Urambuyo lwa Yohane 3
3
1Na mwisi ulya wa siṛi yo ikee Saride ntisiṛie: A fi firero farerwa ni ito awore mimuyo ilya mfungare ya Iṛuva na nyinyiri tilya mfungare. Nafo mfo ifi: Niishi mitanie yafo. Kwasendwa sheeli kukee na muu, nawe kukee mfu. 2Okia ruoń kukaarise valya vengi vakiseere vakee kufui na ifwa. Amu nallolia mitanie yafo yansumana mbele ya Iṛuva wakwa ndi. 3Kyasia kumbua sheeli kundewaria nrumi ilya shisha na iita. Iwara tabu na iilashika! Kake kwara kutalala rembo nshaa kwafo sha inini, nawe nta kumanyaa saa nshaa nayo kwafo ndi. 4Kake kuwore vandu kiindi va siṛi ifo Saride kitaare vandindisa miseto yawo. Nawo veendaa andu emwi nań vaṛee miseto myeelwa, amu isumani nawo. 5Ulya avingaa kuro avikwaa miseto myeelwa, ana nta nuutaa kutu irina lyamwi kitabuń kya muu ndi. Nań nrambuaa irina lyamwi mbele ya Nde yakwa na mbele ya vamalaika vamwi. 6Ulya awore marwi aaranye kirero ki Mumuyo akee iia siṛi ti.
7Na mwisi ulya wa siṛi ikee Filadelifia ntisiṛie: A fi firero mfo akee irera ito akee nsongori muni wa udede awore ufunguo lwa Davidi. Ito aruaa ateefo arayaa. Nae arayaa ana nta eefo amaa ndi. Na firero famwi mfo ifi: Niishi mitanie yafo. 8Lla te nankuniinga mwaango nrue mbele yafo kitaare eefo amakii yuraya. Kuwore finya shaangu, kake kunderinga kirero kyakwa ana nta kundekana irina lyakwa ndi. 9Manya kilya ntanaa: Iwo vakee va siṛi ya Satana iva vanumbuaa sheeli vVayuda, nawo vatakee Vayuda, kake vareraa wongo, waaṛuaa vashe vakuwoye marendeń afo na imanya sheeli nkukundie. 10Amu iwe kwawwara kirero kyakwa kya isisiria, nań nkuringaa na ikuuta kiṛengoń kya yelelio kyammaa ideeṛio ifikia isanga lyoose yelelia iwo vakee isangeń. 11Nkee isha ree. Wara tabu ikyo kukee nakyo atashe nndu akusoka uṛeto lwafo. 12Ulya avingaa mmwaṛuaa ave ngo ifo numba ya Iṛuva wakwa, nae akiukaa-fo lingi ndi. Nań ntisiṛiaa-wo irina lya Iṛuva wakwa na irina lya muṛi wa Iṛuva wakwa, nto Yerusalemu ilya shiiya yolokaa iṛuvewu yukie kwa Iṛuva wakwa. Na akwaa ni irina lyakwa nti-siṛ'aa-wo lia iiya. 13Ulya awore marwi aaranye kirero ki Mumuyo akee iia siṛi ti.
14Na mwisi ulya wa siṛi ya Laodikia ntisiṛie: A fi firero farerwa ni ito akee irera kirero kya mbooko na kirero kya ifurumia, akee nrambua nsongori na wa udede, akee mumbele wa filya foose fitani fa Iṛuva. Nafo mfo ifi: 15Niishi mitanie yafo sheeli kurelelie ana kuwore muro ndi. Kiikooyaa kurelelie ana kukee na muro. 16Kake ili kukee ngumio, kutarelelie ana kutawore muro, nkumishaa sha manyiiri ifo kaniń kakwa. 17Fulya kukee irera: Niń nkee isimba, noore masaa mbilya ana nta kindo kishitinye. Nawe nta kwishi sheeli kukee nkiva na mutińwa na ndoń na nndu akee kya ruu ndi. 18Nkee ikwia: Uṛa saabu kwakwa shisangye na muro, amu kuve isimba. Uṛa na masaṛa meelwa, amu usutu lwafo lwa ikaa kya ruu lutalolike. Uṛa na nri wa miso wa yaamba miso afo, amu kulolie. 19Valya woose wakundie niń vvakandaraa na ivaikimba. Kyasia va ntomari kwailashika. 20Lla niń nselele mwaangoń niikabakabaa yoondi. Nndu kaita ununga lwakwa na irua mwaango, naakaa kwamwi na ilyashoonga andu emwi nae, nae alyaa andu emwi nań. 21Ulya avingaa ninkaarisaa rembo andu emwi nań kifumbiń kyakwa kya unini, sheeli nań nndevinga nakaa rembo andu emwi na Nde yakwa kifumbiń kyamwi kya unini. 22Ulya awore marwi aaranye kirero ki Mumuyo akee yongoya siṛi ti.
Currently Selected:
Urambuyo lwa Yohane 3: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
