Urambuyo lwa Yohane 11
11
1Nań naniingio ireko likee sha mbiiri ya yelelia naio̱: ”Kwimboo kwelelie numba ya Iṛuva na kiraa kilya kya irasia na iwo vakee iterevia-wo. 2Na andu alya akee wooṛo ya numba ya Iṛuva kuaree nta kuteelelie, fulya anrambikio vaya vaṛumu, nawo vavariaa muṛi uu nsongori miiri makumi aani na ivili. 3Nań nniingiaa varambua vakwa vavili muumu, nawo vaniingiaa wikimbi mikonu kiku kimwi na mayana avili na makumi arindaru, nawo vawikwa makunia“. 4Iwo wwo misenifu ilya ivili na taa tilya ivili fiselele mbele ya Nndumi wa isanga. 5Na nndu afuraa ivakasheesa, muro usomukaa kaniń kawo na ilya fituva fawo. Na nndu afuraa ivakasheesa, kuro mfo kyawara awalwa. 6Iwo vawore finya ya ifinga iṛuvewu, amu fua itakabe mikonu yo ya wauya lwawo. Nawo vawore finya ya yaṛua mura uve usao na ikaba isanga na mikabie yoose andu woose vakundaa. 7Vakammaa imarisia mirambuye yawo ifisi lia ivaave lyarwa lyuka kundo kulya kwa si likabanaa nawo, nalyo livavingaa na ivawaa. 8Na minyińa yawo ikaa ifo shień ya muṛi ulya nnini ukee ivaangwa kwa mirerie ya kimumuyo Sodomo na Misiri, lingi ni io Nndumi wawo andekabio kiriń. 9Na vandu va isanga na makanika na mirerie na vaya vaṛumu vallaa minyińa yawo mikonu iraru na kyeenga, ana nta vaotoṛiaa minyinńa yawo iṛikwa mbangeń ndi. 10Na valya vakee isangeń vafuraa kiimba kyawo na ikaba mindoṛo. Nawo vakurikiaa findo fa ikukyesia wo veni na veni, fulya vaauya wo vavili vandelisa valya vakee isangeń ukiva. 11Kake ili mikonu yo iraru na kyeenga indemaa isia, mumuyo wa muu uukie kwa Iṛuva ukavaakia, vakasalala kyumu na marende awo. Na weṛei unini lukashea vandu valya vandevalolia. 12Vakaita ununga unini luuka iṛuvewu lwivaiaa: Aṛukień kumande kunu. Nawo vakaaṛukia iṛuvewu variwa ni iṛumbe fituva fawo fiivallaa. 13Na saa ilya sheni kikava kirerema kinini kya isanga. Na kyeenga kya ikumi kya muṛi ulya kikafika. Vandu fiku mfungare vakafiya ifo kireremioń kilya. Na iwo vandesaa vakawarwa wweṛei. Vakaindia Iṛuva wa iṛuvewu. 14Ushi lwa kavili lwammaa iira. Lla te ushi lwa kararu lukee isha ree.
15Na malaika ulya wa mfungare kakaba wembe. Tikaitiwa ngyununga nini ifo iṛuvewu tiireraa: Umangi lwa isanga lwammaa iva umangi lwa Nndumi weru na lwa Kristo wamwi, nae yye eetoṛoo kumande miṛeṛe na miṛeṛe. 16Na vasuṛi valya makumi avili na vaani vakee rembo mbele ya Iṛuva fifumbiń fawo vakawa si na fisangu fawo vakaaniṛia Iṛuva. 17Vakanumbua: ”Takwa a na iwe, Nndumi Iniva muni finya, iwe kwifo, nawe kwiifoo, fulya kwamiimboo imakii lyafo likee inini na iwara umangi. 18Na vaya vaṛumu vaka-tuṛuka, kake ituṛuka lyafo nalyo likasha na kyeeri kya yumisia vafu na iniingia maketi afo maṛe, wwo vaauya fisuku na vasongori na valya veeṛee irina lyafo valya vannya na valya vanini na ireta iwo vakee ikasheesa isanga li“. 19Llyo numba ya Iṛuva ikee iṛuvewu irulwa na isanduku lia lya mma yamwi likalolika ifo numba yamwi. Tikava ngova na ngyununga na fiṛuṛumu na irerema lya isanga na masaawe manini nnu.
Currently Selected:
Urambuyo lwa Yohane 11: RWK72
Highlight
Copy
Compare
Share
Want to have your highlights saved across all your devices? Sign up or sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
