Urambuyo lwa Yohane 18
18
1Numa ya ifo nalolia malaika ungi eeolokaa iṛuvewu awore ushili unini, na isanga likavaramiswa llanga yamwi. 2Karosa ununga unini enumbuaa: ”Wamburulwa, wamburulwa muṛi uu nnini wa Babeli ukava kirembo kya masatana ukaaṛuka kifingio kya mimuyo yoose mikasha na kifingio kya ndee shikasha tisulwa. 3Fulya vaya vaṛumu woose vannwa mfinyo vvaave wa waaisi lwayo na mamangi a isanga vakaaika nato, na vakaba mbusha va isanga vakakooya masaa kwa finya ya ukasha lwayo.
4Naita lingi ununga lungi luuka iṛuvewu lwireraa: ”Ini vandu vakwa, ukeń kwayo, manya mutatańaṛie mareko ayo, amu mutakooye ikabwa andu emwi nato. 5Fulya mareko ayo amfika kumande iṛuvewu na Iṛuva kakumbua makasha ayo. 6Utaań sheeli nato undemutaa, utaań kavili kisumani na mitanie yayo. Umbateń lua unde-sandia-sandia minuiye usandie-sandień kavili mmwasi. 7Na alya undekushomba na inyanyata masaa ayo wwo uniingeń mavavio na unari kwa kiṛengo kilya kilya. Fulya ureraa ngooń yayo: Neengeṛiaa iva mangi ya kika, ana nkee nsikeeti ndi, ana wwaraa unario kutu ndi. 8Kwa ikyo mikabie yayo yuwoyaa na nkonu umwi: Ni ufu na unari na soto, nato urongoriswaa na muro deń. Amu Nndumi Iṛuva ito andeuumisia awore finya.
9Na mamangi wo a isanga valya vandeaaika nato na inyanyata masaa andu emwi nato vaiyaa na iishiṛa, ili valoliaa musu wa imuṛo lyayo. 10Nawo vasalalaa kwaasha vaworwa wweṛei lwa mavavio ayo veenumbuaa: Wui, wui Babeli kuńini kuri muni finya! Kari ka saa imwi uumisio lwafo lwankuwoya. 11Na vakaba mbusha ya isanga vakee iiya na iwishiṛia, fulya atakiifo nndu auṛaa fiya fawo. 12Mfiya fa saabu na fesa na mawe a uuru na samana na miseto minuru na miseto ya utoṛe na hariri na miseto itondoṛie na miri yoose ya kisaamu na fiya fa mbembe na kidamwa na fa yaambo na fa minya na fa mawe avaramaa. 13Na makanda a nri wa iṛovili na karafuu na mafura a kisaamu na ubani na mfinyo na mafura a misenifu na uro shinuru na ngano na numbe na maanri na farasi na magari na masinga na mirima ya vandu. 14Na nunda tilangio ni nrima wafo tallakana nawe, na findo foose fa ibońisa na fa isenya wili wafo fankurekia. Nafo fikilolioo lingi kutu ndi. 15Na vakaba mbusha va findo fo veekooyaa masaa kwayo vasalalaa kwaasha vaworwa wweṛei lwa mavaviso ayo veeiyaa na iishiṛa 16veenumbuaa: Wui, wui muṛi uu unini kuri undevikwa miseto minuru na miseto ya kimangi na miseto itondoṛie na yambikwa na saabu na mawe a uuru na samana shinuru. Amu kari ka saa imwi usimba lu loose lwa wa ukiva. 17Na vanini woose va ngalava na valya vakee yenda andu woose na fingalava na vaṛundi va ifo ngalaveń na valya woose vakee iṛunda mashoṛa nruveń vakasalala kwaasha. 18Vakaiya nnu, ili vandelolia musu wa imuṛo lyayo veenumbuaa: Mmuṛi ungau uvakani na muṛi uu nnini? 19vakakufwalia funga mirweń yawo vakaishiṛa na ikumba ngoṛu veenumbuaa: wui, wui muṛi uu unini kuri! Kari kayo woose veni ngalava vauta-fo masaa meengi usimbeń lwayo, kake kari ka saa imwi wawa irama.“ 20Fura kyayo, iwe iṛuvewu, fureń neeni mukee vasongori na varumi na vaauya! Amu Iṛuva ammuumisia uumisio lwanu.
21Na malaika umwi awore finya kaimboo iwe sha isewe inini lya yeesea kalikumba nruveń eenumbuaa: Nkuro kwa finya sha ii Babeli muṛi uu nnini ukumbwaa utakilolio lingi kutu. 22Ana ununga lwa vakaba finanda na lwa vakaba ngyura na lwa vakaba filimbi na lwa vaivilia mbembe lukiitiwaa lingi kari kafo kutu ndi. Ana mwaṛia wa mikae yoose akilolikaa kari kafo kutu ndi. Ana ununga lwa isewe lya yeesea lukiitiwaa kari kafo kutu ndi. 23Ana langa ya taa ikimulikaa lingi kwafo kutu ndi. Ana mindoṛo ya nndumi wa wali na nka wa wali ikiitiwaa lingi kari kafo kutu ndi. Amu vakaba mbusha wo vafo veekee vanini va uruka, fulya kiimba kya usavi lwafo vandu va masanga woose vandelembwa. 24Na ifo muṛiń uu lwalolika usao lwa vaauya na lwa vasongori na lwa woose vandewaywa isangeń.
Currently Selected:
Urambuyo lwa Yohane 18: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.