Mitanie ya varumi 28
28
1Ili findemaa ikia Uyo timanya sheeli kisanga kilya kivaangwaa Melita. 2Veni uruka lu vakatitania finuru fitavaa isenda. Amu vaata muro vakatiwaria ti woose kiimba kya fua na mbioo. 3Ili Paulo andeenda isana iṛio lya ngwi na itirwaa muroń, shoka ikasomuka-fo kiimba kya muro ulya ikankwiṛinia ukoń. 4Ili veni uruka vandelolia shoka ilya iikusheluasheluaa ukoń vakakurera: Kikafura nndu uu ni wwaa vandu. Amu lla kasa andekia nruveń, udede lua lusumani na muwaa lukee imwotoṛa akaa na muu ndi. 5Kake ye kaitukia kulya muroń atakooye kitani. 6Wo vakakusaṛa sheeli afumbaa ana afwe kwa tiń. Neeli vandemaa imulla nnu na ilolia sheeli nta kitani akooya, vakailasha firero fawo vakanumbua: Uu ni Iṛuva.
7Kufui na andu alya kiiyoo kivasha kya nnini wa kyuruka kilya, irina lyamwi ni Pubilio. Nndu uu katiwaria na nrima wa undoo katiaṛua veeni vamwi andu a mikonu iraru. 8Na ndee wa Pubilio eelolee iseṅu na nsoru. Paulo kaaka numba kwamwi kanterevia kwa Iṛuva kamwekeṛia maako kankiṛa. 9Ili ifo findemaa iva na vengi veelolee kulya kyurukeń kilya vakasha vakakiṛwa. 10Nawo vakatiindia kwa windi wiingi. Neese ili tindeaṛukia ngalaveń vakatisaamisia na findo filya fititinye.
11Ili indesia miiri iraru tikaenda kyaaṛo na ngalava yukie Alekisanderia. Nayo iikee alya kyurukeń kilya kyeeri kya mbioo. Na myorusie yayo mfwana ya yaasa. 12Tikafika Sirakusa tikakaa-fo mikonu iraru. 13Kuuka ifo tikalengetia tikafika Regio. Numa ya nkonu umwi mburaato ya itate ikavivita na nkonu wa kavili tikafika Puteoli. 14Ifo tikakooya-fo vanavamae vakatilembalemba tikaa nawo mikonu mfungare. Na kuro llyo tifika Rome. 15Ili vanavamae veefo kulya vandeita mboni teru vakasha ikwania neese singiṛeń ya Apio na kundo kuvaangwaa Trestaberne. Ili Paulo andevalolia kaana Iṛuva kawiiṛio̱ muu.
16Ili tindefika Rome nshili ulya karambikia vafinge maakoń a nshili wa varingi va Kaisari. Kake Paulo kaniingwa muumu wa ikaa kyaanya ye muni andu emwi na nsikari ulya eenringiee.
17Kyasia yamiira mikonu iraru Paulo kavaanga vanini va Vayuda vashe ikusandioń. Nawo ili vandemaa isha kavaia: Muṛe womi na vamwanama, na akwaa kitaare nndetana kikasha kya isulwa vvandu veru ana kirero kya ivingana na mikae ya vakuuku veru, nnderambikio̱ maakoń a Varome nava mfinge kuuka Yerusalemu. 18Nawo ili vandemaa ishiuṛauṛa vakafura ishiawua, amu kiifo kiteveto kwakwa kyeewaraa wwalwa ndi. 19Kake ili Vayuda vanderera nnu ifo mwaanduń ulya kikashiwara naaṛuye kikwena ki kwa Kaisari. Ana nta niikai niiworee kya kirero kya iṛiinga vandu va uruka lwakwa ndi. 20Kiimba kya ikyo nkyo namuvaangia musheshilla na irera nań. Amu namfingwa na nse uu kiimba kya ikusura lya Isiraeli. 21Nawo vakamwia: Nta ise tankooya barua yoore mboni tafo yuka Yudaya ndi. Ana nta eefo mwanamae weru umwi anshe na itiongoya mboni ana irera kirero kyafo kikasha ndi. 22Kake tifurie iita kwafo kilya kulolie iwe. Amu kari ka mboni ta siṛi iyo yammanyika sheeli ikee irerwa kikasha andu woose. 23Ili vandemaa irekiana nae nkonu vakanshea numbeń ilya eekaii vandu veengi. Kavaongoya kwa walio na irambua umangi lwa Iṛuva eevaikimbaa mboni ta Yesu na firero fa uvavaso lwa Mose na fa vaauya kuuka ngama kumande ukwa-wuń. 24Vengi vakakusura filya findererwa na vengi vakalea ifikusura. 25Neeli vandelemana ikwirikiana wo veni na veni vakataṛa-kana, ili Paulo andemaa irera kirero ki kimwi sheeli: Mumuyo Nsongori arera kisha na vaande yanu kwa kana ka mwauya Yesaya eenumbuaa: 26”Enda kwa vandu va kuvaie: Iita mwitaa, kake mumanyaa ndi. Na illa mullaa, kake muloliaa ndi. 27Amu ngoo ta vandu va tanriṅana na marwi awo mmemeri iita na miso awo vammaa iraya, kaaṛa vatalolie na miso awo ana iita na marwi awo ana imanya misendie na ngoo tawo na iilasha makusaṛo awo wakiṛe.“ 28Kyasia iki kimanyike kwanu sheeli ikiṛwa li lya Iṛuva lyanrikwa kwa vayavaṛumu, nawo valiaranyaa. 29Ili andemaa irera ifo Vayuda vakaenda veeuṛanaa fiingi wo veni na veni. 30Paulo kakaa kiṛengo kya myaka ivili iishule numba yo yamwi eekaii kawaria vandu woose valya veekee inshea 31eekwanisaa mboni ta umangi lwa Iṛuva na ilosha mboni ta Nndumi Yesu Kristo kwa utomari wiingi ataimwa ni nndu.
Currently Selected:
Mitanie ya varumi 28: RWK72
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
