Urambuyo lwa Yohane 21
21
1Numa nalolia iṛuvewu iiya na isanga iiya. Amu iṛuvewu lia lya mbele na isanga lia lya mbele fammaa iira, na nruva nayo ikiifo lingi ndi. 2Nań nalolia muṛi ulya nsongori wa Yerusalemu ulya mwiiya wiolokaa iṛuvewu uuka kwa Iṛuva, weemaa yambikwa sha sambuṛa ya wali yammaa yambikio mmi wamwi. 3Naita ununga unini luuka kifumbiń kilya kya kimangi lwinumbuaa: ”A ki kirembo kya Iṛuva kikee andu emwi na vandu. Nae aruaa kwawo, nawo vavaa vandu vamwi. Na Iṛuva muni avaa andu emwi nawo. 4Nae aanguaa masoru woose misoń awo. Ana ufu lukivaa-fo lingi ndi ana unari ana kiiyo, ana mavavio akivaa-fo lingi ndi, amu findo filya fa mbele fammaa iira. 5Na ulya akee rembo kifumbiń kilya kya kimangi kanumbua: Lla te nkee yaṛua foose five fiiya. Kanumbua: Tisiṛa! Amu firero fo mfa dede na fa ikusurwa. 6Kashiia: Kyammaa iva. Niń nkee A na O, wa ibooka na wa ifurumia. Niń nniingaa ulya aworwa nnyura usookwa lwa maṛukioń a mira ya muu kya ruu. 7Ulya avvinga arwaa ifi five dińu yamwi. Nań vvaa Iṛuva wamwi, nae avaa mwana wakwa. 8Kake valya vakee veeṛei na vatakusurie na vatuṛua na vawaa na vaaisi na vasavi na valya vakee iindia fifu na va wongo woose fuva yawo ikee iruveń lia likee yaka muro wa kibalabala. Ilu llo ufu lwa kavili.“
9Kasha umwi wa vamalaika valya mfungare valya veeworee faasho filya mfungare fiishule makabwa alya mfungare a ifurumia. Nae karera nań eenumbuaa: Oṛesho kunu, nań nkworusaa nka ulya wa wali, ni nka wa ngarina ilya. 10Kashikurika nkee wware mMumuyo kashirosa uroń unini lukee waasha kashoorusa muṛi ulya nsongori wa Yerusalemu wiolokaa iṛuvewu uuka kwa Iṛuva. 11Urie unini lwa Iṛuva, na langa yayo ivakani na iwe liwore uuru unini liivaramaa sha iwe lya Yasipisi likee yeelwa fyu. 12Uwore na usuṛumate unini lukee waasha, luwore mbenge ikumi na ivili. Na kwa ule ya mbenge tilya veefo vamalaika ikumi na vavili, na marina atisiṛie-wo akee a ngyufwari tilya ikumi na ivili ta vana va Isiraeli. 13Taari ya ngama fiifo mbenge isaru, na taari ya nturu mbenge isaru, na taari ya itate mbenge isaru na taari ya mbeleń mbenge isaru. 14Na usuṛumate lua lwa muṛi lwiworee mawe a mbembe ikumi na avili, na ifo maweń alya atisiṛie marina a varumi valya ikumi na vavili va ngarina ilya.
15Na malaika ulya anderera nań eeworee ireko lya yelelia likee lya saabu, amu aelelie nalyo muṛi to na mbenge tayo na usuṛumate lwayo. 16Na muṛi to ukee nsongosie uwore mbembe iinyi na waasha lwayo luvakani na mbari tayo. Kaelelia muṛi na ireko lia kakooya sha maili kiku kimwi na mayana araanu. Waasha lwayo na mbari tayo na yenda ringewu lyayo fivakani. 17Kaelelia usuṛumate lwayo lukakooya maṛambo mayana aani na makumi aani na aani na kyelelio kya kivandu, nakyo nkimwi na kyelelio kya vamalaika. 18Na usuṛumate lua lwikee utane na mawe a Yasipisi, na muṛi muni wikee wa saabu shisha ivakie kilola kinuru. 19Na mawe a mbembe a usuṛumate lwa muṛi aambikie na mawe a mikae yoose ya uuru, lwe lya mbele liikee lya Yasipisi, lya kavili llya Safiro, lya kararu llya Kalikedon, lya kaani llya Simaragidi, 20ya karaanu llya Saridoniki, lya karindaru llya Karineolo, lya mfungare llya Kirisolito, lya nyaanyi llya Berilo, lya kyeenda llya Topasi, lya ikumi llya Kirisopuraso, lya ikumi na limwi llya lyakinto, lya ikumi na kavili llya Ametisito. 21Na mbenge tilya ikumi na ivili nsamana shinuru ikumi na ivili. Mbenge yoose nsamana shinuru imwi. Na shia ta muṛi nsha saabu shisha ivakie kilola kisokue. 22Kake numba ya iterevia nalolia-fo ndi. Amu Nndumi Iṛuva muni finya toose akee numba yawo ya iterevia na ngarina ilya. 23Na muṛi ulya utinywa saa ana mwiri fa yumulika ndi, amu unini lwa Iṛuva luumulikiaa na taa yayo nngarina ilya. 24Na vandu va masanga varuaa langeń yayo. Na mamangi a isanga vanndee-fo ngyusimba tawo. 25Na mbenge tayo tiraywaa nsanyiń kutu ndi, amu ifo kikiifo kio ndi. 26Nawo vanndee-fo masaa woose a vandu va masanga kari kayo na findo foose foore uuru. 27Kake nta kindo kimwi kikee kikasha kyakaa-fo ndi ana nndu atanaa kya usutu ana kya wongo ndi kita valya vakee vatisiṛe kitabuń kya muu kya ngarina ilya.
Currently Selected:
Urambuyo lwa Yohane 21: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
