Urambuyo lwa Yohane 20
20
1Numa nalolia malaika eeolokaa iṛuvewu arie ufunguo lwa kundo kulya kwa si na nse nnini ukoń lwamwi. 2Kawara ishoka lia, nshoka ilya shikuu, nayo ni ndiingi ulya Satana, kamfinga myaka kiku kimwi. 3Kankumba kundo kulya kwa si kanraya-fo karwaa kiringisio, amu atakilembe vandu va masanga kumande myaka ilya kiku kimwi imarisikiaa yoose. Ikansia kyawara aboṛomulwa mikonu myaangu.
4Numa nalolia fifumbi fa kimangi. Vakasha na-wo vafikaya, nawo vakarambikio uṛundi lwa yumisia vandu. Nań nalolia mirima ya valya vandeminywa mirwe kiimba kya irambua Yesu na kiimba kya kirero kya Iṛuva na valya vatandeindia ifisi lia ana fwana yayo, ana kitaare vandewaria kiringisio kilya fisanguń fawo ana maakoń awo. Nawo vakava lingi na muu vakaitoṛo andu emwi na Kristo myaka kiku kimwi. 5Na vafu valya vengi vandesaa vandekiva na muu ndi kumande myaka ilya kiku kimwi imarisikiaa. 6Ilyo llyo iṛuka lya mbele. Wwa ngoma na nsongori ni ulya akooyaa fuva yamwi ya iṛuka lya mbele, iwo ufu lwa kavili lumakii ivabaana ndi. Kake vavaa vakohani va Iṛuva na va Kristo, nawo veetoṛoo andu emwi nae myaka yo kiku kimwi.
7Na myaka yo kiku kimwi ili isiaa, Satana aboṛomulwaa auke kifingioń kyamwi. 8Nae eendaa alembe vandu va isanga vakee mbe-mbeń tilya iinyi ta isanga vvalya va Gogu na Magogu na ivaitiṛimu kya iimboo fira. Na itaala lyawo nsha nsanga wa mbaai ya nruva. 9Vakaaṛukia kundo isanga likwalie vakalengetia ikuumbioń lya vasongori valya na muṛi ito nkunde. Lia eni muro ukaoloka iṛuvewu ukavalya. 10Na ndiingi ulya andevalemba kaeeṛwa iruveń lia lya muro wa kibalabala kulya ifisi lia likai na mwauya ulya wa wongo. Mfo valisio̱o̱ ukiva kio na nsanyiń kumande miṛeṛe na miṛeṛe.
11Nalolia kifumbi kinini kya kimangi kikee kyeelwa. Na ito akikaaye kisangu kyamwi isanga li na iṛuvewu li fikakirisha, na andu ayo andekilolio ndi. 12Nań nalolia vafu valya vanini na valya vannya vaselele mbele ya kifumbi kilya kya kimangi. Na fitabu fikarulwa. Kiifo na kitabu kingi nakyo kikarulwa, nkilya kya muu. Na vafu valya vakaumisio kisumani na mitanie yawo ikee mitisiṛe fitabuń filya. 13Na akwaa ni nruva ikawiiṛa vafu valya iivaworee. Na ufu na kundo kulya kwa si fikannde vafu vayo. Vakaumisio oo nndu kisumani na mitanie yamwi. 14Na ufu na kundo kulya kwa vafu fikakumbwa iruveń lia lya muro. Ilu llo ufu lwa kavili, ni iniva lia lya muro. 15Na nndu ataare andekooywa atisiṛie kitabuń kya muu kakumbwa iruveń lia lya muro.
Currently Selected:
Urambuyo lwa Yohane 20: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
