Urambuyo lwa Yohane 17
17
1Kasha umwi wa vamalaika valya mfungare valya veeriee faasho filya mfungare karera nań eenumbuaa: Oṛesho kunu, nkworuse uumisio lwa nka mwaaisi ulya nnini akee rembo mbaai ya mira miingi. 2Ni ulya mamangi a isanga andeaaika nae, na valya vakee isangeń vakanangiswa ni mfinyo wa waaisi lwamwi. 3Kashikurika nkee wware mMumuyo kashirwaa bateń. Nań nalolia-fo nndu nka akaaye rembo ifisi litondoṛie deń, nalyo liikee ikabie marina a iruma Iṛuva wiliń wayo woose, liiworee mirwe mfungare na mbembe ikumi. 4Na nka to eekee vvike masaṛa a kimangi. Lingi eekwambikiee na saabu na mawe a uuru na samana shinuru. Nae eeworee umbata lwa saabu ukoń lwamwi lwishule makasha a ikasheesa mirima na ukwe lwa waaisi lwamwi. 5Na kisanguń kyamwi liifoo irina litisiṛie lya kiṛisi: Babeli nini, mae wa vaaisi na wa makasha a ikasheesa mirima akee isangeń. 6Nalolia nka ulya anangio ni usao lwa vasongori na usao lwa varambua va Yesu. Nań ili nndellolia naawukwa ni yawukwa inini.
7Na malaika ulya kashiia: ”Naamu ki kwaṛiika? Nkuiaa kiṛisi kilya kya nka uu na kya ifisi li linrie liwore mirwe ilya mfungare na mbembe tilya ikumi. 8Ifisi li kwalilolia liifoo ilyo mbooko, kake alli likiifo ndi, nalyo lyankusongosia irwa lingi lyuka kyolokioń kilya kya kundo kwa si lyende uretiń. Na valya vakee isangeń vatakee vatisiṛe marina awo kitabuń kya muu kuuka isanga litandevevio wo vaṛiikaa ili valoliaa ifisi li liifoo mbele liteefo alli, nalyo likaa-fo lingi. 9Io wwo atinyie makusaṛo a uṛango. Mirwe ilya mfungare nngyuro mfungare wwo nka to akaaye. 10Nato nna mamangi mfungare. Varaanu vawo vammaa iwa, na ulya umwi eefo, na ulya ungi ansha ndi. Nae ili ashaa akee ndeeṛie akaa-wo kyeeri kyaangu. 11Na ifisi lyo liifoo mbele litakiifo alli nalyo llyo lya nyaanyi, nalyo llimwi lya valya mfungare, nalyo likaenda uretiń. 12Na mbembe tilya ikumi kundetilolia mmamangi ikumi, nawo kitaare vanrambikio umangi, kake vawariaa miitoṛio sha mamangi andu a saa imwi andu emwi na ifisi lia. 13Iwo kikwena kyawo nkimwi kya iniingia ifisi lia finya tawo na miitoṛio yawo. 14Wo wwo vawaraa fira ya ikabana na ngarina ilya, kake ngarina ivavingaa, amu yo ni Nndumi wa mawomi na mangi ya mamangi. Na iwo vakee andu emwi nayo wwo vakee vavaange na vasaue na valya vakusurie.
15Llyo ashiia: Mira ilya kwailolia, io mwaaisi to wa kika akee rembo, yyo ngyufwari ta vandu na makusandio na va ngyuruka na va mirerie yoose. 16Na mbembe tilya ikumi kundetilolia na ifiisi lia iwo vasuaa mwaaisi ulya wa kika, nawo vansokaa masaa amwi na intia kya ruu. Na nyama ta wili wamwi valyaa na inrongorisa kutu muroń. 17Amu Iṛuva anderwaa ngooń tawo vatane kilya akusaṛie na ikuwara na kikwena kimwi na iniingia ifisi lia umangi lwawo, kumande firero fa Iṛuva faawutioo. 18Lingi nka ulya kwallolia mmuṛi ulya nnini woore umangi lwa iitoṛio mamangi a isanga.“
Currently Selected:
Urambuyo lwa Yohane 17: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
