammaa ikusongosia mmukwanisie nrumi shinuru neeni ifo Rome. 16Amu noore sonu ya nrumi yo ya Kristo ndi, fulya ikee finya ya Iṛuva ya ikiṛa valya woose vaikusuraa, lya mbele Vayuda na akwaa vVagiriki nawo. 17Amu nrumi ii iiraa usumani luukie kwa Iṛuva. Nalo luavio̱o̱ ulya akuwore na ikusura. Nalo lurwaa nndu ikusureń, sheeli kikee kitisiṛe: “Nsumani akooyaa muu kiimba kya ikusura Iṛuva.”
18Fulya uvave lwa Iṛuva lwamanyiswa loolokaa luuka iṛuvewu lushee vandu woose valya vabiṛie Iṛuva, vafungiṛia kilya kikee kya dede na ukasha lwawo. 19Fulya findo fa kwa Iṛuva fanrambuka kwawo. Amu fanrambulwa, nafo ni Iṛuva avarambuya. 20Kiimba kya iki findo famwi kitaare fallolio̱ fikee ilolika kuuka isanga lintanwa yye na imanyika kwa vandu, amu llyo imakii lyamwi lya miṛeṛe na unini lwamwi. Kikava kuri kaaṛa vatave na kya ikuuta. 21Fulya veeshi Iṛuva, kake vamwitikisa sheeli yye Iṛuva ndi ana nta imwaana. Kake varekia ifo iiṅaneń lyawo na mirima yawo ikasikio̱ ni llema. 22Vakakureria wo veni sheeli vawore uṛango vakariṅana. 23Vakailasha tikisi ya Iṛuva atasiaa na fwana ya mikae ya nndu wa vandu asiaa na ya ndee na ya mafisi na faafuafuaa.
24Kiimba kya ikyo Iṛuva kavatia vakuatie ifo ilangeń lya mirima yawo vasoṛe ukwe, kumande vatuṛiaa mivili yawo sonu. 25Amu vandeilasha udede lwa Iṛuva lukava wongo, vakakwinitia kindo kitani na ikitereva andu a Mukitana aṅiniswa miṛeṛe na miṛeṛe. Amen. 26Kwa ikyo Iṛuva andevatia valatie malanga awo a usutu. Na akwaa vvaka vawo vakailasha miṛundie ya kimia ikava miṛundie itakee ya kimia. 27Womi nawo mfo kuro vandetia miṛundie ya kimia kya uka vakakwantia milangie womi kwa womi veetanaa fa usutu vakakooya ifo mimanyień yawo mitaiye ya ureti lwawo kisumani nawo. 28Na sheeli vandelea iva na Iṛuva ifo imanyeń lyawo, Iṛuva andevatia valatie ngyuṛango tawo titamakii yeleka vatane kitaare kyeewwaraa vafitani. 29Vakaishua wilo lwa mikae yoose na ureti na ilanga na ukasha. Vakaishulwa ni iriso na iwaa na uṛiingi na ntambwe, vvandu va makusaṛo makasha na varera vandu. 30Vakee vafingia na vasule Iṛuva na vakuṅinisi vawore ukufumbisi na vakushombi na vasongosia fikasha na vatairikie vasuṛi vawo. 31Vatawore imanya na vafukya firekio, vatakundie va kyeń kwawo, vatawore ililia. 32Lla kasa veeshi nnu uumisio lwa usumani lwa Iṛuva, sheeli iwo vakee itana ifo kyavawara vakooye ufu, nawo vakee itana ifo, ana wwo veni da ndi, kake vakee iirikiana na iwo vakee ifitana.
Currently Selected:
Barua ya Varome 1: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
